T’áá’ałahijį’ Jesus Christ nihe’iina’ bighi’ dahólǫ́ǫgo

Tracy Y. Browning Áyiilaa

Áłchíní Yázhí Nanitinji yá’anajají ts’ídá alą́ą́jį’ danahaaztanígíí éí naaki gone’ dasida

Yisdaíiníilii hinaa’ígi át’áo niniinaago, Diyin nihił holǫ́ǫgo hiniiná.

Shidine’é, jooba’ íínisingo nihidaadę́ę́ sézí díí ’abíní bighi’. Shijéí bighi’dóó adahwiisáagóó nihił łá’í nishłį́įgo ’áłah niidlį́, diyin yá yałti’í, hastóí Jesus Christ yá naazį́įnii,bił éédahózinii, diné binakáá gone’ hane’ii, dóó God bił haz’ánigóó naat’áanii danilinigíí bizaad dadidiits’į́į́ł. King Benjamin bidine’é daniidlí nahalingo nihinibaal God yá yałti’í bich’į’jigo nihidaadilkał ’ąą at’éego díí ni’ bikáa’gi,¹ éí President Russell M. Nelson

T’áá niléí dę́́ę́ doo házhó’ó ’eesh’į́įgo bénáshniih dóó nak’eesinilí éí t’áá ’áłaji’ chosh’į́į́ nt’ę́ę́. T’áá ’áłaji’ ’abínígo shináá’ ąą ashiigo, t’óó halbáa łeh. T’áá ’ałsoní doo hazhó’ó yit’į́įda, t’óó łikizh, doo at’é hę́ę́gi at’éeda. Shich’ooní ndi doo ts’ídá ayóó’abidónínígíí dóó binahjí’ ha’ahoní yéé at’éhígíí doo yit’į́įda’ T’áadoo baatsidiskeesí shinák’eesinilí bíká dishchi’, ’áko shinaagóó ahoot’éhígíí bee nesh’į́įgo t’áadoo le’é adeeshłíí’ígíí binidiishnish.

Lą’í naahai, naaki haz’ą́ągo t’áá’íghísíí ba’ííníshłíigo baa ’áhoniizį́į́h: ’áłtsé éí, t’áadoo le’é shinaagóó bee hoot’į́įdoo’ígíí, dóó naaki gone’, éí háíshį́į́ náásgóó yá’át’ééh ’atiingóó naas shooloos doo. Díí t’áá ’áłahijį’ asht’ínígíí éí niHisdá’iiníiłii, Jesus Christ t’áá ’áłahijį’ ba’ííníídlíhígíí bił ’aheełt’é’.

Nihe’iina’ bighi’ éí na’idikid da nihee hóĺ́ǫ́́o łeh, yinííł da hwidiił’áa łeh, ndi niHisdá’iiníiłii t’ááłá’í niidzinigo ayóó’áníhóní dóó bił ałha’deetą́ bá’áłchíní niidlį́, dóó bina’nitin dóó bibeehaz’áanii bił, dóó díí éí t’áá ’ákwíí jį́ bee ’iináanii nihá silá binahjį’ nihá “adiniłdííngo bee diyingo nihi náá’ dóó nihi ntsékees ąą íidoolííł.”² Nihe’iina’ bighi’ Ii’sizį́ diyinii nik’ihojidlíi doo niizingo biká’iit’į́įgo éí Jacob na’nitingo, “k’ad diyin bit’áá ’aaníí at’éii, dóó náásgóó nee’nijį diyin bit’áá’aaníí atéii at’é dooleełígíí baa’akodiniidzįįł.”³

God bá’áłchíní yił aha’da’deest’ánígíí, ayóó at’éego diyingo bibeena’anishí nigheiinilá ako diyingo bee iit’į́įdoo biniiyé. Jesus Christ bizaad dóó bina’nitin diyin bizaad bighi’ bee ak’eda’ashchínígíí dóó diyin yá yadałti’í nayiizlá’ígíí, dóó t’áá ’ákwíí jį́ sohodizin binahjį’ biyi’sizíinii hwił hólǫ́ǫgo, t’áá ’áłahjį’ diyin bighan templegóó na’adáago, dóó t’áá damóo ná’ádlee bááh dóó tó diyin bibee’ó’ool’įįł binahjį’ al’į́įgo ayi’ hasht’e’hodít’é nidoodleeł dóó baa ’ákohwiinidzin binahjį’ Christ bibe’adinídíín dóó Bibee’ak’idiitįįhii nihighi’ hólǫ́ǫ doo ’azhá ni’ bikáá’góó ’áhí bee chahałheeł nahalin ndi. Díí nihe’iina’ bighi’ hodéesyeei dóó táłkáá́’gi yéigo níyol nahalingo nihił haz’ą́ągo éí Yisdá’iiníiłii jideeskaigóo dah astsihhii nihá nilį́ dóó nihina’ałt’a’í nilį́. Diyin God be’atiingóó éí t’áadoo ’ách’ą́ą́h silá’í nihá íídoolííł binahjí’ hool’áágóó iiná baa hóniit’į́’. Áko, ha’át’ííshą’ yidiiltséłígíí dóó háágóó diidáł’ígóó nihił ííshją́ą́ íídoolííł’.

NihiDiyin yá yałti’í na’neeztą́ągo ání “Yisdá’iiníiłii éí ’ííghísíí niil’į́įdoo dóó bina’nitin” dóó shį́į́ “t’áá ’áłahíjį’ bich’į’ diníít’į́į doo t’áá ntsííkeesígíí bighi’.”⁴ President Nelson adee hadoodzíigo ání “Ii’sizį́ diyinii nihił hólǫ́ǫ doogo éí Jesus Christ bich’į’ diníít’į́į́ doo. … Bí alą́ąjį’ yigaałgo dóó oo’į́į́go ni ne’íina’ bighi’ t’áá ni Bí biba’ ahwiinilaago ne’iina’ bighi’—t’áá ’áhwííshjį́.”⁵ Shik’is, Jesus Christ éí ’ííghísíí bich’į’ adeest’į́į́’ dóó bich’į’ oodááł biká’áhát’į́. Neenijį’ diníit’į́įgo dóó yiidaał doogo, éí Yisdá’iiníiłii nihe’iina’ nííl’į́įdoo Bí binákáagone’ bee yit’į́įdooleełgo Bí aláadi nihe’iina’ bighi’. Diyin God Bizaad bighi’ naaltsoos saní yinishta’go ts’ídá ííghísíí baa hane’ígíí lą’í bits’ą́ądóó íhooł’ą́ą́’.

Moses bibeehaz’áanii éí Israelite dine’é béiyilyá diyin bizaad binahjį’ hasht’e’áda’dilnééh, ’áko náásdi diné ts’ídá hodago diyin God bee bił ałha’deet’aahii Jesus Christ binahjį’ yiba’ hasht’e’áda’dilnééh doo biniigheh.⁶ Díí beehaz’áanii, éí ayóó ’at’éii na’nitin bighi’go da’oodláanii “náásgóó dadinoh’į́į́” Jesus Christ yighááh dóó nihá be’iina’ yee nihá nina’doodlééł,⁷ éí Israel dine’é Yisdá’iiníiłii yich’į’ dadeez’į́į doo dóó bibe’oodla’ binahjį’, Náá’iisniihígíí, dóó Bibeehaz’áanii be’iina’ bighi’ dahólǫ́ǫgo⁸ binají’ ayóó’ at’éego biDiyin Nina’ídláanii yaa’akodanizin doo.

Dííshjį́ aniit’éhigi ’át’éego, éí ’ałk’idą́ą́’ Diyin God bidine’é be’iina’ deiyiłt’éhígíí deidinoołįįł Bí binákáagone’ bee yit’į́į dooleełgo Bí aláadi diné be’iina’ bighi’ dahóĺǫ́ǫ doo. Yisdá’iiníiłii na’nitin yę́ę́dą́ą́, Israelite dine’é Christ bina’nitin yaadayoosnah, t’óó nahjį’ adaHwiilaa dóó beehaz’áanii t’áá bí dei nizinígíí yidayiizoh, éí doo binahjį’ t’áá ’aanii at’éii yisdá’iildééh dóó náda’iidlá—Jesus Christ, bee na’nitin bighi’ hólǫ́ǫ da.⁹

Israelite dine’é t’áá ’ákwíí jį́ be’iina’ bighi’ yee ’ák’idahałta’ yę́ę́ t’óó bił ’ałtaanákááhigi ’át’éego bił dahoo’a’. Israel bá’áłchíní, díígi ’ahoot’éego ga’, díí beehaz’áanii bighi’ e’él’į́hígíí ga’ éí t’áá hwi jizį́įgi bee yisdá’iildééhgóó be’atiin dóó łahigóó Moses bibeehaz’áanii yidahideezohigi adayiilaa ’áko kot’éego bidine’é ada’al’į́įdoogo adayiilaa.¹⁰ Díí éí Yisdá’iiníiłii bina’nitin dóó Bí bich’į’ adeest’į́’ígíí hazhó’ógo yaa ’ákonidadinoozįįłgo yee hooł’a’.

Áko ’azhą́ ’ákot’ée ndi t’óó ’ahayóí Israelite dine’é Bina’nitin doo deiniizį́į́h da, dóó t’áá biláadi Yisdá’iiníiłii yik’idahodii’ą́—Bí éí díí eiinilá díí beehaz’áanii dóó haadzíigo Bí aní shí éí “beehaz’áanii nishłį́, dóó ’adinídíín”¹¹—k’íínítih dabiłní. Dayisk’idgi Jesus na’nitingo, Moses bibeehaz’áanii yaa yałti’go, haadzíí’, “Doo éí beehaz’áanii deeshchxǫǫł biniigheh niyáada t’áadoo danohsiní, doodago diyin yá yadaałti’í da: Shi éí doo adeeshchxǫǫł biniigheh niyáada, ndi t’áá ałtso bi’doonííł biniigheh.”¹² Áko áádi Yisdá’iiníiłi, be’iina’ yee nihá niná’ídlá’ígíí binahjį’ Moses bibeehaz’áanii Israel dine’é yik’ehgo ada’ał’ínee nííníłt’i’. Be’iina’ yee nihá niná’ídlá’ígíí binahjį’ éí díí didligo náá’iinii’ígíí éí “ajéí yisdił dóó yiniił jilí’ígíí” bikék’eh ninadlá,¹³ náá’iinii bibee’o’ool’įį’ dę́ę́ dóó kojį́’ bááh dóó tó dilzingo yidą́ bibee’o’ool’įį’.

President Russell M. Nelson, díí baa yá’ati’’ígíí yee na’nitingo’, aní, “jó díí, náá’iiniihii yę́ę́ éí ’ałnánasnilgi ’adzaa nááhanii yę́ę́ éí náá’iiłnii yę́ę́ éí nááhanii silį́į́.”¹⁴ Yisdá’iiníiłii bich’į’ nááhanii ííl’į́įgo, éí binahjį’ t’áá ’ałahijį’ Jesus Christ nihe’iina’ bighi’ nihił hólǫ́ǫ doo, Bí bich’į’ jooba’ niidzingo baa’adidiit’ááł haalá Bí éí ts’ídá ayóó ’at’éego bizhé’é yich’į’ adaa’adeet’ą́. Jesus Christ bich’į’ diniit’į́įgo, nihił bééhózingo Bí binahjį’ t’éíyá ań’dí’t’aahii dóó náda’iidlá, inda hool’áágóó Diyin God bił iiná dóó Diyin God at’éhigi. ’aniit’éedoo.

T’ah bitséedi Jesus Christ bina’nitin bikéé’ yichaał nt’ę́ę́, áádóó díí sodizin bidiiyáago lą’í hadashizíídgo asht’į́nígíí dóó łahgo anisht’éhígíí yaa ’ákodaniizį́į́h. “Ha’át’íísh’ biniigheh” danizingo dadees’́į́į́’—ha’át’ííshą’ biniigheh tó bee shidoolzį́į́h dóó bidiiyá díí oodlą́ní ’’áłah nilį́nígíí, jó díí Jesus Christ Binahagha’ Akée’di Dayoołkáałgo Yá Naazínígíí, ha’át’ííshą’ biniigheh damoogo dóó t’áadoole’į́ doo ła’ ash’į́įda, ha’át’íísh biniigheh Word od Wisdom bi’ish’į́, ha’át’íí biniigheh Mormon binaaltsoos yinishta’, ha’át’íísh biniigheh dííshjį́įdi diyin yá yałti’í dóó hastói Jesus Christ yá naazį́į́nii yinishdlá dóó bił honishłǫ́, ha’át’íísh biniigheh t’áá damoo na’oodleeł sodizin báhoghangóó naashá, ha’át’ííshą’ biniigheh naana ła’ “hoshdę́ę́ dóó ninaał, hoshdę́ę́ dóó aka’anilgeed … hoshdę́ę́ dóó t’áá kǫ́ǫ́ sinídá ,”¹⁵ dóó “hoshdę́ę́ dóó atah honilǫ́.”¹⁶

Íídą́á, bina’idikid t’óó shił hałą́ągo ashósin nt’ę́ę́’, dóó hanakáhoot’į́ nahalin, łahda ’’ak’ihodiit’ą́ shich’į’ alį́į łeh. Áko díí na’idikid yee shida’atsihígíí na’ashíneestą́ą́’, áko áádi bina’idikid yee shida’atsi yę́ę́ binahjį’ diyin k’éhgo iiná’ígíí binákáágone’ dinish’į́į́go shił t’áá ííshjání alyaago biniinaa diyin bina’nitin dóó bibeehaz’áanii bik’ehgo hinishná. Ha’át’íí éí binahjį’ t’áá aníinii shił bééhózin? Díí daats’í t’óó ’bik’ehgo é’ésh’į́ “t’áadoo Diyin God bibeehaz’áanii bídeet’i’go binahjį’Christ yinishdlánígíí bidziil doo,”¹⁶ doodaii’ bee ak’idiitą́ągo éí Jesus Christ t’áá bí t’éii binahjį’ adziilgo baa ákonisin?

T’áá ’ííghísíí biká’áhát’į́įgo hanitáago bich’į́’ dinish’į́įgo Jesus Christ ts’ídá t’áá ntséskees dóó asht’įįłii bighi’ hólǫ́ǫdoo, dóó diyingo shinaa’ ’́ąą ’ádzaa, dóó shintsékees bighi’di baa’ákoniizį́į́h Jesus Christ éí “hágo shaanináá” shił nííga’.¹⁸ T’ah tsíłkéí nishłį́įgo Jesus Christ bikéé’ dadiiyá, idahoołaahii nishłį́įgo, bénáshniihgo Jesus Christ bina’nitiní ch’íkéí t’áá shí bił ałhąąh nidanise’go nidéiidiníítą́ągo nihił honiílǫ́ǫdoo shidiiniid. Łah hííłch’į́’go, díí ch’íkéí łah bighan gone’ danijiiztą́ągo, baa hasti’go “ha’át’íísha’ biniinaa ’iinisdlą́” daaníigo nida’iídeełkidígíí shijéí yideelchid, dóó áádi Bóhólníihii ił ííshją́ą́ é’éł’į́nígíí binahjį’ t’áá ’ííghísíí baa’akóníídzííhgo diyingo shidiisnáago bikéé’ dadiiyá bidishníigo bee bich’į’ haasdzííh, dóó t’áá aníinii shił bééhózinígíí bidziilgo ayiilaa.

’Áádi shił ééhózin, dóó k’ad shił bééhózinigi at’éego, niHisdá’iiníiłii, Jesus Christ, nihikee’ t’áá damoo na’oodleełí bisodizin bá hooghangóó yiyoołááł ’áádi Bibááh dóó tó diníízingo diidą́ą́ł biigheh, dóó Bóhólníihii bighan gone’ bee ałha’diit’aahii Bił adiilnííł, dóó Diyin God bizaad dóó Diyin God yá yadaałti’í bina’nitin bits’ą́ądóó Bizaad bidahodiil’ááł. Nihizééd́ę́ę́’ bee t’áá aníinii át’éego baa hwiilne’ nihá ’áyósin, nihíla’ deigo ó’ósin dóó ’áká’analwo’ doo t’áá Bí a ’át’ínigi at’éego, nihináá’ bee ni’ bikáá’góó dóó ahidiniłnáago beeda’ahoot’į́įdoo, Bí nihineł’ínigi at’éego—“ts’ídá ’ííghísíí át’éhigi’ at’éego, dóó ts’ídá ’ííghísíí át’éedooleełígíí.”¹⁷ T’áá siidzį́į nt’́ę́ę́’ Bí bich’į’ baa’ádiniit’ą́ągo bini’bik’ehgo yiidáago, t’áá aníinii nił bééhózinígíí binahjį’ “éí t’áá anii God hiná,”¹⁸ haalá bikádiniit’į́igo bik’ihdiidááł²¹—t’áá ákwíí jį́. Díí t’áá ’aníí át’éego baa hashne’ dóó Jesus Christ bízhi’ dilzinii binahjį’ adishnį́, amen.