Ngaahi Fehuʻí mo e Talí
“ʻOku ʻikai te u hoko ko e lelei taha ʻi ha faʻahinga meʻa pē. ʻE fēfē ʻa e hokohoko atu ʻeku feingá ʻo ʻikai ke loto-foʻi?”
“ʻOua pē ʻe loto-foʻi! ʻOku ʻikai ha taha ʻe hoko ko e lelei tahá ʻi ha faʻahinga meʻa pē ʻi he fuofua taimí. Mahalo te ke ako ia ʻi ha lau māhina pe lau taʻu. ʻI he kamata ʻeku tā pianó ʻi he taʻu ʻe fitu kuohilí, naʻe ʻikai ke u lava ʻo tā ha foʻi hiva faingofua ʻoku foʻi nota pē ʻe tolu. ʻOku ou hoko ʻi he taimí ni ko ha tokotaha tā piano fakalakalaka! Te ke lava ʻo kole ha tokoni mo ha mālohi meia Sīsū Kalaisi.”
Toutiseni S., 12, ʻIutā, USA
“Feinga ke falala ki he ʻEikí. Te Ne ʻi ai maʻu pē ʻo tokoniʻi koe ke ke lavameʻa. Fokotuʻu ha palani ki he ngaahi meʻa ʻokú ke loto ke fakahokó pea fiefia ʻi he fanga kiʻi meʻa iiki ʻokú ke faí. Hiki hoʻo ngaahi lavameʻá pea te ke ʻiloʻi ai hoʻo tupulakí. Faʻa kātaki, fai ho lelei tahá, pea ʻiloʻi ʻoku ʻi ai ha palani ʻa e Tamai Hēvaní maʻa ʻEne fānaú.”
ʻUnana A., 21, ʻAkiuā ʻAipomu, Naisīlia
“Te ke lava ʻo kole tokoni ki hoʻo Tamai Hēvaní. Te Ne tokoniʻi koe koeʻuhí he ʻokú Ne ʻofa ʻiate koe. ʻOku faingataʻa ʻa e moʻuí, ka ʻi Heʻene tokoní, te ke lava pē ʻo fai ha faʻahinga meʻa.”
Teila W., 14, Tekisisi, USA
“Ko e feingá, ko e konga ia ʻo e palani ʻa e ʻOtuá. ʻOku lahi ʻa e taimi ʻoku ʻikai ke tau lava ai ʻo fai ʻa e ngāué, ka ʻoku lava ke tau ako mei he ngaahi meʻa ʻoku tau feinga ke faí. Naʻe talamai ʻe Palesiteni Lāsolo M. Nalesoni kiate kitautolu ʻi ha konifelenisi ʻe taha ke ʻoua naʻa tau manavasiʻi ʻi he nofo taʻelatá, pea naʻe tokoni ia kiate au ʻi he taimi ʻoku ou feinga ai ke fai ha meʻa pea ongoʻi hangē he ʻikai ke u malava ʻo fai iá.”
Konisalo C., 18, Lisiponi, Potukali
“Lolotonga ʻeku ngāue fakafaifekaú, naʻá ku ako ʻa e lea faka-Pilitāniá ko ha lea fakafonua fika ua. ʻI he kamakamata maí, naʻá ku loto-foʻi koeʻuhí he naʻe ʻikai ke u lava ʻo ako lelei ia. ʻI ha ʻaho ʻe taha, naʻá ku manatuʻi ha pōpōaki meia Palesiteni Lāsolo M. Nalesoni: ‘ʻOku hōifua ʻa e ʻEikí ki he ngāué.’ Naʻá ne ueʻi hoku lotó mo kei fakaʻaiʻai pē ke hokohoko atu ʻeku ako iá.”
Tieko M., 19, Mekisikou Siti, Mekisikou