’O Iesu Mesia tō ’oe pūai
Mai te aha tō ’oe « huru » ?
E nehenehe tō ’oe huru nō ni’a i te mau parau tumu i roto i te arata’i Nō te pūai o te feiā ’āpī e tauturu ia ’oe ’ia tāpae i te mau vāhi teitei roa a’e.
E pi’i te mau pairati i te ti’ara’a o te manureva i roto i te reva tōna huru. E ihu-ni’a ānei ’aore rā e ihu-raro ānei te manureva ? E tāviri ānei ’aore rā e tere ’āfaro ānei ’e i te fāito tano ? Nā roto i te reo peretāne, e nehenehe ato’a te aura’a o te huru mai te ferurira’a nō te fa’aruru i te mau mea teitei ’e te mau mea i raro o te orara’a. Teie te hō’ē parau tahito nō ni’a i te rerera’a ’e te orara’a ’oia ho’i : « Nā tō tātou huru e fa’ata’a i tō tātou teiteira’a ».
E aha tō tātou huru ’ia tai’o ana’e tātou Nō te pūai o te feiā ’āpī : E arata’i nō te rave i te mā’itira’a ? E nehenehe tō tātou huru nō ni’a i te mau parau tumu i fa’a’itehia i roto i te arata’i e taui i tō tātou orara’a ’e e fa’ata’a e tāpae ānei tātou i te fāito teitei ’āpī ’aore rā e topa mai i te hō’ē fāito ha’iha’i a’e.
’Ua hōro’a mai te Fa’aora ia tātou i te hō’ē vāhi rahi nō te ha’amata. ’Ua parau ’oia, « e ao tō tei marū » (Mataio 5:5). E nehenehe tātou e rave mai i te hō’ē huru marū ma te rirora’a ’ei parauti’a, te ha’eha’a, ’e te hina’aro ’ia pe’e i te mau ha’api’ira’a o te ’evanelia. Teie e toru uira’a e fa’a’ite nei rave rau huru o tā tātou e fāri’i i mua i te mau parau tumu tei hōro’ahia mai ia tātou.
Huru 1 : E aha te fāito ’ino ’eiaha e ma’iri iā’u ?
E parau te feiā tē vai ra teie huru, « tei hea te rēni ? Tē hina’aro nei au e ora i pīha’i iho roa i te reira, ma te ’ore te reira e ma’iri iā’u ». E mea ataata te reira mai te hō’ē ta’ata ’ōu’a ’āmarara e ui : « E aha te vāhi piri roa a’e i te tahua tā’u e nehenehe e ’īriti i tā’u ’āmarara ? »
Huru 2 : E aha te fāito maita’i tei tītauhia iā’u ?
E mā’imi teie huru ta’ata i te tauto’ora’a iti e rave. ’Oia ho’i mai te anira’a i te hō’ē ’orometua ha’api’i, « e aha te ’ohipa iti ’o tā’u e nehenehe e rave nō te manuia ato’a i te ha’api’ira’a ? » E au ra te reira mai te ta’ata ’ōu’a ’āmarara e parau ra, « tē hina’aro nei au e rave i te ’ohipa maita’i ma te pū’ohura’a i tō’u ’āmarara, e ’ere rā ma te maita’i ».
Huru 3 : Nāhea vau i te rave itoito ?
’Ua parau mai te hō’ē tamaiti iā’u i te hō’ē mahana ē, tē haere nei ’oia i te séminaire i te hora 5 i te po’ipo’i. ’Ua nā ’ō atu vau, « e mea po’ipo’i roa. Nō te aha ’oe e haere ai ? » ’Ua pāhono noa mai ’oia, « nō te mea tē hina’aro nei au. ’Ua here au i te reira. E tuha’a maita’i roa a’e te seminaire nō tō’u mahana ». Tōna huru ’oia ho’i, « tē hina’aro nei au ’ia vai itoito noa ! » Nōna, ’ua riro te ha’apa’ora’a ’ei ’imira’a, e ’ere i te ’ino’inora’a.
E au ra te reira mai te ta’ata ’ōu’a ’āmarara e parau ra, « e pū’ohu māite au i tā’u ’āmarara ’e e ’īriti au i te reira hou ’a tae ai i ni’a i te repo fenua, nō te mea e mea au nā’u te ’ōu’a ’āmarara ’e tē hina’aro nei au e tāmau noa i te rave i te reira ». E tauturu te reira huru ia tātou ’ia pa’i’uma i ni’a.
I roto i te Buka a Moromona, ’ua pūpū te metua tāne o te ari’i Lamoni i te hō’ē pure nehenehe ’o tē fa’a’ite maita’i nei i te huru 3 :
« E te Atua, ’a fa’a’ite mai na ’oe ia ’oe iho iā’u nei, ’e e ha’apae atu vau i tā’u ato’a ra mau hara ’ia ’ite au ia ’oe na » (Alama 22:18).
’Aita te ari’i i parau, « nāhea vau e riro ai e mea ’ino mau ’e ’ia ’ite ia ’oe ? » ’aore rā « nāhea vau e riro ai e mea maita’i mai nō te ’ite ia ’oe ? » ’Aita, tōna huru, ’oia ïa, « e ha’apae atu vau i tā’u mau hara ato’a ’ia ’ite au ia ’oe na ».
Mau huru teitei a’e ’e te mo’a a’e
Tē ti’aturi nei te Fatu ia tātou ’eiaha ’ia ’imi i te mau ’apera’a, ’ia ’imi rā i te mau huru teitei a’e ’e te mo’a a’e. Mai te peu ’aita te tahi mea i fa’ata’a-maita’i-hia i roto i te arata’ira’a mai tā tātou e mana’o nei, ’eiaha e uiui ē, « e aha te mea tā te Atua e fa’ati’a ? » teie rā « e aha tā te Atua e au roa a’e ? » Tē fa’a’ite nei te piti o te uira’a i te ’ā’au hina’aro ’o tā te Fatu e hina’aro nei ia tātou ’ia fa’ananea ma te ha’api’ira’a ia tātou ’ia vai marū noa.
Mai te mea e pa’i’uma atu vau i roto i te hō’ē manureva, ’aita roa vau e hina’aro nei ’ia ui te pairati ē « Mai te aha tō’u huru ’ia ’ino vau ? » ’aore rā ato’a, « Mai te aha tō’u huru e mea maita’i au ? » Tē hina’aro nei au ’ia ui mai ’oia, « Mai te aha te huru ’ia vai itoito ai au ? » I roto i te rerera’a ’e i roto i te orara’a, nā te huru o te peu e fa’ata’a i tō tātou fāito. ’Aita te buka arata’i Nō te pūai o te feiā ’āpī i pāpa’ihia nō te fa’ata’a a’e i te mau peu e pe’e, i te ha’api’ira’a tumu rā nō te ti’ara’a pipi. ’O te tuha’a nō muri iho mau ïa.