Sau, Mulimuli Mai ia te A’u
O Se Fuafuaga o le Alofa Mutimutivale
O Le Fuafuaga o le Faaolataga a le Tama Faalelagi
O le fuafuaga a le Tama Faalelagi e tuu ai mea uma i se vaaiga, aemaise lava lo tatou manaomia ona liliu atu ia te Ia ma lo tatou Faaola—ia faia ia lelei atu ma ia e lelei atu.
Ata na tusia e Sarah Keele
O loo i ai se fuafuaga a le Tama Faalelagi. O lenei fuafuaga e masani ona ta’ua o le fuafuaga o le faaolataga aua e faatatau i le laveaiina o i tatou—o lona uiga, o le faatoilaloina o mea e taofia ai i tatou mai le toe foi atu i le Tama Faalelagi. E ta’ua foi i nisi taimi o le fuafuaga o le fiafia auā o lona faamoemoega o le fesoasoani lea ia i tatou ia avea atili e faapei o lo tatou Tama Faalelagi ina ia mafai ai ona tatou maua se atoatoaga o le olioli.
O le malamalama i le fuafuaga a le Tama Faalelagi e mafai ona tatou maua ai se vaaiga e faavavau, lea e mafai ona fesoasoani ia i tatou e salamo ai ma faia filifiliga lelei atu. Ua tuuina mai e le Tusi a Mamona ia i tatou se faaataata lelei o lenei upumoni i le tala i le atalii o Alema o Korianetona.
Ae muamua, o se vaaiga aoao faavae lenei o le fuafuaga a le Tama Faalelagi.
O Le Fuafuaga a le Tama Faalelagi
I Luma Atu O Le Olaga Lenei
O Agaga: O i tatou uma o atalii ma afafine agaga a ni matua faalelagi. E silafia e le Atua i tatou ma alofa ia te i tatou taitoatasi.
O Le Fuafuaga: Ua saunia e le Tama Faalelagi se fuafuaga mo lo tatou fiafia ma le alualu i luma. Sa tuuina mai lenei fuafuaga ia i tatou uma.
Iesu Keriso: O Iesu Keriso e totonugalemu i le fuafuaga ma sa filifilia e avea ma o tatou Faaola mai le amataga.
Faitalia: Sa tatou filifili e talia le fuafuaga a le Tama Faalelagi.
Foafoaga: I lalo o le taitaiga a le Tama Faalelagi, na foafoaina ai e Iesu Keriso le lalolagi mo i tatou e nonofo ai.
I Le Taimi O Le Olaga Lenei
Olaga Faitino: Ua nonofo nei o tatou agaga i tino faaletino. I lenei olaga, tatou te maua ai le poto masani, aoao, ma tuputupu ae ai.
Faitalia: Ua fananau mai tagata uma ma le Malamalama o Keriso—o lona uiga, o le loto fuatiaifo po o se lagona autu o le sa’o ma le sese. Ua tuuina mai foi e le Tama Faalelagi i tagata uma le tomai e galulue ai mo i latou lava ma filifili le lelei po o le leaga.
Agasala ma le Oti: O i tatou taitoatasi e agasala, ma o le a feoti uma i tatou taitoatasi.
Iesu Keriso: Ona e alofa le Tama Faalelagi ia i tatou, na Ia auina mai ai Iesu Keriso, Lona Alo, e togiola i tatou mai le agasala ma le oti. Sa puapuagatia Iesu Keriso mo a tatou agasala; sa maliu, ma toetu. Ona o Ia, o le a tatou toetutu ai. Ona o Ia, ua mafai ai ona tatou salamo ma faamagaloina mai i a tatou agasala.
Talalelei a Iesu Keriso: Ua faaali mai e le Tama Faalelagi Lana fuafuaga i perofeta. Ua latou talai le talalelei a Iesu Keriso. E aofia ai le faatuatua ia Iesu Keriso, salamo, papatisoga, mauaina o le meaalofa o le Agaga Paia, ma le tumau e oo i le iuga
Pe A Mavae Le Olaga Lenei
Lalolagi o Agaga: Pe a tatou oti, o le a ola pea o tatou agaga. O le lalolagi o agaga e aofia ai se tulaga o le parataiso (filemu ma le malologa o e amiotonu) ma le falepuipui o agaga.
Faitalia: Ua folafola atu le talalelei a Iesu Keriso i le lalolagi o agaga ina ia maua e tagata uma se avanoa e filifili ai e talia le talalelei.
Toetu: Ona o Iesu Keriso, o le a tatou toetutu uma ai. O le a toe faatasia le agaga ma le tino, ma o tagata taitoatasi o le a ola e faavavau i se tino toetu atoatoa.
Faamasinoga: O le a aumaia tagata uma i le afioaga o le Atua ina ia faamasinoina. O Iesu Keriso o le a avea ma o tatou faamasino.
Malo o le Mamalu: Faatasi ai ma ni nai tuusaunoaga laiti lava, o fanau uma a le Atua o le a mautofi i se malo o le mamalu. O nei malo e tolu ua tā’ua o le selesitila, terasitila, ma le telesitila. Afai tatou te faamaoni, e mafai ona tatou toe foi atu e nonofo i le afioaga o le Atua i le malo selesitila ma maua se atoatoaga o le olioli.
O Le Mana o le Malamalama i le Fuafuaga: Tala a Korianetona
Na tuuina mai e le perofeta o Alema ia i tatou se faataitaiga o le ala e fesoasoani ai se malamalama sili atu i le fuafuaga o le faaolataga ia i tatou e opogi le ala o le Atua i le fiafia, le ala o le salamo (tagai i le Alema 39–42).
Na valaauina Korianetona le atalii o Alema e o ma lona tamā e talai atu i sa Soramā. Ae sa lei amio lelei pea Korianetona e pei ona tatau ai. Na te lei faalogo lelei i lona tama. Sa lē usitai o ia. Sa faamaualuga ma mitamita o ia. Ma sa ia tuuina atu o ia i faaosoosoga ma faia agasala matuia faalefeusuaiga.
Sa i ai ni upu faamaoni a Alema mo Korianetona e uiga i le ogaoga o ana agasala ma le ala na faatiga ai lana amio i a la taumafaiga ia salamo sa Soramā. Ae o le mea sili lava, na aoao e Alema lona atalii e uiga i le fuafuaga o le faaolataga.
Sa i ai ni fesili a Korianetona na faafaigata ai ia te ia ona fesootai i le talalelei. O nisi o ona le malamalama na taitai atu ai o ia e tauamiotonuina o ia lava i ana agasala. Sa faaalu e Alema se taimi e tali ai fesili a lona atalii e ala i le faamatalaina o le fuafuaga o le faaolataga.
Sa mafaufau Korianetona e uiga i le:
-
Valoaga. Aisea na iloa ai le afio mai o Iesu Keriso a o lei taitai ona tupu? Na fai atu Alema e tatau ona muai faailoa atu le fuafuaga ma e mafai e le Atua ona auina mai agelu e folafola atu i soo se taimi—a o lei afio mai po o le mavae ai foi o le afio mai o Keriso. (Tagai i le Alema 39:15–19.)
-
Toetu. O afea o le a toetutu ai tagata? O le a le mea e i le va o le oti ma le toetu? Sa faamatala atu e Alema ia te ia o le a amata ona toetutu tagata pe a mavae le Toetu o Iesu Keriso. Na aoao atu foi Alema e faapea, i le va o le oti ma le toetu, o le a o atu ai agaga o e amiotonu i se tulaga o le filemu ma le malologa, i le vaega lea na ia ta’ua o le parataiso. O agaga o e amioleaga o le a o atu i se nofoaga o le pogisa ma le pagatia. (Tagai i le Alema 40:1–15
-
Salamo. Aisea e manaomia ai ona tatou salamo pe afai e toefuatai mai le agaga ma le tino o tagata uma e ala i le toetu? Sa faamatala atu e Alema ia te ia o le a toetutu tagata uma ma faamasinoina e tusa ma a latou galuega. Afai sa latou faia mea lelei ma mananao i le lelei ma salamo ia latou agasala, o le a toefuatai i latou i le fiafia. Afai sa latou faia mea leaga ma mananao i le leaga, e le mafai ona toefuataiina i latou i lena lava tulaga o le fiafia, auā latou te lei filifilia i lenei olaga. (Tagai i le Alema 41:1–15.)
-
Faamasinoga tonu ma le alofa mutimutivale. E faapefea ona tonu mo le Atua le faasalaina o tagata mo a latou agasala? Na faamatala e Alema e faapea ua vavaeeseina tagata mai le afioaga o le Atua ona o le oti faaletino ma a latou agasala. Ma o le a vavaeeseina i latou e faavavau e aunoa ma Iesu Keriso. Na Ia aumaia le toetu, ma faatoilaloina ai le oti faaletino. Na togiolaina foi o Ia mo a tatou agasala uma. Ae o Lona alofa mutimutivale togiola e le mafai ona faaumatia ai le faamasinotonu, o lea e tuuina mai ai le alofa mutimutivale e na o i latou lava o e salamo. O le salamo o le vaega lea ua Ia faatulagaina ina ia mafai ai e i tatou ona maua le alofa mutimutivale ua avanoa mo i tatou ona o Lana taulaga togiola. (Tagai i le Alema 42:1–28.)
Ia, o le a la le mea na tupu ia Korianetona?
Sa toe valaauina o ia e talai atu. E foliga mai sa ia faalogo i upu a lona tama e uiga i le fuafuga o le faaolataga. Sa salamo o ia ma saili e ola i se olaga amiotonu (tagai i le Alema 63:2).
Ae a la i Tatou?
Pe a manaomia ona tatou salamo (lea—ia tatou faamaoni—o aso uma), e mafai ona tatou mafaufau i le ata o le faaolataga ma suesue i ai. Na ta’ua e Alema o le “fuafuaga o le alofa mutimutivale” (Alema 42:15). O le Togiola a Iesu Keriso mo a tatou agasala ua ofoina mai ai ia i tatou lenei alofa mutimutivale—ao tatou salamo. Atonu la e mafai ona tatou mafaufau i le fuafuaga o le “fuafuaga o le salamo.”
E finagalo lo tatou Tama Faalelagi ia tatou toe foi atu ia te Ia, avea atili e faapei o Ia, ma maua se atoatoaga o le olioli e pei ona Ia maua. O le mea atoa lena e faatatau i ai Lana fuafuaga. Sa tatou filifili e talia lenei fuafuaga ae tatou te lei fananau mai. E mafai ona tatou faataunuuina lenei fuafuaga i le taimi nei e ala i le faatuatua ia Iesu Keriso, salamo, ma osia ma tausia feagaiga.