Pagbuhat og Maayo didto sa Paris
Kining duha ka disipulo nagpakita kon giunsa nila pagsunod ang Manluluwas.
Mga litrato pinaagi ni Christina Smith
Uban sa daghan kaayong mga hagit ug mga tawo sa tibuok kalibotan nga nagkinahanglan og tabang, nakahunahuna ba kamo sukad kon adunay bisan unsa nga inyong mabuhat aron sa pagtabang nga makahimo gayod og kalainan?
Atol sa Iyang mortal nga pangalagad, si Jesus “[n]agpangadto-adto sa paghimog mga kaayohan” (Mga Buhat 10:38). Isip Iyang disipulo, makasunod kamo sa Iyang ehemplo ug makabuhat niana. Oo! Adunay daghan kaayo nga inyong mabuhat aron sa paghimo og kalainan.
Mao kana ang nadiskobrehan sa managsoon nga si Elodie, 14, ug Micah, 12, gikan sa Paris, France. Ania ang pipila sa mga paagi nga ilang gisunod si Jesukristo ug “[n]agpangadto-adto sa paghimog mga kaayohan” sa palibot kanila.
Pagtutok Niadtong Nanginahanglan
“Ang usa ka disipulo ni Jesukristo kanunay nga mosalig sa Manluluwas,” misulti si Elodie. “Ang usa ka disipulo ni Jesukristo nahigugma Kaniya ug mapasalamaton alang sa unsay Iyang nahimo alang kanila. Ang usa ka disipulo ni Jesukristo maningkamot sa pagsunod sa Iyang mga tunob.”
Si Elodie nagsunod sa Manluluwas pinaagi sa pagkahimong “matinguhaon nga moapil diha sa usa ka maayo nga katuyoan” (Doktrina ug mga Pakigsaad 58:27). “Ang akong mga higala ug ako nag-organisar og mga kalihokan aron sa pagtigom og mga pundo alang sa mga tawo nga adunay menos nga mga kahigayonan o sa mga nasod nga naglisod,” misulti si Elodie. “Ang kwarta gamiton aron sa pagpalit og sinina, mga libro, mga dulaan, mga gamit sa paghinlo sa kaugalingon [toiletries], ug pagkaon. Kami usab nagpasiugda og kahibalo alang sa mga tawo kinsa tingali wala nasayod mahitungod niining mga butanga aron makita kon ganahan ba sila motabang. Naningkamot kami nga adunay lig-on nga baroganan sa mga isyu ug motabang sa ubang mga tawo.”
Niadtong tinglarag sa 2022, si Elodie ug ang iyang mga higala misuporta sa usa ka manggiluy-on nga organisasyon sa France nga motabang sa mga babaye nga adunay mga kalisod sa pagpangita og mga trabaho o kinsa nagkinahanglan og tabang sa pagsuporta sa ilang mga pamilya. Nagpahigayon sila og fashion show aron makakwarta. Gidonar nila ang mga pundo ngadto sa organisasyon sa paglaom nga mosuporta kini sa mga babaye nga nanginahanglan ug sa paghimo og kalainan sa ilang mga kinabuhi.
“Makapalipay kanako nga makahimo ko sa pag-usab og usa ka butang nga wala nagmalamposon alang sa laing tawo,” miingon si Elodie. “Makalingaw usab nga makig-uban sa mga tawo aron mosulay sa pagsulbad kon unsaon sa pagpaapil sa uban ug tabangan sila nga makaamgo nga makaapil sila ug makahimo usab og kalainan.”
Ang Pagkahigala
“Ang usa ka disipulo ni Kristo mobutang ni Kristo diha sa sentro sa ilang mga kasingkasing ug sa ilang mga kinabuhi,” miingon si Micah. “Maningkamot sila nga mahisama Kaniya.”
Si Micah nagserbisyo isip usa ka ambassador sa iyang eskwelahan. Ang usa ka ambassador motabang sa bag-o nga mga estudyante. Mopahigayon sila og mga paglibot sa eskwelahan, mopakita kon sa unsang paagi magamit ang kurikulom, ug motabang sa bag-o nga mga estudyante nga mahiangay.
“Gitabangan nako ang usa sa akong mga higala sa dihang una siyang miabot sa among eskwelahan,” miingon si Micah. “Atol sa paniudto, nangutana siya nako bahin sa eskwelahan, ug gitubag nako kini. Naningkamot ko nga mobati siya nga komportable. Nindot nga motabang sa mga higala kinsa tingali mibati og negatibo nga mga emosyon, naguol, o nag-inusara. Mopabati kini nako nga ingon og nahimo kong mas sama ni Jesukristo.”
Sa dihang miabot ang panahon nga bunyagan si Micah pipila ka tuig na ang milabay, ang iyang mama nangutana kon kinsa ang gusto niyang imbitaron ngadto sa iyang bunyag. Giimbitar ni Micah ang pito ka higala, ug silang tanan miabot! “Malipayon ko nga gisuportahan ko sa tanan,” miingon siya.
Atol sa sunod nga pipila ka adlaw, ang mga higala ni Micah nangutana niya mahitungod sa iyang bunyag ug sa Simbahan. “Nagdala ko og mga kasulatan ug naghisgot kanila mahitungod unsa ang Simbahan,” miingon si Micah. “Nindot kaayo nga sultihan sila kon unsay bili sa Simbahan kanako ug sa akong pamilya.”
Pagkaplag og Kalig-on sa Pagbuhat og Maayo
Pinaagi sa paghinumdom ug pagsunod sa Manluluwas, si Elodie ug Micah nakakaplag og kalig-on sa pagbuhat og maayo.
“Ang pagsalig kang Jesus nakatabang gayod kanako,” miingon si Elodie. “Kon anaa Siya sa akong kiliran, mahimo kong mopakigbahin sa ebanghelyo, mogahin og panahon sa pamilya, mopalig-on og mga relasyon, moapil sa mga kalihokan sa kabatan-onan, mopalambo sa akong pagpamatuod, mangandam nga moserbisyo og misyon, ug mopadayon sa pagpundok sa Israel.”
Nakakaplag usab og kalig-on si Micah sa pagbarog isip disipulo ni Kristo. “Kon dili ko segurado kon unsay buhaton sa piho nga mga sitwasyon, pangutan-on nako ang akong kaugalingon kon unsay buhaton sa Manluluwas. Kon buhaton kini sa Manluluwas, nan kinahanglan buhaton usab nako kini,” miingon si Micah. “Kaniadto, mibati ko nga maulawon kaayo mahitungod sa akong mga tinuohan. Naghunahuna ko, ‘O, bugalbugalan ra ko nila.’ Ang pagsimba, pag-adto sa templo, ug pagtabang sa uban mopahibalo sa akong mga higala nga nakaila sila sa tinuod nga ako.”
Si Elodie nagpahinumdom kanato nga “Si Jesukristo mihatag sa tanan Niyang panahon, tanan sa Iyang paningkamot, ug tanan sa Iyang gugma ngadto sa uban.” Ang paghinumdom niini nakatabang ni Elodie sa daghang paagi. “Kon ang akong mga higala ug ako moorganisar og mga pagpanghatag [charities], naningkamot kami sa pagsunod sa unsay gibuhat ni Jesus sa tibuok Niyang kinabuhi,” miingon siya. “Buhaton namo ang unsay buhaton Niya kon anaa Siya dinhi. Kini nagpahinumdom kanako nga ako usa ka disipulo ni Kristo.”
Si Jesukristo “mao ang ‘kalig-on sa kabatan-onan.’” Kana nagpasabot nga Siya mao ang inyong kalig-on. Siya molig-on kaninyo sama sa Iyang gibuhat alang kang Elodie ug Micah. Uban Kaniya, kamo “[makahimo sa] tanang butang” (Mga Taga-Filipos 4:13) ug makaadto sa paghimo og “daghang kaayohan” alang sa inyong mga higala, pamilya, ug sa uban sa inyong palibot.