Sau, Mulimuli Mai ia te A’u
Sauniuni mo Au Taua Faaleagaga
E pei o Taitaiau Moronae, e mafai ona e maua le fesoasoani faalelagi ma le mana mo luitau o loo feagai ma oe i le olaga.
Ata na tusia e Rose Datoc Dall
Ina ua ou faitauina muamua le Tusi a Mamona, sa ou maofa i le faatuatua, atamai, ma auala na faaaoga e Taitaiau Moronae. Sa avea o ia ma taitai o autau uma a sa Nifae ina ua na o le 25 ona tausaga! Sa atamai, malosi, ma tuuto atoatoa atu o ia i le saolotoga ma le manuia o ona tagata (tagai i le Alema 48:11–12).
Nai lo le faafetaia o le manuia (manumalo) o le autau ia te ia lava, sa ta’u atu e Moronae i se taitai o le autau a le fili ua faatoilaloina:
“O le Alii … ua tuuina mai outou i o matou lima … ona o la matou tapuaiga ma lo matou faatuatua ia Keriso.” Na fai mai foi Moronae, “o le a lagolagoina, ma tausia, ma faasaoina i matou e le Atua, pe afai matou te faamaoni ia te ia, ma lo matou faatuatuaga, ma la matou tapuaiga” (Alema 44:3, 4).
I le aluga o taimi, ua ou iloa ai o le faataitaiga a Moronae e mafai ona fesoasoani ia i tatou e faafetaiaia ai luitau o o tatou olaga i ona po nei. O le a e tauina nisi o taua faaleagaga i lou talavou. A o e faatinoina le faatuatua ia Iesu Keriso, o le a Ia faamanuiaina oe i Lona mana. O le a Ia fesoasoani ia te oe e saunia ma manumalo i na taua. Ae ina ia faia e Ia, e tatau ona e malamalama i lou faamoemoega, fuafua mo le manuia, ma saunia mo taua faaleagaga o le a e feagai ai, e pei lava ona sa faia e Moronae i taua moni i lona olaga. A o e faia, o le a lagolagoina ma faasaoina oe e le Tama Faalelagi ma Iesu Keriso.
Malamalama I Lou Faamoemoega
Sa faamanatu atu pea lava pea e Moronae i tagata ē sa avea ai i latou (o e mautofi i le Feagaiga FaaAperaamo), o e o o latou (fanau faapelepele a le Atua), ma le faamoemoe na latou tau ai (aiga, faatuatua, ma le saolotoga mai le faasauā ma le nofopologa).
Ina ua saili nisi o sa Nifae e faoa le pule mo le manuia faaletagata lava ia, sa sasae e Moronae lona ofu talaloa ma tusia i se fasi ofu: “Mo le manatuaina o lo tatou Atua, ma la tatou tapuaiga, ma le saolotoga, ma lo tatou filemu, a tatou avā, ma a tatou fanau” (Alema 46:12). Sa ia sii ae lenei fu’a, lea sa ia ta’ua o le “tagavai o le saolotoga” (Alema 46:13), i le pito o se pou ma faaaoga e faamanatu ai i tagata le uiga atoa o le taua ma ia faapotopoto i latou i le faamoemoe. O tatou foi, e tatau ona faamanatuina mai i ai le uiga atoa o le taua.
Sa faia e Elder Neal A. Maxwell (1926–2004), o se tasi sa avea muamua ma sui o le Korama a Aposetolo e Toasefululua, lenei mea mo au. I le 2004, sa ou asiasi atu ai ia te ia i lona potu i le falemai i se taimi e lei leva ae maliu o ia. Sa agalelei tele o ia i tagata uma sa asia pe fesoasoani ia te ia. Sa o atu tagata faigaluega tausi soifua maloloina i totonu o lona potu ma o mai ua fetagisi.
“Elder Maxwell, e matuai faigata lava lenei mea,” sa ou fai atu ai.
“Se, Dale,” sa ia ataata. “O i tatou o tagata e faavavau o loo ola i se lalolagi faaletino. Ua tatou o ese mai o tatou elemene, e pei o i’a mai le vai. Seiloga lava tatou te maua se vaaiga e faavavau, ona i ai lea o se uiga o nei mea uma.”
Aua lava ne’i galo lou natura paia ma le taunuuga e faavavau. I taua faaleagaga o le olaga, “[tou te] lē tau ma tagata, a o alii sili ma faipule … ma alii o le pouliuli … [ma] agaga leaga” (Efeso 6:12). O le malamalama sa’o i le fuafuaga a le Tama Faalelagi mo oe o le a faaosofia ai oe e tauivi pea mo lou faaolataga e faavavau ma mo lou saolotoga mai le nofopologa faaleagaga.
Fuafua Tatau mo le Manuia
I le tele o taua, sa fuafuaina tatau ai e Moronae ni fuafuaga e faamautinoa ai le faamanuiaina. Sa ia faaaogaina ma le mataalia ana punaoa e iloa ai gaoioiga ma faamoemoega a ona fili ma ia faamalosia ma puipuia ai aai. Sa ia sailia le taitaiga mai le perofeta, o Alema, ma faaaoga i lona agai atu i le taua. Sa lei faamalieina lava Moronae i manumalo ua mavae. Sa faaauau pea ona ia faaleleia ana fuafuaga. Sa fesoasoani lenei mea i ana autau e maua ai le manumalo i o latou fili.
E mafai ona e faaaogaina auala talitutusa i taua faaleagaga. O loo taumafai Satani e faalavefau ia te oe mai lou faamoemoega. Afai e te gauai atu e oo lava i faaosoosoga laiti, e te faaaogaina “vai ‘ona” (Alema 47:18), o se auala sili ona aoga e faaaoga e mana o le amioleaga lea e mafai ona taitai atu ai i taunuuga matautia faaleagaga. A e feagai ma faaosoosoga, fesili ifo ia te oe lava:
-
“E faapefea e lenei faatinoga ona faaputu e faasaga tau atu i le afioga faaalia a le Atua?”
-
“O a ni taunuuga o le faia o lenei faatinoga?”
-
“Mata o le a fesoasoani lenei faatinoga ia te au e faataunuu ai lo’u faamoemoega i le lalolagi?”
E mafai ona e faamalosia oe lava e tetee atu i faaosoosoga a Satani e ala i le mulimuli i le taitaiga mai lo tatou perofeta o aso e gata ai. O le faia o lena mea e fesoasoani e te faatumauina ai se vaaiga e faavavau. O le fuafuaina o le auala o le a e faasaga atu ai e feagai ma faaosoosoga o le a fesoasoani ia te oe e faia ai ni filifiliga sa’o. O fuafuaga e muai fuafuaina o le a fesoasoani ia te oe e puipuia ai mai mea faalavefau mai lou faamoemoega e faavavau.
Mo se faataitaiga, o tekinolosi e mafai ona avea o se pelu mata-lua, e le gata ina aoga ae taufaaleaga, e faalagolago i le auala tatou te faaaogaina ai. O punaoa “Puleaina o Tekinolosi” ma le Mo Le Malosi o le Autalavou: O Se Taiala mo le Faia o Filifiliga e mafai ona fesoasoani ia te oe e faia ai filifiliga atamai e uiga i au masini. Latou te faamanatu atu ia te oe lou faamoemoega, faasino atu oe ia Iesu Keriso, ma fesoasoani ia te oe e valaaulia le Agaga Paia i lou olaga. O le fuafuaina pe faapefea, o afea, ma o fea e te faaaogaina ai tekinolosi o le a faamalosia ai oe e tetee atu i mea faalavefau a Satani.
Saunia Nei Loa
Na saunia Moronae mo taua o le a oo mai e ala i le tuuina atu i lona nuu o ufifatafata, talita, pulou, ma lavalava mafiafia. Sa ia siomia foi aai i olo, ma fau i luga auvai i le eleele e siomia ai i latou.
Mo taua faaleagaga o aso nei, e te saunia e ala i le tausia o poloaiga a le Atua. E te faataunuuina tatalo faaletagata lava ia, anapogi, ma le suesueina o tusitusiga paia. E te faatino i le faatuatua, ma tali atu ai i le taitaiga faaleagaga e te maua. E te faamalosia lou aiga. E te auai i le lotu ma saunia ma le maelega e ai ma inu ma le agavaa i le faamanatuga. A o e alualu i luma i le talalelei, o le a e osia ma tausia feagaiga ma le Atua lea o le a maua ai le mana o Iesu Keriso i lou olaga.
I le faia o nei mea, o le a e iloa ai e te le tau na o oe au taua. O le a sili atu ona moni le Faaola ia te oe, e pei lava ona moni o Ia ia Moronae. Sa mausali o ia i lona faatuatua ia Iesu Keriso ma sa ia iloa e mafai ona ia faalagolago i le Faaola mo le taitaiga ma le laveaiga (tagai i le Alema 48:16). E mafai ona e faia foi faapena.
Vaai Atu i le Tama Faalelagi ma Iesu Keriso
Na faamamaluina e Moronae le fiafia uma o lona nuu i le faamaoni i lo latou faatuatua i le Atua ma la latou tapuaiga. A o e malamalama i lou faamoemoega, fuafua mo le manuia, ma saunia mo taua faaleagaga, o le a e iloaina o le olioli e oo mai ona o le Tama Faalelagi ma Lana fuafuaga, ma Iesu Keriso ma Lana Togiola.
E pei o Moronae, ou te iloa e aumaia e le Tama Faalelagi ma Iesu Keriso le saolotoga sili mai le nofopologa—saolotoga mai le oti ma le agasala. O le a la faamanuiaina oe i la Laua fesoasoani ma le mana paia pe a e vaai atu ia i Laua i mea uma.