’A haere nā roto i te māramarama o te Fa’aora
’A haere mai ai ’oe ia Iesu Mesia ’e ’a tātarahapa ai, e arata’i tōna mana fa’aora ’e tōna mana pūai ia ’oe i rāpae i te pōiri.
I ni’a i te hō’ē terera’a roa ’o tā’u i rave ’ei tāpena manureva, ’ua fa’aru’e atu vau ia Heremani i te hora 11:00 ’e ’ua tāpae atu i Califonia i te hora 13:00, i te reira ihoā mahana. ’Ia fa’aauhia i te hora revara’a ’e te hora tāpaera’a, e au ra e roa’ahia e piti noa hora te rerera’a nā ni’a i te Moana Ataranetita ’e te fenua Amerika apato’erau.
Mea vitiviti te tere o te Boeing 747, e ’ere roa rā i te mea tere roa te reira ! Te ti’ara’a mau, ’ua rave te terera’a fātata roa e 11 hora te maoro, tei te huru o te mata’i, nō te tere e 9 000 km.
Nō te mea tē rere ra mātou nā te pae tō’o’a o te rā, ’aita roa te mahana i tape i roara’a o tō mātou tere. ’Ua fana’o mātou i te māramaramara’a o te ao mai Heremani ē tae atu i Califonia. Terā rā, te ho’ira’a mai i Heremani, e ’ā’amu ta’a ’ē roa atu ïa te reira. ’A rere ai mātou nā te pae hiti’a o te rā, ’ua tae vitiviti roa mai te tapera’a mahana i tei mātauhia, ’e hou mātou ’a ’ite ai i te reira, ’ua tae mai te ru’i i ni’a ia mātou.
’Oia ato’a te rerera’a i te ru’i, i roto i te pōiri rahi, ’ua ’ite pāpū maita’i vau ē tē vai tāmau noa ra te mahana, te ’āueue ’ore ’e te pāpū. ’Ua ’ite maita’i au ē i te hope’a e hiti mai ihoā te mahana, ’e e ho’i fa’ahou mai te māramarama ’ana’ana nō te hōpoi mai i te māhanahana ’e te ora i te hō’ē mahana ’āpī, hou ’a hope ai tō mātou tere.
I te tahi taime, e au ra te mau mea ’ati a’e ia tātou e mea pāpū ’ore, te mana’o-’ore-hia ’e te pōiri ta’ota’o. ’Auē ïa tō’u māuruuru ia Iesu Mesia. ’O ’oia te māramarama ’e te ora o te ao nei. Maoti ’oia, e tīa’ira’a tō tātou nō ananahi, te roa’ara’a i tōna māramarama hanahana ’e te fafaura’a nō te upo’oti’ara’a hope’a i ni’a i te hara ’e te pohe.
Te here ’e te mana o te Fa’aora
Nō tōna here ia tātou, ’ua hōro’a Iesu Mesia i tōna ora nō te mau tamari’i ato’a a te Atua ’e ’ua ’īriti i te ’ūputa nō te tāhuti ’ore ’e te ora mure ’ore.
Noa atu te mea tā Sātane e hina’aro ra ’ia ti’aturi ’oe, ’aita ’oe i ’ere i te ti’ara’a o te Fa’aora nō te fa’aora ia ’oe. ’Aita roa ’oe i ’ere « ’ua ha’ati-noa-hia [’oe] ē a muri noa atu e nā rima o tōna ra aroha » (2 Nephi 1:15).
Teie hōro’a rahi roa a’e o te mau hōro’a ato’a nō ’ō mai i te mana fa’ati’a ’e te fa’aorara’a o te tāra’ehara a Iesu Mesia. Maoti te mamae o te Fa’aora i Getesemane ’e i Golagota, ’ua ’ite ’oia e nāhea i te tauturu ia ’oe i roto i te mau fifi ato’a tā ’oe e fa’aruru nei (hi’o Alama 7:11–12).
’Ua parau te peresideni Russel M. Nelson : « I te taime te Fa’aora [’a pupu ai teie tusia tāra’ehara] nō te mau ta’ata ato’a, ’ua ’īriti ’oia i te hō’ē ’ē’a e ti’a i te feiā e pe’e iāna ’ia fāri’i i tōna mana fa’aora, te pūai ’e te ora ».
Te reira mana, mai te mahana, e vai tāmau noa mai. E’ita roa te reira e ’āueue. Te pe’era’a i te ta’ahira’a o te Fa’aora, mai te haerera’a mai ïa i rāpae i te marumaru ’e te haerera’a atu i te māramarama o te mahana, i reira e nehenehe ai e fāri’i i te mau ha’amaita’ira’a o te māramarama, te māhanahana ’e te here o te Atua.
Hō’ē ha’amatara’a ’āpī ’ana’ana maita’i
Tē fa’ati’a nei te Buka a Moromona mea nāhea te mau ’āti Nephi i te fa’aeara’a e toru mahana i roto i te pōiri hōhonu roa i muri a’e i te fa’asātaurora’ahia te Fa’aora. Tē fa’ahōho’a nei te pōiri pae tino ’ati a’e ia rātou i te pōiri pae vārua ’o tē tupu nei i ni’a ia tātou nō te hara. I muri iho, ’ua fa’aro’o rātou i te reo o te Mesia i te anira’a ia rātou ’ia haere mai i rāpae i te pōiri ’e ’ia tomo mai i roto i tōna māramarama :
« ’Aita ānei ’outou e fāriu mai iā’u i teienei, ’e ’ia tātarahapa ho’i i tā ’outou mau hara, ’e ’ia fa’afāriuhia mai, ’ia fa’aorahia ’outou e au ra ? » (3 Nephi 9:13).
« E pūpū mai ’outou ia’u nei i te tusia nō te ’ā’au ’oto ’e te vārua tātarahapa » (3 Nephi 9:20).
« e tātarahapa ’outou ’e e fāriu mai iā’u nei ma te ’ā’au hina’aro mau » (3 Nephi 10:6).
Tē fa’atae mai nei te Fa’aora i te reira ā mau anira’a manihini ’ia ’ite ana’e ’oe ē, ’ua mo’e ’oe i roto i te pōiri. Mai te hitira’a mahana tāta’itahi e tāpa’o nei i te ha’amatara’a o te hō’ē mahana ’āpī, i te mau taime ato’a e tātarahapa ai ’oe, e fāri’i ’oe i te hō’ē ha’amatara’a ’āpī, hō’ē ha’amatara’a ’āpī ’ana’ana maita’i.
Maoti tā ’oe tātarahapara’a mau, e « mono Iesu Mesia i tō ’oe fa’ahapara’a i te hau ’e te ’oa’oa. E’ita ’oia e ha’amana’o fa’ahou i tā ’oe mau hara. Maoti tōna pūai, e mara’a mai tō ’oe hia’ai ’ia ha’apa’o i tāna mau fa’auera’a ».
I te taime ’a rave ai ’oe i te ta’ahira’a mātāmua nō te tātarahapa, e ha’amata te Fa’aora i te « taui i tō ’oe ’ā’au ’e tō ’oe orara’a ». Ma’a vāhi iti ’e ma’a vāhi iti, e tupu ’oe i te rahi ’e e riro rahi atu ā ’oe mai iāna ra te huru » ’e e « hōpoi mai ’oia ’ia noa’ara’a rahi a’e ia ’oe tōna mana ».
’Ite mai i te fa’aorara’a tāmau
’O te Fa’aora te Fatu o te Ora. Hō’ē o te mau fa’a’itera’a nehenehe roa a’e o tōna mana fa’aora, tei roto ïa i tāna iho tāvinira’a i roto i te Buka a Moromona :
« Tē vai ra ānei te feiā ma’i i rotopū ia ’outou ? » Tāna ïa uira’a. « E feiā ro’ohia ānei i te tahi atu mau huru ’ati ? ’A hōpoi mai ia rātou i’ō nei, ’e e fa’aora vau ia rātou, e aroha ho’i tō’u ia ’outou na. …
« ’Ia oti a’era tāna paraura’a atu, ’ua haere mai ra te mau ta’ata ato’a, ma te ’ā’au hō’ē, ’e ’ua haere atura … ; ’e ’ua fa’aora ’oia ia rātou tāta’itahi ’a hōpoihia mai ai rātou iāna ra » (3 Nephi 17:7, 9).
I te mau taime ato’a ’a fa’aora ai te Fa’aora i te hō’ē ta’ata, hou a’e ’e i muri a’e i tōna ti’afa’ahoura’a, ’ua fa’a’ite pāpū ’oia i tōna mana hope nō te fa’aora i tō tātou vāerua. E fa’a’ite te fa’aorara’a temeio tāta’itahi i tāna fafaura’a nō te fa’aorara’a tāmau i te pae tino ’e i te pae manava, i te taime o te ti’afa’ahoura’a.
I te tahi taime, e’ita tā ’oe mau pure nō te fa’aorara’a e pāhonohia mai tā ’oe e tīa’i ra, ’aita roa rā te reira i tau’a-’ore-hia. E tae mai iho ā te taime nō te fa’aorara’a mai te au i te rāve’a ’e i taime a te Metua i te ao ra, mai te pōiri o te pō ato’a e mono mai iho ā i te hitira’a o te mahana hanahana.
E tō’u hoa here, tē fa’a’ite pāpū nei au ē, ’o Iesu Mesia te Fa’aora i roto i teie orara’a ’e i roto i te tau mure ’ore. ’Ua nava’i tōna aroha nō te fa’aora i tō ’oe mau pēpē, nō te tāmā i tā ’oe hara, nō te ha’apūai ia ’oe i roto i te mau tāmatara’a, ’e nō te ha’amaita’i ia ’oe i te tīa’ira’a, te pa’ari ’e te hau. Tē vai noa nei ā tōna mana—te tāmau ’e te pāpū—noa atu i roto i te tahi taime, tē mana’o nei ’oe ’ua ātea ’oe i tōna here, i tōna māramarama ’e i tōna māhanahana.
E ti’a ia ’oe ’eiaha roa ’ia mo’e i tō ’oe nino’a mana’o fa’atura ’e tō ’oe māuruuru rahi nō te mau mea ato’a tā Iesu Mesia i rave nō ’oe. ’Ia ’ite mai ’oe ē ’ua here-maita’i-hia ’oe. ’A ha’amana’o i te mau mea tei fafauhia ia ’oe ē a muri noa atu. ’E « ’ia ha’amāmā mai te Atua i tā [’oe] mau hōpoi’a, nā roto i te ’oa’oa o tāna ra Tamaiti », Iesu Mesia (Alama 33:23).