Tiepene Lap
Limpoak en Krais kin Kasohrala Kailok
Kapokon Lap en Oakotohpe 2021

Limpoak en Krais kin Kasohrala Kailok

Sang Elder Dale G. Renlund

Sang Pwihn en Wahnparon Ehk-riemenko

Ni ansou me limpoak en Krais kin kapilpene atail mour, kitail kakehng powehdi saweweh kan sang ni atail kin ahniki aktikit, kanengamah, oh kadek.

Rioai mwanakapw oh peinakapw kan koaros, nan ansoun exercise en kihsang kapwunod kan, dodohk en mongiong kan kin keirda. Mohngiong kan me kin kakehng alu pahn sohte mweihn kak en sawas ong tangada ni ukada. Ni wiepe wet, sosohng en mongiong wet pahn kak kasalehda soumwahu me sohte sansal. Soumwahu sohte lipilipil me pwarada pahnkak kamwahula mwohn arail pahn kahrehda kahpwal laud nan momour en akan.

Soumwau dou COVID-19 wia ehu mehn sosohng ong sampah pwon! Sosohng wet kasaledahr songongen imwila tohto. Dok en silasil mwahu oh katapan kan wiawidahr.1 Semen en wiahda wini kan, sounpadahk kan, sounkihda sawas kan, oh mehtei kan kasaledahr arail tohmetei laud—oh wie peusehlahte arail tohnmetei. Aramas tohto kasaledahr arail limpoak oh sapan--oh sohte uhdi. Ahpw, kisehn kahpwal wet wie pwarapwaradahte. Me kohwa soumwau kan ahnkidier lokolok--oh wie lokolokte kohwei. Irail kan me wie doadoahk pwehn kasalehda duwen iren kahpwal pwukat anahne utuht oh kaping ong irail.

Soumwahu wet pil wia ehu sosohng en palingehn ong sapwellimen Sounkomouro Mwomwohdiso oh towehkan. Soangoasoangen ireh kei me pwaradahr. Atail mour kapaikidahr sang ni wen papah “laud oh sarawi,”2 me sang pwuhk en kaskuhl Come Follow Meme wia poahson en dipwisoun kasukuhl en wasahn kouson sang ni utuht en rongamwahu en Mowmowhdiso. Me tohto me kasaledahr arail sawas en limpoak oh kaloalemwahu nan ansou apwal pwukat oh kin wenlahte wihwia.3

Ahpw, mie ansou, me sosohng en palingehn wet kin kapwarada uhpene oh liaktohrohr. Met kasalehda me kitail anahne wekidala atail mohngiong kan pwehn ehupene nin duwen atail wia tohnpadahk mehlel kei en Sounkomouro. Met sohte wia ire kapw ehu, ahpw ire kesempwal ehu.4

Ni ansou me Sounkomouro ketla rehn mehn Nihpai ko, E ketin padahngki, “Sohte akupwung pahn wiawi nan pwungamwail. Mehmen me kin kolokol ineng en uhpene, kaidehn e kin kohsangie, ahpw e kin kohsang rehn tepelo, iei ihme pahpahn uhpene oh e kin kamwakidada mohngiong en aramas akan en kin uhpene nan pwungarail.”5 Ni atail kin uhkihpene atail kailok, Setan kin pereniki oh Koht en nanleng kin ketin pahtoukihla.6

Setan kin kouruhr oh Koht kin ketin pahtoukihla pwehki kahrepe riau. Keieu, uhpene kin kaluwetehla atail kin kadehdeki Sises Krais ong sampa oh doarepatail me kin alahldi sang Sapwellime “tohnmetei kan, mahk, oh kalahngan.“”7 Sounkomouro mahsani, “I pahn kihong kumwail kosonned kapw ehu, Kumwail en poakpene nanpwungamwail. Pwe ihme aramas koaros pahn esehki me kumwail nei tohnpadahk kei, ma kumwail pahn limpoakpene.”8 Lepin mahseno pil mehlel—koaros ese me kitail kaidehn Sapwellime tohnpadahk kei ma kitail sohte pahn kasalehda atail limpoak ong mehteikan. Sapwellime doadoahk en ni imwin rahn-akan kin sapwungala ma uhpene de kailok9 kin miehda nan pwungen Sapwellime tohnpadahk kan.10 Keriau, uhpene kin kasaminehla palingenatail kan. Kitail kin sohla kak diar meleilei, popohl, oh kommol, oh atail kak en pepehm Ngehno kin sohrala.

Sises Krais ketin mahsani me Sapwellime padahk sohte kin “kamwakidada mohngiong en aramas akan en kin lingeringeriong emenemen, ahpw [me Sapwellime] padahk me soahng pwuko en dehr kin wiawi.”11 Ma I kin mwadang en pelian de sapeng ire de madamadau ehu ni lingeringer de kadeik, palingenio sohte powehdi kasongosongo. Pwupwidi pahn kasongosongo sohte wehwehki me solahr ahi koapworopwor. Ahpw ihme e kasalehda me I anahne wekila. Oh mwo wia mehkot mwahu I en ese.

Mwurin en Sounkomouro ketla America, aramas akan miniminpenehr; “sohte uhpene nan sahpwo.”12 Dahme kumwail medemedewe me aramas akan miniminkipene pwehki irail koaros duwepene, de pwehki arail madamadau kan duwepene? I sohte leme. Ahpw, uhpene oh kailok sohla mie pwehki irail pwokada arail mour en tohnpadak en Sounkomouro pohnangin mehkoaros. Arail wekpeseng kan kihrla pwehki arail poakohng Spounkomouro, oh irail minimikipene arail “sohsohki wehin Koht.”13 Ni imwio “saikinte pwihn en aramas ehu me pein limen Koht ketin kapikada me kin peren duwehte irail.”14

Miniminpene anahne en kin koadoakda.15 E kin miehda ni atail kin kakairada limpoak en Koht nan mohngiongitail kan16 oh kitail kin kilekilenlahngete atail mour soutik.15 Kitail kin miniminpene pwehki atail wia seri en Koht kei18oh atail kin kesempwaliki me mehlel kan en rongamwahu kopwurupwurdohu. Mwurin mwo, atail poakohng Koht oh atail wia tohnpadahk en Sises Krais pahn kakairada atail impoak ong mehteikan. Kitail kin kesempwaliki en mehteikan arail wiewia, madmadau oh koahiek kan.19 Ma kitail sohte kak pwokada atail mour en tohnpadahk en Sises Krais pohnangin dahme kitail kin pereniki oh medemedewe, kitail ahane pwurehng dawih dahme kitail kin kesempwaliki oh wekidala.

Kitail ele kak nda, “Mehlel kitail kak miniminpene--ihte ma kumwail pahn pwungkin ie!” E pahn mwahusang ma kitail kin peidek, “Dahme I kak wia pwehn kakehlaka miniminpene? Ia mwoamwen ahi kak sewesehda aramas menet pwehn karaniala Krais? Dahme I kak wia pwehn katikala uhpene oh pwehn kauwada ehu Mwomwohdisohn limpoak oh nseno?“

Ni ansou me limpoak en Krais kin kapilpene atail mour,20 kitail kin apwalih sohte pwung penehn kan sang ni karakarahk, kanengamah, oh kadek.21 Kitail kin uhd kesempwaliki en mehn mpatail kan arail madamadau, kaidehn atail. Kitail “kin rapahki ehupene oh miniminpene.“22 Kitail sohte kin uhkipene madamadau likamw kan, kadeik irail me kitail sohte pwungki, de song en kese iraildi.23 Ahpw, kitail kin medemedwe me irail me kitail sapwungki kan wiewia arail kak koaros nin duwen irair kan me irail alehier nan arail mour.

Ahi pwoudo wiahier emen sounsawas ki erein sounpar 20 [riesek]. Nin duwen sounsawas men, e kin doadoahkehng irail kan me arail pwuhng kan sohte kin dokpene. Ahpw e esehier mwomwen ah pahn sapwungki ni ah sohte laumwoahmwki de lingeringerki. Ekak ndahiong pali me sohte pwungkio, “I kak kilang me kita sohte pahn pwungkihla ire wet. I pwungkin komwi. I wauneki sapwellimwomwi madamadau. I koapwoaroapwoariki me komwi kak kihong ie soangen wahuohte.” Met kin kalapw kasalehda wahupene oh nanpwungmwahu mendahte wiewiah kan ah sohte ehupene.

Pwe imwintihti kan en mahs pil kak miniminpene nan arail pwukoah en tohnpadahk en Sounkomouro.24 Nan 2006, I iang ehu kapidelong en Tehnpas Sarawi en Helsinki Finland pwehn kawauwih ahi pahpao oh pahpa/nohno kahlapko me iangala Mwomwohdiso wet nan Finland. Mehn Finland kan, iangahki ahi pahpao, ouramanikiher ehu tehnpas sarawi en kokouda nan Finland ki sounpar kei. Ni ansouo, tehnpas sarawi en distrik me apwalihpene Finland, Estonia, Latvia, Lithuania, Belarus oh Russia.

Ni kapidelongo, I diarada mehkot kapwuriamwei. Keieun rahn me tehnpas sarawio tepda doadoahk koasondiongehr towe kan en Russia en wia arail tiahk sarawi en tehnpas sarawi. Me apwal I en kawehwehda uwehn kapwuriamwein mwekid wet. Russia oh Finland mahmahwenpene ki sounpar ngeder kei. Ahi pahpao sohte kin liki oh sohte pwungki kaidehnte Russia ahpw mehn Russia koaros. Ohlo kasalehdahr mehlel en ah madamadau kan, oh ah madamadau kan duwehtehte en mehn Finland kan arail madamadau ong Russia. Ohlo wadlikialahr soai kei me pid mahwen kan nan pwungen mehn Finland oh Russia kan . Dahme e lelehng kan nan irair en Mahwen Keriauo, ni ansou me Finland oh Russia pil pwurehng peipene, sohte wekidala ah madamadau kan.

Sounpar ehu mwhon kapidelong en Tehnpas Sarawi en Helsinki Finland, kamidi en tehnpas sarawio me audaukihda mehn Finland tohr, tuhpene pwehn koasone duwen kapidelongo. Nan mihtingo, mehmen pakairki me Souleng en Russia kan pahn seilongki rahn kei pwehn iang kapidelongo oh koapwoaroapwoariki me irail pahn ale arail kapai en tehnpas sarawi mwohn arail pwurala nan arail wasa. Chairman en kamidi, Brother Sven Eklund, peki me mehn Finland kan kak ekis awi, pwe mehn Russia kan pahn tepin ale arail tiahk sarawi kan nan tehnpas sarawi. Tohn kamidi ko koaros pwungkihla. Souleng pwoson kan en Finland kapwandalahr arail kapai kan en tehnpas sarawi pwehn apwalih mahs Souleng en Russia.

Ehria Presiden me iang mih nan mihting en kamidio, Elder Dennis B. Neuenschwander, mwuri ntingi me. “I sohte kin kalahki mehlel mehn Finland duwehte me I ahniki ahnsou wet. Wen kahpwal akan me sansal nan poadoapoad en nan pwungen mehn Finland oh irail mehn pali epeng oh wen arail peren pwehki ehu [tehnpas sarawi] kokoudahr pohn sapwarail me pwilikihdier mepwukat. Mweidehng mehn Russia kan en tepin pedelong nan tehnpas sarawio wia kadehde pen limpoak oh tohnmetei.”25

Ni ahi padahkihong ahi pahpao duwen limpoak wet, mohngiong en ohlo pei peseng oh e mwahieidi, olen Finland sohte kin wia mwekid wet. Sang ni ansouo lao e kapilsalehdala sounpar silu mwuri, ohlo sohte pak ehu ndahki Russia mehkot suwed. Pwehki karasaras mwahu me e alehdi sang ienge mehn Finland kan, ahi pahpao pilada en pwokada ah mour en tohnpadahk en Sises Krais pohnangin mehkoaros. Mehn Finland wiewiahte mehn Finland; mehn Russia wiewiahte mehn Russia; irail sohte pwilikihdi arail tiahk, poadoapoad, de irair kan pwehn kasohrala imwintihti. Irail sohte anahne wia mwo. Ahpw, irail pilada irail en koadoahki arail mour en tohnpadahk en Sises Krais26

Ma irail kak wia met, kitail pil kak. Kitail kak wahdo atail mour, tiahk, oh irair kan ong nan Mwomwohdiso en Sises Krais. Samuel sohte pirekek sang ah mour en mehn Laman,27oh Mormon sohte pil pirekek sang ah ni e wia mehn Nihpai.28 Ahpw emenemen ira pwokada ara mour en wia tohnpadahk en Sounkomouro mwohn mehkoaros.

Ma kitail sohte ehupene, kitail sohte wia Sapwellime.29 Ai luhkei kumwail en ahniki eimah ni atail poakehng Koht oh pwokada atail mour en tohnpadahk en Sounkomouro mwohn mehkoaros.30 Kitail uhpa kosonned me pid atail mour en tohnpadahk--kosonned en ehupene.

Kitail idawehn karasaras en Souleng kan en sampa me pweidahr ni arail wihwiahla tohnpadahk en Krais. Kitail kak likih Sises Krais, me “wia atail popohl, me karangkehdi kehl me kin katohreirailpeseng; ketin kasorehla imwintihti pwehki sapwellime [tomwo].”31 Atail kadehde duwen Sises Krais ong sampah pahn kehlail la, oh kitail pahn pil kekehlail te ni pali ngehn. 32 Ih kadehde me ni atail “kauhdi uhpene“ oh wiahla “duwehte-ehu ong Kauno ki limpok oh ehu ong Ih ki pwoson,“ Sapwelime popohl pahn mihmi rehtail. 33 Ni mwaren Sises Krais, amen.

Ireh kan

  1. Kilang “ Keieu en Presidensi Koangengohki Souleng-en-Imwin-Rahn-Akan En Kin Dodohngki Mask Ansou me Anahn Akan oh Ale Dok En Silasil En COVID-19,” Newsroom, Aug. 12, 2021, newsroom.ChurchofJesusChrist.org; “Vaccines Explained,“ World Health Organization, who.int/emergencies/diseases/novel-coronavirus-2019/covid-19-vaccines/explainers; “Safety of COVID-19 Vaccines,” Centers for Disease Control and Prevention, Sept. 27, 2021, cdc.gov/coronavirus/2019-ncov/vaccines/safety/safety-of-vaccines.html; “COVID-19 Vaccine Effectiveness and Safety,” Morbidity and Mortality Weekly Report, Centers for Disease Control and Prevention, cdc.gov/mmwr/covid19_vaccine_safety.html.

  2. Russell M. Nelson, “Sisters’ Participation in the Gathering of Israel,” Liahona, Nov. 2018, 69.

  3. Tehk Doctrine and Covenants 81:5.

  4. Wahnparon oh soukohp tohto pil padahngkiher duwen miniminpene oh uhpene nan pahr kei samwalahr. Kilang, ni karasepe: Marvin J. Ashton, “No Time for Contention,” Ensign, May 1978, 7–9; Marion G. Romney, “Unity,” Ensign, May 1983, 17–18; Russell M. Nelson, “The Canker of Contention,” Ensign, May 1989, 68–71; Russell M. Nelson, “Children of the Covenant,” Ensign, May 1995, 32–35; Henry B. Eyring, “That We May Be One,” Ensign, May 1998, 66–68; D. Todd Christofferson, “Come to Zion,” Liahona, Nov. 2008, 37–40; Jeffrey R. Holland, “The Ministry of Reconciliation,” Liahona, Nov. 2018, 77–79; Quentin L. Cook, “Hearts Knit in Righteousness and Unity,” Liahona, Nov. 2020, 18–22; Gary E. Stevenson, “Hearts Knit Together,” Liahona, May 2021, 19–23.

  5. 3 Nephi 11:28–29.

  6. Tehk Moses 7:26, 28, 33. Met e sohte wewehki me sapwellimen Sounkomouro tomw en tohnmetei doudoulahte de E ketin wie lokolokte; Sise Krais ketin kaimwsekalahr Tomwo. Ahpw, Sapwellime limpoak poatoapoat, unsek, oh sohte imwi me E ketin kileimih me wia pweidahn Sapwellime tomw en tohnmetei me E ketin kaimwsekala me kahrehda Eh ketin ahniki insensuwed oh pahtou.

  7. 2 Nihpai 2:8.

  8. Sohn 13:34, 35.

  9. Imwintihti iei pepehm en uhwong de kin kasapwunge mehmen de mehkot; e kin iangahki moromor, lemei, kailok, akatat, on uhdahn sohte pwungki de lamalam suwed. Lokaiahn Greek ni kaweweh “imwintihti” iei me pil wehwehki “kailok.” Iei me weksang agapeme kin wehwehki “limpoak”. Kilang James Strong, The New Strong’s Expanded Exhaustive Concordance of the Bible (2010), Greek dictionary section, 2189.

  10. Tehk Sohn 17:21, 23.

  11. 3 Nihpahi 11:30.

  12. 4 Nephi 1:18.

  13. 4 Nephi 1:17.

  14. 4 Nephi 1:16.

  15. Preseden Russell M. Nelson ketin mahsanih me, “Sapwellimen Koht manaman en limpoak kan” (nan Joy D. Jones, “An Especially Noble Calling,” Liahona,, Mei 2020, 16).

  16. Kilang 4 Nihpai 1:15. Miehier irail kan me aledier soangen minimin wet. Nan mwein Enoch, “Kauno ketin kahdaneki sapwellime aramas akan Saion, pwehki irail ahneki mohngiong oh lamalam ehute, oh kin wiewia me pwung; oh sohte me paisuwed nan pwungarail” (Moses 7:18).

  17. Tehk Mosiah 18:21.

  18. Tehk Wiewia kan 17:29Melkahka kan 82:6.

  19. Tehk 1 Korint 12:12–27.

  20. Tehk Moroni 7:47-48.

  21. Tehk Doctrine and Covenants 107:30–31.

  22. Dallin H. Oaks, “Defending Our Divinely Inspired Constitution,” Liahona, Mei 2021, 107.

  23. Tehk Rom 14:1–3, 13, 21

  24. Sounkomouro koasoiahki Sapwellime tohnpadahk kan, ni keilahn aio me rapahki en kadeik emenmen oh sohte mahkpene nan arail mohngiong kan; oh pwehki met irail eri keriahla oh ale kauparail. Ihme kahrehda,” Sises ketin kangonge Sapwellime tohnpadahk en imwin rahn-akan, I ndahiong kumwail, kumwail anahne mahkpene nan pwungamwail (Doctrine and Covenants 64:8–9).

  25. Elder Dennis B. Neuenschwander, pein sapwellime kisin likou.

  26. Nin duwen tiahk en mehn Finland, ni en Brother Eklund ah kosoia ire wet, e nda me iei ih madamadau pwungo mwo. Ahpw eh sohte kepinga en mehn Finland kan arail lamalam mwahu, e wia kaping kalahngan ong mehn Russia kan. Mehn Finland kan kaping kalahnganki lapalahn sawas me mehn Russia kan wiahiong Tehnpas Sarawi en Helsinki Finland. (Sven Eklund, peihn ah kisin likou.)

  27. Tehk Helaman 13:2, 5.

  28. Tehk 3 Nephi 5:13, 20.

  29. Tehk Doctrine and Covenants 38:27.

  30. Tehk Luk 14:25–33.

  31. Episos 2:14–15.

  32. Tehk Episos 2:19.

  33. Kilang Russell M. Nelson, “The Canker of ContentionEnsignMei 1989, 71.