Vāvāhi i te ’ohura’a o te hōho’a faufau
’Ua putapū vau i te ’ōtahira’a ’e te tauturu ’ore. ’Ua fa’aha’amana’o mai rā tō’u ’episekōpo iā’u i te tahi mau tāviri, nō te ’ite mai i te tīa’ira’a ’e te tauturu.
Fa’ahōho’ara’a nā Sue Teodoro
Te taime mātāmua i fa’a’itehia mai ai iā’u te hōho’a faufau i te 13ra’a ïa o tō’u matahiti. ’Ua ’ite-hape-hia mai iā’u te reira i ni’a i te rāve’a tūreiara’a tōtiare, ma te ’ite ’ore e aha te reira ’e ma te māramarama ’ore. ’Ua haere atu vau nā roto i te fa’a’ite’itera’a-tītau-’ore-hia ’e te ’ānoenoe i te ’imira’a i te reira.
I taua tau ra, e au ra te mau poro’i a tō’u feiā fa’atere nō ni’a i te hōho’a faufau, e parau ra ïa ē ’o te mau tamāroa ana’e tē fa’aruru nei i te reira fifi. ’Ua fa’atupu te reira i te ha’amā rahi i roto iā’u. ’Ua mana’o vau e’ita roa atu e nehenehe iā’u e paraparau i te hō’ē ta’ata i tō’u ’arora’a. ’Ua ’ite au i te tāra’ehara a Iesu Mesia, nō te mea rā tē mana’o nei au ’o vau ana’e te tamāhine i roto i teie ’arora’a, e au ra iā’u e’ita tā te Fa’aora e nehenehe e tauturu iā’u. Mai te huru ra e mea ta’a ’ē roa vau.
Te piha tōro’a a te ’episekōpo
I roto i taua mau matahiti ra, i roto i te mau vāhi mai te séminaire ’aore rā te mau purera’a—i te mau vāhi ato’a tei reira te Vārua—pinepine au i te tura’ihia ’ia fa’anaho i te hō’ē fārereira’a ’e tō’u ’episekōpo. I roto i te roara’a o te tau, te mea tei tāpe’a iā’u ’ia fa’atupu i te reira, ’o te mana’o ïa e ro’o maita’i i te rirora’a ’ei tamari’i maita’i nō roto mai i te hō’ē ’utuāfare itoito. ’Ua mana’o vau e hi’o mai ’oia iā’u mai tō’u huru mau—e ’aita vau i mana’o ē e mea marū teie ta’ata. ’Ua mana’o vau e fa’autu’a-vave-hia vau.
I te pae hope’a ’ua fa’anaho vau i teie fārereira’a, e mea ta’a ’ē roa te tupura’a i tā’u i mana’o na. ’Āhiri i te fa’autu’ara’a, ’ua parau mai tō’u ’episekōpo iā’u : « E tamāhine noa ā ’oe nā te Atua. ’Ua here-noa-ā-hia ’oe ’e ’ua ha’afaufa’a-noa-ā-hia ’oe ».
Tē ha’amana’o nei au i te putapūra’a i te ’īra’a o te here. ’O te taime mātāmua i roto i tō’u orara’a tō’u ’ite-pūai-ra’a i te mana o te Tāra’ehara a te Fa’aora. ’Ia hi’o vau i muri, ’ua ta’a iā’u nō te aha e mea faufa’a roa te mau parau tei fa’ahitihia e tō’u ’episekōpo.
Tamāhine nā te Atua
’Ia ’aro ana’e ’outou i te hōho’a faufau, e nā roto ’outou i te hō’ē ’ohura’a o te ha’amā. Nō’u nei, e ’ite au i te tū’ati-’ore-ra’a i tō’u iho ti’ara’a ta’ata ’e i muri iho e fa’a’ohipa vau i te hōho’a faufau nō te fa’atere i teie mau ’āehuehura’a ’ino. I muri iho, e ha’amā vau ’e e fa’ata’a ’ē au iā’u ia vetahi ’ē, ’e e nā reira noa te ’ohura’a.
I te roara’a o te tau, ’ua tāmata vau i te tūru’i i ni’a i tō’u iho hina’aro nō te « fa’aea ». ’Aita rā i ti’a iā’u ’ia rave ’o vau ana’e iho. ’Ua tauturu mai tō’u ’episekōpo iā’u ’ia ha’amana’o i tō’u ihota’ata—ē e tamāhine herehia vau nā te Atua. I tō’u fārereira’a iāna ’e ’a ha’amana’o ai au i taua parau mau ra, ’ua ha’amata vau i te haere i mua mau.
Mau hōho’a tei hōro’ahia mai e Madelyn ’e tōna ’utuāfare
’Ua ’ite Madelyn ē, e’ita te hōho’a faufau e riro ’o tāna ana’e mou’a e pa’i’uma atu. Nā roto i te tauturu a te Fa’aora ’e te mau mauiha’a maita’i, e tāmau noa ’oia i te ’ite mai i te pūai nō te upo’oti’ara’a i ni’a i te mau tāmatara’a o te orara’a. ’Ua patahia teie hōho’a hou ’oia ’a pa’i’uma ai i ni’a i te hō’ē ha’apu’era’a pape pa’ari i Alaska, Marite !
Te parau mau nō ni’a i te Atua ’e te Fa’aora
I te ha’amatara’a, ’ua ri’ari’a vau i te pure atu. ’Ua fa’ariro vau i te Metua i te ao ra mai te hō’ē Atua parauti’a ’e te riri. ’Ua tauturu rā te fa’anahora’a o te tātarahapara’a tāmau iā’u ’ia hāro’aro’a i te nātura o te Metua i te ao ra ’e o Iesu Mesia. Te ’itera’a ē, ’ia tātarapa vau hō’ē taime e’ita te reira e pāruru iā’u i mua i teie ’arora’a, e fa’ati’a ra iā’u ’ia tāmau noa i te ti’aturi i ni’a i tā rāua tauturu hanahana. ’Ua ’ite ’e ’ua māramarama a’ena te Metua i te ao ra i tō’u mau tāmatara’a ; ’ua tītau-noa-hia iā’u ’ia fa’atoro atu i te rima iāna ra.
’Ua ha’api’i mai au ē, e mea aroha ’e e mea hāro’aro’a te Metua i te ao ra ’e o Iesu Mesia. ’A fāriu ai ’outou ia rāua, e haere rāua nā tō ’outou pae ’e e tāpe’a rāua i tō ’outou rima i te mau ta’ahira’a ato’a o te ’ē’a.
’Upo’oti’a i ni’a i te mau rāve’a a Sātane
Te hāro’aro’ara’a i te nātura o te Atua,’ua tauturu ato’a iā’u ’ia hāro’aro’a ia Sātane ’e tāna mau mauiha’a e nāhea rātou i te fa’a’ohipa i te pāto’ira’a ’āfaro a te Atua. Hō’ē o te mau mauiha’a pūai roa a Sātane o te ha’amā ïa, tei ta’a ’ē i te mana’o hapa ’aore rā, « te oto e au i te Atua » (2 Korinetia 7:10). ’Ia ’ite ana’e ’outou i te mana’o hapa i roto ia ’outou, e ’ite ’outou ē ’ua rave ’outou i te hape. Terā rā, e ha’atū’ati te ha’amā i tō ’outou mau mana’o ’ino ’o tā ’outou e putapū nei nō ’outou iho ’ia hara ana’e ’outou nō tō ’outou ihota’ata, mai te au ra ’o ’outou taua mau nino’a mana’o ra.
’Ua hina’aro Sātane ’ia ti’aturi vau e nehenehe vau iho e upo’oti’a i ni’a i teie tāmatara’a’a. ’Ua ’ōpani teie ha’avare iā’u ’ia paraparau i tō’u ’episekōpo nō ni’a i tō’u ’arora’a i te hōho’a faufau. E au iā’u ē e’ita e nehenehe iā’u e fārerei iāna ē tae roa i te taime i nehenehe ai iā’u e parau ē, ’o te hō’ē ïa mea ’o tā’u i ’aro na nā mua a’e nei. Tē fa’a’ohipa nei Sātane i tō ’outou iho mau paruparu nō te fa’ariro ia ’outou ’ei mea ti’amā ’ore, nō te ’imi i te mana fa’aora o te Fa’aora.
’Ua ha’api’i mai au ē tē ’ohipa nei Sātane i ni’a ia tātou ’ia vai ’ōtahi ana’e tātou, ’e tō tātou pārurura’a maita’i roa a’e ’o te tū’atira’a ïa. I te tahi taime e mea ’ōhie roa ’ia toro i te rima ia vetahi ’ē ’e te ravera’a i te taime e au ’e te mau hoa maita’i. Te tū’atira’a atu i te Metua i te ao ra, ’ia ’outou iho ’e ’ia vetahi ’ē (te feiā iho ā rā e hi’o nei ia ’outou mai tā te Metua i te ao ra e hi’o ra) ’o te rāve’a maita’i roa a’e ïa nō te ha’amana’o i tō ’outou ihota’ata mau : e tamari’i faufa’a rahi nā te Atua.
E ’ōpuara’a teitei a’e
I te pae hope’a, ’ua ha’amata vau i te fāri’i i te mau fa’aurura’a nō te tauturu i te tahi atu feiā ’āpī tamāhine e ’aro ra i te hōho’a faufau. ’Ua putapū vau i te hō’ē ’ōpuara’a teitei roa a’e. ’Ua fa’aoti au e ha’ape’ape’a rahi atu ā i te mea tā te Metua i te Ao ra e mana’o nei i tā vetahi ’ē ’ati a’e iā’u e feruri nei, nō reira ’ua ha’amata vau i te paraparau hua atu nō ni’a i tō’u mau ’itera’a.
I te taime ’a putapū ai ’outou i te ’oa’oa pāpū o te tātarahapara’a tāmau, e hina’aro ’outou e fa’a’ite atu i te reira ia vetahi ’ē ! I teienei, tē tāmau noa nei au i te fa’a’ite i teie ’oa’oa ’ei misiōnare rave tāmau.
’Ua fa’ata’ahia Madi ’ia ’ohipa ’ei misiōnare rave tāmau i roto i te misiōni nō Tinetāpora, e paraparau ra i te reo Malay.
Tā’u parau poro’i
’Aita roa atu ’outou i vai ’ōtahi noa ’e tē vai nei te tī’a’ira’a.
’Ua riro teie ’arora’a ’ei hō’ē ’ohipa ’o tā ’outou e nehenehe e upo’oti’a ma te tauturura’a a te Fa’aora, te feiā tei here ia ’outou ’e te feiā fa’atere tā ’outou e ti’aturi nei, ’oia ato’a te mau mauiha’a tano. ’A haere mai i rāpa’e i te vai-’ōtahi-ra’a, ’a fārerei atu i te hō’ē ta’ata ’o tē hi’o nei ia ’outou nā roto i te mata o te Atua. ’A ani ia rātou e aha tā rātou e ’ite nei i roto ia ’outou !
Noa atu te huru o tā ’outou ’arora’a, ’aita roa atu ’outou i mo’ehia i te Fa’aora ’e i tāna tāra’ehara. ’Ua here hope roa te Metua i te ao ra ia ’outou, ’e e mea ho’ona ’ia tāmau noa ’outou i te tātarahapa.