Faataitai I Ai!
E mafai faapefea ona e iloa o upu a perofeta ma tusitusiga paia e moni ma e faatatau ia te oe?
Ata na tusia e Emily E. Jones
Tatou te maua le taitaiga taua mai perofeta ma tusitusiga paia. Latou te faamanuiaina o tatou olaga ma fesoasoani ia avea i tatou ma tagata sili ona lelei. E taua mo oe le saili mo oe lava pe e moni mea ia o loo latou aoaoina mai.
E faapefea ona e faia lena mea?
Na aoao mai Alema e mafai ona tatou “tofotofo i [le] upu … ma faaaoga sina vaega itiiti o le faatuatua” (Alema 32:27). O suesuega e faia i taimi uma ma saunia ai se auala e sailiili ai le lalolagi o siomia ai i tatou. E mafai foi ona fesoasoani ia i tatou e saili ai tali i fesili faaleagaga ma faamalosia ai lo tatou faatuatua.
O se suesuega faaleagaga lenei e mafai ona e faataitaia:
Mauaina o le Faaola i totonu o Tusitusiga Paia
I ni nai tausaga ua mavae, sa valaaulia ai e Peresitene Russell M. Nelson le autalavou matutua o le Ekalesia “ia faateleina a latou molimau” ma “aoao mea uma latou te mafaia e uiga ia Iesu Keriso.” Sa ia fai atu ia i latou e faaalu sina taimi i vaiaso taitasi “e suesue ai i mea uma na fetalai ai Iesu ma faia e pei ona tusia i tusitusiga faavae” e faaaoga ai upusii o mau i lalo o le ulutala o Iesu Keriso i le Taiala i Autu po o le Taiala i Tusitusiga Paia.
I le taimi lena, o Peresitene Nelson ua mae’a ona ia “faitauina ma vase lalo o fuaiupu uma o loo ta’ua ai e uiga ia Iesu Keriso, e pei ona lisiina i lalo o le ulutala autu ma soa ulutala e 57 i le Taiala i Autu.” Sa ia suesue i le silia ma le 2,200 tusitusiga paia! Na ia faaaluina ai le ono vaiaso e faamaea ai le galuega. Ina ua fesili atu le faletua o Peresitene Nelson o Wendy ia te ia po o le a se aafiaga o le suesueina o na mau uma ia te ia, sa ia fai mai, “O au o se tagata ese!”
Sa matou fai atu i ni nai talavou e faia lea lava faataitaiga e tasi e faitau ai le tele latou te mafaia e uiga i le Faaola i tusitusiga paia mo le vaiaso e tasi. Ona matou fesili atu lea ia i latou po o a mea na latou aoaoina. O mea nei na latou fai mai ai.
O a ni Taunuuga?
“Sa ou lagonaina le Agaga e ala i molimau ma aoaoga na faasoa mai e uiga ia Iesu Keriso. Ou te fiafia faapitoa lava i tusitusiga paia e uiga ia Keriso o lo tatou Leoleo Mamoe. E tausia i tatou e Ia. A o ou faitau e uiga ia te Ia, sa mafai ona ou lagonaina Lona alofa o siomia au. Sa ou aoaoina na lagonaina e lo tatou Faaola ia faaosoosoga ma mafatiaga faaletino, e pei lava ona tatou oo i ai. A o tatou taumafai e avea e faapei o Ia, e le afaina le lagona o le faaosoosoina ma le lelava, auā sa oo lava foi i lo tatou Faaola, ae e lei taofia ai o Ia mai le faia o le galuega a Lona Tama. Ou te fia manao e manatuaina lenei mea pe a ou lagona le vaivai tele e faitau a’u tusitusiga paia. Ou te fia mulimuli i aoaoga a lo tatou Faaola auā ou te alofa ia te Ia—e le na o le tau lava ina faataunuu. Ou te manao i lou olaga e faaali atu o a’u o se soo o Keriso.”
Eve S., 17, Alberta, Kanata
“Sa ou aoaoina atonu tatou te feagai ma luitau tetele, ae faatasi ai ma le fesoasoani a lo tatou Faaola, e mafai ai ona tatou faia mea uma ma faamalolosia e ala i o tatou luitau. E mafai ona fesoasoani le Faaola ia i tatou e saunia mo faafitauli o le a tatou feagai i le lumanai. O le faitauina o tusitusiga paia na fesoasoani ou te malamalama ai i le taua o lo tatou Faaola ma Lana Togiola i le fuafuaga a le Atua. O le suesue i tusitusiga paia i aso taitasi ou te lagona ai le alofagia ma faamanatu mai ia te a’u e taua a’u i le Faaola. E ala i le faitauina o mau e uiga ia Iesu Keriso, sa ou maua ai le taitaiga mo a’u ia faia ia sili atu ma ia ‘mafaufau faa selesitila.’ O le a ou fai atu i a’u uo e auai faatasi ma a’u i le faitauina o le Tusi a Mamona ina ia mafai ona tatou faasoa atu mea ua tatou aoaoina faatasi.”
Ambher L., 17, Nueva Ecija, Filipaina
“A o savalia e Iesu Keriso le lalolagi, sa Ia faia ma le loto i ai i tagata sa Ia faamanuiaina ma faamaloloina. A o ou faitau ma mafaufau loloto e uiga i le Faaola, sa ou lagonaina se lagona malosi o le filemu. Sa mafai ona ou faase’e mai i tua mai atugaluga ma popolega o le olaga ma vaai i mea mai se vaaiga ese. Faatasi ai ma lou malamalama fou e uiga i le Faaola, o le a ou tatalo e saili tagata e manaomia e Iesu au e fesoasoani ma auauna atu ia i latou e pei ona Ia finagalo ai.”
Josh H., 16, Florida, ISA