Digital Lamang: Mga tubag gikan sa usa ka Apostol
Unsaon Nga Ako Mapasaylo, Mapasaylo ang Akong Kaugalingon, ug Mapasaylo ang Uban?
Samtang atong gipunting ang atong mga kinabuhi diha sa Manluluwas, makaplagan nato ang mga tubag sa lawom ug mahinungdanong mga kabalaka sa atong mga kalag.
Gikan sa usa ka pakigpulong sa debosyonal nga gihatag didto sa Brigham Young University–Hawaii sa miaging Ene. 29, 2023.
Gusto ko nga motubag og pipila ka pangutana nga nakapabalaka sa batan-ong mga disipulo ni Jesukristo.
Unsaon Nga Ako Mapasaylo, Mobati nga takos, ug Mobati sa Gugma sa Dios?
Daghang mga tawo ang nanglimbasog sa paghinulsol ug sa pagka-napasaylo sa atong mga sala, pagbati og katakos sa pag-ambit sa sakramento, ug pagbati sa gugma sa Dios alang kanato bisan kon atong gibati nga dili takos.
Ang baroganan sa paghinulsol moabot human sa hugot nga pagtuo diha ni Jesukristo. Ang Dios nahigugma kanato, bisan kon kita nalubong sa sala. Kita mapasaylo kon kita nakapaubos sa atong mga kaugalingon sa atubangan sa Dios, mipakigtambag uban sa tukma nga mga lider sa Simbahan ingon nga gikinahanglan, ug mihinulsol ug mibiya sa atong mga sala. Ang paghimo niini nga mga lakang nagdala kanato ngadto sa Manluluwas, kinsa sa kataposan makahimo sa pagpalingkawas kanato gikan sa sala, kasubo, ug sa espirituwal ug pisikal nga pagkaulipon.
Wala kita mahibalo kon ngano usahay kita padayon nga mobati nga nakasala bisan human kita nakahinulsol alang sa mga sala nga atong nahimo. Kay sa maghunahuna, pakigsulti ngadto sa inyong Langitnong Amahan mahitungod niini. Pangutana Kaniya sa direkta nga paagi. Ako nahibalo nga sa kadugayan, Siya mopadayag nganha kanimo kon unsay imong gikinahanglan.
Sa akong kahimtang, sa gihapon ako adunay mga panumdoman sa pipila sa akong nanglabay nga mga kasaypanan. Samtang ako nag-ampo mahitungod niini, ang Ginoo nagsulti kanako nga ako napasaylo na, ug kinahanglan nga dili na ako maguol mahitungod niadtong mga butanga. Bisan pa niana, gibati ko usab kadtong mga panumdoman nga mga pahimangno alang kanako sa pagpaninguha nga dili mahulog pag-usab ngadto niadto nga mga sayop. Mao nga, ang pag-angkon niadto nga mga panumdoman dili gayod hingpit nga negatibo. Nakita ko kini sa akong kinabuhi isip usa ka pagpakita sa gugma sa Dios alang kanako samtang Siya sa kanunay nagpahimangno kanako sa paglikay sa pag-agi niana nga dalan pag-usab.
Samtang kita magpadayon sa pagpaninguha sa pagbuhat sa atong labing maayo, magpakita pinaagi sa atong mga buhat sa tinguha sa paglimpyo sa sulod nga sudlanan ang mga pagbati nga nakasala ug nawad-an sa kadasig ingon og mawala. Moabot ang panahon, ang atong kasinatian mahimong sama niana kang Alma, kinsa mipamatuod nga human sa paghinulsol “siya makahinumdom pa gihapon sa iyang mga sala, apan ang paghinumdom sa iyang mga sala wala na mohasol ug mosakit pa kaniya, tungod kay nasayod siya nga siya napasaylo na.”
Unsaon nga Ako Makapasaylo sa Uban Kinsa Nakasilo o Nakapasakit Kanako?
Usa ka makapaikag nga kabalaka nga gipahayag sa batan-ong mga tawo may kalabotan ngadto sa pagpasaylo niadtong kinsa nakasilo kanato ug mihimo og ngil-ad nga mga butang ngari kanato.
Samtang kita nagtuon sa pulong sa Dios, kita nagkat-on nga ang pagpasaylo sa uban nagdala og importante nga espirituhanong mga panalangin, lakip ang kalinaw ug paglaom. Tingali ang labing importante niini nga mga panalangin mao nga samtang kita nagpasaylo sa uban, kita mahimong mapasaylo usab sa atong kaugalingong mga sala. Ang Ginoo nagtudlo kanato nga ang pagpasaylo usa ka sugo sa tanan ug nga kita “gikinahanglan nga mopasaylo sa tanan nga mga tawo.” Bisan pa niana, kini sa gihapon malisod.
Usahay nagtugot kita sa garbo, kahadlok, kaligutgot, o kakulian sa pagwala og kadasig kanato ug sa pagbabag sa atong abilidad sa pagbati og paglaom. Apan ang kaisog sa pagpasaylo moabot ngadto niadtong kinsa mibutang sa ilang hugot nga pagtuo ug pagsalig diha sa Ginoo. Ang pagpasaylo nagpasabot og pagpalabay sa pasangil alang sa usa ka miaging pagpasakit. Kini usab mao ang pagbuhi og usa ka mahinungdanong palas-anon. Kini mao ang pagpadayon sa kinabuhi sa unahan.
Kabahin sa paghikalimot, kini importante sa paghinumdom nga ang “pagpasaylo wala mangahulogan sa pagkalimot sa sala nga nahitabo o magpaka-aron ingnon nga kini wala gayod mahitabo. Kini wala magkahulogan nga imong gitugotan ang makasakit nga batasan nga magpadayon. Kini wala magpasabot nga kini posible alang sa tanang mga relasyon nga mamaayo. Ug kini wala magpasabot nga ang sad-an dili patubagon sa iyang mga binuhatan. Kini nagkahulogan nga ang Manluluwas makatabang kanimo sa pagpasaylo.”
Ania ang pipila ka mga sugyot sa pagtabang niini nga proseso:
-
Pag-ampo alang sa pagpaubos. Ang pagpaubos kaatbang sa garbo, nga mao ang nag-unang babag sa atong paninguha sa pagpasaylo. Ang garbo naggiya kanato sa pagtutok diha sa mga pagbati og kaligutgot ngadto sa uban. Kini hinungdan usab kanato nga dili makakita sa atong kaugalingong mga kahuyang, mga sayop ug mga sala. Apan ang Ginoo nagsaad, “Kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.” Sumala sa atong pagpaubos ug hugot nga pagtuo, ang Ginoo motabang kanato nga mahimong mas mahisama Kaniya ug sa tinuod magpasaylo sama sa Iyang gibuhat.
-
Pahayag og pasalamat. Ang pagpahayag og pasalamat nagdapit sa Espiritu sa mas hingpit nga paagi ngadto sa atong mga kinabuhi, diin makapahumok ug makapausab sa atong mga kasingkasing. Paghunahuna sa paghimo og journal sa mga butang nga ikaw mapasalamaton. Pangita og mga pagpakita sa gugma sa Dios sa matag adlaw. Samtang ikaw nag-ugmad og kinaiya sa pagpasalamat, imong mahibaloan nga ikaw makaila og mga rason nga magmapasalamaton alang sa imong mga pagsulay.
-
Pagmapailobon. Ang pagpasaylo kon ikaw anaa sa hilabihan nga kasakit mahimong mokabat og panahon. Makahimo ikaw og lawak diha sa imong kasingkasing alang sa pagpasaylo pinaagi sa kinasingkasing nga pag-ampo, pagtuon, ug pagpamalandong. Ang pagbusog sa mga pulong ni Kristo sa matag adlaw motabang usab kanimo nga mas mapaduol ngadto Kaniya ug modala og dakong gahom sa pagpang-ayo nganha sa imong kinabuhi.
-
Biyai ang nangaging panahon. Ang kasaysayan mao ang kasaysayan ug dili mausab. Apan ikaw makapunting sa imong enerhiya sa karon, tungod kay karon ikaw adunay gahom sa pagpili sa pagpasaylo. Itugyan ang imong palas-anon diha sa Ginoo. Hinumdomi nga agi og pagdugang sa pagdala diha Kaniya sa mga sala sa kalibotan, si Kristo midala diha Kaniya sa atong mga kasakit ug mga balatian. Kon ikaw motugot Kaniya, siya makahimo sa imong palas-anon nga magaan.
Ang pagkaplag og kalig-on sa pagpasaylo mahimong makahagit, apan ang Manluluwas ug ang Iyang Pag-ula naghimo niini nga posible. Sa tinuod, samtang atong ablihan ang atong mga kasingkasing sa pagpasaylo sa uban, kita panalanginan og kalinaw. Nagdapit ako kaninyo sa pagdawat sa makaayo nga gahom sa pagpasaylo.
Samtang atong gipunting ang atong mga kinabuhi diha sa Manluluwas, makaplagan nato ang mga tubag sa lawom ug mahinungdanong mga kabalaka sa atong mga kalag. Ang makaayo nga gahom sa Manluluwas mopuno sa atong mga kalag og kalinaw, kahayag, pagsabot, hingpit nga kalipay, ug gugma.