Inu Lēmani Palāsilá pea mo e Ngaahi ʻAhiʻahi ʻo e Moʻuí
ʻOku ʻikai ke faʻa hoko maʻu pē ʻa e meʻa ʻokú ke fakaʻamua ʻi he moʻuí. Ko e hā leva ʻa e meʻa te ke faí?
Inu Lēmani Palāsila Foʻou, ko e fakaʻilongqa ia ʻoku tohi ʻi tuʻa ʻi he māketí. Hili ha kiʻi maʻanga ʻaisikilimi ifo ʻe taha, naʻe pau ke u foki ki ʻapi ʻo ngaohi haku inu pehē.
Naʻá ku fakakaukau ne u ʻilo e meʻa ke u ʻamanaki ki aí: ʻa e suká, vaí, ʻaisí, pea mo e lēmaní, ko ia? (Ko hono moʻoní, ʻi he lea faka-Pilitāniá, ko e hingoa ʻo e inú ʻoku kau ʻa e lēmaní ai.)
Ka ʻi heʻeku kumi ʻi he ʻinitanetí ʻa e founga feimeʻatokoni faka-Palāsilá, naʻá ku ʻohovale ʻi hono ʻiloʻi ko e laimi ka ʻoku ʻikai ko e lēmani naʻá ku ʻamanaki ki aí. Naʻe ʻikai ko e meʻa ia naʻá ku anga ki aí!
Ko e Ngaahi Meʻa ʻOku Fie maʻu ki he Moʻuí
ʻOku kehe ʻa hono fakakau ha ngaahi meʻa taʻe-ʻamanekina ki ha ngaohi meʻatokoní, kae fēfē ʻa e taimi ʻoku ʻoatu ai ʻe he moʻuí kiate koe ha faingataʻaʻia taʻe-ʻamanekina pe ʻikai fakafiemālié? Fakakaukau ki he tūkunga ko ʻení: ʻokú ke fai ho lelei tahá ke fai ʻa e ngaahi fili māʻoniʻoní, pea ʻoku lele lelei ʻa e ngaahi meʻá. ʻOkú ke fakakaukau ko e ngaahi meʻa ʻoku fie maʻu ki hoʻo moʻuí ʻoku ala kau ki ai ʻa e ngaahi meʻá ni:
-
Ngaahi Tāpuakí
-
Ngaahi kaungāmeʻa tuʻuloa
-
Ko ha fāmili ʻofa
-
Fakahoko ha ngāue fakafaifekau lelei ʻaupito
-
Maʻu ʻa e ngāue naʻá ke fakaʻamuá
Ka ʻi he hoko atu hoʻo fonongá, te ke toe ʻiloʻi foki ʻoku tuifio atu ai mo e ngaahi meʻá ni:
-
Ngaahi ʻAhiʻahí
-
Ngaahi feohi fakakaungāmeʻa ʻoku motuhia taʻe-ʻamanekiná
-
Fāmili ʻoku faingataʻaʻia
-
Ko ha ngāue fakafaifekau mātuʻaki faingataʻa moʻoni
-
Ko e ngaahi lotu ʻoku ʻikai ke talí
Naʻá ke fai nai ha meʻa ʻoku hala? Kuo maumauʻi nai ʻa e moʻuí? ʻOku totonu nai ke ʻoua te ke toe hoko atu ʻi he taumuʻa naʻe palani ke fakahokó (mo hoʻo tuí kae fai ha meʻa kehe) koeʻuhí he ʻoku ʻikai hoko ʻa e ngaahi meʻá ʻi he founga naʻá ke ʻamanaki ki aí?
Tuku Hoʻo Falalá ki he ʻOtuá
ʻIkai! Ako mei he sīpinga ʻa e kau tau kei talavou ʻe toko 2,000. Neongo naʻa nau moʻui angatonu mo honau ngaahi fāmilí, ka naʻa nau kei fehangahangai pē mo e taú, mavahe mei honau ngaahi fāmilí, mo lavelavea lalahi. ʻOku pau pē naʻe ʻikai ko e meʻa ia naʻe ʻamanaki atu ki ai ʻa e kau talavou loto-toʻa ko ʻení.
Ka neongo iá, naʻa nau kei pehē pē, “ʻOku ʻiate kitautolu ʻa hotau ʻOtuá” (ʻAlamā 56:46). ʻI he taimi naʻa nau tukuange ai ʻenau ngaahi fie maʻú, kae falala ki he ʻOtuá, pea laka atu ki muʻa ʻi he tuí, naʻá Ne liliu ʻa e “ngaahi faingataʻa” taʻe-ʻamanekina ʻo ʻenau moʻuí ke hoko ko ha ngaahi tāpuaki. Pea te Ne fai ʻa e meʻa tatau maʻau.
Ko ia ai ka ʻikai ke hoko mai ʻa e meʻa naʻá ke fakaʻamuá kae hoko mai ha meʻa ia naʻe ʻikai ke fie maʻu, ʻoua pē muʻa ʻe loto-foʻi. Pea hangē pē ko hono akoʻi ʻe he ʻEikí ʻa Siosefa Sāmitá, “ʻe foaki ʻe he ngaahi meʻá ni kotoa pē ʻa e potó kiate koe, pea ʻe hoko ia ʻo ʻaonga kiate koe” (Tokāteline mo e Ngaahi Fuakavá 122:7). Tatau ai pē pe ko e hā ʻa e meʻa ʻe hokó, ʻe kei fakafiefia pē ʻa e moʻuí, koeʻuhí he ʻoku ʻi ho tafaʻakí ʻa e ʻOtuá. (Mahalo ʻe ifo tatau pē ia mo e inu lēmani Palāsilá.)