Siya Nabanhaw nga adunay Kaluwasan sa Iyang mga Pako: Mahimong Labaw Pa Kita ka mga Mananaog

Abril 2022 nga kinatibuk-ang komperensiya

12:15

Siya Nabanhaw nga adunay Kaluwasan sa Iyang mga Pako:

Mahimong Labaw Pa Kita ka mga Mananaog

Ni Elder Patrick Kearon

Sa Kapangulohan sa Seventy

Si Jesus mibuntog sa mga pag-abuso niini nga kalibotan aron sa paghatag kaninyo og gahom dili lamang sa pagsugakod, apan usa ka adlaw, pinaagi Kaniya, sa pagbuntog ug bisan sa pagdaog.

Marin, ako si Elder Holland, ug ang mga butang mag-anam na og ka maot.

Labaw Pa Kita ka mga Mananaog

Kitang tanan naintriga sa mga istorya sa pagsugakod. Nakadungog kita sa mga istorya sa walay kahadlok nga mga manunuhid [explorers] ug ordinaryo nga mga tawo nga nakahimo nga ipabiling buhi ang ilang kaugalingon bisan pa og imposible ug makapangutana gayod kita sa atong kaugalingon, “Makabuhat kaha ko niana?”

Ako makahunahuna dayon sa British nga manunuhid nga si Ernest Shackleton ug sa mga tripulante sa iyang barko nga HMS Endurance, nga nalunoran og barko diha sa yelo sa Antartika ug dayon natanggong diha sa walay tanom nga isla sulod sa dul-an duha ka tuig. Ang talagsaon nga pagpangulo ug dili mabuntog nga tinguha ni Shackleton miluwas sa mga kinabuhi sa iyang mga tawo, bisan pa sa kinalisoran nga mga kondisyon.

Dayon makahunahuna ko sa mga tripulante sa Apollo 13 nga naglawig sa kawanangan aron mo-landing sa bulan! Apan nahitabo ang usa ka katalagman sa dihang mibuto ang tangke sa oxygen, ug ang misyon kinahanglang hunongon. Kulang sa oxygen, ang mga tripulante ug ang mission control maalamong miayom-ayom ug luwas nga midala sa tanang tulo ka astronaut balik sa yuta.

Nahingangha ko sa makapahibulong nga pagsugakod sa mga indibidwal ug mga pamilya nga nabiktima sa gubat, nabilanggo sa mga kampo, ug niadtong nahimong mga bakwit kinsa mabayanihon ug maisogon nga mipabiling buhi sa kalayo sa paglaom alang sa mga isigkatawo nga nag-antos, kinsa mipakigbahin og kamaayo bisan pa man sa pagkabangis, ug kinsa nakahimo pa gayod sa pagtabang sa uban nga molahutay og bisan usa pa ka adlaw.

Makasugakod ba kamo o ako sa bisan usa niini nga grabe nga mga kahimtang?

Tingali pipila kaninyo, hinuon, makakonsiderar sa mga istorya sa mga nakasugakod, ug makaamgo nga kamo nagpuyo sa usa ka istorya sa pagsugakod karon isip usa ka biktima sa pag-abuso, pagbaliwala, pagdaogdaog, pagpangdapat [domestic violence], o sa bisan unsa nga pag-antos niini nga matang. Kamo anaa taliwala sa inyong kaugalingon nga desperado nga paningkamot nga makasugakod sa usa ka sitwasyon nga mabati nga sama kaayo sa usa ka makaalaot nga pagkalunod sa barko o sa usa ka malaomon kaayo nga misyon nga kalit lang nga gihunong. Mareskyu ba kaha gayod kamo; makalahutay ba kamo sa inyong kaugalingon nga istorya sa pagsugakod?

Ang tubag oo. Makasugakod kamo. Kamo sa pagkatinuod nareskyu na; kamo naluwas na—pinaagi sa Usa kinsa miantos sa mismong kasakit nga inyong giantos ug milahutay sa mismong paghingutas nga inyong gilahutay.¹ Si Jesus mibuntog sa mga pag-abuso niini nga kalibotan² aron sa paghatag kaninyo og gahom dili lamang sa pagsugakod, apan usa ka adlaw, pinaagi Kaniya, sa pagbuntog ug bisan sa pagdaog—aron hingpit nga mopatigbabaw sa kasakit, sa kasubo, sa kaguol, ug makita kini nga mailisan sa kalinaw.

Si Apostol Pablo nangutana:

“Kinsa ba ang makapahimulag kanato gikan sa gugma ni Kristo? Ang pag-antos ba, o ang kasakitan, o ang paglutos, o ang gutom, o ang kahubo, o ang katalagman, o ang espada ba? …

“Dili, hinonoa niining tanang mga butanga labaw pa kita ka mga mananaog pinaagi kaniya nga nahigugma kanato.”³

Ang mga Saad ngadto sa Nakigsaad nga Israel

Mahinumdoman ninyo sa dihang si Presidente Russell M. Nelson miisyu sa mosunod nga pagdapit sa kinatibuk-ang komperensiya. Miingon siya: “Samtang magtuon kamo sa inyong mga kasulatan … , moawhag ako kaninyo sa paghimo og lista sa tanan nga gisaad sa Ginoo nga Iyang buhaton alang sa nakigsaad nga Israel. Nagtuo ko nga mahingangha kamo!”⁴

Aniay pipila lamang sa gamhanan ug makapahupay nga mga saad nga nakit-an sa among pamilya. Hunahunaa ang Ginoo nga namulong niini nga mga pulong nganha kaninyo—nganha kaninyo kinsa nagsugakod—tungod kay kini alang kaninyo:

Ayaw kahadlok.⁵

Nasayod ako sa inyong mga pag-antos, ug Ako miabot aron pagluwas kaninyo.⁶

Dili ko kamo biyaan.⁷

Ang akong ngalan anaa kaninyo, ug ang akong mga anghel mobantay kaninyo.⁸

Ako maghimog katingalahang mga butang sa taliwala ninyo.⁹

Lakaw uban kanako; pagkat-on gikan kanako; papahulayon ko kamo.¹⁰

Ako anaa sa inyong taliwala.¹¹

Kamo akoa.¹²

Ngadto Niadtong Kinsa Nagsugakod

Uban sa paghunahuna gayod niana nga mga kasegurohan, gusto kong direkta nga mamumulong ngadto niadtong mibati nga ingon og walay kalingkawasan sa ilang kaugalingon nga istorya sa pagsugakod tungod sa kasakit nga gipahamtang pinaagi sa madagmalon nga mga binuhatan sa uban. Kon kini mao ang inyong istorya sa pagsugakod, kami nagdangoyngoy uban kaninyo. Nangandoy kami nga kamo makabuntog sa kalibog, kaulaw, ug kahadlok, ug kami nagtinguha alang kaninyo, pinaagi kang Jesukristo, nga modaog.

Gikan sa Pagkabiktima ngadto sa Pagkanakasugakod ngadto sa Pagkamananaog

Kon kamo nakasinati og bisan unsang matang sa pag-abuso, pagdagmal, o pagdaogdaog, tingali nagkaideya kamo nga kini nga mga panghitabo mahimong inyong sala ug nga kamo angay nga modawat sa kaulaw ug kasal-anan nga inyong gibati. Kamo mahimong adunay mga hunahuna sama sa:

Napugngan nako unta kini.
Ang Dios wala na mahigugma kanako.
Wala na gayoy mahigugma kanako.
Ako nadaot na nga dili na gayod mamaayo.
Ang Pag-ula sa Manluluwas magamit ngadto sa uban apan dili kanako.

Kining sayop nga mga panghunahuna ug mga pagbati tingali usa ka babag sa pagpangayo og tabang gikan sa pamilya, mga higala, mga lider, o mga propesyonal, ug mao nga nag-inusara kamong nanglimbasog. Kon nangayo kamo og tabang gikan niadtong inyong gisaligan, tingali nakigbisog pa kamo sa mga ideya sa kaulaw ug gani kasilag sa kaugalingon. Ang epekto niini nga mga panghitabo mahimong magpabilin sulod sa daghang katuigan. Naglaom kamo nga usa ka adlaw moarang-arang ang inyong pagbati, apan sa wala mahibaloi nga hinungdan kana nga adlaw wala pa moabot.

Ang pag-abuso dili kaniadto, dili karon, ug dili gayod inyong sala, bisan unsa pay sukwahi nga gisulti sa miabuso o ni bisan kinsa. Kon kamo usa ka biktima sa pagdagmal, paghilawas sa duol nga kabanay [incest], o sa bisan unsang kadaotan, dili kamo ang kinahanglang maghinulsol; dili kamo ang responsable.

Kamo dili menos nga takos o menos nga bililhon o menos nga gihigugma isip usa ka tawo, o isip usa ka anak nga babaye o anak nga lalaki sa Dios, tungod sa unsay gibuhat sa laing tawo kaninyo.

Ang Dios wala karon nakakita, ni Siya sukad nakakita, kaninyo isip tawo nga pagatamayon. Bisan unsa may nahitabo kaninyo, Siya wala naulaw o nasagmuyo kaninyo. Siya nahigugma kaninyo sa paagi nga inyo pang diskobrehon. Ug inyo kining madiskrobrehan kon kamo mosalig sa Iyang mga saad ug kon kamo makat-on nga motuo Kaniya kon Siya moingon nga kamo “bililhon sa [Iyang] pagtan-aw.”¹³

Ang inyong bili wala gitino niining makalilisang nga mga butang nga nabuhat nganha kaninyo. Kamo, sa mahimayaon nga kamatuoran, gihatagan og bili pinaagi sa inyong anaa na nga mahangtoron nga pagkatawo isip usa ka anak nga lalaki o anak nga babaye sa Dios ug pinaagi sa hingpit, walay kataposan nga gugma ug pagdapit sa inyong Tiglalang ngadto sa tibuok ug kompleto nga pagkaayo.

Bisan og kini ingon og imposible, mabati nga imposible, ang pagkaayo mahimong moabot pinaagi sa milagro sa matubsanon nga kusog sa Pag-ula ni Jesukristo, kinsa nabanhaw “nga adunay kaluwasan sa iyang mga pako.”¹⁴

Ang atong maluluy-on nga Manluluwas, nga madaogon batok sa kangitngit ug kadaotan, adunay gahom sa paghusto sa tanang sayop, usa ka makahatag og kinabuhi nga kamatuoran alang niadtong nasad-an sa uban.¹⁵

Palihog hibaloi nga ang Manluluwas nakasinati sa tanan nga butang, bisan sa unsay nahitabo kaninyo. Tungod niana, Siya nasayod gayod kon unsay pagbati sa tinuod nga kalisang ug kaulaw ug unsay pagbati nga gibiyaan ug nasakitan.¹⁶ Gikan sa kinahiladman sa Iyang maulaong pag-antos, ang Manluluwas nagpakigbahin og paglaom nga inyong gihunahuna nga nawala na sa hangtod, kalig-on nga inyong gituohan nga dili na gayod ninyo maangkon, ug pagkaayo nga wala ninyo gihunahuna nga posible.

Ang Abusado nga Kinaiya Klarong Gipanghimaraot sa Ginoo ug sa Iyang mga Propeta

Walay luna ang bisan unsang matang sa pag-abuso—pisikal, sekswal, emosyonal, o berbal—sa bisan unsang panimalay, bisan unsang nasod, o bisan unsang kultura. Walay bisan unsang mabuhat o masulti ang usa ka asawa, anak, o bana ang mohimo kanila nga “angayan” nga kulatahon. Walay bisan kinsa, sa bisan unsang nasod o kultura, ang “nangayo” sukad og pagpangatake o pagdagmal gikan sa laing tawo nga anaa sa awtoridad o sa usa ka tawo nga mas dako ug mas kusgan.

Kadtong kinsa nangabuso ug kinsa nagtinguha sa pagtago sa ilang grabe nga mga sala mahimong makaipsot niini sulod sa usa ka panahon. Apan ang Ginoo, kinsa nakakita sa tanan, nasayod sa mga binuhatan ug sa mga hunahuna ug mga tumong sa kasingkasing.¹⁷ Siya usa ka Dios sa kaangayan, ug ang Iyang balaanon nga hustisya ipahamtang.¹⁸

Sa milagrosong paagi, ang Ginoo usa usab ka Dios sa kaluoy ngadto sa matinuoron nga naghinulsol. Ang mga miabuso—lakip niadtong kinsa mismo giabusohan kaniadto—kinsa mokompisal, mobiya sa ilang sala, ug mobuhat sa tanan sa ilang gahom aron sa pagbayad ug pagpahiuli, makapahimulos sa kapasayloan pinaagi sa milagro sa Pag-ula ni Kristo.

Ang mga gipahamtangan og bakak nga pasangil, nakasinati sa grabe nga kaseryoso ug kasakit niini nga mga pasangil ug dili makiangayon nga gisilotan. Apan sila usab gipanalanginan sa puli nga pag-antos sa Manluluwas alang kanila ug sa kahibalo nga sa kataposan ang kamatuoran mopatigbabaw.

Apan ang mga miabuso nga dili mahinulsolon mobarog sa atubangan sa Ginoo aron manubag sa ilang daotan kaayo nga mga krimen.

Ang Ginoo mismo klaro kaayo sa Iyang panghimaraot sa bisan unsang matang sa pag-abuso: “Bisan kinsa nga mahimong hinungdan nga makasala kining mga gagmayng bata … , mas maayo pa nga hiktan ug dako nga galingang bato ang iyang liog ug itambog siya sa lawod.”¹⁹

Panapos

Minahal nga mga higala kinsa grabe kaayong nasamdan—ug kalabot niana, si bisan kinsa nga nakasinati sa mga kawalay hustisya sa kinabuhi—mahimo kamong makabaton og bag-ong sinugdanan ug presko nga pagsugod. Sa Getsemane ug sa Kalbaryo, si Jesus “midala sa Iyang Kaugalingon … sa tanan nga hilabihan nga kagul-anan ug pag-antos nga sukad ninyo nasinati ug nako,”²⁰ ug nabuntog Niya kining tanan! Uban sa gituyhad nga mga bukton, ang Manluluwas nagtanyag sa gasa sa pagkaayo ngadto kaninyo. Uban sa kaisog, pailob, ug matinud-anon nga pagtutok Kaniya, sa dili madugay kamo hingpit nga makadawat niini nga gasa. Kamo makabiya sa inyong kasakit ug ibilin kini diha sa Iyang tiilan.

Ang inyong malumo nga Manluluwas mipahayag, “Apan ang kawatan moanhi aron lamang pagpangawat, pagpatay ug paglaglag. Mianhi ako aron makabaton kamo ug kinabuhing madagayaon.”²¹ Kamo usa ka nakasugakod, kamo mamaayo, ug kamo makasalig nga uban sa gahom ug grasya ni Jesukristo, kamo makabuntog ug makadaog.

Si Jesus batid sa mga butang nga daw imposible. Siya mianhi dinhi aron himoon ang imposible nga posible, ang dili matubos nga matubos, ang dili maayo nga mamaayo, sa paghusto sa dili mahusto, sa pagsaad sa dili masaad.²² Ug maayo kaayo Siya niana. Sa pagkatinuod, hingpit Siya bahin niana. Sa ngalan ni Jesukristo, atong Tig-ayo, amen.

Alang sa dugang nga impormasyon ug mga kapanguhaan, tan-awa ang “Abuso” diha sa Tabang sa Kinabuhi nga seksiyon sa ChurchofJesusChrist.org ug diha sa Gospel Library nga app.