O Ai o Pulea Lou Faiai?
Mafaufau i mea uma e faaaoga e lou faiai i aso uma—talanoaga, ata o le TV, musika, vitio, tesi, vaaiga, upu, leo! E toetoe lava a tele naua mea e mafaufau i ai. Afai e te le gauai atu i mea e faaalu ai le taimi o lou faiai, e faigofie mo na mea ona nofoia le nofoa o le avetaavale i lou olaga. O nei fesoasoaniga e mafai ona fesoasoani ia te oe e tumau ai i le puleaina.
1. Fuafua e Se’i ese mai le Palaka
Faatulaga se taimi i aso uma e alu ese ai mai tekinolosi ma mea faalavefau. Atonu e te faaaluina se taimi toafilemu i fafo pe faataitai le alu i nofoaga e aunoa ma au masini pe a e le manaomiaina. O le faataatia ese o taimi filemu, faamoemoeina e aunoa ma le talanoa faatekinolosi i lou taliga e maua ai e lou mafaufau le avanoa e malolo ai, toe faafou, ma fatu ni manatu musuia. Mafaufau i le mea o loo ta’u mai e le taiala o le Mo le Malosi o le Autalavou e uiga i le faaaogaina o tekinolosi: “O ala o faasalalauga faaagafesootai ma isi tekinolosi e mafai ona alu ai le tele o lou taimi e aunoa ma le mauaina mai ai o se mea e taua tele. Fai se malologa mai le lalolagi faatekinolosi, ma fesootai ma tagata i le olaga sao lava.”
2. Faataitai le Mafaufau Loloto
Ina ua asiasi atu Iesu Keriso i sa Nifae, sa Ia aoaoina i latou i Lana talalelei. Ona Ia fetalai atu lea ia i latou e o i le fale ma manatunatu loloto (mafaufau loloto e uiga) i Ana upu ma “saunia [o latou] mafaufau” mo nisi o Ana afioga (3 Nifae 17:3). E tatau foi ona tatou faaaluina se taimi e manatunatu loloto ai ma mafaufau lemu ai. Mafaufau i mea na e lagonaina talu ai nei, mea e te faafetai ai, mea na e aoaoina talu ai nei, po o a foi au sini. O le mafaufau loloto e mafai ona fesoasoani ia te oe e vaai ai i le aao o le Atua i lou olaga.
3. Tatalo, ona Faalogo Lea
E mafai ona avea o tatou mafaufau ma se vaega e talia mea faaleagaga. Na aoaoina i tatou e Peresitene Russell M. Nelson ia tatou “tatalo atu i le suafa o Iesu Keriso e uiga i ou atuatuvalega, ou popolega, ou vaivaiga—ioe, o faanaunauga o lou loto. Ona faalogo lea! Tusi i lalo manatu e oo mai i lou mafaufau.” O le tatalo ona faalogo lea i le Agaga, e mafai ona fesoasoani e te lagona ai le filemu ma le taitaiga faalelagi i le tele o leo o le lalolagi.
4. Faamuamua Faatosinaga Lelei
“O lou mafaufau ma lou agaga e matua aafia lava i mea e te faitauina, matamata, ma faalogo i ai.” Vaai i mea o loo e fafagaina ai lou faiai. O a ni puna’oa e aogā? O le fea o nei mea e valaauliaina ai le Agaga? Afai o mea e te faaaluina le taimi e te lagona ai le le fiafia, popole, paie, po o le fefinauai, atonu ua oo i le taimi e ooti ese ai na faatosinaga. Faamuamua vaega e maua ai le lagona faagaeetia po’o mea e “mama, matagofie, pe logoleleia, pe tauleleia” (Mataupu Faavae o le Faatuatua 1:13). O le filifilia o faatosinaga lelei e mafai ona fesoasoani ia te oe e mulimuli ai ia Iesu Keriso ma maua Ai Ana faamanuiaga folafolaina.