Kinsay Nagkontrol sa Imong Utok?
Paghunahuna mahitungod sa tanan nga giproseso sa imong utok kada adlaw—mga panag-istoryahanay, mga salida sa TV, musika, mga bidyo, mga text, mga talan-awon, mga pulong, mga tingog! Hapit sobra ra kaayo hunahunaon. Kon dili ka magpakabana sa unsay gigahinan og panahon sa imong utok, sayon ra alang niana nga mga butang nga maoy mokontrol sa imong kinabuhi. Kini nga mga sugyot makatabang kanimo nga magpabilin nga maoy nagkontrol.
1. Pagplano og Panahon nga Dili Mogamit og mga Device
Pag-eskedyul og panahon matag adlaw nga dili mogamit og teknolohiya ug magpalayo sa mga makabalda. Mahimong mogahin ka og malinawon nga panahon sa gawas o magbansay sa pag-adto sa mga dapit nga wala ang imong mga device kon wala nimo kini gikinahanglan. Ang paggahin og hilom, tinuyo nga panahon nga walay teknolohiya nga naghimo og makabalda nga mga tingog mohatag sa imong hunahuna og kahigayonan nga makapahulay, makahunahuna sa butang nga ikaw walay panahon sa una nga hunahunaon, ug magmugna og dinasig nga mga ideya. Hunahunaa kon unsay gisulti sa Alang sa Kalig-on sa mga Kabatan-onan nga giya mahitungod sa paggamit sa teknolohiya: “Ang social media ug ubang teknolohiya mokuha og daghan sa inyong oras nga dili mohatag og dakong bili isip bugti. Pahulay gikan sa birtuwal nga kalibotan, ug pakigkonektar ngadto sa mga tawo sa tinuod nga kinabuhi.”
2. Pagpraktis sa Pagpamalandong
Sa dihang si Jesukristo mibisita sa mga Nephita, Siya mitudlo kanila sa Iyang ebanghelyo. Dayon Siya misulti kanila sa pagpamauli ug pagpamalandong (lawom nga maghunahuna mahitungod) sa Iyang mga pulong ug “i-andam ang [ilang] mga hunahuna” alang sa dugang pa nga mga pulong Niya (3 Nephi 17:3). Kita usab kinahanglan mogahin og panahon sa pagpamalandong ug paghunahuna og lawom. Paghunahuna mahitungod sa unsay imong gibati bag-ohay lang, unsay imong gipasalamatan, unsay imong bag-ohay lang nga nakat-onan, o unsa ang imong mga tumong. Ang pagpamalandong makatabang kanimo nga makakita sa impluwensiya sa Dios sa imong kinabuhi.
3. Pag-ampo, ug Dayon Paminaw
Ang atong mga hunahunaha mamahimong espirituwal nga mga tigdawat [receptors]. Si Presidente Russell M. Nelson mitudlo kanato sa “pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—o, sa mga tinguha sa inyong kasingkasing. Ug dayon maminaw! Isulat ang mga ideya nga masulod sa inyong hunahuna.” Ang pag-ampo ug dayon pagpaminaw ngadto sa Espiritu makatabang nimo nga mobati og kalinaw ug langitnon nga giya taliwala sa daghang tingog sa kalibotan.
4. Hatagi og Prayoridad ang Maayong mga Impluwensiya
“Ang inyong hunahuna ug espiritu maapektohan gayod sa unsay inyong basahon, tan-awon, ug paminawon.” Tan-awa kon unsay imong gisulod sa imong utok. Unsa nga mga tinubdan ang makatabang? Unsa ang mga butang nga modapit sa Espiritu? Kon ang mga butang nga imong gigahinan og panahon mohimo kanimo nga mobati nga nasagmuyo, nabalaka, tapolan, o malalison, tingali panahon na nga wagtangon na kana nga mga impluwensiya. Hatagi og prayoridad ang mga butang nga mobayaw o nga “mahiyason, matahom, o maayo og dungog o dalaygon” (Mga Artikulo sa Hugot nga Pagtuo 1:13). Ang pagpili sa maayo nga mga impluwensiya makatabang kanimo nga mosunod kang Jesukristo ug modawat sa Iyang gisaad nga mga panalangin.