Mai, pe’e mai
E fa’aro’o ānei ’oe ?
E nehenehe te arata’ira’a a te peropheta e pāruru, e ha’amaita’i ’e e tauturu ia tātou—mai te mea e fa’ari’i tātou.
Fa’ahōho’ara’a nā Alyssa Talent
« E tae mai ra te ha’amoura’a ! »
E poro’i ’oto roa teie nō te fa’ari’i. ’A feruri na ’o ’oe te ta’ata tei pi’ihia nō te hōro’a i te reira !
’Ua pi’ihia Samuela te ’āti Lamana e te Fatu nō te fa’aara i te mau ’āti Nephi i tō rātou ’ino. ’A ti’a ai i ni’a i te patu, ’ua parau Samuela ē, i te hō’ē mahana te « ha’amou-roa-ra’a-hia ; ’e e tupu mau iho ā teie, maori rā ’ia tātarahapa ’outou » (Helamana 13:10).
’Ua tohu ato’a Samuela ē i roto i nā matahiti e pae tē vai ra hō’ē pō ma te pōiri ’ore ’e hō’ē feti’a ’āpī i ni’a i te ra’i nō te tāpa’o i te fānaura’a o te Fa’aora (hi’o Helamana 14:2–5).
Nāhea te mau ’āti Nephi i te pāhonora’a i te poro’i a Samuela ?
’Ua pāto’i rātou i te fa’aro’o atu. ’Ua « taora rātou i te ’ōfa’i i ni’a ia [Samuela] ’e ’ua te’a atu i ni’a iāna ’a ti’a ai ’oia i ni’a i te patu ra » (Helamana 16:2). Aua’e rā, ’aita te ta’ata e taora nei i te ’ōfa’i ’aore rā e te’a nei i ni’a i te peropheta i teie mahana, terā rā e rave rahi e pāto’i nei ’e e fa’a’o’ō’o fa’ahou nei i tāna mau parau, ’a ha’api’i ai ’oia i te mau parau mau mure ’ore o te ’evanelia a te Fa’aora.
’Ia paraparau ana’e te peropheta, nāhea ’oe i te pāhono atu ? E fa’aro’o ānei ’oe ?
Teie e toru fa’aha’amana’ora’a o te mau ha’amaita’ira’a ’o te tae mai, ’ia vai mai te hō’ē peropheta i ni’a i te fenua nei ’e te fa’aro’ora’a iāna.
’Ua here te peropheta ia tātou ’e tē pure ra nō tātou
I roto i te mau a’ora’a e rave rahi o te ’āmuira’a rahi, ’ua parau mai te peresideni Russell M. Nelson :
« ’Ua here au ia ’outou ». « ’Ua vai tāmau noa ’outou i roto i tō’u ferurira’a ’e i roto i tā’u mau pure ».
’Auē ïa ha’amaita’ira’a i te ’itera’a ē ’ua here te peropheta ia tātou ’e tē pure nei ’oia nō tātou !
Fātata e pae matahiti i muri mai i te tohura’a a Samuela te ’āti Lamana, ’ua parau te tahi mau ’āti Nephi ē, ’ua ma’iri te taime nō te tupura’a o tāna mau parau. ’Ua fa’a’o’ō’o rātou i te feiā tei ti’aturi ’e ’ua mā’iti ato’a rātou i te hō’ē mahana nō te taparahi pohe i te feiā fa’aro’o, mai te mea ’aita te mau tāpa’o nō te fānaura’a o te Fa’aora e tae mai (hi’o 3 Nephi 1:6–9). I roto i taua taime ri’ari’a ra, ’ua pure te peropheta Nephi i te mahana tā’āto’a « ’ei maita’i nō tōna nūna’a o tei fātata i te pohe nō tō rātou fa’aro’o » (3 Nephi 1:11).
I teie mahana, tē tauturu nei te mau pure a te peropheta ia tātou hau atu i tā tātou e mana’o nei. E ha’amaita’i te arata’ira’a pae vārua ’o tāna e fa’ari’i nei nā roto i te pure i te ao ato’a nei.
Tē arata’i nei te peropheta ia tātou i te Fatu ra
« ’A fa’ateitei i tō upo’o i ni’a ’e ’a fa’aitoito », ’ua parau te Fatu ia Nephi. « ’Ua fātata te taime ’e i teie pō e fa’a’itehia atu ai te tāpa’o, e ananahi e tae mai ai au i te ao nei » (3 Nephi 1:13).
’A ma’iri ai te mahana i raro, ’aita i pōiri. ’Ua tupu te tāpa’o ! (Hi’o 3 Nephi 1:15.) I te po’ipo’i a’e, ’ua ’ite te mau ta’ata ato’a ’o te mahana ïa e fānauhia mai ai te Fa’aora, ’e ’ua fā mai te hō’ē feti’a ’āpī (hi’o 3 Nephi 1:19, 21). Te mau mea ato’a tā te Fatu i tohu nā roto mai ia Samuela nō ni’a te fānaura’a o te Fa’aora, ’ua tupu mau iho ā mai tā te Fatu i parau.
Te taera’a mai o te Fa’aora i te ao nei, ’ua fa’aora ’oi’oi i teie feiā tei ti’aturi mai te pohe mai. Terā rā, ’aita te reira i fa’aora noa ia rātou. ’Ua haere mai Iesu Mesia nō te fa’aora ia tātou pā’āto’a i te hara ’e te pohe, nō te hōro’a ia tātou i te pūai i roto i te mau taime fifi, ’e nō te hōro’a ia tātou i te tīa’ira’a ’e te ’oa’oa maoti tāna tāra’ehara. ’O teie te poro’i rahi a te mau peropheta ato’a « tei tohuhia e a muri noa atu mai te ha’amatara’a mai ā o te ao nei » (Mosia 13:33). E arata’i te mau peropheta ia tātou i te Fa’aora, ’oia ho’i « te ’ē’a, te parau mau ’e te ora » (Ioane 14:6).
Tē fa’a’ite nei te peropheta i te parau mau
I te taime mātāmua ’a tai’o ai au i te Buka a Moromona i te fare ha’api’ira’a tuarua, ’ua putapū vau i te hō’ē ha’api’ira’a a Samuela te ’āti Lamana. ’Ua parau ’oia i te mau ’āti Nephi ē, mai te mea e tāmau noa rātou i te fa’atāere i tō rātou tātarahapara’a, e tae mai te taime « ’ua tāere roa » ’Ua parau ’oia, « ’ua tītau noa ’outou i te tā’āto’ara’a o te mau mahana nō tō ’outou orara’a i te mau mea ’o tē ’ore e noa’a ia ’outou ; ’e ’ua tītau ’outou i te ’oa’oa nā roto i te ravera’a i te mau ’ohipa ’ī’ino », ’e ’aita ho’i te reira i au i te huru nātura o tō tātou Metua i te ao ra (Helamana 13:38).
I tō tātou nei ’anotau, ’ua ha’api’i ato’a te peresideni Nelson mai te reira te huru :
« Tē parau onoono nei te ao ē, te mana, te mau tao’a rahi, te ro’o ’e te mau ’āreareara’a o te tino, e hōro’a mai te reira i te ’oa’oa, e’ita roa atu ïa ! E’ita roa atu e nehenehe !
« Te parau mau maori rā, e mea rohirohi a’e ’ia ’imi i te ’oa’oa i te vāhi e’ita roa atu e ’itehia ! Iesu Mesia, ’o ’oia ana’e, e mana tōna nō te fa’ateitei ia ’outou i ni’a a’e i te ’umera’a a tō teie nei ao ».
’Ua mā’iti te tahi mau ’āti Nephi ’ia fa’aro’o ’e ’ia ti’aturi i te mau parau a Samuela ; e rave rahi rā tei ’ore i nā reira (hi’o Helamana 16:1–8). I roto i te hi’ora’a e rave rahi, ’aita teie mahana i ta’a ’ē roa.
E aha ïa tā ’oe e mā’iti ? E fa’aro’o ānei ’oe i te peropheta ?
’Ua ha’api’i mai te peresideni Nelson :
« [Te mau peropheta, te mau hi’o ’e te mau heheu parau] e’ita paha rātou e parau noa i te nūna’a i te mea tā rātou e hina’aro e fa’aro’o. E mea varavara te mau peropheta i te auhia e te ta’ata. E ha’api’i noa rā mātou i te parau mau ! »
’A fa’aro’o ai ’oe i te peropheta ’e ’a rave ai mai tāna i parau, e ’ite ’oe ē e paruru, e ha’amaita’i, ’e e tauturu tāna mau arata’ira’a ’ei peropheta ia ’oe i roto i tō ’oe orara’a.