Te fa’ari’ira’a—’e te hōro’ara’a—i te tauturu nō te ea i te pae ferurira’a
Nō ni’a i te ea i te pae ferurira’a, e nehenehe ’outou e ani i te tauturu ’e e hōro’a ato’a te reira ia vetahi ’ē.
Fa’ahōho’ara’a nā Simona Love
E aha te ti’a ia ’outou e rave ia ’oto ana’e ’outou, ’ia paruparu ana’e te mana’o, ’ia ’āravī ana’e, ’aore rā ’ia fa’aturuma ana’e ?
E riro ’outou i te pāhonohia mai, mai teie te huru : Ora i te ’evanelia. Pure. Tai’o i te mau pāpa’ira’a mo’a. Rave i te ’ōro’a mo’a. ’E te rave-tāmau-ra’a i taua mau mea ra e mea maita’i ïa ’e te tītauhia, ’e e tātara (’e e arai) i te mau fifi e rave rahi. Te tahi rā mau fifi e tītauhia te tahi atu ā mau tauto’ora’a.
Mea pāpū e pe’ape’a ’e e ’oto te mau ta’ata ato’a i te tahi taime. E tuha’a te reira nō te orara’a. E rave rahi rāve’a maita’i nō te fa’aruru i taua mau mea ra. Mai te mea rā e mea teimaha ’e te onoono te ’aravī ’e te fa’aturumara’a, ’aore rā e maoro atu ā te reira ’o te fa’aapiapi i tō ’outou orara’a, ’e e ’ōpani ia ’outou ’ia putapū i te Vārua, ’ua tae paha ’outou i te fāito e ’ite mai ’outou e’ita te reira e maita’i mai, maori rā i te tītaura’a i te tauturu hau atu.
Te ea i te pae ferurira’a ’o te ea ïa o te tino (hi’o Nō te pūai o te feiā ’āpī : E arata’i nō te rave i te mau mā’itira’a [2022], 29). E taurutu te mau tārā’aura’a e vai ra i roto i tō tātou roro ’ia fa’atanotano i tō tātou mau ’āehuehu ’e e tuha’a te roro nō te tino. Te ta’ata e parau te fa’aturumara’a ’e te ’aravī « tei roto noa i tō ’outou upo’o » ’ua tano i ni’a noa i te tātarara’a ’āfaro : ’ua riro tō ’outou upo’o, ’ua tano, i reira e vai ai tō ’outou roro. E ’ere rā te mau fifi i te mea mana’o-noa-ra’a, mai te hō’ē ’āvae fati ’aore rā i te hō’ē ’ā’au pē.
Tītau i te tauturu
Tē parau nei te Buka a Moromona ’ua ha’amaita’ihia te mau ’āti Nephi nā roto i « te mau rā’au maitata’i i roa’a ia rātou nō roto mai i te mau tumu rā’au e rave rahi ’e te mau a’a, ’o tā te Atua i fa’aineine nō te fa’a’ore i te tumu o te mau ma’i » (Alama 46:40). I teie mahana, e nehenehe tātou e pi’i i teie mau te rapa’aura’a taote.
I teie mahana, ’ua fa’aineine te Atua e rave rahi fa’ahou atu ā rāve’a nō te ’aro atu i te ma’i ’e te pēpē, tae noa atu te mau māuiui i te pae ferurira’a ’e i te pae manava. Tē vai nei tā tātou i teienei te mau rāpa’aura’a ’o tā te mau ’āti Nephi—’e ’oia ato’a tō tātou mau metua tupuna—i moemoeā noa na. Tē ora nei tātou i te tau o te mau temeio ! ’E tē hina’aro nei tō tātou Metua i te ao ra ’ia fa’a’ohipa tātou i te reira.
’Aita te reira e parau nei te mau ta’ata ato’a e ’aro nei i te fa’aturuma ’aore rā i te ’āravī, e hina’aro rātou i te rā’au ’aore rā i te rapa’aura’a. E mea ta’a ’ē te mau ta’ata ato’a. Noa atu rā te huru ’o tō ’outou vaira’a, hō’ē ’ohipa e mea pāpū maita’i : ’Aita e faufa’a ’ia māuiui ’outou, ’outou ana’e. Tē onoono nei tō ’outou Metua i te ao ra i te tauturu ia ’outou.
’Ua ’ite tō ’outou Metua i te ao ra i te mea e tauturu ia ’outou. Noa atu e matara tō ’outou mau fifi nā roto i te pure ’e te fa’aro’o, ’aore rā e ti’a ato’a ia ’outou e ’imi mai i tāna mau ha’amaita’ira’a nā roto i te ’āpiti atu i te mau rā’au, te mau taote, te mau metua, te mau hoa, te mau ’episekōpo, te mau rauti o te feiā ’āpī, te mau ’orometua ha’api’i, te mata’i ’āpī ’e te fa’a’eta’etara’a tino nō te fa’aruru i te mau taime fifi, ’a ani atu i tāna tauturu. ’Eiaha e ha’ape’ape’a rahi roa nō ni’a i te rāve’a ’a ’aro ai te tahi mau ta’ata i te mau fifi mai teie te huru, e ’ua matara te reira. E tauturu mai tō tātou Metua i te ao ra ia ’outou ’ia ’ite i te mau rāve’a e tano i tō ’outou fifi.
’A tauturu atu
E fa’atano te ’evanelia nā mua roa i te tauturu ia vetahi ’ē, i te hi’ora’a ’o tā te Fa’aora i tauturu ia tātou nā roto i tāna Tāra’ehara. E ti’a ia ’outou ’ia tāmau noa i te tāmata i te « toro atu i te rima i te feiā e ’ite nei i te ’ōtahira’a, te mo’emo’e, ’aore rā te hepohepo.« »’A tauturu ia rātou ’ia putapū i te here o tō tātou Metua i te ao ra nā roto ia ’outou » (Nō te pūai o te feiā ’āpī : E arata’i nō te rave i te mau mā’itira’a, 12). E ’ere paha ’outou i te taote ’aore rā i te hō’ē taote rapa’au maita’i, e pipi rā ’outou nā te Mesia, ’e te mau pipi a te Mesia e « ’oto ’a ’oto ai te feiā ’oto ra ; ’oia ïa, ’e ’ia tāmāhanahana ia rātou ’o tē au ’ia tāmāhanahanahia » (Mosia 18:9).
Hō’ē o te mau mea faufa’a roa a’e tā ’outou e nehenehe e rave ’ia ’aro ana’e te hō’ē ’o tā ’outou i here i te fa’aturuma, te ’āravī ’aore rā i te tahi atu mau fifi i te pae ferurira’a, ’o te hōro’ara’a ïa i tō ’outou tari’a nō te fa’aro’o.
Pinepine, te mea noa tā te hō’ē ta’ata e fa’aruru nei i te fifi pae manava e hina’aro, ’o te fa’ahoara’a ïa ’e ’ia fa’a’ite i tō ’outou here. ’Aita rātou e tīa’i nei ’ia roa’a mai ia ’outou te hō’ē pāhonora’a manamana ’o te tātara i te mau mea ato’a. E hina’aro noa paha rātou e rave i te tahi atu ’ohipa. E hina’aro rātou i te hō’ē ta’ata i pīha’i iho ia rātou, nō te fa’aro’o ia rātou ’e nō te fa’a’ite i tō rātou hoara’a—nō te parau, « ’ua tano ’oe, e mea ’ino iho ā te mea tā ’oe e fa’aruru nei.« »Tē pe’ape’a nei au.« »Tē hina’aro nei au e tātā’i i te reira.« »’A parau mai, nāhea vau e nehenehe ai e tauturu ia ’oe »
’E ’a ha’amana’o […]
’Ia riro ’outou i te ta’ata e tauturu atu ’aore rā te ta’ata e hina’aro i te tauturu, ’a ha’amana’o tē vai rā te tahi mau mea ’o te Atua ana’e tē nehenehe e rave. ’A vaiiho iāna ’ia rave i te reira mau mea. ’A tīa’i noa ai, ’a rave i te mea tā ’outou e nehenehe e ’atu’atu atu ia ’outou iho ’e i te feiā e ha’ati ra ia ’outou.