Dali, Sunod Kanako
Pagpangandam alang sa Inyong Espirituhanong mga Gubat
Sama ni Kapitan Moroni, kamo makadawat og balaan nga tabang ug gahom alang sa mga hagit nga inyong atubangon sa kinabuhi.
Mga paghulagway pinaagi ni Rose Datoc Dall
Sa dihang una nakong nabasa ang Basahon ni Mormon, nahingangha ko sa hugot nga pagtuo, kaabtik, ug sa mga taktika nga gigamit ni Kapitan Moroni. Nahimo siya nga lider sa tanan nga mga sundalo sa Nephita sa dihang siya nag-edad lang og 25! Maalamon siya, kusgan, ug hingpit nga mapasaligon ngadto sa kalingkawasan ug kaayohan sa iyang katawhan (tan-awa sa Alma 48:11–12).
Imbis modawat og pagdayeg sa militante nga kalamposan para sa iyang kaugalingon, si Moroni misulti ngadto sa usa ka napildi nga lider sa kaaway:
“Ang Ginoo … mitugyan kaninyo sa among mga kamot … tungod sa among tinuohan ug sa among hugot nga pagtuo kang Kristo.” Miingon usab si Moroni, “Ang Dios mobulig, ug moamping, ug mopanalipod kanamo, samtang kami matinud-anon ngadto kaniya, ug ngadto sa among hugot nga pagtuo, ug sa among tinuohan” (Alma 44:3, 4).
Paglabay sa panahon, Ako nakaamgo nga ang ehemplo ni Moroni makatabang kanato sa pag-atubang sa mga hagit sa atong modernong mga kinabuhi. Kamo makig-away og pipila ka espirituhanong mga gubat sa inyong pagkabatan-on. Kon magpakita kamo og hugot nga pagtuo diha ni Jesukristo, mapanalanginan kamo sa Iyang gahom nga gipahaom sa inyong kahimtang. Motabang Siya kaninyo nga maandam ug modaog niana nga mga gubat. Apan aron Siya makabuhat sa ingon, kamo kinahanglan makasabot sa inyong katuyoan, makaestratehiya alang sa kalamposan, ug mangandam alang sa espirituhanong mga gubat nga inyong atubangon, sama sa gihimo ni Moroni sa tinuod nga mga gubat sa iyang kinabuhi. Kon inyong buhaton, ang Langitnong Amahan ug si Jesukristo moabag ug mopanalipod kaninyo.
Sabta ang Inyong Katuyoan
Gibalik-balik ni Moroni sa pagpahinumdom ang mga tawo kon si kinsa sila (mga tigpanunod sa Pakigsaad ni Abraham), nga sila mao ang (minahal nga mga anak sa Dios), ug ang kawsa nga maoy hinungdan sa ilang pagpakig-away (pamilya, hugot nga pagtuo, kagawasan gikan sa pagdaug-daog ug pagkaulipon).
Sa dihang ang pipila ka mga Nephita nagtinguha sa pag-ilog og awtoridad alang sa personal nga kaayohan, si Moroni migisi sa iyang kupo ug misulat diha sa usa ka piraso niini: “Agi og paghinumdom sa atong Dios, sa atong tinuohan, ug kagawasan, ug sa atong kalinaw, sa atong mga asawa, ug sa atong mga anak” (Alma 46:12). Giisa niya kining bandila, diin iyang gitawag nga ang “bandila sa kalingkawasan” (Alma 46:13), diha sa tumoy sa tukon ug migamit niini sa pagpahinumdom sa katawhan kon unsa ang katuyoan niini nga pagkig-away ug sa pagpundok kanila ngadto sa kawsa. Kita, usab, kinahanglan nga mapahinumdoman kon unsa ang katuyoan niini nga pagpakig-away.
Si Elder Neal A. Maxwell (1926–2004), usa ka kanhi sakop sa Korum sa Napulog Duha ka Apostoles, mibuhat niini alang kanako. Niadtong 2004, mibisita ko niya didto sa iyang kwarto sa ospital dili pa dugay sa wala pa siya namatay. Mabination kaayo siya ngadto sa tanan nga mibisita o mitabang kaniya. Ang mga worker sa health care miadto sa iyang kwarto ug migawas nga nagbakho.
“Elder Maxwell, lisod kini kaayo,” miingon ko.
“Oh, Dale,” mikatawa siya. “Kita mahangtorong mga binuhat nga nagpuyo sa mortal nga kalibotan. Wala kita sa dapit nga maoy alang kanato, sama sa isda nga gihaw-as gikan sa tubig. Sa panahon lamang nga kita makabaton og mahangtoron nga panglantaw mao ang panahon nga ang bisan unsa niini atong masabtan.”
Ayaw gayod pagpakawala sa panglantaw sa imong balaan nga kinaiyahan ug mahangtoron nga padulngan. Sa mga espirituhanong gubat sa kinabuhi, “wala [kamo] makig-away batok sa dugo ug unod, kondili … sa mga daotang nagmando … [ug] batok sa daotang espirituhanong gahom” (Mga taga-Efeso 6:12). Ang hustong pagsabot sa plano sa Langitnong Amahan alang kaninyo makapadasig kaninyo sa pagpadayon sa pagkig-away alang sa inyong mahangtoron nga kaluwasan ug alang sa inyong kagawasan gikan sa espirituhanong pagka-ulipon.
Pag-estratehiya alang sa Kalamposan
Sa tibuok nga panahon sa daghang gubat, si Moroni nag-estratehiya og mga plano aron maseguro ang kalamposan. Epektibo niya nga gigamit ang mga kapanguhaan aron sa pagdiskobre sa mga kalihokan ug mga tumong sa iyang mga kaaway ug sa pagpalig-on ug pagpanalipod og mga siyudad. Siya nagtinguha og direksiyon gikan ni propeta, Alma, ug migamit niini sa iyang pamaagi sa gubat. Si Moroni wala gayod nakontento sa nangagi nga mga kalamposan. Mipadayon siya sa pagpalambo sa iyang mga estratehiya. Kini nakatabang sa iyang mga sundalo nga magmadaogon batok sa ilang mga kaaway.
Kamo makagamit sa susama nga pamaagi diha sa espirituhanon nga mga gubat. Si Satanas mosulay sa pagbalda kaninyo gikan sa inyong katuyoan. Kon kamo motugyan sa bisan gamay nga tentasyon, kamo mikunsomo og “hilo sa hinay-hinay” (Alma 47:18), usa ka labing epektibo nga estratiheya nga gigamit sa mga gahom sa daotan nga mosangpot sa espirituhanong pagkamatay. Kon kamo mag-atubang sa tentasyon, pangutan-a ang inyong kaugalingon:
-
“Sa unsang paagi kining aksiyon ikatandi batok sa gipadayag nga pulong sa Dios?”
-
“Unsa ang mga sangpotanan sa paghimo niini nga aksiyon?”
-
“Makatabang ba nako kini nga aksiyon nga matuman ang akong katuyoan dinhi sa yuta?”
Inyong mapalig-on ang inyong kaugalingon batok sa mga tentasyon ni Satanas pinaagi sa pagsunod sa direksiyon gikan sa mga propeta sa ulahing mga adlaw. Ang pagbuhat sa ingon makatabang kaninyo nga mapabilin ang mahangtoron nga panglantaw. Ang paghimo og estratehiya kon unsaon ninyo sa pag-atubang ang mga tentasyon makatabang kaninyo nga makahimo og mas husto nga mga pagpili. Ang giplano nang daan nga mga estratehiya motabang kaninyo nga mapanalipdan batok sa mga pagbalda gikan sa inyong mahangtoron nga katuyoan.
Pananglitan, ang teknolohiya mahimong doble ang katuyoan, mapuslanon ug makadaot, depende kon giunsa nato kini sa paggamit. Ang mga kapanguhaan “Taking Charge of Technology [Pagdumala sa Teknolohiya]” ug Alang sa Kalig-on sa mga Kabatan-onan: Usa ka Giya alang sa Paghimo og mga Pagpili makatabang kaninyo sa paghimo og maalamon nga mga pagpili mahitungod sa inyong mga device. Kini nagpahinumdom kaninyo sa inyong katuyoan, mopunting kaninyo ngadto ni Jesukristo, ug motabang kaninyo sa pagdapit sa Espiritu Santo nganha sa inyong kinabuhi. Pagplano kon unsaon, kanus-a, ug kon asa ninyo gamiton ang teknolohiya nga makalig-on kaninyo batok sa mga pagbalda ni Satanas.
Pag-andam Karon
Si Moroni miandam alang sa umaabot nga mga gubat pinaagi sa paghatag sa iyang katawhan sa mga panagang sa dughan, mga taming, mga kalo, ug baga nga mga besti. Iya usab nga gipalibotan ang mga dakbayan og mga kuta, gitapok ang mga yuta libot niini.
Alang sa espirituhanong mga gubat karon, kamo makaandam pinaagi sa pagtuman sa mga sugo sa Dios. Kamo mohimo sa personal nga pag-ampo, pagpuasa, ug pagtuon sa kasulatan. Kamo molihok diha sa hugot nga pagtuo, motubag sa espirituhanong giya nga atong madawat. Kamo mopalig-on sa inyong pamilya. Kamo motambong sa simbahan ug mangandam og maayo alang sa ug takos nga moambit sa sakramento. Samtang kamo mouswag diha sa ebanghelyo, kamo mohimo ug motuman sa mga pakigsaad sa Dios nga makahatag sa gahom ni Jesukristo ngadto sa inyong kinabuhi.
Sa pagbuhat niining mga butanga, inyong maamgohan nga kamo wala makig-away sa inyong mga gubat nga nag-inusara. Ang Manluluwas mahimong mas tinuod nganha kaninyo, sama nga Siya tinuod ngadto ni Moroni. Siya ligdong diha sa iyang hugot nga pagtuo ni Jesukristo ug nasayod nga siya makasalig sa Manluluwas alang sa direksiyon ug katubsanan (tan-awa sa Alma 48:16). Makabuhat usab kamo sa ingon.
Tan-aw sa Langitnong Amahan ug ni Jesukristo
Si Moroni mipasidungog sa tanang kalipay sa iyang katawhan ngadto sa pagkamatinud-anon sa ilang hugot nga pagtuo sa Dios ug sa ilang tinuohan. Samtang kamo makasabot sa inyong katuyoan, mohimo og estratehiya alang sa kalamposan, ug mangandam alang sa espirituhanong mga gubat, kamo makaamgo nga ang kalipay moabot tungod sa Langitnong Amahan ug sa Iyang plano, ug ni Jesukristo ug sa Iyang Pag-ula.
Sama ni Moroni, Ako nasayod nga ang Langitnong Amahan ug si Jesukristo naghatag og kinadak-ang kagawasan gikan sa pagkaulipon—kagawasan gikan sa kamatayon ug sala. Sila mopanalangin kaninyo uban sa Ilang balaan nga tabang ug gahom kon kamo motan-aw ngadto Kanila sa tanang mga butang.