Fesili ma Tali

“E le o au o se tagata sili ona lelei i soo se mea ou te taumafai e fai. E mafai faapefea ona ou taumafai pea e aunoa ma le faalotovaivaiina?”

“E tofu uma i tatou ma taimi tatou te lagona ai le fia taofiina, tuua, sola ese, pe atonu foi e fiu. Ae o le faaaogaina o le faatuatua i lo tatou Faaola, o Iesu Keriso, e fesoasoani tatou te faatoilalo ai le lotovaivai tusa lava po o a mea faalavefau tatou te fetaia’i.”

Elder Carl B. Cook o le Au Peresitene o Fitugafulu, konafesi aoao Ape. 2023 (Liahona, Me 2023, 15).

“Aua le fiu! E leai se tasi e sili ona lelei i soo se mea i le taimi muamua. E ono alu ai ni masina po o ni tausaga e aoao ai. Ina ua ou amata i le piano i le fitu tausaga talu ai, sa tau le mafai ona ou taina se pese e tolu ni ona nota faigofie. O lea la ua avea au ma se ta piano ua matua lelei lava! E mafai ona e ole atu ia Iesu Keriso mo se fesoasoani ma le malosi.”

Doutzen S., 12, Iuta, ISA

“Saili e faalagolago i le Alii. O loo i ai pea o Ia iina ma o le a fesoasoani ia te oe ia manuia. Fai se fuafuaga mo mea e te manao e faataunuu ma maua le olioli i mea iti e te faia. Tusi i lalo ou tulaga faamanuiaina ma o le a e vaaia ai lou tuputupu ae. Ia onosai, tuu i luma lau taumafaiga sili, ma ia iloa o loo i ai se fuafuaga a le Tama Faalelagi mo Ana fanau.”

Unwana A., 21, Akwa Ibom, Nigeria

“E mafai ona e tatalo i lou Tama Faalelagi mo se fesoasoani. O le a Ia fesoasoani ia te oe aua e alofa o Ia ia te oe. E faigata le olaga, ae faatasi ai ma Lana fesoasoani, e mafai ai ona e faia soo se mea.”

Tyler W., 14, Texas, ISA

“O le taumafai o se vaega o le fuafuaga a le Atua. E tele taimi, tatou te toilalo ai ina ia mafai ona tatou aoao mai mea tatou te taumafaia. Sa ta’u mai e Peresitene Russell M. Nelson i se tasi taimi ia i tatou i se konafesi e aua le fefe i le tuuatoatasi, ma e fesoasoani tele lena mea ia te au pe a ou taumafai e fai se mea ma lagona e pei ou te le o faamanuiaina.”

Gonçalo C., 18, Lisbon, Potukale

“I le taimi o la’u misiona, sa ou aoaoina le Igilisi o se gagana lona lua. I le taimi muamua, sa ou lotovaivai ona sa le mafai ona ou malamalama lelei i ai. I se tasi aso, sa ou manatua ai le savali mai ia Peresitene Russell M. Nelson: ‘E fiafia le Alii i taumafaiga.’ Sa ia pa’i mai i lo’u loto ma uunaia a’u e faaauau pea ona aoao i ai.”

Diego M., 19, Aai o Mekisiko, Mekisiko

O tali ua faamoemoe mo se fesoasoani ma se vaaiga, ae e lē o ni faalauiloaga aloaia o aoaoga faavae o le Ekalesia.

O Le A Sou Manatu?

“E mafai faapefea ona ou fiafia i faamanuiaga o tekinolosi a o aloese pea mai tulaga e lē lelei ai?”

Auina mai lau tali ma lou ata ae le‘i oo i le aso 15 o Setema, 2024.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le uumi po o le manino.