O Le Mana ua i ai lava iina Mo Oe

Saunia e Jessica Zoey Strong

Mekasini a le Ekalesia

E mafai ona e maua le malosi sili atu nai lo le mea e mafai ona e iloaina.

E mafai ona faigata le olaga. Pe na i ai se taimi na e lagonaina ai e mafai ona e faaaogaina sina fesoasoani faaopoopo e taulimaina ai? Na saunoa mai Peresitene Russell M. Nelson, “O tagata taitoatasi e osia feagaiga i vai papatiso ma i totonu o malumalu—ma tausi i ai—ua faateleina le avanoa e maua ai le mana o Iesu Keriso.” Ioe, e sao lau faitau. O le osia ma le tausia o feagaiga e aumaia ai le mana o le Faaola i lou olaga. E te fiafia i ai??

Tausia o Au Feagaiga o le Papatisoga

Pe a e papatiso, e te osia se feagaiga (o se folafolaga paia), ma le Tama Faalelagi. Ma o vaiaso taitasi pe a e ai ma inu i le faamanatuga, e te toe osia ai lenei feagaiga. Afai o loo e manao atili i le mana o le Faaola i lou olaga, e taua le iloa o mea o loo e folafola atu ma pe faapefea ona tausia na folafolaga.

Ua e folafola: O Le a e naunau e tauave i ou luga le suafa o Iesu Keriso.

“O le tauaveina i o tatou luga o le suafa o Iesu Keriso o lona uiga tatou te manatua o Ia ma taumafai e ola o ni Ona soo i le olaga atoa. Tatou te faasusulu atu Lona malamalama i isi, e ala mai ia i tatou. Tatou te vaai ia i tatou lava o Ona tagata ma faamuamua o Ia i o tatou olaga.” O lona uiga foi tatou te “tutu atu e avea ma molimau a le Atua i taimi uma ma i mea uma, ma i nofoaga uma” (Mosaea 18:9).

O auala talafeagai e tausia ai lenei folafolaga:

Ia salamo ma le faamaoni ma taumafai e fai le mea o le a faia e le Faaola.
Tatalo i le Tama Faalelagi i le suafa o Iesu Keriso.
Manatua le Faaola ma aoao atili e uiga ia te Ia e ala i le faitauina o tusitusiga paia.

“Ou te fiafia lava e faitau le Tusi a Mamona aua o loo molimau mai e uiga ia Keriso ma ou maua ai tali i a’u fesili. O le mafuaaga lena ou te valaaulia ai tagata uma e faitau i ai.”

Trésor, Democratic Republic of the Congo

Ua e folafola: E tausia poloaiga a le Atua.

“Na te [Tama Faalelagi] silafia foi le mea o le a aumaia ia i tatou le fiafiaga silisili. O poloaiga taitasi o se meaalofa paia, ua tuuina mai e taiala ai a tatou faaiuga, puipuia ai i tatou, ma fesoasoani ai ia tatou tuputupu a’e.” Ua valaaulia i tatou e le Tama Faalelagi e “[ulu atu] i se feagaiga faatasi ma ia, o le a [tatou] auauna atu ia te ia ma tausi ana poloaiga” (Mosaea 18:10).

O auala talafeagai e tausia ai lenei folafolaga:

Alofa i le Atua ma lou tuaoi (tagai i le Mataio 22:37–39).
Tausi le Aso Sapati ia paia.
Totogi le sefuluai.
Ola i le Upu o le Poto (tagai i le Mataupu Faavae ma Feagaiga 89).

“O vaiaso uma i le taimi o le faamanatuga, ou te faafouina ai le feagaiga na ou osia ma le Atua e usitai i Ana poloaiga. Afai tatou te mulimuli i fautuaga a perofeta ma poloaiga a le Alii, o le a Ia faamanuiaina i tatou.”

Emmanuel, Cte d’Ivoire

Ua e folafola: Ia auauna atu i le Atua mo aso o totoe o lou olaga.

E tatau ona tatou “maua se naunautaiga e auauna atu [i le Atua] e oo i le iuga” (Mataupu Faavae ma Feagaiga 20:37). O se tasi auala e auauna atu ai i le Atua o le auauna atu lea i isi—o le “naunau e tauave avega a le tasi ma le isi, … ma faamafanafana atu ia te i latou o e e manaomia le faamafanafanaga” (Mosaea 18:8–9; tagai i le Mosaea 2:17).

O auala talafeagai e tausia ai lenei folafolaga:

Vaavaai mo ni auala e mafai ona e fesoasoani ma faamafanafana ai lou aiga ma uo.
Auauna atu i se valaauga i lau paranesi po o le uarota.
Ia auai i galuega faatino o auaunaga i le alalafaga.

“Sa ou maua se manatu e ao mai sapalai mo aoga iinei i Hawaii ma i Filipaina. O lenei auaunaga o la’u auala lea e faaali atu ai le alofa faaKeriso. E leai se isi lagona e sili atu nai lo le lagona e te maua pe a e faia se aafiaga.”

Marielle, ISA

A uma le papatisoga: Tumau e oo i le iuga.

“A uma le papatisoga, e faaauau pea ona tatou ‘fetaomi atu i luma ma le tumau ia Keriso’” (2 Nifae 31:20) ma “faaauau pea ma le faamaoni i luga o le ala o le talalelei.”

O auala e mafai ona faaauau ai i luga o le ala o feagaiga:

Ia ola agavaa mo se pepa faataga o le malumalu.
Aoao e uiga i ou tua’a ma faia papatisoga mo i latou i totonu o le malumalu.
Sauni e ulu atu i le malumalu ina ia maua ou faaeega paia ma ia faamauina.

“Talu ai nei lava, sa tonu ai ia te a’u ou te papatiso. Talu mai lena taimi, ua ou suia ai lava la’u amio. Sa masani ona avea au ma se tagata fouvale, ae ua ou filifili nei e tausia tulaga faatonuina a le Faaola.”

Celiany, Venesuela

Mauaina o Faamanuiaga ma le Mana

A o e tausia le feagaiga e te osia i le papatisoga, ua folafola mai e le Tama Faalelagi faamanuiaga ofoofogia, e aofia ai le meaalofa o le Agaga Paia ma le faamagaloga mai agasala. I le pito i luga o lena mea, ua faasoa mai ai e perofeta ma aposetolo o aso nei le ala e aumaia ai e le tausia o a tatou feagaiga le mana.

E te mauaina: Mana e faatoilalo ai faaosoosoga.

E te mauaina: Mana e avea ai ma tagata sili atu.

E te mauaina: Mana e lagona ai le filemu ma le olioli.

Faaiuga

A o e taumafai e tausia le feagaiga na e osia i le papatisoga—ma mulimuli ane, o feagaiga e te osia i le malumalu—e mafai ona e maua le mana o le Faaola e fesoasoani ai ia te oe i lou olaga.

Na saunoa mai Peresitene Russell M. Nelson: “O le ulu atu i se sootaga faalefeagaiga ma le Atua e noatia ai i tatou ia te Ia i se auala e faia ai mea uma e uiga i le olaga ia faigofie atu. Faamolemole ‘aua ne’i malamalama sese ia te a’u: Ou te le’i fai atu o le osia o feagaiga e faigofieai le olaga. O le mea moni, ia faamoemoeina ni mea faafeagai, ona e lē manao le fili ia te oe ia mauaina le mana o Iesu Keriso. Ae o lou mulimuli o oe lava ia i le Faaola o lona uiga e te mauaina Lona malosi ma le mana togiola.”

Atonu la e lagona le faigata o le olaga. Atonu e te lotovaivai pe lagona e te manaomia se fesoasoani faaopoopo. Ae a e tausia au feagaiga, e te fusia oe lava i le Togiola o tagata uma, ma e te maua Lona mana e fesoasoani ai ia te oe. Faatasi ai ma Lona mana, e mafai ai ona e maua “le meaalofa silisili a le Atua—o le meaalofa o le ola e faavavau.”