Lemonada sa Brazil ug ang mga Hagit sa Kinabuhi
Sa kinabuhi ang inyong mga gilaoman nga mahitabo dili kanunayng matuman. Nan unsa man ang inyong buhaton?
Preskong Lemonada sa Brazil, sa gawas nga merkado [outdoor market] nakasulat kana nga pahibalo. Human sa usa ka lamian, puno sa krema nga paghigop, kinahanglan mopauli ko sa balay ug maghimo og akong kaugalingon.
Nagtuo ko nga kahibalo na ko unsay gikinahanglan: asukar, tubig, ice, ug syempre mga lemonsito, dili ba? (Total, sa Iningles, ang ngalan sa mainom adunay lemonsito niini.)
Apan sa dihang akong gisusi sa google ang Brazilian resipe nasurprisa ko nga nakaplagan nga adunay mga suha imbes sa akong gidahoman nga lemonsito. Dili kadto maoy akong naandan!
Usa ka Resipe alang sa Kinabuhi
Ang wala damha nga mga sangkap sa resipe usa ra ka butang, apan unsa man ang imong reaksiyon kon sa kinabuhi moabot kanimo ang wala damha o gani ang malisod nga kahimtang? Handurawa kini: inyong gibuhat ang inyong labing maayo aron mohimo og matarong nga mga pagpili, ug maayo kaayo ang dagan sa imong kinabuhi. Sa inyong hunahuna ang resipe sa inyong kinabuhi lagmit adunay mga sangkap nga sama niini:
-
Mga Panalangin
-
Mga higala sa tibuok kinabuhi
-
Usa ka mahigugmaong pamilya
-
Pagserbisyo og talagsaon nga misyon
-
Nakuha ang gipangandoy ninyo nga trabaho
Apan sa inyong pagpadayon, nakaplagan usab ninyo kining mga sangkap nga nasagol:
-
Mga Pagsulay
-
Panaghigalaay nga wala damhang natapos
-
Pamilya nga nanglimbasog
-
Usa ka lisod kaayo nga misyon
-
Mga pag-ampo nga wala matubag
Nakabuhat ba kamo og sayop? Naguba ba ang inyong kinabuhi? Dili nalang ba kamo maningkamot nga matuman ang tumong (ug ang inyong hugot nga pagtuo samtang kamo anaa niini) tungod kay ang mga butang wala masubay sa paagi nga inyong gilaoman?
Ibutang ang Inyong Pagsalig diha sa Dios
Siyempre dili! Pagkat-on gikan sa 2,000 ka batan-ong manggugubat. Bisan og sila ug ang ilang mga pamilya nagpuyo nga matarong, sila nag-atubang gihapon og gubat, nahibulag gikan sa ilang mga pamilya, ug grabeng naangol. Tingali dili ingon niini ang gilaoman niining mga batan-ong lalaki.
Apan bisan pa niana, sila misulti gihapon nga, “Ang atong Dios nag-uban kanato” (Alma 56:46). Sa dihang ilang gisalikway ang ilang mga gilaoman, gibutang ang ilang pagsalig diha sa Dios, ug mipadayon sa unahan inubanan sa hugot nga pagtuo, Iyang gihimo wala damha nga mga “suha” sa ilang mga kinabuhi ngadto sa mga panalangin. Ug Siya mobuhat sa samang butang alang kanimo.
Busa sa sunod higayon nga kamo maglaom og pihong butang sa kinabuhi apan makasinati hinuon og mga kalisdanan, ayaw pag-undang. Sama sa gitudlo sa Ginoo kang Joseph Smith, “kining tanan nga mga butang makahatag kanimo og kasinatian, ug alang sa imong kaayohan” (Doktrina ug mga Pakigsaad 122:7). Bisan unsa pay mahitabo, uban sa Dios diha sa inyong kiliran, ang kinabuhi matam-is gihapon. (Tingali kini mahimong sama ka maayo sa lemonada sa Brazil.)