Mga Pangutana ug Mga Tubag
“Dili gayod ako maayo sa bisan unsa nga akong sulayan. Unsaon nako sa pagsige og sulay nga dili ra mawad-an og kadasig?”
“Ayaw pag-undang! Walay bisan kinsa nga maayo kaayo sa bisan unsa sa unang higayon. Mahimong magkinahanglan kini kanimo og mga bulan o mga tuig sa pagkat-on. Sa dihang misugod ko sa piyano pito ka tuig ang milabay, hapit dili ko makatukar og yano nga tulo ka nota nga awit. Karon ako hinay-hinay nga nahimong usa ka hanas nga piyanista! Mahimo kang mangayo og tabang ug kalig-on kang Jesukristo.”
Doutzen S., 12, Utah, USA
“Tinguhaa nga mosalig sa Ginoo. Kanunay Siyang anaa ug motabang kanimo nga molampos. Paghimo og plano alang sa mga butang nga gusto nimong makab-ot ug pangita og hingpit nga kalipay sa ginagmay nga mga butang nga imong gibuhat. Isulat ang imong mga kalamposan ug imong makita ang imong pag-uswag. Pagmapailobon, buhata ang imong labing maayong paningkamot, ug hibaloi nga ang Langitnong Amahan adunay plano alang sa Iyang mga anak.”
Unwana A., 21, Akwa Ibom, Nigeria
“Mahimo kang mangayo og tabang sa imong Langitnong Amahan. Motabang Siya kanimo tungod kay Siya nahigugma kanimo. Ang kinabuhi lisod, apan pinaagi sa Iyang tabang, mahimo nimo ang bisan unsa.”
Tyler W., 14, Texas, USA
“Ang pagsulay kabahin sa plano sa Dios. Sa daghang higayon, mapakyas kita aron makakat-on kita gikan sa mga butang nga atong sulayan. Si Presidente Russell M. Nelson kausa misulti kanato diha sa usa ka komperensiya nga dili mahadlok nga mag-inusara, ug kana nakatabang gayod kanako kon mosulay ko sa pagbuhat og usa ka butang ug mobati nga ingon og wala ko nagmalamposon.”
Gonçalo C., 18, Lisbon, Portugal
“Atol sa akong misyon, nagkat-on ko og Iningles isip ikaduha nga pinulongan. Sa sinugdanan, nawad-an ko og kadasig tungod kay wala ko mahanas niini. Usa ka adlaw, nakahinumdom ko sa mensahe gikan ni Presidente Russell M. Nelson: ‘Ang Ginoo ganahan og paningkamot.’ Natandog niya ang akong kasingkasing ug midasig kanako nga magpadayon sa pagkat-on niini.”
Diego M., 19, Mexico City, Mexico