Moipon ngadto sa Panon sa Dios
Sulod sa panon sa Dios, atong masinati ang mabinantayon, maamumahon nga pag-atiman sa Maayong Magbalantay ug mapanalanginan nga mobati sa Iyang matubsanong gugma.
Isip batan-on nga mga ginikanan, si Brother ug Sister Samad nakakat-on sa ebanghelyo ni Jesukristo diha sa ilang yano nga duha ka lawak nga balay sa Semarang, Indonesia.1 Naglingkod palibot sa usa ka gamay nga lamesa, uban sa usa ka dulom nga suga nga ingon og mihatag og mas daghang lamok kay sa kahayag, duha ka batan-on nga mga misyonaryo mitudlo kanila sa mahangtoron nga mga kamatuoran. Pinaagi sa sinsero nga pag-ampo ug sa giya sa Espiritu Santo, mituo sila sa unsay gitudlo kanila ug mipili nga mabunyagan ug mahimong mga miyembro sa Ang Simbahan ni Jesukristo sa mga Santos sa Ulahing mga Adlaw. Kana nga desisyon, ug ang ilang sundanan sa pagpakabuhi sukad, mipanalangin ni Brother ug Sister Samad ug sa ilang pamilya sa matag aspeto sa ilang kinabuhi.2
Sila mao ang pipila sa nag-unang pioneer nga mga Santos sa Indonesia. Wala madugay sila midawat sa mga ordinansa sa templo, ug si Brother Samad miserbisyo isip presidente sa branch ug dayon presidente sa district, nagdrayb sa tibuok Central Java aron sa pagtuman sa iyang mga responsibilidad. Sa miaging dekada, miserbisyo siya isip ang unang patriyarka sa Surakarta Indonesia Stake.
Isip usa sa mga misyonaryo nianang mapainubsanon, puno sa hugot nga pagtuo nga panimalay 49 ka tuig ang milabay, nasaksihan nako diha kanila ang unsay gitudlo ni Hari Benjamin diha sa Basahon ni Mormon: “Ako nagtinguha nga kamo kinahanglan maghunahuna sa bulahan ug sa malipayon nga kahimtang niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon.”3 Ang mga panalangin nga moabot ngadto sa mga kinabuhi niadtong kinsa mosunod sa ehemplo ug mga pagtulun-an ni Jesukristo, kinsa mopili nga maihap taliwala sa Iyang mga disipulo, daghan, makalipay, ug mahangtoron.4
Ang Panon sa Dios
Ang pakigsaad sa bunyag nga imbitasyon ni Alma ngadto niadtong nagpundok sa Katubigan sa Mormon nagsugod niini nga pulongan: “Karon, ingon nga kamo mga matinguhaon sa pag-ipon ngadto sa panon sa Dios.”5
Ang usa ka panon, o toril, usa ka dako nga koral [enclosure], kasagaran gitukod gamit ang bato nga mga bungbong, diin gipanalipdan ang mga karnero sa gabii. Kini adunay usa lamang ka agianan. Sa kataposan sa adlaw, ang magbalantay motawag sa mga karnero. Sila nakaila sa iyang tingog, ug agi sa ganghaan mosulod sila sa kahilwasan sa panon.
Ang katawhan ni Alma nakahibalo nga ang mga magbalantay magbarog sa pig-ot nga agianan sa panon aron kon mosulod ang mga karnero, sila giihap6 ug ang ilang mga samad ug mga balatian mailhan ug maamumahan sa tagsa-tagsa. Ang kahilwasan ug ang kaayohan sa mga karnero nagdepende sa ilang kaandam nga moipon ngadto sa panon ug magpabilin diha sa panon.
Taliwala kanato tingali adunay pipila kinsa mibati nga sila anaa sa ngilit sa panon, tingali naghunahuna nga sila wala kaayo kinahanglana o hatagi og bili o nga sila wala nahisakop diha sa panon. Ug, sama diha sa toril, diha sa panon sa Dios usahay makapasilo kita sa laing tawo ug kinahanglang maghinulsol o mopasaylo.
Apan ang Maayong Magbalantay7—atong tinuod nga magbalantay—kanunayng maayo. Sulod sa panon sa Dios, atong masinati ang Iyang mabinantayon, maamumahon nga pag-atiman ug mapanalanginan nga mobati sa Iyang matubsanong gugma. Siya miingon, “Gikulit ko ang imong ngalan diha sa akong mga palad; ang imong mga paril kanunay kong gibantayan.”8 Ang atong Manluluwas nakahibalo ug nagpakabana sa atong mga sala, mga sakit, mga kasakit,9 ug sa tanan nga dili makiangayon sa kinabuhi.10 Ang tanan mahimong makadawat niini nga mga panalangin, kon sila “matinguhaon sa pag-ipon”11 ug mopili nga magpabilin diha sa panon. Ang gasa sa kabubut-on dili lamang ang katungod nga mopili; kini mao ang oportunidad nga mopili sa matarong. Ug ang mga paril sa panon dili usa ka pagpugong apan usa ka tinubdan sa espirituhanong kahilwasan.
Si Jesus mitudlo nga adunay “usa na lamang ka panon ubos sa usa ka magbalantay.”12 Miingon Siya:
“Ang mosulod agi sa pultahan mao ang magbalantay sa karnero. …
“Ug ang mga karnero mamati sa iyang tingog … ,
“… ug kaniya mosunod ang mga karnero kay sila makaila man sa iyang tingog.”13
Si Jesus namulong dayon, “Ako mao ang pultahan, kon adunay mosulod agi kanako, siya maluwas,”14 nga klarong nagtudlo nga adunay usa lamang ka paagi nga moipon ngadto sa panon sa Dios ug adunay usa lamang ka paagi aron maluwas. Kini pinaagi kang Jesukristo.15
Moabot ang mga Panalangin ngadto Niadtong anaa diha sa Panon sa Dios
Kita makakat-on kon unsaon sa pag-ipon ngadto sa panon gikan sa pulong sa Dios, nga mao ang doktrina nga gitudlo ni Jesukristo ug sa Iyang mga propeta.16 Kon kita mosunod sa doktrina ni Kristo ug moipon ngadto sa panon pinaagi sa hugot nga pagtuo ni Jesukristo, paghinulsol, pagpabunyag ug kompirmasyon, ug padayon nga kamatinud-anon,17 si Alma misaad og upat ka piho nga personal nga mga panalangin. Kamo mahimong (1) “matubos sa Dios,” (2) “malakip uban niadto nga diha sa unang pagkabanhaw,” (3) “makabaton og kinabuhi nga dayon,” ug (4) ang Ginoo “mobubo sa kabuhong sa iyang Espiritu diha kaninyo.”18
Human si Alma mitudlo mahitungod niini nga mga panalangin; ang katawhan namakpak sa ilang mga kamot tungod sa kalipay. Ania kon ngano:
Una: ang pagtubos nagpasabot sa pagbayad sa usa ka utang o obligasyon o sa pagpalingkawas sa unsay makaugtas o makadaot.19 Walay igong personal nga pagpalambo sa atong bahin ang makahimo kanato nga limpyo gikan sa mga sala nga atong nabuhat o makaayo gikan sa mga samad nga atong giantos kon wala ang Pag-ula ni Jesukristo. Siya ang atong Manunubos.20
Ikaduha: Tungod sa Pagkabanhaw ni Jesukristo, ang tanan mabanhaw.21 Human ang atong mga espiritu mobiya sa atong mortal nga mga lawas, kita sa walay pagduhaduha maglantaw sa panahon nga kita usab uban sa usa ka nabanhaw nga lawas mohangop niadtong atong gihigugma. Kita mahinamong maglantaw nga mahimong kabahin sa Unang Pagkabanhaw.
Ikatulo: Ang kinabuhi nga dayon nagpasabot nga magpuyo uban sa Dios ug sama sa Iyang kinabuhi. Kini mao ang “labing mahinungdanon sa tanan nga mga gasa sa Dios”22 ug magdala og kahingpitan sa kalipay.23 Kini mao ang kinatas-an nga katuyoan ug tumong sa atong mga kinabuhi.
Ikaupat: Ang pakig-uban sa usa ka sakop sa Dios nga Kapangulohan, ang Espiritu Santo, maghatag og gikinahanglan kaayo nga giya ug kahupayan atol niining mortal nga kinabuhi.24
Ikonsiderar ang pipila ka hinungdan sa kasub-anan: ang kauyamot naggikan sa sala,25 ang kagul-anan ug pag-inusara gumikan sa kamatayon sa usa ka hinigugma, ug ang kahadlok gumikan sa kawalay kasegurohan sa unsay mahitabo kon kita mamatay. Apan kon kita mosulod sa panon sa Dios ug motuman sa atong mga pakigsaad ngadto Kaniya, mabati nato ang kalinaw sa pagkahibalo ug pagsalig nga si Kristo motubos kanato gikan sa atong mga sala, nga ang pagkabulag sa atong lawas ug espiritu dali rang matapos, ug nga kita mahangtorong mabuhi uban sa Dios sa labing mahimayaong paagi.
Salig kang Kristo ug Lihok inubanan sa Hugot nga Pagtuo
Mga kaigsoonan, ang mga kasulatan puno sa mga ehemplo sa halangdon nga gahom sa Manluluwas ug sa Iyang mapuangoron nga kaluoy ug grasya. Atol sa Iyang mortal nga pangalagad, ang Iyang mga panalangin sa pagkaayo miabot ngadto niadtong kinsa misalig Kaniya ug milihok nga inubanan sa hugot nga pagtuo. Sama pananglit, ang masakiton nga tawo diha sa linaw sa Betsata milakaw sa dihang, uban sa hugot nga pagtuo, siya misunod sa sugo sa Manluluwas nga “Tindog, dad-a ang imong gihigdaan ug lakaw.”26 Kadto kinsa masakiton o may balatian sa bisan unsang matang didto sa yuta sa Bountiful naayo sa dihang “nagkahiusa” sila nga “miduol.”27
Sa samang paagi, aron makadawat sa talagsaong mga panalangin nga gisaad ngadto niadtong kinsa moipon ngadto sa panon sa Dios nagkinahanglan kanato sa pagbuhat gayod niana—kinahanglan nato nga mopili nga moipon. Si Alma nga Batan-on mitudlo, “Ug karon ako moingon nganha kaninyo nga ang maayo nga magbalantay motawag kaninyo; ug kon kamo mopatalinghog ngadto sa iyang tingog siya modala kaninyo ngadto sa iyang panon.”28
Pipila ka tuig ang milabay usa ka minahal nga higala ang mitaliwan tungod sa kanser. Sa dihang ang iyang asawa, si Sharon, unang misulat mahitungod sa resulta sa iyang pagpahiling, miingon siya: “Kami Mopili sa Hugot nga Pagtuo. Hugot nga pagtuo sa atong Manluluwas, si Jesukristo. Hugot nga pagtuo sa plano sa atong Langitnong Amahan, ug hugot nga pagtuo nga Siya nasayod sa among mga panginahanglan ug motuman sa Iyang mga saad.”29
Nakahimamat ko og daghang Mga Santos sa Ulahing mga Adlaw sama ni Sharon kinsa mibati og kaugalingong kalinaw sulod sa panon sa Dios, ilabi na kon moabot ang tintasyon, oposisyon, o mga kalisod.30 Sila mipili nga magbaton og hugot nga pagtuo kang Jesukristo ug sa pagsunod sa Iyang propeta. Ang atong minahal nga propeta, si Presidente Russell M. Nelson mitudlo: “Ang tanan nga maayo sa kinabuhi—ang matag kalagmitan nga panalangin nga may mahangtorong kahulogan—magsugod sa hugot nga pagtuo.”31
Hingpit nga Moipon ngadto sa Panon sa Dios
Ang akong lolo sa lolo sa tuhod [great-great-great-grandfather] nga si James Sawyer Holman miabot sa Utah niadtong 1847, apan dili siya kauban niadtong miabot sa Hulyo uban ni Brigham Young. Siya miabot sa ulahing bahin niana nga tuig ug, sumala sa mga rekord sa pamilya, mao ang responsable sa pagdala sa mga karnero. Wala siya nakaabot sa Walog sa Salt Lake hangtod pagka-Oktubre, apan siya ug ang mga karnero nakaabot gayod.32
Sa pasumbingay nga pagkasulti, ang uban kanato anaa pa gihapon diha sa kapatagan. Dili ang tanan moabot kuyog sa unang grupo. Akong minahal nga mga higala, palihog padayon sa panaw—ug tabangi ang uban—nga hingpit nga moipon ngadto sa panon sa Dios. Ang mga panalangin sa ebanghelyo ni Jesukristo dili masukod tungod kay kini mahangtoron.
Ako mapasalamaton gayod nga nahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw. Ako magpamatuod sa gugma sa atong Langitnong Amahan ug sa atong Manunubos, nga si Jesukristo, ug sa kalinaw nga moabot gikan lamang Kanila—ang kaugalingong kalinaw ug ang mga panalangin nga makita diha sa panon sa Dios. Sa ngalan ni Jesukristo, amen.