Direkta sa Punto

Unsaon nako sa pagtubag sa mga tawo nga mosaway sa Simbahan?

Kon ang mga tawo mosaway sa Simbahan, “pagsugod pinaagi sa pagseguro nga ang inyong mga pulong ug mga aksiyon dinasig sa gugma alang sa Dios ug sa Iyang mga anak.” (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 33). Tutoki ang balaanon nga mga kinaiya ni Jesukristo. Pagbaton og hugot nga pagtuo, paglaom, pailob, ug gugma ingon man sa kahibalo, kaalam, ug kaluoy.

Dugang pa, aniay pipila ka mga pangutana alang sa inyong kaugalingon:

Nganong gibuhat man nila kini? Ang pagkahibalo sa unsay nagdasig sa mga tawo makatabang kaninyo nga mahibalo kon unsaon sa pagtubag. Matinuoron ba silang nagtinguha sa kamatuoran apan nakasugat og negatibo nga impormasyon? Gusto lang ba sila nga makakuha og reaksiyon ug makamugna og panagbingkil? Naningkamot ba silang panalipdan ang ilang kaugalingon nga mga tinuohan pinaagi sa pag-atake sa atong mga tinuohan?

Unsa nga matang sa tubag ang labing makatabang kanila o sa uban? Tinguhaa ang giya sa Espiritu Santo. Sa ubang sitwasyon, mahimong labing maayo alang kaninyo nga dili gayod motubag. Usahay ang pagpakigbahin og pagpamatuod ug pagpakita og gugma mao ang tanan nga inyong gikinahanglan nga buhaton. Sa ubang higayon, ang usa ka mas detalyado nga tubag mahimong labing maayo. Kon mao, hinumdomi: “Panalipdi ang inyong mga gituohan uban sa maayong pamatasan ug kamanggiloy-on, [apan] panalipdi kini” (Jeffrey R. Holland, Abr. 2014 nga kinatibuk-ang komperensiya [Liahona, Mayo 2014, 9]).