Nizhóní bideená łeeshch’íh: Ańdiit’aah Bee Ná’ádziih At’iin

Sister Kristin M. Yee Áyiilaa

Sáanii Áká Ańdaajah Akéégóne’ Dah Sidáh

Ni’iina’ bi’łeeshch’ih bideená nizhónígíí baandłee’go ni’oodlą’ bee hinínáago éí binahjį’ Yisdá’iiníiłii bikéé’ yínááł doo.

Hane’ áłtséhígíí Samuel éí t’áá ayáhágo baa yáti’ éí náasdi Israel binaat’áanii, David baa hane’, dóó ła asdzání Abigail wolyéego.

Samuel daaztsą́ dóó bik’ijį’, David bidine’é yił King Saul yits’ánah, háálá David yi’niiłhxį́įgo. Hastįį Nabal wolyéego ayóo at’į́ dóó doo yitsííd da ndi bá ńdazhniłkaad dóó bá nal’a’í dajílį́. David bidine’é neeznáá yilt’éego Nabal yich’į’ ayííł’aad yaadahaniih dóó ch’iyáán bidįhóyéé’ dóó naalyéhé yideiyídookił.

Nabal David yiyiikeedyą́ą yee bíídzíí’ dóó bidine’é ch’íbiníłkaad t’áadoo shoda’oost’e’ da.

Bíni’ yii’a’go, David bidine’é Nabal dóó yiłkeehat’íinii yich’į’ hasht’e’áda’diilyaa, kóníigo,“Yá’át’ééhii bidiníná doo yá’áshoonii shich’į’ ájiilaa.”¹ Naal’a’í ła’ Abigail yił hoolne’, bich’ooní Nabal, David bidine’é yich’į’ báhoochįįdgo. Abigail ha’hída ch’iyáán ahíyiijaa’ dóó naalyéhé áádóó at’a’ adoogaałgo dahdiiyá.

Abigail baa níyáago, “David yidááhdóó’ ntsidinígo’ binii’ yee,

“Doo deeseezjį́’ nitsidinígo’, dóó kodíídniid, Shik’ijį’, shinaat’áanii, díí bąąhági át’éii bíni’dii shik’ijį’ dooleeł. …

“Áko k’ad, … Diyin God binahjį’ ááhosist’įįd dił dadeezna’ doo ńt’ę́ę́’, dóó t’áá ni bá niná’ádinítą́. …

“… K’ad ninaal’a’í nishłíigo díí ak’ihojídlí naa nishnííł shinanit’a’í, bíni’dii dinééh baa díínił. …

“Nííníshkeed, na’naal’a’í baańdiní’aah doo na’shíínilíigo naaníyah. …

Áádóó David Abigail ííłní, Israel bi Bóhólníihii Diyin God baa hash’niih, éí díí jį́ shich’į’ anííł’a’go shéínyá:

“Dóó heindzííhígíí baa ha’niih, dóó nik’ihojídlí, háálá díí jį́ dił dadeezna’ doo ńt’ę́ę́’, dóó t’áá shí bee ák’éhodeenééh bits’ą́ąjį’ ashíínílóóz. …

Ákohgo David éí asdzání t’áadoo le’é yiníjaa’ígíí néidiinil, áádóó iiłní, Nílááh, nich’į’ hózhǫ́ǫgo nighangóó nídíídááł; … nizaad diséts’ą́ą́’, dóó yíníkeedígíí ná bi’iishłaa.”²

T’áá áłah k’é nídzingo ałts’ą́ąjį’ dahdii’áázh.

Díí hane’ biyi’, Abigail bidziilgo baa ńtsáhákees doodaii’ Jesus Christ yik’ehgo áát’įįd.³ Bits’íís ninéédiní’áo nihá niná’ídlá, bąąhági’át’éii dóó ałk’i’jį’ ntsáhákees ajéí bee nidaazii biyidę́ę́’ nihéé’níłnii’ dóó bíighahí nihá hólǫ́ǫ áyósin.⁴

Abigail éí Nabal ni’iisíhígíí yá ák’iidiit’ą́, Yisdá’iiníiłii ałdó’ ákódzaa—doo bik’izh’dootįįh át’éego—asiilzihígíí dóó háíshį́į́ asiihgo atí’nihiilaa’ígíí doodaii’ nihíni’ yiyiił’a’ígíí nihá yik’é Niná’ídlá.⁵ Gethsemanedi dóó tsin ałnáos’dzoh bikáá’gi, díí ni’iilzííh ák’iidiit’ą́. Ák’ehodeenééh ájéí bididiichiłgo nihá yee hooł’a’. Éí “kót’éego” ańdiit’aah—éí ts’ídá aláahdi nantł’ah’go é’iilyaa dooleeł dóó ts’ídá aláahdi baa hast’i’go bits’ą́ą́dóó óhwiil’ą́ą doo. Ańdiit’aah atiingóó, Jesus Christ ti’hooznii’go nihá niná ídlá bi’adziil nihe’ iina’ biihílį́įgo nihijéí dóó nihíí’sizíinii bik’iizgóó nádziihgo hahodoolzhish.

President Russell M. Nelson na’neezt’ą́ą́’ éí Yisdá’iiníiłii oodzíí’ ańdiit’aah bíínííghahgo yee nihá has’ą́:

“Nihá nina’ídlahígíí binahji’, háíshį́į́ atí’daniilaahígíí baa nídidíí’ááł azhą́ doo yits’íídgóó doo yaa ákodanízin da ndi.

“Doo nanitł’ah da asiihígíí ádaaná’ookąąhgo t’áá aaníí áníigo dóó shanídiní’aah hałníigo. Ndi Yisdá’iiníiłii bíínighahgo áńdoolííł áko háíshį́į́ t’áá ha’át’áo atí’niilaahígíí baa ńdídíí’ááł. Áko índa atí’da’íł’į́įgo doo nii’sizíinii yineesgai da dooleeł.”⁶

Abigail lą’í ch’iyáán dóó naalyéhí yiníjaa’ígíí binahjį’ bik’i’dadidii’tį́į́ł Yisdá’iiníiłii ánihiłní t’áá háíshį́į́ átí’bi’diilyaa dóó ádeeznihígíí, bee áhodoonííłii dóó nihíł áká’a’doowoł éí nánihidoołdzih dóó bee yá’ánít’ééh doo.⁷ Doo t’áá sáhí tí’dahwii’nííhgo nihi’doolnii’da atí’da’ał’íinii biniinaa; nihidó’ yá’át’ééh ńdadii’dleeł dóó nihijéí hóyéé’ bee dańdaazígíí dóó biniinaa ádahoodoonííł bits’ą́ądóó yisdá’ńdiikah.

Diyin Bóhólníihii ádííniid, “Shí, Diyin Bóhólníihii, t’áá háíshį́į́ baa ńdideesh’ááł, ndi ni éíí t’áá áłtso diné baa ńdidíí’ááł.”⁸ Diyin Bóhólníihii aanááhidit’ááh yee nihá has’ą́ éí nihá t’áá ákónéehii.⁹ Ákóndi Bi’aná’áwo’, Bi’ayóí ó’óní, Bi’ak’i’diit’įįh doo t’áágééd nihi’níłnii’ da. Diyin God Bił aha’dit’aah binahjį’, bee adziil shoidiilt’eel, bee ééhózinii, dóó áká aná’álwo’ bidin niidlínígíí bee ańdidiit’ááł, dóó nihaańdidoot’ááł.

T’ááshǫǫdí nihił bééhózin éí t’áá háíshį́į́ baańdíínáago doo éí t’áá atí’nááni’dil’į́į dooleełgo ááha’níi da. “Háíshį́į́ baańdíní’aah bikah ańt’į́įgo dóó Diyin Ii’sizíinii t’áadoo bighahjį’ naninání niłníigo yíí’síníłts’ą́ą́’.”¹⁰

Abigail éí David yíká iilwodyę́ęgi’ át’áo “doo nijéí ak’e’diniih bii’ hólǫ́ǫ da doo“¹¹ dóó bíká’a’oowod, áko nihidó’ Yisdá’iiníiłii nihíká’adoolwoł. Ayóí ánóó’ní, dóó nidááh doogááł ne’atiingóó “Bit’a’ na’ádziih bee.”¹² Ił hodeezyéél ná yinízin.

Shił bééhózin Christ bi’álíléi yee shijéí diniihgo nayiiłdzíí’. Shizhé’é ááhdííniidgo, díí bee nihił hashne’ éí hooghangi doo hasihgo shiyaahoo’a’ háálá áni’ dóó saad bee atí’nihi’dil’įį ńt’ę́ę́’. Nooséłi nishłį́į́dą́ą́ dóó ch’íkę́ę́h nishłį́įgo, shizhé’é bee ák’e’ashdlį́į ńt’ę́ę́’ dóó at’íshi’diilyaa’ígíí biniinaa shijéí áháchį’ bii’ hólǫ́ǫgo hoolzhiizh.

Nináháhááhgo dóó ch’ééh ił hodeezyéél hanishtáago dóó ańdiit’aah bee ná’adziih honít’í’góó hadish’į́įgo hoolzhiizh, baa akoniizį́į́’ éí t’áá Bí Diyin BiYe’ ni’ayísíí’go shá ti’hoznii’go, t’áá Bí sháninánídláhyę́ę ałdó’ atídashiilaa’ígíí yisdáyidoo’ish. T’áá’aaníí át’éii áłtséhígíí doo t’áá’aaníí yinishdłą́ą da doo akéé’góne’ígíí doo wooshdłą́ą́góó.

Shi’ayóí’ó’óní bidziil silį́į’ Yisdá’iiníiłii ayóí’óshníigo, áko laanaa nisin Bibee na’ádziih éí atí’íl’į́ dóó áháchį’ bikék’eh góne’ dooleeł. Kósht’į́įgo lą’í nááhai, niná’ádinisht’ą́ą́go, ayahooshłigo, ha’íínishníigo, dóó Yisdá’iiníiłii Bi’adziil diyinii bee yisda’iildeeh dóó na’ádziih ba’ííníshłį́įgo baa ákoniizį́į́’. T’ahdii binaashnish, ndi k’ad shijéí doo naabaah da. ”Ajéí ániidígo ánályaa’“¹³—éí shiYisdá’iiníilii bi’ayóí ó’ó’ní bidziilii dóó áłahjį’ íł hólóonii bił bééhózinígíí, t’áá shisdáá ńt’ę́ę́’, hazhó’ígo dóó kóódígo yá’á’hoot’ééhjį’ shił íí’áázh, shił yííchah, bąąh shíni’ígíí bił bééhózin.

Diyin Bóhólníihii niná’ályéii yee shik’ihojisdli’ t’áá ákot’éego Abigail éí David yídin niłíinii yee níjaa’. Shiká adoolwołii shich’į’ ayííł’a’. Dóó alááh baa’ááhasin dóó ts’ídá íiyisíí bee łahgo íísdzaa’ígíí éí shiZhé’é Yá’ąąshdi hólóonii bee béé hosísįįd. Bi binahjį’, ayóo’at’áo baa ákoníizį́į́’ ajooba’íí, aa’áháłyáanii, dóó aZhé’é hadaałt’éi bi ayóí’ó’ó’ní há’oo’íínii.

Elder Richard G. Scott ádííniid: “Áhoot’įįdígíí doo k’éé’diiłchxǫǫł da, ndi ańdídiit’ááłgo biiníghah.¹⁴ Ańdiit’aahii t’óó baa’ihii neełdziih, doo shóhánéeh dadii’níigo, áko Diyin God Bee ayóí’ó’ó’ní yee nijéí dóó níni’ bii’dee ajoodlá báhádzidii nahjį’ kwíídoolííł. Ák’ehodeenééh niní íínísin yę́ę nahjí’ iidołįįł. Hadaałt’éii dooleełgo yá hooł’aah, ná’ádziih, Diyin Bóhólníihii bi’ayói’ó’ó’ní nináalyéh.”¹⁵

T’áá dikwii nahai yę́ędą́ą́’ nibikaa shi’zhé’é bijéí łahgo áyiilaa dóó Diyin Bóhółníihii yich’į́’ ninádza’—éí doo neínishłída ńt’ę́ę́’ dii nihookááh iiná bíí’. Oodlą t’áá aaníinii ła’ shiłííshjoní ánáánáál’yaa dóó Jesus Christ bi’adziil yee łahgo áná’oodłííł.

Shiłbééhoozingo asiihígíí neełdziih dóó bikidji oodzíí’ígíí. Díí nahasdzáán bi’ Yisdá’íiníiłii dóó Diyin Niná’dláanii nilį́, Bits’iis ninéédiit’ą’ áko nááhiníínáá dooleeł biniyá. Kodííniid, Diyin Bóhólníihii Bi Iisiszíínii shiłhólǫ́, háálá shee’yílyáago badahojoobá’ígíí nidinííht’į́į́ł shidooniid; bijéí baańdahookaadígíí nidadiisdzí biniyé, daasnáahígíí béédahididoochił na’nitin bee, dóó doo da’oo’ínígíí da’oo’į́ nídadoodleeł, at’́i’dadzaago dastłishígíí bee da’deeshnih.”¹⁶

T’áá háíshį́į́ bijéí baa ndahóókaadígií, dasnáhígíí, bąąh dahoo’a’ígíí, dóó bąąhági’át’éii dóó átídabi’diilyaago biniinaa bini’ daasdiłígíí, Nánihidoołzih, yá’át’ééh ńdoohdleeł, dóó yisdánídíídááł éí nich’į’ yí’oołkąąh. Shi’oodlą t’áá aaníinii bee shił bééhózin na’adziih dóó yá’á’t’ééh ná’ádleeh éí t’áá aaníí át’é. Hahgo oolkiłgo nidoodzihígíí éí háíshį́į́ nádziihígíí bídéét’i’, dóó bá nihoodiit’ááłgo doo bee nihá haz’ą́ą da. T’áá íiyisíí baa hasti’ háshį́į́ nízaagóó a’doolkił na’adziihgo t’áadoo tsxį́į́ł jílíní dóó ákohgo ádaa áhójilyą́ą doo. Yisdá’iiníiłii nihaajooba’ áłahjį́’ dóó nihaa’áhályą́ dóó hasht’é’ádólzin ha’át’ííshį́į́ bidin níídlínígíí nihá hólǫ́.¹⁷

Aańdiit’ááh atiingóó joogááłgo dóó níjídziihgo doo bąąhági’ ádajit’į́į da doodaii’ bił danihighanígíí dóó t’áá háádéé’ da ádaat’ínígíí. T’áá háíshį́į́ bił kééhwiit’ínígíí, baajiníba’ doo átí’al’į́ éí dooda, ayóí ííní’ní ajoodlá éí dooda, hazhó’ígo yá’áti’ t’áá na’níle’dii éí dooda, t’áá hasih éí aanahakaad eí dooda, dóó hodeezyéél sáád hólǫ́ǫgo éí dooda.

T’áá ha’át’ííshį́į́ naahyíht’įįdígíí baa nidlee’ dooleeł éí t’áá íiyisíí aláah át’é Jesus Christ bee diyingo ná’ádziihgo. Ni’iiná baanidlee’go hinínáago, Isaiah ádííniidyę́ę bik’ehgo, łeeshch’ih éí nizhónígíí bideená¹⁸ Éí oodlą’ ayóó át’éego át’é éí Yisdá’iiníiłii t’áá ałtsoní yee ti’hooznii’ t’áá ałtsóní yá.

Egyptdéé’ Joseph be’iina’ łeesch’ih t’éiyá ńt’ę́ę́’. Bik’iské dabijoołáa ńt’ę́ę́’, binda’azlo’, naalté nilį́įgo baa nidahaz’nii’, t’áadoo biniinaaí awaalyáhgóó abi’doolt’e’, níká’adeeshwoł biłnínée baa yooznah. Ndi Diyin Bóhónííhii ya’oolí. “Diyin Bóhółníihii Joseph yił hólǫ́”¹⁹ bich’į’ nahwiisná’ígíí éí ak’ijídlí dóó yee noosééłgo áyiilaa—dóó bighandóó yił háájéhígíí dóó Egypt t’aa’át’é yisdáyíí’eezh.

Egyptdi Joseph aláahdi naat’áanii nilį́įgo bik’iské yééhoosį́į́d, yaanéídiní’ą́ dóó ayóó bił ééhózingo ajooba’ saad yee haadzíí’:

“Áko nidashiyoołnii’ígíí t’áadoo bąąh danihíne’í, doo t’áadoo áłch’į’ nihá da hachį’í. Háálá Diyin God t’áá nihítséedi shiníł’a’go dahináanii dadoodzih biniyé ádzaa. …

“Áko doo nihí shida’soołnii da, ndí Diyin God.”⁹

Yisdá’iiníiłii binahjį’, Joseph bi’iina’ “łeeshch’ih bideená nizhónígíí hazlį́į́’.”²¹

Kevin J. Worthen, BYU binaat’áanii, łah ádííniid éí God “yá’át’éehii ííł’į́ … doo éí hazhó’í é’élyaaígíí t’éiyá bitsą́ą́dóó da ndi bi’oh siidlį́’ígíí ałdó’ éí bik’ee ti’hwii’nííh. Diyin God ákót’éego yá’át’ééh dóó bidziil.”²²

T’áá aaníigo shił bééhózin ayóí ó’óní dóó aa náhidit’aah éí nihi Yisdá’iiníiłii ayóó át’éego yee sizį́, Jesus Christ, ti’hoonííhgo adííniid, “ShiZhé’é, baanídiní’aah; háálá ádaat’ínígíí doo bił béédahózin da.”²³

Yá’ąąshdéé’ nihi Zhé’é yá’át’ééhii nihá yinízin dóó Ba’áłchíní yá ha’olníigo shił bééhózin. Jeremiah bii’dę́ę́’ yííníílta’, “Shił bééhózin nantséskeesígíí, Bóhólníihii ání, yił hodeezyéél baanitséskees’.”²⁴

Jesus Christ ni Messiah nilį́, ayóí ánóóníinii Nik’éniná’ídláii, dóó Yisdá’iiníiłii, nijéí na’ookąąhgo bił bééhózin. Nídíídzih dóó nił hozǫ́ǫ dóó nóó’ní. Bí ayóí ánóó’ní. Yínííł biyi’ yínááłgo nił yichah dóó yá’át’ééh nídíídleełgo ná yaa bił hózhǫ́. Hada’ííníidlíigo dóó ayóí ánihóóníigo nihich’į’ dahdoolnih²⁵ aanáhidit’aah atiingóó yidááłgo Jesus Christ bízhi’ binahjį’, amen.