Faia o Mea Lelei i Pale (Farani)
Ua faaali mai e nei soo e toalua le ala la te mulimuli ai i le Faaola.
Ata na pueina e Christina Smith
Faatasi ai ma le tele naua o luitau ma tagata i le salafa o le lalolagi o loo manaomia le fesoasoani, pe o e mafaufau ea pe i ai se mea e mafai ona e faia e fesoasoani ai, lea o le a faia moni ai lava se eseesega?
I le taimi o Lana galuega i le olaga nei, sa “femaliuai Iesu ma agalelei” (Galuega 10:38). I le avea ai ma Ona soo, e mafai ona e mulimuli i Lana faataitaiga ma faia foi faapena. Ioe! E tele mea e mafai ona e faia e faia ai se eseesega.
O le mea lena na iloa e tuafafine ma uso o Elodie, 14, ma Mika, 12, mai Pale, Farani. O nisi nei o auala latou te mulimuli ai ia Iesu Keriso ma “femaliuai ma agalelei” i e o siomia ai i laua.
Taulai Atu ia i Latou e Le Tagolima
“O se soo o Keriso e faalagolago i taimi uma i le Faaola,” o le tala lea a Elodie. “E alofa se soo o Keriso ia te Ia ma e faafetai mo mea ua Ia faia mo i latou. E taumafai se soo o Keriso e mulimuli i Ona tulagaaao.”
E mulimuli Elodie i le Faaola e ala i le “auai ma le naunautai i se faamoemoega lelei” (Mataupu Faavae ma Feagaiga 58:27). “Matou te faatulagaina ma a’u uo ni vaega e saili ai ni tupe mo tagata po o atunuu e le o faamanuiaina,” o le tala lea a Elodie. “E alu le tupe e faatau ai lavalava, tusi, meataalo, vaega e faaaoga i fale-le-ta’ua, ma meaai. Matou te siitia foi le nofouta mo tagata atonu e le iloa nei mea, e vaai ai pe latou te mananao e fesoasoani. Matou te taumafai e tutu i luga ma fesoasoani i isi tagata.”
I le tautoulu o le 2022, sa lagolagoina ai e Elodie ma ana uo se faalapotopotoga o le alofa mama i Farani lea e fesoasoani i tamaitai e i ai faafitauli i le sailia o galuega po o e manaomia le fesoasoani e lagolago ai o latou aiga. Sa latou faia se faaaliga o teuga e sue ai ni tupe. Sa latou foai atu tupe i le faalapotopotoga ma le faamoemoe o le a lagolagoina tamaitai e manaomia le fesoasoani ma faia se eseesega i o latou olaga.
“Ou te lagona ai le fiafia ona ua mafai ona ou suia se mea na sese mo se isi tagata,” o le tala lea a Elodie. “E malie foi le faatasitasi ma tagata e taumafai e fuafua pe faapefea ona faaaofia isi ma fesoasoani ia latou iloa e mafai ona latou auai ma faia foi se eseesega.”
Avea ma se Uo
“O se soo o Keriso e faatumauina Keriso i le totonugalemu o o latou loto ma o latou olaga,” o le tala lea a Mika. “Latou te taumafai ia pei o Ia.”
Ua avea Mika ma se amepasa i lana aoga. E fesoasoani se amepasa i tamaiti aoga fou. Latou te tuuina atu maimoaga i le aoga, faaali atu pe faapefea ona galueina silapasi ma fuafuaga a le aoga, ma fesoasoani i tamaiti aoga fou ia maua se lagona lelei.
“Sa ou fesoasoani i se tasi o a’u uo i le taimi muamua na sau ai i le matou aoga,” o le tala lea a Mika. “I le taimi o le malologa, sa ia fesili mai ia te au e uiga i le aoga, ma sa ou taliina. Sa ou taumafai ia ona maua se lagona lelei. E manaia le tutu atu mo ni uo o e atonu o loo lagonaina le faatoilaloina, faanoanoa, po o le tuuatoatasi. Ou te lagona ai e pei ua ou avea atili e pei o Iesu Keriso.”
Ina ua oo i le taimi e papatiso ai Mika i ni nai tausaga ua mavae, sa fesili atu lona tina po o ai na te manao e valaaulia i lona papatisoga. Sa valaaulia e Mika ni uo se toafitu, ma na latou o mai uma lava! “Sa ou fiafia ona sa lagolagoina au e tagata uma,” o lana tala lea.
I nai aso na sosoo ai, na fesili atu ai uo a Mika ia te ia e uiga i lona papatisoga ma le Ekalesia. “Sa ou aumaia tusitusiga paia ma talanoa ma i latou e uiga i le mea e faatatau i ai le Ekalesia,” o le tala lea a Mika. “Sa matuai manaia lava le ta’u atu ia i latou le uiga o le Ekalesia ia te a’u ma lo’u aiga.”
Mauaina o le Malosi e Fai ai Mea Lelei
O le manatuaina ma le mulimuli i le Faaola, ua maua ai e Elodie ma Mika le malosi e fai ai mea lelei.
“O le faalagolago ia Iesu ua fesoasoani tele ia te a’u,” o le tala lea a Elodie. “Faatasi ai ma Ia i ou autafa, e mafai ona ou faasoa atu le talalelei, faaalu se taimi ma le aiga, fausia ni sootaga, auai i gaoioiga a le autalavou, faatuputupu ae la’u molimau, saunia e auauna atu i se misiona, ma faaauau pea ona faapotopoto Isaraelu.”
E maua foi e Mika le malosi e tu atu ai o se soo o Keriso. “Afai ou te le o mautinoa po o le a le mea e fai i ni tulaga patino, ou te fesili ifo ia te au lava po o le a le mea o le a faia e le Faaola. Afai e faia e le Faaola, ona tatau foi lea ona ou faia,” o le tala lea a Mika. “O le taimi muamua, sa ou lagona le matamuli tele e tau atu i se tasi e uiga i ou talitonuga. Sa ou mafaufau, ‘Oi, o le a latou taufaalili mai ia te au.’ O le alu i le lotu, alu i le malumalu, ma le fesoasoani atu i isi e ta’u atu ai i a’u uo ua latou iloa lo’u tagata moni lava.”
Ua faamanatu mai e Elodie ia i tatou e faapea “na tuuina mai e Iesu Keriso Lona taimi atoa, o Ana taumafaiga uma, ma Lona alofa atoa i isi.” O le manatuaina o lenei mea na fesoasoani ia Elodie i le tele o auala. “Pe a matou faatulagaina ma a’u uo ni auaunaga alofa, matou te taumafai e faata le mea na faia e Iesu i Lona soifuaga atoa,” o lana tala lea. “Matou te faia mea atonu e Na te faia pe ana i ai o Ia iinei. Ua faamanatu mai e lenei mea ia te a’u, o a’u o se soo o Keriso.”
O Iesu Keriso “o le malosi o le autalavou.’” O lona uiga o Ia o lou malosi. O le a Ia faamalosia oe e pei lava ona Ia faia mo Elodie ma Mika. Faatasi ai ma Ia, e mafai ona e “faia mea uma” (Filipi 4:13) ma o atu ma faia “mea lelei e tele” mo au uo, aiga, ma isi o siomia ai oe.