Ang Gahom nga Inyo ra nga Makab-ot
Kamo adunay agianan ngadto sa dugang kalig-on kay sa unsay inyong mahunahunaan.
Mga paghulagway pinaagi ni Sam Ledoyen
Ang kinabuhi mahimong malisod. Mibati na ba kamo sukad nga kamo nagkinahanglan og diyotay pang tabang aron makalahotay sa usa ka butang? Si Presidente Russell M. Nelson nagtudlo, “Ang matag tawo nga mohimo og mga pakigsaad diha sa mga bunyaganan ug diha sa mga templo—ug motuman niini—nakapadugang og agianan ngadto sa gahom ni Jesukristo.” Oo, husto ang inyong nabasa. Ang paghimo ug pagtuman sa mga pakigsaad makadala sa gahom sa Manluluwas ngadto sa inyong kinabuhi. Interesado ba kamo?
Pagtuman sa Inyong Pakigsaad sa Bunyag
Sa dihang kamo nabunyagan, kamo naghimo og pakigsaad (sagrado nga saad) ngadto sa Langitnong Amahan. Ug sa matag semana kon kamo moambit sa sakramento, inyong gihimo pag-usab kining pakigsaad. Kon kamo gusto pa og dugang sa gahom sa Manluluwas diha sa inyong kinabuhi, importante nga mahibaloan kon unsa ang inyong gisaad ug unsaon sa pagtuman niadtong mga saad.
Kamo mosaad: Mahimong Andam sa Pagdala ngari Kanato sa Ngalan ni Jesukristo.
“Ang pagdala ngari kanato sa ngalan ni Jesukristo nagpasabot nga kita mohinumdom Kaniya ug maningkamot nga magpakabuhi isip Iyang mga disipulo sa tibuok kinabuhi. Tugotan nato ang Iyang kahayag nga modan-ag pinaagi kanato ngadto sa uban. Atong tan-awon ang atong kaugalingon isip Iyaha ug unahon Siya diha sa atong mga kinabuhi.” Gihangyo kita nga “mobarog ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9).
Posible nga mga paagi aron matuman kining mga saad:
-
Sinsero nga maghisulsol ug manglimbasog sa pagbuhat kon unsa ang buhaton sa Manluluwas.
-
Mag-ampo ngadto sa Langitnong Amahan sa ngalan ni Jesukristo.
-
Hinumdomi ang Manluluwas ug pagkat-on og dugang mahitungod Kaniya pinaagi sa pagbasa sa mga kasulatan.
“Ganahan gyod kong magbasa sa Basahon ni Mormon tungod kay kini nagpamatuod ni Kristo ug ako makakaplag og mga tubag sa akong mga pangutana. Mao nga ako nagdapit sa tanan sa pagbasa niini.”
Trésor, Democratic Republic of the Congo
Kamo nagsaad: Sa pagtuman sa mga sugo sa Dios.
“Ang [Langitnong Amahan] nakahibalo unsa ang makadala kanato sa labing dakong kalipay. Ang matag sugo usa ka balaan nga gasa, gihatag aron sa paggiya sa atong mga desisyon, sa pagpanalipod kanato, ug sa pagtabang kanato nga molambo.” Ang Langitnong Amahan nagdapit kanato sa “[pagsulod] ngadto sa usa ka pakigsaad uban kaniya, nga [kita] mag-alagad kaniya ug maghupot sa Iyang mga sugo” (Mosiah 18:10).
Posible nga mga paagi aron matuman kining mga saad:
-
Higugmaa ang Dios ug higugmaa ang inyong silingan (tan-awa sa Mateo 22:37–39).
-
Balaana ang Adlawng Igpapahulay.
-
Pagbayad sa ikapulo.
-
Mosunod sa Pulong sa Kaalam (tan-awa sa Doktrina ug mga Pakigsaad 89).
“Matag semana atol sa sakramento, akong gibag-o ang pakigsaad nga akong gihimo ngadto sa Dios sa pagtuman sa Iyang mga sugo. Kon kita mosunod sa tambag sa mga propeta ug sa mga sugo sa Ginoo, Siya mopanalangin kanato.”
Emmanuel, Côte d’Ivoire
Kamo nagsaad: Sa pagserbisyo sa Dios sa tibuok ninyong kinabuhi.
Kita kinahanglan “magbaton og determinasyon sa pagserbisyo sa [Dios] hangtod sa kataposan” (Doktrina ug mga Pakigsaad 20:37). Usa sa paagi sa pagserbisyo sa Dios mao ang pagserbisyo sa uban—isip “andam sa pagtambayayong sa usag usa nga mga alantoson, … ug sa paghupay niadto nga nagkinahanglan sa kahupayan” (Mosiah 18:8–9; tan-awa sa Mosiah 2:17).
Posible nga mga paagi aron matuman kining mga saad:
-
Pangita og mga paagi nga kamo makatabang ug makahupay sa inyong pamilya ug mga higala.
-
Moserbisyo diha sa usa ka calling sa inyong branch o ward.
-
Moapil sa mga proyekto sa pagserbisyo sa komunidad.
“Ako adunay ideya sa pagkolekta og mga kasangkapan sa eskwelahan alang sa mga eskwelahan dinhi sa Hawaii ug sa Pilipinas. Kini nga serbisyo mao ang akong paagi sa pagpakita og Kristohanong gugma. Wala nay mas maayo pa nga bation kay sa pagbati nga inyong maangkon kon kamo makahimo og kalainan.”
Marielle, USA
Human sa bunyag: Molahutay hangtod sa kataposan.
“Human sa bunyag, kita ‘mopadayon sa unahan uban ang pagkamakanunayon kang Kristo’” (2 Nephi 31:20) ug “matinud-anong magpadayon subay sa dalan sa ebanghelyo.”
Posible nga mga paagi aron sa pagpadayon diha sa dalan sa pakigsaad:
-
Magpabilin nga takos sa usa ka rekomend sa templo.
-
Magkat-on mahitungod sa imong mga katigulangan ug makapahigayon sa mga bunyag alang kanila sa sulod sa templo.
-
Mag-andam sa pagsulod sa templo aron sa pagdawat sa inyong pagtuga ug pagselyo.
“Bag-ohay lang, mihukom ko nga magpabunyag. Sukad niana, akoa na gayod giusab ang akong pamatasan. Ako usa ka supakero nga tawo kaniadto, apan karon ako mopili sa pagtuman sa mga sumbanan sa Manluluwas.”
Celiany, Venezuela
Pagdawat og mga Panalangin ug Gahom
Samtang kamo motuman sa pakigsaad nga inyong gihimo sa bunyag, ang Langitnong Amahan mosaad og talagsaong mga panalangin, lakip ang gasa sa Espiritu Santo ug kapasayloan gikan sa mga sala. Labaw pa niana, ang modernong mga propeta ug apostoles adunay gipakigbahin kon sa unsang paagi ang pagtuman sa atong mga pakigsaad makadala og gahom.
Inyong madawat: Gahom sa pagbuntog sa tentasyon.
Inyong madawat: Gahom aron mahimong mas maayo.
Inyong madawat: Gahom sa pagbati og kalinaw ug hingpit nga kalipay.
Panapos
Kon kamo maningkamot sa pagtuman sa mga pakigsaad nga inyong gihimo sa bunyag—ug sa kadugayan, sa mga pakigsaad nga inyong himoon sa templo—kamo makabaton sa gahom sa Manluluwas nga makatabang kaninyo sa inyong kinabuhi.
Si Presidente Russell M. Nelson miingon: “Ang pagsulod ngadto sa relasyon sa pakigsaad uban sa Dios nagbugkos nato ngadto Kaniya sa paagi nga makapahimo sa tanan mahitungod sa kinabuhi nga mas sayon. Palihog ayaw ako saypa sa pagsabot: Ako wala moingon nga ang paghimo og mga pakigsaad makapahimo sa kinabuhi nga sayon. Gani, paabot og oposisyon, tungod kay ang kaaway dili gusto ninyo nga makadiskobre sa gahom ni Jesukristo. Apan ang pagpakigtambayayong sa Manluluwas nagpasabot nga kamo makagamit sa Iyang kalig-on ug makatubos nga gahom.”
Busa mahimong bation nga ang kinabuhi lisod. Mahimong kamo nawad-an og kadasig o mobati nga nagkinahanglan mo og dugang pang tabang. Apan kon kamo motuman sa inyong mga pakigsaad, inyong gibugkos ang inyong kaugalingon ngadto sa Manunubos sa tanang katawhan, ug kamo makadawat sa Iyang gahom sa pagtabang kaninyo. Gamit ang iyang gahom, kamo sa kataposan makadawat sa “talagsaong gasa sa Dios—ang gasa sa kinabuhing dayon.”