Nāhea i te fa’ariro i te ’āmuira’a ’ei mea faufa’a atu ā nō ’oe
’A tāmata i teie nā mana’o e toru nō te hō’ē ’itera’a o te ’āmuira’a faufa’a rahi a’e.
Fa’ahōho’ara’a nā Jarom Vogel
Tē fātata mai nei te ’āmuira’a rahi, ’e e ti’a roa i te reira ’ia fa’atupu i te hō’ē hope’ara’a ’o te tāmau noa i muri a’e i te hepetoma o te ’āmuira’a ! E nehenehe teie nā e toru parau a’o e fa’ariro i te ’āmuira’a ’ei mea faufa’a roa a’e nō ’oe.
1. Fa’aineine ia ’oe iho i te pae vārua
Hou te ’āmuira’a rahi, e nehenehe ’oe e fa’aineine i tō ’oe vāerua nā roto i te mau mea ’ōhie, mai te ’imi-maita’i-ra’a i te pāpa’ira’a mo’a ’e te pure ma te ’ā’au tae. E nehenehe ato’a ’oe e rave i te hō’ē ha’apaera’a mā’a nō te rāve’a tūreiara’a tōtiare ’aore rā e rave i te hō’ē tere ta’a ’ē i te hiero. Ma te fa’aineinera’a ia ’oe i te pae vārua, e putapū ’oe i te fa’aurura’a arata’i a te Vārua Maita’i.
2. Tāpe’a i te hō’ē uira’a i roto i te ferurira’a
E aha te mea e vai nei i roto i tō ’oe ferurira’a i teie mau mahana nei ? E fa’aotira’a faufa’a rahi paha tā ’oe e ti’a e rave, e māna’ona’ora’a ’utuāfare ’aore rā e uira’a nō ni’a i te ’evanelia. ’A pure i te Metua i te ao ra nō teie tumu parau, ’e ’a fa’aro’o i te arata’ira’a i roto i te ’āmuira’a rahi.
’A hi’o mai i te ’ohipa i tupu tei orahia e James i te matahiti i ma’iri a’e nei !
’A fātata mai ai te ’āmuira’a, ’ua hina’aro vau ’ia ’ite nāhea e ti’a ai iā’u ’ia fa’a’ohipa maita’i a’e i te mana o te tāra’ehara a te Mesia i roto i tō’u orara’a. ’Ua ani au nā roto i te pure i te Metua i te ao ra ’ia tauturu mai iā’u ’ia fa’aro’o i te Vārua, ’ia ’ite e nāhea ’ia rave i te mau mā’itira’a maita’i a’e, ’e ’ia fa’a’orehia tā’u mau mā’itira’a hape.
’A paraparau ai Elder Dieter F. Uchtdorf, ’ua haru mai teie mea i roto iā’u :
« Te taime ’outou e fa’aoti ai e ho’i mai ’e e haere nā ni’a i te ’ē’a o tō ’outou Fa’aora ’e Tāra’ehara, e tomo mai tōna mana i roto i tō ’outou orara’a ’e e taui i te reira ».
’Ua ’ite au ’o teie te mea tā te Fatu i hina’aro ’ia fa’aro’o vau, ’e ’ua ti’a iā’u ’ia putapū i te Vārua i te fa’a’ite-pāpū-ra’a iā’u e parau mau te reira Ma te fa’aineinera’a iā’u ’e te hō’ē uira’a i roto i te ferurira’a, ’ua ti’a iā’u ’ia fāri’i i te hō’ē pāhonora’a nō’u iho i tā’u mau pure.
James M., 16, Dakota Apato’erau, Marite
3. Fa’a’ohipa i te hō’ē parau tumu ’aore rā te hō’ē anira’a manihini
’A fa’aro’o i te hō’ē ha’api’ira’a ’aore rā te hō’ē parau tumu e tano nō ’oe. ’A ha’amau i muri iho i te hō’ē fā nō te fa’a’ohipa i te reira i roto i tō ’oe orara’a. E nehenehe ato’a ’oe e fa’aro’o maita’i i te mau anira’a manihini ’āfaro a te mau peropheta ’e te mau ’āpōsetolo. ’A pāpa’i ’e ’a ’ohipa i ni’a hō’ē a’e o teie mau anira’a manihini. E tauturu te ’ohipara’a ma te fa’aro’o ia ’oe ’ia ’ite i te parau mau ’e te mana o te mau ha’api’ira’a a te mau peropheta.