ʻAi Hangatonu
Te u tali fēfē nai ki he kakai ʻoku nau fakaangaʻi ʻa e Siasí?
ʻI he taimi ʻoku fakaangaʻi ai ʻe he kakaí ʻa e Siasí, “kamata ʻaki hono fakapapauʻi ko hoʻo ngaahi leá mo e tōʻongá ʻoku ueʻi hake ia ʻe he ʻofa ki he ʻOtuá mo ʻEne fānaú” (Ki Hono Fakamālohia ʻo e Toʻu Tupú: Ko ha Fakahinohino ki Hono Fai ʻo e Ngaahi Filí [2022], 33). Tokanga taha ki he ngaahi ʻulungaanga fakalangi ʻo Sīsū Kalaisí. Maʻu ʻa e tuí, ʻamanaki leleí, faʻa kātakí, mo e ʻofá kae pehē ki he ʻiló, potó, mo e manavaʻofá.
Makehe mei aí, ʻoku ʻi ai ha ongo fehuʻi ke ʻeke pē kiate koe:
Ko e hā ʻoku nau fakahoko ai iá? ʻE tokoni hono ʻiloʻi ʻa e meʻa ʻokú ne fakalotolahiʻi ʻa e kakaí ke ke ʻiloʻi ai ʻa e founga ke fai ʻaki ha tali. ʻOku nau fekumi moʻoni nai ki he moʻoní ka kuo nau maʻu ha ngaahi fakamatala ʻoku ʻikai ke moʻoni? ʻOku nau feinga nai ke maʻu ha tali mo fakatupu ha fakakikihi? ʻOku nau feinga nai ke maluʻi ʻenau tuí ʻaki hono ʻohofi ʻetau tuí?
Ko e hā ha faʻahinga tali ʻe tokoni lelei taha kiate kinautolu pe ko e niʻihi kehé? Fekumi ki he tataki ʻa e Laumālie Māʻoniʻoní. ʻI ha ngaahi tūkunga ʻe niʻihi, mahalo ko e lelei tahá ke ʻoua naʻá ke fai ha tali. ʻOku ʻi ai ʻa e taimi ʻe niʻihi ko e meʻa pē ʻoku fie maʻu ke ke faí ko hono vahevahe hoʻo fakamoʻoní mo fakahaaʻi ʻa e ʻofá. ʻI ha taimi ʻe niʻihi, mahalo ko e lelei tahá ke fai ha tali ʻoku fakaʻaulilikí. Kapau ko ia, manatuʻi ke: “Taukaveʻi hoʻomou tuí ʻaki ʻa e fakaʻapaʻapa mo e anga ʻofa, ka ke mou taukaveʻi kinautolu” (Jeffrey R. Holland, konifelenisi lahi ʻo ʻEpeleli 2014 [Ensign pe Liahona, Mē 2014, 9]).