O Se SootagaMamana
O se feagaiga ua sili atu nai lo se konekarate; o se sootaga.
O loo i ai pea sa’u ata o nofoa lanumeamata sa saofafai ai Elder Pistone ma Elder Morasco, a o la aoaoina lo’u aiga i lo matou fale i Atenitina. Sa la aoao atu ma le mana tele faaleagaga, lea ma te taufetuli ai ma lo’u uso e 10 tausaga le matua e pa’i atu i nofoa pe a la o ese atu, ma le faamoemoe o le a sau le mana i o ma’ua luga.
E le leva ae ou iloaina e lei sau le mana mai nofoa ae mai le i ai o se sootaga faalefeagaiga ma le Atua ma Iesu Keriso.
O Lo’u Aafiaga i le Papatisoga
Sa ou osia la’u uluai feagaiga i le aso 13 o Novema, 1977. Ou te le manatua tele e uiga i lou papatisoga, ae ou te manatua Elder Pistone o fesoasoani mai ia te au i totonu o le vai ma Elder Morasco o loo faamauina au a o susu pea lo’u lauulu. Ou te manatua foi le olioli na ou lagonaina a o tuuina mai e uo fou a le uarota ni opo ma ni sogi i le ala faa Atenitina ma le naunautaiga malosi sa ou lagonaina o se afafine faamaoni o le Tama Faalelagi.
O Sister Spannaus ao talavou (ogatotonu) ma ona matua (agavale), o lona uso o Silvina (taumatau mamao), ma Elder Morasco.
Mulimuli ane, sa ou iloaina o le olioli na ou lagonaina na sau mai le meaalofa o le Agaga Paia. Sa ou aoaoina a o ou tausia ma le faamaoni a’u feagaiga ma le Atua, o le a faatasi le Agaga ma a’u. O le Agaga Paia ua na o se tasi o faamanuiaga mamana e sau mai se sootaga faalefeagaiga ma le Atua ma Iesu Keriso.
O le taimi nei, e tusa lava pe le atoatoa o’u faamoemoega, mafaufauga, ma faatinoga, ua ia te a’u le faamoemoe e taumafai pea. Aisea? Ona o le ‘ai ma inu i le faamanatuga ua mafai ai ona ou faafouina a’u feagaiga ma osia feagaiga fou i vaiaso taitasi. Ou te matuā loto faafetai mo lena faamanuiaga.
O Se Sootaga Mafanafana, Faalefeagaiga
E masani ona tatou faalogo o feagaiga o ni folafolaga e lua itu i le va o i tatou ma le Atua. E ui e moni lena mea, ae e le na o le pau lea o le mea. O le mea moni, “o le tausia o feagaiga e le o se fefaatauaiga lē anoa (le faapitoa), ae o se sootaga mafanafana.”
E faapefea la ona e fatuina se sootaga faalefeagaiga ma le Tama Faalelagi ma le Faaola? Ua uma ona La alolofa atoatoa ia te oe ma mananao e faamanuia oe (tagai i le 3 Nifae 14:11). Ae o soo se sootaga e lua itu e alu ai le taimi ma le alofa mai itu uma e lua.
E te manao e faaalu se taimi tele ma i La’ua? Pe a e faia mea o le a La faia, o loo outou savavali faatasi ma i La’ua! Atonu e faigofie lena mea e pei o le faalogo atu i se uo i se taimi faigata, faaavanoa se taimi e taaalo ai ma se tei, po o le faaaofia ai o se tasi o lagona le tuulafoaiina. Talu ai nei, sa ou faaaluina ai se taimi e savavali faatasi ai ma le Atua e ala i le faamaumauina o fe’au po’o sāvali leo, ma auina atu tesi i se uo i Atenitina o le sa lagonaina le tuuatoatasi. Ua ou filifili foi e tausia pea le aoga o la’u pepa faataga o le malumalu ina ia mafai ai ona ou faaaluina le taimi faatasi ma le Alii i Lona maota paia. E mafai ona e tatalo mo ni manatu o le a fesoasoani ia te oe e faaalu ai le taimi faatasi ma le Tama Faalelagi ma lou Faaola.
E te manao e faaali atu ia i La’ua e te alofa? Taulimaina poloaiga ua e osifeagaiga ai, e tausia o se auala e faailoa atu ai lou alofa, ae le o se lisi o tulafono. Mo se faataitaiga, ina ia ola i le Upu o le Poto, sa ou aoao ai le auala e kuka ai meaai paleni ma soifua maloloina ai. O lea la ua ou aoaoina la’u fanau teine ia faia foi faapea. A o e tausia ma le loto i ai poloaiga a le Atua, o le a tuputupu ae lou alofa mo Ia ma le Faaola.
O a tatou sootaga faalefeagaiga ma le Tama Faalelagi ma Iesu Keriso o le a fesoasoani tatou te iloa atili ai i La’ua ma maua atili ai lo La’ua mana i o tatou olaga—e sili atu nai lo se isi lava mea e ofoina mai e se seti o nofoa lanumeamata. Ma o lena mana e suia ai i tatou e faavavau!