Parau ’āfaro atu

Tē ha’apa’o ra ānei te ’Ēkālesia i te ’ohipa poritita ’e i te fa’aterera’a fenua ?

E fa’aruruhia tō tātou orara’a e te ’ohipa poritita ’e e te fa’aterera’a fenua, ’oia ato’a tō tātou ’aravihi nō te ha’amori, ’e tē fa’aitoito nei Te ’Ēkālesia a Iesu Mesia i te Feiā Mo’a i te mau Mahana Hope’a nei i tōna mau melo ’ia ’āmui atu i roto. Nā roto i tāna mau peropheta, ’ua hōro’a mai te Fatu ia tātou i te mau parau tumu mau, ’e tei ia tātou tāta’itahi i te fa’a’ohipara’a i teie mau parau tumu i roto i te mau huru ta’a ’ē o tō tātou orara’a, ’oia ato’a i roto i tā tātou tītaura’a poritita ’e fa’aterera’a fenua. E mau ture ta’a ’ē i tō tera ’e tera vāhi, ’e tē fa’aitoito nei te ’Ēkālesia ia tātou ’ia ’āmui hau atu mai tā tātou e nehenehe.

’Aita te ’Ēkālesia iho e turu nei i te hō’ē noa a’e pupu poritita, te fa’anahora’a ’aore rā te tino poritita. ’Aita tōna e pae poritita. ’E ’aita te ’Ēkālesia e parau nei ia tātou nāhea ’ia mā’iti. E fa’aha’amana’o noa te reira ia tātou ē, ’ua parau mai te Fatu ia tātou ’ia ’imi ’e ’ia pāturu i te feiā fa’atere ha’avare ’ore, te maita’i ’e te pa’ari (hi’o Te Ha’api’ira’a Tumu ’e te mau Fafaura’a 98:10). ’E i te tahi taime, e ha’apuroro ’oia i te mau fa’ahitira’a mana i te huira’atira nō ni’a i te mau ’ohipa poritita e tū’ati i te mau uira’a i te pae mōrare ’aore rā i te mau fa’a’ohipara’a a te ’Ēkālesia.

Tē fa’aitoito ato’a nei te ’Ēkālesia i te mau melo ’ia tauturu i te fa’arirora’a i tō rātou tuha’a ’oire ’ei vāhi au maita’i nō te ora ’e nō te aupuru i te mau ’utuāfare. E rave rahi tumu maita’i i roto i te reira ’o tātou e nehenehe ai e fa’aō atu nō te ha’amaita’i i te mau ’ohipa, i te mau vāhi tei reira tātou.

Hi’o Buka arata’i rahi, 38.8.30, Vaira’a buka ’evanelia ; Te mau Hīro’a Fa’aro’o 1:11–12.