Sulayi Kini!
Unsaon ninyo pagkahibalo nga tinuod ang mga pulong sa mga propeta ug sa mga kasulatan ug gituyo alang kaninyo?
Paghulagway pinaagi ni Emily E. Jones
Makadawat kita og importante nga giya gikan sa mga propeta ug sa mga kasulatan. Sila mopanalangin sa atong mga kinabuhi ug motabang kanato nga mahimo nga atong labing maayo. Importante alang kaninyo nga mahibaloan sa inyong kaugalingon mismo nga unsay ilang gitudlo tinuod.
Unsaon man ninyo sa pagbuhat niana?
Gitudlo ni Alma nga kita makahimo sa “pagsulay [pag-eksperimento] [sa] pulong, ug pagbansay sa usa ka tipik sa hugot nga pagtuo” (Alma 32:27). Ang mga eksperimento gibuhat sa tanang higayon ug maghatag og paagi sa pagsuhid sa kalibotan sa atong palibot. Kini makatabang usab kanato sa pagpangita og mga tubag sa espirituwal nga mga pangutana ug makalig-on sa atong hugot nga pagtuo.
Aniay usa ka espirituwal nga eksperimento nga inyong masulayan:
Pangitaa ang Manluluwas diha sa mga Kasulatan
Pipila ka tuig ang milabay, si Presidente Russell M. Nelson midapit sa mga young adult sa Simbahan “sa pagpalambo sa ilang pagpamatuod” ug “sa pagkat-on sa tanan kutob sa ilang mahimo mahitungod kang Jesukristo.” Mihangyo siya kanila sa paggahin og panahon matag semana “sa pagtuon sa tanan nga gisulti ug gibuhat ni Jesus ingon nga narekord diha sa sumbanang mga basahon” gamit ang kinutlo nga kasulatan ubos sa ulohan nga Jesukristo diha sa Giya ngadto sa mga Kasulatan.
Nianang higayona, si Presidente Nelson, “[mibasa ug mibadlis na sa] matag bersikulo nga gikutlo kabahin ni Jesukristo, nga nalista ubos sa 57 ka mga subtitle diha sa Topical Guide.” Gitun-an niya ang labaw sa 2,200 ka kasulatan! Milungtad kini kaniya og unom ka semana sa pagkompleto sa buluhaton. Sa dihang ang asawa ni Presidente Nelson nga si Wendy nangutana kaniya kon unsay epekto diha kaniya sa pagtuon sa tanan niadto nga mga kasulatan, miingon siya, “Lahi na ako nga tawo!”
Gihangyo namo ang pipila ka kabatan-onan nga buhaton kining sama nga eksperimento nga mobasa mahitungod sa Manluluwas diha sa mga kasulatan kutob sa posible nilang mabuhat sulod sa usa ka semana. Gipangutana dayon namo sila kon unsay ilang nakat-onan. Ania ang ilang gisulti.
Unsa Man ang mga Resulta?
“Nabati nako ang Espiritu pinaagi sa mga pagpamatuod ug mga pagtulun-an nga gipaambit bahin ni Jesukristo. Ganahan kaayo ko sa mga kasulatan mahitungod ni Kristo isip atong Magbalantay. Nagbantay Siya kanato. Samtang nagbasa ko mahitungod Kaniya, nabati nako ang Iyang gugma nga nagpalibot kanako. Nakat-onan nako nga ang atong Manluluwas mibati og mga tintasyon ug pisikal nga mga pag-antos, sama kanato. Samtang maningkamot kita nga mahimong sama Kaniya, OK lang nga mobati nga natintal ug gikapoy, tungod kay ang atong Manluluwas mibati usab, apan wala kana mipugong Kaniya sa paghimo sa buhat sa Iyang Amahan. Gusto ko nga makahinumdom niini kon mobati ko nga gikapoy og maayo sa pagbasa sa akong mga kasulatan. Gusto ko nga mosunod sa mga pagtulun-an sa Manluluwas tungod kay nahigugma ko Kaniya—dili kay basta buhaton lang. Gusto ko nga ang akong pamaagi sa kinabuhi mopakita nga ako usa ka sumusunod ni Kristo.”
Eve S., 17, Alberta, Canada
“Nakat-onan nako nga tingali mag-atubang kita og dagko nga mga hagit, apan uban sa tabang sa Manluluwas, kita makabuhat sa tanan nga mga butang ug malig-on pinaagi sa atong mga hagit. Ang Manluluwas makatabang kanato sa pagpangandam alang sa mga problema nga atong atubangon sa umaabot. Ang pagbasa sa mga kasulatan nakatabang kanako nga makasabot sa importansiya sa atong Manluluwas ug sa Iyang Pag-ula diha sa plano sa Dios. Ang inadlaw nga pagtuon sa kasulatan mopabati kanako nga gihigugma ug mopahinumdom kanako nga ako importante ngadto sa Manluluwas. Pinaagi sa pagbasa sa mga kasulatan mahitungod ni Jesukristo, nakadawat ko og giya alang kanako aron makahimo og mas maayo ug ‘maghunahuna og celestial.’ Hangyoon nako ang akong mga higala nga moapil kanako sa pagbasa sa Basahon ni Mormon aron mapakigbahin namo kon unsay among nakat-onan.”
Ambher L., 17, Nueva Ecija, Philippines
“Samtang naglakaw sa yuta si Jesukristo, matinud-anon Siya sa mga tawo nga Iyang gipanalanginan ug giayo. Samtang nagbasa ko ug namalandong mahitungod sa Manluluwas, mibati ko og lig-on nga pagbati sa kalinaw. Nakahimo ko sa pagpalayo gikan sa mga kaugtas ug mga kabalaka sa kinabuhi ug makita ang mga butang gikan sa lahi nga panglantaw. Uban sa akong bag-o nga kahibalo bahin sa Manluluwas, mag-ampo ko nga makakaplag sa mga tawo nga gusto ni Jesus nga akong tabangan ug serbisyohan sama sa Iyang buhaton.”
Josh H., 16, Florida, USA