Mai, pe’e mai
’A fafa’i i tō mahana
E hina’aro ānei ’oe e ora i te tau i ma’iri ? ’Aita ïa.
Fa’ahōho’ara’a nā Alyssa Petersen
’Ua mana’o a’ena ānei ’oe e mea ’ōhie a’e ’aore rā e mea maita’i a’e tō ’oe orara’a, mai te mea ’ua fānauhia ’oe i te hō’ē tau i ma’iri ? ’Ua feruri a’ena te tahi mau ta’ata i te reira—tae noa atu te hō’ē peropheta, i te hō’ē taime.
’Ua ’ite te peropheta Nephi (i roto i te buka a Helamana) i te ’ino turituri o tōna nūna’a ’e ’ua tuō ’oia : « ’Auē, ’āhiri i ora na vau i tō’u nei mau mahana i te mau mahana ’a tae mātāmua mai ai tō’u metua tāne ra ’o Nephi mai te fenua mai ra mai Ierusalema … — … ’ia ti’a iā’u ’ia ’oa’oa » (Helamana 7:7–8).
Tē fifi nei ’oia ’ia ora i tōna ’anotau. I te pae hope’a, ’oia mau, ’ua tītauhia iāna ’ia fa’aruru i te ’ohipa e tupu ra : « Inaha rā […] teie tō’u mau mahana » (Helamana 7:9).
Tō mahana
Teie tō ’oe mau mahana E nehenehe te reira e vauvau mai i te mau tāmatara’a, e hōro’a ato’a mai rā te reira i te mau rāve’a. ’Ei hi’ora’a, i roto i tō ’oe mau mahana, e nehenehe ’oe :
-
E ha’aputuputu ia ’Īserā’ela i nā pae e piti o te pāruru. ’O « te ʼohipa faufaʼa rahi roa ïa e tupu nei i niʼa i te fenua nei ». Tē vai nei ia ’oe e rave rahi rāve’a nō te fa’a’ite i te ’evanelia ’e nō te ani manihini ia vetahi ’ē ’ia ha’afātata atu ia Iesu Mesia ’e i tāna ’Ēkālesia. E nehenehe ’oe e tauturu ’ia ’ite mai i te mau tupuna ma te rāve’a fa’ahiahia ’e ’ia tauturu i te feiā tei pohe ’ia fāri’i i te mau ’ōro’a i roto i te hiero.
-
’A fa’a’ohipa i te ihi anoha’a ma te rāve’a maita’i. ’Ua fa’anahonaho-ta’a-’ē-hia ’oe nō te fa’a’ite i tō te ao nei, e mea nāhea te ihi anoha’a ’āpī e nehenehe ai e fa’a’ohipahia ma te maita’i.
-
’A pāto’i i te riri, i te vahavaha ’e i te ’āmahamahara’a. ’A ha’ape’ape’a ai teie mau ’ino i tō tātou nei ao, e nehenehe ’oe e fa’a’ite atu i te hō’ē ’ē’a maita’i a’e—te ’ē’a o te hāmani maita’i, te aroha, te fa’ahaura’a ’e te here o te Fa’aora.
-
’Ia vai itoito noa i roto i hō’ē ao tāuiui. Mai te mea e vai ha’apa’o maita’i ’oe ia Iesu Mesia, i tāna ’evanelia, ’e i tāna ’Ēkālesia, e ha’amaita’i mai te Fatu ia ’oe, ’e e hi’o mai vetahi ’ē i tō ’oe hi’ora’a maita’i i roto i te mau vero o te orara’a.
Tō mau temeio
’Aita te reira i riro noa e mea ’ōhie nō Nephi, tei reira rā ’oia i te vāhi (’e i te taime) tā te Fatu e hina’aro ai iāna. ’Ua ha’apa’o maita’i ’oia. I te pae hope’a, ’ua ’ite ’oia i te mau temeio ’e te mau ’ohipa māere i roto i tōna mau mahana ’e ’ua pāturuhia ’oia e te Fatu. (Hi’o Helamana 7–16.)
E nehenehe ’oe e ’ite i tō ’oe iho mau temeio ’e te mau ’ohipa māere, ’a vai ha’apa’o maita’i ai ’oe i tō ’oe mau mahana.