Usa ka Gamhanan nga Relasyon
Ang usa ka pakigsaad labaw pa sa usa ka kontrata; kini usa ka relasyon.
Ako adunay litrato gihapon sa berde nga mga lingkoranan nga gilingkoran nila ni Elder Pistone ug Elder Morasco samtang gitudloan nila ang akong pamilya didto sa among balay sa Argentina. Mitudlo sila uban sa dako kaayong espirituwal nga gahom nga ang akong 10 anyos nga igsoon nga babaye ug ako (9 anyos) modagan aron sa paghikap sa mga lingkoranan human sila mibiya, naglaom nga kana nga gahom motapot kanamo.
Akong nakat-onan sa wala madugay nga ang gahom wala naggikan sa mga lingkoranan apan gikan sa pagbaton og pakigsaad nga relasyon uban sa Dios ug ni Jesukristo.
Akong Kasinatian sa Bunyag
Gihimo nako ang akong unang pakigsaad niadtong Nobiyembre 13, 1977. Ako wala kaayoy nahinumdoman mahitungod sa akong bunyag, apan nakahinumdom gayod ko ni Elder Pistone nga mitabang kanako nga motuslob ngadto sa tubig ug ni Elder Morasco nga mikompirma kanako samtang basa pa ang akong buhok. Nahinumdoman usab nako ang hingpit nga kalipay nga akong nabati samtang ang bag-o nga mga higala sa ward mihatag og mga gakos ug mga halok sa Argentine nga paagi ug sa lig-on nga tinguha nga akong nabati nga mahimong usa ka matinud-anon nga anak nga babaye sa Langitnong Amahan.
Batan-ong Sister Spannaus (tunga) uban sa iyang mga ginikanan (wala), iyang igsoon nga babaye nga si Silvina (layo sa tuo), ug si Elder Morasco.
Wala madugay akong naamgohan nga ang hingpit nga kalipay nga akong nabati naggikan sa gasa sa Espiritu Santo. Nakat-onan nako nga samtang matinud-anon nakong gituman ang akong mga pakigsaad sa Dios, ang Espiritu mag-uban kanako. Ang Espiritu Santo usa lang sa gamhanan nga mga panalangin nga moabot gikan sa usa ka pagkigsaad nga relasyon uban sa Dios ug ni Jesukristo.
Karon, bisan kon mapakyas ang akong mga tumong, mga hunahuna, ug mga aksiyon, ako adunay paglaom nga mopadayon sa pagpaningkamot. Ngano man? Tungod kay ang pag-ambit sa sakramento mohimo niining posible alang kanako sa pagbag-o sa akong mga pakigsaad ug mohimo og bag-o nga mga pakigsaad matag semana. Mapasalamaton kaayo ko niana nga panalangin.
Usa ka Mahigugmaon, Pakigsaad nga Relasyon
Kanunay natong madunggan nga ang mga pakigsaad mao ang mga pagsinaaray tali kanato ug sa Dios. Samtang tinuod kana, dili kini mao ang tanan. Sa pagkatinuod, “ang pagtuman sa pakigsaad dili usa ka transaksiyon nga dili personal apan usa ka mahigugmaon nga relasyon.”
Busa unsaon ninyo sa pagmugna og pakigsaad nga relasyon ngadto sa Langitnong Amahan ug sa Manluluwas? Sila hingpit na nga nahigugma kaninyo ug gusto nga mopanalangin kaninyo (tan-awa sa 3 Nephi 14:11). Apan ang bisan unsang pagsinaaray nga relasyon nagkinahanglan og panahon og gugma gikan sa duha ka habig.
Gusto ba ninyong mogahin og dugang nga panahon uban Kanila? Kon buhaton ninyo ang mga butang nga Ilang buhaton, naggahin kamo og panahon uban Kanila! Kana mahimong sama ka yano sa pagpaminaw sa usa ka higala atol sa malisod nga panahon, paggahin og panahon sa pakigdula uban sa usa ka igsoon, o paglakip sa usa ka tawo nga mibati nga wala nahisakop. Bag-ohay lang, migahin ko og panahon sa paglakaw uban sa Dios pinaagi sa pagrekod og mga voice message ug sa pagpadala og mga text ngadto sa usa ka higala didto sa Argentina nga mibati nga nag-inusara. Midesisyon usab ko nga kanunayng ipabilin nga aktibo ang akong rekomend sa templo aron nga makagahin ko og panahon uban sa Ginoo didto sa Iyang balaan nga balay. Mahimo kamong mag-ampo alang sa mga ideya nga motabang kaninyo nga mogahin og panahon uban sa Langitnong Amahan ug sa inyong Manluluwas.
Gusto ba ninyong ipakita Kanila nga kamo nagpakabana? Hunahunaa ang mga sugo nga gipakigsaad ninyo nga tumanon isip usa ka paagi sa pagpahayag sa inyong gugma, dili isip usa ka lista sa mga lagda. Sama pananglit, aron sa pagsunod sa Pulong sa Kaalam, nagkat-on ko unsaon sa pagluto og sustansiyado nga mga pagkaon. Karon gitudloan nako ang akong mga anak nga babaye sa pagbuhat niini. Samtang andam kamong motuman sa mga sugo sa Dios, motubo ang inyong gugma alang Kaniya ug sa Manluluwas.
Ang atong pakigsaad nga mga relasyon uban sa Langitnong Amahan ug ni Jesukristo motabang kanato nga mas makaila Kanila ug makabaton og dugang nga access sa Ilang gahom sa atong mga kinabuhi—walay kinutoban nga labaw pa sa bisan unsang ikatanyag sa usa ka pundok sa berde nga mga lingkoranan. Ug kana nga gahom mousab kanato sa kahangtoran!