5 a’o nō te ea maita’i a’e i te pae manava
Mea pūai a’e tātou ’ia tāhō’ēhia.
’Ua tāvini nā māua tā’u tāne ’o Scott ’ei feiā fa’atere i roto i te misiōni nō Sydney, Auterāria mai te matahiti 2018 ē tae atu i te matahiti 2021. I te mau taime ato’a ’ia fa’a’itehia mai te mau pu’e parau ’o te hō’ē misiōnare ’āpī ē, e mau fifi nō te ea tōna i te pae manava, e fa’a’ite ’oi’oi atu vau iāna ē, ’ua ora nā vau i te mau taime fa’aturumara’a i te roara’a ’o tō’u orara’a ta’ata pa’ari. ’Ua hina’aro vau ’ia hāro’aro’a rātou ē, tei roto mātou i te hō’ē ā pupu ’ia ’ore rātou ’ia fa’aruru i te reira ’o rātou ana’e.
Tē hina’aro nei au e fa’a’ite atu i te hō’ē ā poro’i ia ’outou ! E rave rahi ta’ata e fa’aruru nei i te mau fifi o te ea i te pae manava, e nehenehe rā tātou pā’āto’a e tauturu i te tahi ’e te tahi. Nō te ha’apāpūra’a : E ’ere au nō te tōro’a o te ea pae manava. Tē hina’aro nei rā vau e hōro’a atu i te tahi mau parau a’o ’ōhie ’e nō te pae vārua, nō te hō’ē ea maita’i a’e i te pae manava, tei tauturu iā’u ’oia ato’a te feiā tā’u i mātau ’e i here.
Te Mesia i te fa’ati’ara’a i te tamāhine a Iaeiro, nā Greg K. Olsen
A’o 1 : Tu’u ana’e i te Mesia i rōpū
’Ua pa’ari au piri atu ia San Francisco, California, i te fenua Marite, ’e tē ha’amana’o nei au i te aura’a e hāhaere nā roto i te ’āua ha’utira’a i te pae tātahi ! I reira, tē vai rā te hō’ē poro’a’a rahi i hāmanihia i te rā’au, e pārahi ’oe i ni’a ma te tāmata i te tāpe’a māite ’a ’ohu vitiviti ai te poro’a’a. Te feiā e pārahi i te hiti rāpae ’o rātou ïa tē pe’e mātāmua i rāpae. Teie rā te feiā tei māramarama i te pūai i rōpū e pārahi rātou piri i rōpū.
Tē mana’o nei au e fa’ahōho’ara’a maita’i te reira nō te tāpe’a i te Mesia i rōpū, ’a nā roto ai tātou i te tahi o teie mau huru tupura’a fifi—nō te ’āravī ānei, te fa’aturumara’a, te MRT [Ma’i Ruriāiho Tāpepe], ’aore rā te tahi ’ohipa mai te reira te huru. Tē hina’aro nei tātou i te Mesia i rōpū i tō tātou orara’a.
I roto i te mau taime o te fifi i te pae nō te ea o te roro, e nehenehe tātou e fa’ari’i i te tū’atira’a ’e te ra’i ’aore rā e mea fifi nō tātou i te ha’afātata atu i te Fa’aora. ’Aita te reira e parau nei, ’ua fa’autu’ahia tātou ’aore rā ’aita tātou i ti’amā i te here o te Atua. Nō’u nei, te ti’aturira’a tei i’ō nei ’oia ’a tīa’i noa ai ’ia ho’i fa’ahou mai te tū’atira’a, e mea faufa’a te reira ! ’A tāmau noa i te pure, i te fa’aherehere i te mau parau a te Fa’aora, i te ti’aturi i tāna mau fafaura’a, i te rave i te ’ōro’a mo’a, ’e i te rave i te mau mea ato’a e tāpe’a ia ’outou ma te fa’atumuhia i ni’a iāna.
A’o 2 : Tūru’i ana’e i ni’a i te Fatu i te mau mahana ato’a
I roto i te medebara, e ti’a i te mau tamari’i ’Īserā’ela e tūru’i i ni’a i te Fatu i te mahana tāta’itahi nō te fa’ari’i i te māna. I te tahi taime, ’ia fa’aruru ana’e tātou i te mau mea hōhonu a’e i te mau ira hauriri’a ’aore rā te tahi atu mau māuiui i te pae ’āehuehu, e hina’aro tātou ’ia mo’e ’ē roa atu te reira. ’E penei a’e e nā-reira-hia—e’ita rā paha te reira e tupu ’ia au i te huru ’aore rā i te taime tā tātou e hina’aro. ’Aita te reira e parau nei, ’aita e rāve’a fa’ahou. E ti’a ia tātou e tūru’i i ni’a i te Atua i te mau mahana ato’a, ’a ’ohipa ai tātou ’e ’a tīa’i ai ’ia tae mai te mau mahana maita’i a’e i muri nei.
Hō’ē ha’afātatara’a ’o te anira’a ïa i te tauturu a tō tātou Metua i te ao ra ’e te tāmatara’a i te mau rāve’a rau ato’a, nō te ’ite mai i te mea e tere maita’i nō ’outou. I muri iho, e nehenehe ’oia e tauturu mai ia ’outou ’ia ha’amana’o, i roto i te mau taime hepohepo ’aore rā te ira hauriri’a, e mea nāhea te hō’ē pehe tamāru e nehenehe e tauturu ia ’outou i roto i te hō’ē tupura’a mai teie te huru, ’aore rā mea nāhea te tū’atira’a atu i te hō’ē ta’ata ’o tā ’outou i ti’aturi i fa’atupu i roto ia ’outou te hau i te hō’ē taime. E fa’ati’a te reira ia ’outou ’ia ha’aputuputu i te hō’ē ruru mauiha’a i tāmatahia nō te fa’a’ohipa i te taime e fifi ai ’outou. Noa atu te mea tā ’outou e rave nei, ’a ani i te tauturu a te Fatu i te mau mahana ato’a.
E nehenehe ato’a tātou e parau ma te reo pūai : « ’Ia tūru’i ana’e au i ni’a i te Fatu i te mau mahana ato’a, e ’ite mai au i te hō’ē pūai ’o tā’u i ’ore i mana’o e fa’ari’i au ! »
A’o 3 : E nehenehe ’outou e atu’atu maita’i i tō ’outou tino
E tuha’a te roro nō tō tātou tino tāhuti ’e e mea hiā’oto te reira i te mau tāuira’a rau ’e i te mau hapehape o te orara’a i ni’a i te fenua nei. Te parau ’āpī maita’i rā : tē vai nei te mau fāito i tāmatahia ’o tā tātou e nehenehe e rave nō te ha’apūai i tō tātou roro ’e ’o tē nehenehe ato’a e ha’amaita’i i tō tātou ea i te pae manava. Teie te tahi o taua mau ta’ahira’a ra :
-
Te ravera’a i te māramarama o te rā ’aore rā te hō’ē māramarama ha’avare ’ana’ana i te po’ipo’i
-
Te haerera’a nā roto i te nātura, te tū’atira’a atu i te fenua
-
Fa’a’eta’eta tāmau i te tino
-
’Amu i te mā’a maita’i
-
Inu rahi i te pape
-
Ta’oto maita’i i te mau pō ato’a
E nehenehe ato’a te mau anoha’a nō te hutira’a i te aho e riro ato’a e mea pūai. ’A tāmata i te huti maoro i te aho nā roto i te ihu, ’e i muri iho i te tahi atu. ’A tāpe’a noa mai te reira ma’a tetoni te maora ’e i te pae hope’a, ’a fa’aru’e i te tā’āto’ara’a ’o tō ’outou aho nā roto i te vaha.
Tē nā reira nei au e rave rahi taime ’ia ara mai au, i roto i te mau taime urupu’upu’u rahi (mai te taime e hōro’a ai au i te hō’ē a’ora’a i te ’āmuira’a rahi !), ’e nā mua noa a’e e ta’oto ai au.
A’o 4 : E nehenehe tātou e ani i te tauturu
Mai te mea ’ua mo’e ’outou i roto i te haerera’a nā ni’a te mou’a, ’e e fārerei atu ra ’outou i te hō’ē ta’ata arata’i, e ha’amā ānei ’outou i te ani atu i tō ’outou ’ē’a, ’ia ora ’outou ? ’Aita vau e mana’o nei. ’E ’ere te anira’a i te tauturu i te tāpa’o nō te paruparu. Tē nā reira nei tātou i te mau taime ato’a i roto i te tahi atu mau tuha’a ’o tō tātou orara’a.
’A tauturu mai i te vāvāhira’a i te anatemara’a e ’ōpani nei i te ani i te tauturu i roto i te mau tāmatara’a i te pae ’āehuehu.
’Ia hina’aro ana’e ’outou i te tauturu a te Atua, a te mau hoa, a te ’utuāfare, ’aore rā a te feiā tōro’a i te pae o te ea, e ’ere ’outou i te ta’ata paruparu a’e nō te ’imira’a i te tauturu hau atu ’o tā ’outou e hina’aro nei. Te parau mau, tē fa’a’ite nei ’outou i te itoito !
A’o 5 : ’A fa’aea tū’ati noa
E mea faufa’a roa ’ia fa’aea tū’ati noa i tō ’outou Metua i te ao ra nā roto i te pure i te mau mahana ato’a.
Tē mana’o ato’a nei au ē, e mea faufa’a roa ’ia fa’aea tū’ati noa ’e te feiā ’o te fa’atupu mai i te hau i roto ia tātou ’e ’o tā tātou e ti’aturi nei. ’A niuniu i tō ’outou māmā ! ’A paraparau mata ’e te mata ’e te hō’ē hoa. ’A paraparau ’e te hō’ē tua’ana ’aore rā te hō’ē tuahine Mea pūai a’e tātou ’ia tauturu ana’e tātou i te tahi ’e te tahi. E haere teie pūai nā roto i nā pae e piti. E hina’aro te mau ta’ata ato’a i te hō’ē ta’ata. Pinepine te ’ōtahira’a ’e te fa’aturumara’a i te tūru’i i ni’a i te tahi ’e te tahi. Te tū’atira’a atu i te feiā tā tātou i here ’e ’o tā tātou e ora nei ’e ’o tā tātou e nehenehe e ’ite atu ’e e tauahi atu, e rā’au rapa’aura’a maita’i mau te reira nō te mau māuiui rahi tā tātou e fa’aruru nei.
E nehenehe tātou e ora mai i te auahi ’ura ’e ’ōna !
I te tahi taime, e hina’aro noa tātou ’ia fa’aha’amana’ohia tātou ē, tei pīha’i iho te Atua ia tātou.
I roto i te Faufa’a Tahito, ’ua huri te ari’i Nebukanesa ia Sadaraka, Meseka ’e Obede-nego i roto i te hō’ē umu auahi ’ura maita’i, e’ita ato’a e ti’a i te mau tīa’i i rāpae e fa’aruru atu i te ve’ave’a rahi.
Nō reira, mea nāhea nā ta’ata to’otoru i te orara’a mai ?
Tē ha’api’i nei te mau pāpa’ira’a mo’a ē, e ’itehia te mahara’a o te ta’ata i roto i te auahi ’e ’o rātou « mai te Tamaiti ïa a te Atua ra » (Daniela 3:25).
Tē ti’aturi nei au te aura’a o te reira, tei pīha’i iho te Mesia ia tātou i roto i te auahi o tō tātou mau tāmatara’a, i te taime iho ā rā ’a fa’aruru ai tātou i te reira. ’E te mau fifi o te ea i te pae roro e nehenehe e riro mai te hō’ē umu auahi ’ura maita’i. Te Mesia ’o Emanuela ïa, te aura’a pāpa’ihia ’oia ho’i, « te Atua i’ō tātou nei ».
’Eiaha ’ia mo’ehia ’o Iesu Mesia tō tātou pūai, ’eiaha noa i te hope’a o te porōmu, ’ia matara ana’e tātou i te mau fifi i te pae ’āehuehu ’o tā tātou i ’ore i ani. Te parau mau tei pīha’i iho ’oia ia tātou i te roara’a ’o tō tātou tere. ’O ’oia tō tātou pūai ’e tō tātou tamarūra’a i teie taime.
’Ia vai pūai ’āmui a’e tātou !