Fai Lelei ʻi Pālesi
ʻOku fakahaaʻi ʻe he ongo ākonga ko ʻení ʻa e anga ʻo ʻena muimui ki he Fakamoʻuí.
Ngaahi laʻitā ʻa Christina Smith
ʻI he lahi fau ʻa e ngaahi faingataʻá pea mo e fie maʻu tokoni ʻa e kakai ʻi he māmaní, ʻokú ke fifili nai pe ʻoku ʻi ai ha meʻa te ke lava ʻo fai ke tokoni ai ke fakahoko ha meʻa makehe?
Lolotonga ʻa e ngāue fakafaifekau ʻa Sīsū ʻi he māmaní, naʻá Ne “faʻa feʻaluʻaki ʻo fai lelei” (Ngāue 10:38). ʻI hoʻo hoko ko ʻEne ākongá, te ke lava ʻo muimui ʻi Heʻene sīpingá pea fai ʻa e meʻa tatau. ʻIo! ʻOku lahi ha meʻa te ke lava ʻo fai ke fakahoko ai ha meʻa makehe.
Ko e meʻa ia kuo ʻilo ʻe ʻElati, taʻu 14, mo Maika taʻu 12, mei Pālesi, Falanisē. Ko ha ngaahi founga ʻeni ʻe niʻihi ʻoku nau muimui ai kia Sīsū Kalaisi mo “faʻa feʻaluʻaki ʻo fai lelei” kiate kinautolu ʻoku nau feohí.
Tokanga Taha kiate Kinautolu ʻoku Faingataʻaʻiá
ʻOku pehē ʻe ʻElati, “ʻOku fakafalala maʻu pē ʻa e ākonga ʻa Kalaisí ki he Fakamoʻuí.” “ʻOku ʻofa ʻa e ākonga ʻa Kalaisí ʻiate Ia pea ʻokú ne houngaʻia ʻi he meʻa kuó Ne fai maʻanautolú. ʻOku feinga ʻa e ākonga ʻa Kalaisí ke molomolomuivaʻe ʻiate Ia.”
ʻOku muimui ʻa ʻElati ʻi he Fakamoʻuí ʻaki ʻene “femoʻuekina ʻi he holi lahi ʻi ha ngāue lelei” (Tokāteline mo e Ngaahi Fuakava 58:27). ʻOku pehē ʻe ʻElati, “ʻOku ou fokotuʻutuʻu mo hoku ngaahi kaungāmeʻá ha ngaahi polokalama ke tānaki ha paʻanga maʻá e kakai masivesivá pe ngaahi fonua ʻoku faingataʻaʻiá. ʻOku fakamoleki ʻa e paʻangá ki hono fakatau ha vala, ʻū tohi, meʻa vaʻinga, ngaahi meʻa ki he haisiní, mo ha meʻakai. ʻOku mau toe ʻai foki ke ʻilo ki ai ʻa e kakai ʻoku ʻikai ke nau ʻilo ki he meʻá ni ʻo sio pe te nau loto ke fai ha tokoni. ʻOku mau feinga ke tuʻu ʻaliʻaliaki mo tokoniʻi ʻa e kakai kehé.”
ʻI he faʻahitaʻu fakatōlau ʻo e 2022, naʻe tokoni ai ʻa ʻElati mo hono ngaahi kaungāmeʻá ki ha kautaha tokoni ʻofa ʻi Falanisē ʻa ia ʻoku tokoni ki he kakai fefine ʻoku faingataʻaʻia ke maʻu haʻanau ngāué pe fiemaʻu ha tokoni maʻa honau ngaahi fāmilí. Naʻa nau fakahoko ha fakaʻaliʻali vala ke tānaki ha paʻanga. Naʻa nau foaki ʻa e paʻangá ki he kautahá mo e fakatuʻamelie te ne tokoniʻi ʻa e houʻeiki fafine ʻoku faingataʻaʻiá mo fai ha meʻa makehe ʻi heʻenau moʻuí.
ʻOku pehē ʻe ʻElati, “ʻOkú ne ʻai ke u ongoʻi fiefia ʻi heʻeku lava ʻo liliu ha meʻa naʻe fehālaaki ki ha taha kehe. ʻOku fakafiefia foki ke ngāue fakataha mo e kakaí ʻo feinga ke ʻiloʻi ʻa e founga ke fakakau mai ai mo ha niʻihi kehe pea tokoni ke nau ʻiloʻi te nau lava ʻo kau mai mo fai ha liliu.”
Hoko ko ha Kaungāmeʻa
ʻOku pehē ʻe Maika, “ʻOku tukulotoʻi ʻe he ākonga ʻa Kalaisí ʻa Kalaisi ʻi honau lotó mo ʻenau moʻuí. ʻOku nau feinga ke hangē ko Iá.”
ʻOku hoko ʻa Maika ko ha tokotaha fakataukei ʻi hono ʻapiakó. ʻOku tokoni ʻa e tokotaha fakataukeí ki he fānauako foʻoú. ʻOku nau fakahoko ha takimamata ʻi he ʻapiakó, fakaʻaliʻali ʻa e founga ʻoku fakaʻaongaʻi ai ʻa e naunau fakalēsoní, mo tokoniʻi ʻa e kau ako foʻoú ke nau lata.
ʻOku pehē ʻe Maika, “Naʻá ku tokoniʻi ha taha ʻo hoku ngaahi kaungāmeʻá ʻi heʻene fuofua hū mai ki homau ʻapiakó. Lolotonga ʻa e maʻumeʻatokoni hoʻataá, naʻá ne fai mai ha ngaahi fehuʻi kau ki he ʻapiakó pea naʻá ku tali ʻene ngaahi fehuʻí. Naʻá ku feinga ke ne ongoʻi fiemālie. ʻOku fakafiefia ke tokoni ki ha ngaahi kaungāmeʻa ʻoku nau ongoʻi taʻelata, loto mamahi, pe tuenoa. ʻOkú ne ʻai ke u ongoʻi ʻoku ou hoko ʻo hangē ange ko Sīsū Kalaisí.”
ʻI he hokosia ʻa e taimi ke papitaiso ai ʻa Maika ʻi he ngaahi taʻu lahi kuo hilí, naʻe ʻeke ange ʻe heʻene faʻeé pe ko hai ʻokú ne loto ke fakaafeʻi mai ki hono papitaisó. Naʻe fakaafeʻi ʻe Maika ha ngaahi kaungāmeʻa ʻe toko fitu, pea naʻa nau haʻu kotoa! ʻOkú ne pehē, “Naʻá ku fiefia ʻi hono poupouʻi au ʻe he taha kotoa pē.”
ʻI he ngaahi ʻaho siʻi hono hokó, naʻe ʻeke ʻe he ngaahi kaungāmeʻa ʻo Maiká fekauʻaki mo hono papitaisó pea mo e Siasí. Naʻe pehē ʻe Maika, “Naʻá ku haʻu mo e folofolá ʻo talanoa mo kinautolu fekauʻaki mo e Siasí. Naʻe fakalata moʻoni ʻeku fakahā kiate kinautolu ʻa e mahuʻinga ʻa e Siasí kiate au mo hoku fāmilí.”
Ko Hono Maʻu ʻo ha Mālohi ke Fai Leleí
ʻI hono manatuʻi mo muimui ʻa ʻElati mo Maika ʻi he Fakamoʻuí, naʻá na maʻu ai ha mālohi ke fai lelei.
ʻOku pehē ʻe ʻElati, “ʻOku tokoniʻi moʻoni au ʻi he falala kia Sīsuú. ʻI Heʻene tokoniʻi aú, te u lava ʻo vahevahe ʻa e ongoongoleleí, feohi mo e fāmilí, fakatupulaki ha ngaahi vā fetuʻutaki, kau ʻi he ngaahi ʻekitivitī ʻa e toʻu tupú, fakatupulaki ʻeku fakamoʻoní, teuteu ke ngāue fakafaifekau, pea hokohoko atu hono tānaki ʻo ʻIsilelí.”
ʻOku toe maʻu foki ʻe Maika ha mālohi ʻi heʻene hoko ko ha ākonga ʻa Kalaisí. ʻOku pehē ʻe Maika, “Kapau ʻoku ʻikai ke u fakapapauʻi ʻa e meʻa ke fai ʻi ha ngaahi tūkunga pau, ʻoku ou fehuʻi loto pē kiate au pe ko e hā ʻa e meʻa naʻe mei fai ʻe he Fakamoʻuí. Kapau ʻe fai ia ʻe he Fakamoʻuí, ta ʻoku totonu ke u fakahoko foki ia.” Kimuʻá, naʻá ku fuʻu mā ʻaupito ke fakahā ki ha taha ʻeku tui fakalotú. Naʻá ku fakakaukau, ‘ʻOi, te nau manumanukiʻi au.’ ʻOku hanga ʻe he ʻalu ki he lotú, ʻalu ki he temipalé, mo tokoniʻi ʻa e niʻihi kehé ʻo ʻai ke ʻiloʻi lelei ʻe hoku ngaahi kaungāmeʻá ʻa hoku tuʻunga totonú.”
ʻOku fakamanatu mai ʻe ʻElati “naʻe foaki ʻe Sīsū Kalaisi Hono taimí kotoa, ʻEne ngāué kotoa, mo ʻEne ʻofá kotoa maʻá e niʻihi kehé.” Kuo tokoniʻi ʻa ʻElati ʻi ha ngaahi founga lahi ʻi hono manatuʻi ʻení. ʻOkú ne pehē, “ʻI he taimi ʻoku ou fokotuʻutuʻu ai mo hoku ngaahi kaungāmeʻá ʻa e ngaahi kautaha tokoni ʻofá, ʻoku mau feinga ke fakakaukau ki he meʻa naʻe fai ʻe Sīsū ʻi hono kotoa ʻo ʻEne moʻuí. ʻOku tau fai ʻa e meʻa naʻá Ne mei fakahokó kapau naʻá Ne ʻi heni. ʻOku fakamanatu mai ʻe he meʻá ni ko ha ākonga au ʻa Kalaisi.”
Ko Sīsū Kalaisi “ʻa e mālohinga ʻo e toʻu tupú.’” ʻOku ʻuhinga ia ko Ia ho mālohí. Te Ne fakamālohia koe ʻo hangē pē ko ʻEne fai ia kia ʻElati mo Maiká. Koeʻuhí ko Ia, te ke “lava ʻo faʻa fai ʻa e ngaahi meʻa kotoa pē” (Filipai 4:13) pea feʻaluʻaki ʻo fai ha “fuʻu lelei lahi” maʻa ho ngaahi kaungāmeʻá, fāmilí, pea mo e niʻihi kehe ʻoku mou feohi.