Na o Tusiga Faaeletonika: Tali mai se Aposetolo
E Mafai Faapefea Ona Faamagaloina Au, Faamagalo A’u Lava, ma Faamagalo Isi?
A taulai atu o tatou olaga i le Faaola, o le a tatou maua tali i atugaluga loloto ma taua i o tatou agaga.
Mai se saunoaga na tuuina atu i le faigalotu a le Iunivesite o Polika Iaga–Hawaii i le aso 29 o Ian., 2003.
Ou te fia taliina nisi o fesili lea e atugalu ai soo talavou o Iesu Keriso.
E Mafai Faapefea Ona Faamagaloina A’u, Lagona le Agavaa, ma Lagona le Alofa o le Atua?
E tele tagata e tauivi ma le salamo ma le mauaina o le faamagaloga o a tatou agasala, lagonaina le agavaa e ai ma inu i le faamanatuga, ma lagonaina le alofa o le Atua mo i tatou tusa lava pe tatou te lagonaina le lē agavaa.
O le mataupu faavae o le salamo e oo mai ina ua i ai le faatuatua ia Iesu Keriso. E alofa le Atua ia i tatou, e tusa lava pe ua tatou i ai i le loloto o le agasala. E faamagaloina i tatou pe a tatou faamaualaloina i tatou lava i luma o le Atua, fefautuaai ma taitai tatau ai o le Ekalesia pe a manaomia, ma salamo ma lafoai a tatou agasala. O le faia o nei laasaga e faalatalata atili atu ai tatou i le Faaola, o Lē e mafai ona faasaolotoina ma le mautinoa i tatou mai le tausalaina, faanoanoa, ma le pologa faaleagaga ma le faaletino.
Tatou te le iloa pe aisea tatou te faaauau ai pea ona lagona le tausalaina i nisi o taimi e tusa lava pe ua uma ona tatou salamo mo agasala ua tatou faia. Nai lo le taumatemate, talanoa i lou Tama Faalelagi e uiga i nei vaega. Fai sa’o atu ia te Ia le fesili lea. Ou te iloa i le aluga o taimi, o le a Ia faaali atu ia te oe le mea e te manaomia.
I lo’u tulaga, o loo i ai pea ni manatuaga o nisi o a’u mea sese ua tuanai. A o ou tatalo e uiga i ai, sa ta’u mai e le Alii ia te au ua faamagaloina au, ma e le tatau ona ou toe popole i na mea. Peitai, ou te lagona foi o na manatuaga o se lapataiga mo au e taumafai ai e aua nei toe pa’u atu i na mea sese. O lea la, o le iai o na manatuaga e lē o se mea e matuā lē lelei lava. Ou te vaai ia i latou i lo’u olaga o se faaaliga o le alofa o le Atua mo a’u a’o Ia lapataia pea a’u ia aloese mai i le toe uia o lena ala.
A o faaauau pea ona tatou taumafai e faia le mea sili tatou te mafaia, o le faaalia e ala i a tatou galuega le manao e faamama totonu o le ipu o lagona o le tausalaina ma le lotovaivai e foliga mai ua aluese. I se taimi, o lo tatou aafiaga e mafai ona faapei o Alema, o lē na molimau mai ina ua uma ona salamo “e mafai lava ona ia manatua ana agasala, ae o le manatuaina o ana agasala e le toe faanoanoa ma faatigaina o ia, aua sa ia iloa ua faamagaloina o ia.”
E Mafai Faapefea Ona Ou Faamagalo Atu i Latou O E Na Faatiga ia te A’u?
O se popolega mataina na faailoa mai e le au talavou e faatatau i le faamagaloina o i latou o e na faatiga mai ia i tatou ma faia mea leaga ia i tatou.
A o tatou suesue i le afioga a le Atua, ua tatou aoao ai o le faamagalo atu i isi e aumaia ai faamanuiaga maoae faaleagaga, e aofia ai le filemu ma le faamoemoe. Atonu o le faamanuiaga aupito sili ona taua o le, a tatou faamagalo atu i isi, e mafai foi ona faamagaloina i tatou i a tatou lava agasala. Ua aoao mai i tatou e le Alii e faapea o le faamagaloga o se poloaiga aoao ma o tatou ua “poloaina ia faamagalo atu i tagata uma.” Peitai, atonu e faigata pea.
O nisi taimi tatou te faatagaina ai le faamaualuga, fefe, le fiafia, po o le lototiga e faalotovaivaia ai i tatou ma poloka ai lo tatou agavaa e lagona ai le faamoemoe. Ae o le lototele e faamagalo atu e oo mai ia i latou o e tuu atu lo latou faatuatua ma le faalagolago i le Alii. O le faamagalo atu o lona uiga o le lafoai o le tuuaia mo se tiga ua tuanai. O le faamatuu ese foi lea o se avega tele. O le agai i luma i le olaga.
E faatatau i le faagalo, e taua le manatua faapea “o le faamagalo atu e le faapea o le galo o le solitulafono na tupu pe faafoliga e lei tupu lava. E le faapea o lona uiga o lou faatagaina o le amioga faatiga e faaauau pea. E le faapea e mafai ona faamaloloina mafutaga uma lava. Ma e le faapea o le a le tali atu le tagata agasala mo ana mea sa fai. O lona uiga e mafai ona fesoasoani le Faaola ia te oe e faamatuuese atu.”
O ni nai fautuaga nei e fesoasoani ai i lenei faagasologa:
-
Tatalo mo le lotomaualalo. O le lotomaualalo o le faafeagai lea o le faamaualuga, o le faafitauli autu lea i la tatou taumafaiga e faamagalo atu. O le faamaualuga e taitai atu ai i tatou e taulai atu i lagona o le ita i isi. E mafua ai foi ona tatou le iloa o tatou lava vaivaiga, mea sese, ma agasala. Ae na folafola mai e le Alii, “Afai latou te faalotomaualaloina i latou lava i o’u luma, ma faatuatua mai ia te a’u, ona ou faia lea o mea vaivai ia avea ma mea malolosi ia te i latou.” E tusa ai ma lo tatou lotomaualalo ma le faatuatua, o le a fesoasoani le Alii ia i tatou ia avea atili e faapei o Ia ma faamagalo moni atu e pei ona Ia faia.
-
Faaali atu le agaga faafetai. O le faaalia o le lotofaafetai e valaaulia atoatoa atili ai le Agaga i o tatou olaga, lea e mafai ona faamaluluina ma suia ai o tatou loto. Manatu i le teuina o se api talaaga o ni mea e te faafetai ai. Vaavaai mo faaaliga o le alofa o le Atua i aso taitasi. A o e atiina ae se uiga faaalia o le lotofaafetai, atonu e te iloaina e mafai foi ona e faailoa maia mafuaaga e faafetai ai mo ou tofotofoga.
-
Ia onosai. O le faamagalo atu pe a e i ai i se tiga tele e ono umi se taimi e alu ai. E mafai ona e faia se avanoa i lou loto mo le faamagaloga e ala i le tatalo faatauanau, suesue, ma manatunatu i ai. O le taumamafa fiafia i afioga a Keriso i aso taitasi o le a fesoasoani foi ia te oe e faalatalata atili atu ai ia te Ia ma o le a aumaia ai le mana faamalolo tele i lou olaga.
-
Faagalo le tuanai. O le mea na tupu na tupu ma e le mafai ona suia. Ae e mafai ona e taulai atu lou malosi i le asō, aua o le asō ua ia te oe le mana e filifili ai e faamagalo atu. Lafo lau avega i le Alii. Manatua e le gata i le tauaveina i Ona luga o agasala a le lalolagi, ae sa tauaveina foi e Keriso i Ona luga o tatou tiga ma vaivaiga. Afai e te faatagaina o Ia, e mafai ona Ia faamāmāina lau avega.
O le mauaina o le malosi e faamagalo atu ai e mafai ona avea o se luitau, ae o le Faaola ma Lana Togiola ua mafai ai. O le mea moni, a o tatala o tatou loto e faamagalo atu i isi, o le a faamanuiaina i tatou i le filemu. Ou te valaaulia outou e talia le mana faamalolo o le faamagaloga.
A’o taulai atu o tatou olaga i le Faaola, o le a tatou maua tali i atugaluga loloto ma taua i o tatou agaga. O le mana faamalolo o le Faaola e faatumulia ai o tatou agaga i le filemu, sususlu, malamalama, olioli, ma le alofa.