Vai Tipolo Pasila ma Tipolo o le Olaga
O le olaga e i ai a auala e faalavelave ai i ou faamoemoega. O le a la se mea e te faia?
Vai Tipolo Pasila, Fou Lava, o le faitauina lea o le faailoga i fafo o le maketi. I le mae’a ai o se miti manaia e tasi, sa ou mautinoa ua tatau ona ou alu ile fale ma faia sa’u a’u lava vai tipolo.
Sa ou manatu sa ou iloa le mea e faamoemoe i ai: suka, vai, aisa, ia ma tipolo, a ea? (Aua, i le faaPeretania, o le igoa o le meainu e i ai le tipolo i totonu.)
Ae ina ua ou saili i luga o upega tafailagi (google) se fua o le meaai/vaiinu Pasila, sa ou tei i le mauaina o tipolo lanu meamata nai lo tipolo samasama na ou faamoemoeina. E le o le mea sa ou masani ai!
O Se Fua mo le Olaga
O mea e lei faamoemoeina i se fua o se kuka o se tasi lea o mea, ae faapefea pe a togi mai e le olaga ia te oe mea e lei faamoemoeina pe le fiafia foi? Vaai faalemafaufau i le mea lenei: o loo e faia le mea sili e fai ai filifiliga amiotonu, ma o loo lelei mea uma. E te manatu o le fua mo lou olaga e ono i ai ni mea faapenei:
-
Faamanuiaga
-
Uo mo le olaga atoa
-
O se aiga agaalofa
-
Auauna atu i se misiona matagofie
-
Mauaina o lau galuega sa e moemiti i ai
Ae a o e agai atu i luma, e te maua foi mea nei o faafefiloi mai ai:
-
Tofotofoga
-
O faauoga e faafuasei ona faamutaina
-
Aiga o loo tauivi
-
O se misiona faigata tele
-
O tatalo e le taliina
Na e faia se mea sese? Pe ua faaleagaina le olaga? Pe tatau ea ona e lafoai ese le fua (ma lou faatuatua a o e i ai iina) aua e le o agai mea i le ala na e faamoemoeina?
Tuu atu Lou Faalagolago i le Atua
E leai lava! A’oa’o mai fitafita talavou e 2,000. E ui ina sa ola amiotonu i latou ma o latou aiga, ae sa latou feagai pea ma taua, vavaeese mai o latou aiga, ma manuaga matuia. Atonu e le o mea na sa faamoemoeina e nei alii talavou totoa.
Ae e ui lava i lena, sa latou fai mai pea, “Ua faatasi mai lo tatou Atua ma i tatou” (Alema 56:46). Ina ua latou lafoaia o latou faamoemoega, tuu atu lo latou faalagolago i le Atua, ma agai i luma i le faatuatua, sa Ia liliuina “tipolo” e lei faamoemoeina o o latou olaga i faamanuiaga. Ma o le a Ia faia foi le mea lava lena e tasi mo oe.
O le isi taimi la e valaau mai ai le fua o lou olaga mo tipolo lanu meamata ae o lo o e manatu i tipolo samasama, aua le fiu. E faapei ona aoaoina e le Alii ia Iosefa Samita, “o nei mea uma e te maua ai le poto masani, ma o le a avea mo ou lelei” (Mataupu Faavae ma Feagaiga 122:7). Po o le a lava le mea e tupu, faatasi ma le Atua i ou autafa, e mafai lava ona suamalie le olaga. (Atonu o le a lelei e pei o le vai tipolo Pasila.)