Te mau parau e ora

Te mau taea’e ’e te mau tuahine i roto i te Mesia

Nā Elder Ulisses Soares

Nō te pupu nō te Tino ’Ahuru ma Piti ’āpōsetolo

Nō roto mai i te hō’ē a’ora’a o te ’āmuira’a rahi nō ’Ātopa 2023.

Fa’ahōho’ara’a nā Adam Nickelv

Tē ha’api’i nei te ’evanelia a Iesu Mesia ē, e mau tamāroa ’e e mau tamāhine vārua tātou pā’āto’a nō roto mai i nā metua i te ao ra ’o tei here mau ia tātou. E nātura, e ’āi’a ’e e pūai hanahana tō tātou pā’āto’a.

’Ei mau pipi nā te Mesia, ’ua anihia tātou ’ia fa’arahi i tō tātou fa’aro’o ’e tō tātou here, nō tō tātou mau taea’e ’e mau tuahine vārua.

Tē ’ana’ana pūai nei te māramarama o te hō’ē mahana ’āpī i roto i tō tātou orara’a, ’ia hi’o ’e ’ia fa’ariro ana’e tātou i tō tātou mau ta’ata tupu ma te fa’atura ’e te ti’amā, ’e ’ei taea’e ’e ’ei tuahine mau i roto i te Mesia.

I te roara’a ’o tāna tāvinira’a i te fenua nei, ’ua fa’ahōho’a maita’i roa Iesu i teie parau tumu.

’Aita e vāhi nō te mau mana’o ’e te mau ’ohipa ha’avāra’a i roto i te mau ’āmuira’a a te feiā mo’a.

’Ua ani-manihini-hia tātou ’ia haere ’āmui, ma te hau ’e te ’ā’au tei ’ī i te here i te Atua ’e i te mau ta’ata ato’a.

’Ia fāna’o maite tātou i te fēti’ira’a pae vārua e vai nei i rotopū ia tātou ’e ’ia ha’afaufa’a i te mau huru ta’a ’ē ’e i te mau hōro’a rau e vai nei ia tātou pā’āto’a.

E aha te taime ’a ’ite ai ’outou i te hō’ēra’a ’ei taea’e ’e ’ei tuahine i roto i te Mesia ? ’A hāpono mai i tā ’outou rata taīreuira nō ni’a i te tumu parau i te [e-mail].