Ajéí Bee Áyóó ó’óní

Michelle D. Craig Áyiilaa

Ch’íkę́ę́h Álą́ajį́ Yadánaháztánígíí Ałtsé Dah Sidá

Nihijéí bee nihił daházhǫ́ǫgo dóó Jesus ayóó íínííníigo bikéé’ deiyínííkaah doo.

Łahda, áhodooníłígíí hoł bééhózingo t’áá bee hasih.

K’adą́ą́ ałtso Binaanish íílééhgo, Jesus Bikéé’ Naazíinii t’áá íiyisíí nihich’į’ nidahwii’náa doo yidííniid. Ákondi ábíłní, “T’áadoo nihich’į’ ndahwiiłnání.”¹ Aoo’, dahNídiidááh ndi, doo t’áá sáhí yi’Doołnih da.² Bii’Siz’íinii bił hólǫ́ǫgo áyiilaa áko yéé daalniih doo, yinahjį’ dabidziil doo, dóó hodeezyéél yik’ídookah. Yisdá’iinííłii t’áá aaníí nihił hólǫ́, Bikéé’ nisiidzíinii, t’áá ahą́ą́h Bich’į’ dadíníit’į́į́’go nihił hólónígíí baa ákodaniidzin doo.

Christ bikéé’ naazíinii éí ach’į’ nahwii’ná áłahjį’ yii’ tádookai.

Shik’is ła ałk’idą́ą́’ naaltsoos bii’ ályaaígíí shich’į’ áyiilaa éí Nebraska Advertiser, éí díí United States hahoodzoh bii’déé’, July 9, 1857 yę́ędą́ą́’ ályaago. Díí bikáá’go yaa halne’: “T’ah abíínídą́ą́’ Gáamalii Salt Lakegóó yinééłgo kǫ́ǫ́ ch’íníná. Sáanii (t’óó doo yídeiyíghah nahalin ndi) naaldlooshii bitsxe’ígíí nahalingo tsin naabąąs deiyóódzį́į́s, ła’ [asdzáá’] hashtł’ish yii’ chą́ą́hdeezgo’ éí biniinaa oonééłyę́ę t’óóyóó ni’kódzaa, áłchíní yázhí ch’ééhdadeeskaigo bikéé’ deiyíkááh [hashį́į́ danolingo] háádéé’ shį́į́ éé’go yee hadadít’é t’áá bimági’ át’áo dabidziil.”³

Asdzáá-hashtłish bąąhyę́ę t’ahdii baa shíne’. Ha’át’íísh biniinaa t’áá sáhí oodzį́į́s nisin? Da’ t’áá sáhí daats’í ba’áłchíní yinisé? Ha’át’íí éí t’áá íiyisíí yee bidziil, doo ni’kónééh da, bich’į’ nahwii’náa ndi doo yik’idighááhgóó hashtł’ish yiyi’ tsinaabąąs yoodzį́į́s, kéyah dahóltseigóó hooghan doo béédahózingóó yich’į’ binichxǫ́’í t’áá át’é tsinaabąąs biyi’go yoodį́į́s—hadabisídíí ła’ da baa daadloh ndi?⁴

President Joseph F. Smith éí díí sáanii yee dabidziilígíí yaa yááłti’, kóníigo: “Da’ díí sáanii t’áá íiyisíí Jesus Christ Bisodizin deiyoodlánígíí bits’ą́ą́jį’ dahdiinááh yididooniił? Da’ Diyin Yá Yáłti’ii Joseph Smith naanish íídoolíłígíí bił ch’aa nilį́įgo ádíílííł? Da’ Jesus Christ, Diyin God BiYe’ nilíinii diyingo binaanishígíísh doo deiyoo’į́į́góó ádíílííł? Doodah, ts’ídá doo ádoohnííł da díí nahasdzáán bikáá’gi. Há’át’íí biniinaa? Jó t’áá íídą́ą́’ bił béédahózin. Diyin God bił ííshjání ádeiyiilaa, dóó yik’ida’diitą́, dóó doo ła’ ni’bikáá’ adziilii t’áá aaníí át’éii doo yits’ádabídínóo’ah da.”⁵

Shilahkéí dóó shik’is, díígi’ át’áo hastiin dóó asdzání daniidlį́įgo bee nihik’idahodiinii’ nihíyoołkááłdi—Jesus t’áá íiyisíí bikéé’ naazíinii yee dabidziilígíí t’ah ni’bikáá’góó deiyíkááh, Diyin God nihił ííshjání áyiilaaígíí bee nihidziilgo, nihił dahózhǫ́ǫgo Jesus bikéé’ ndaasiidzį́ dóó t’áá aaníí ádeit’į́įgo bikéé’ deiniikááh. Jesus Christ bikéé’ nisiidzínígíí, díí táá’go t’áá aaníinii deiniidlą́ dóó bee díníílzééł.

Áłtsé Éí, Diyin Bee Bił Ahada’diit’ánée T’áá Deiyíníita’ Doo, Nanitł’ah Ndi

Ne’oodlą́, dóó nik’éí, doodaii’ nihich’į’ hodeeznáá’go—azhą́ sodizin yéigo bik’ehgo yínááł ndi ni’iiná ayóó nanitł’ah nininzį́į́’go—béénílniih Diyin Bóhólníihii nihich’į’ ndahwii’náa dooleeł nihidííniid. Ach’į’ nahwii’ná t’áá níléídę́ę́’ binahast’ą́ dóó doo éí t’óó ni’álnii’ da; díí éí Bikéé’ asdzį́į doogo biniyé.⁶ Bídó’, áłtsogo, “hastiin yínííł nilį́, dóó ąąhnahóókaad bił bééhózin.”⁷

Bik’idiitą́ Shizhé’é Yá’ąąshdi hólóonii niiséłígíí shá yineidlį́ Jesus Christ bikéé’ sézį́įgo shił hoolzhólígíí éí t’áá a’oh. Doo éí t’áá áłahjį’ díígi’ át’ée doo nisin—ndi ákót’é!

T’óó hoolzhólígo jiináago éí doo hadziil áhodoolííł da. Dííshjį́įdi Diyin Bóhólníihii bibe’adziilii bee ach’į’nahwii’ná bich’į’ danihidziil, dóó Bibe’adziilii bee bił ahada’diit’ánée bits’ą́ą́dóó nihiká’análwo’.⁸ Nihich’į’ nahwii’náago nihe’oodlą’ bee danihidziil doo—t’áá áhwííjį’ Yisdá’iiníiłii bee bił ahda’deit’ánée ádeil’į́ doo, azhą́ ch’ééh diikai ndi, doodaii’ ha’átíí da baa nihíne’ ndi, dóó na’ádíkid ndanitł’ahígíí baa nitsídeekeesgo—éí binahjį’ Bi’ádinídíín, Bibe’adziil, Bi’ayóó ó’óní, Bi’Ii’sizíinii, Bi’ahodeezyéél nihee hodooleeł.

Bee aha’deit’ą́ be’atiin bikáá’ yiidááłgo éí Yisdá’iiníiłii baadiidááł. Jó Bí biniyé ádeit’į́, haałt’éego áda’diilníłígíí éí ndaga’. Doo éí dighájídíjeeh nahalin da, dóó nihí yiidáłígíí doo nááná ła’ be’iina’ bił ałhąąhnidei’nil da. Ch’ą́ą́hnídadiigoh ndi, Bí nihił hólǫ́.

Naaki góne’, Nihe’oodlą’ Chodeiniil’į́į Doo

Jesus Christ bikéé’ ndaasiidzį́įgo, dóó deijoodlą́ągo éí bá ájít’į́į doo—ts’ídá ach’į’ nahwii’nánígíí biyi’.⁹

Díkwíí nááhaiyę́ędą́ą́’, kin biyi’ nináda’niilkaadgo. Yisk’ą́ą́go nidoolkałígíí niigeehgo, shimá shits’ilí ni’sikaadígíí hadadoołdlał dóó bikáá’ sinilígíí nahjį’ kódadoolííł yidííniid. Shideezhí, Emily tsosts’id binááhaigo, t’áá íídą́ą́ ałwosh. Áko, ałwoshgo, nábiiłkáhígi t’áá át’é dabiyi’ígíí ch’ídeeznil, bitsásk’eh éí ndaga, áádóó ni’ sikaadígíí hadeesdláád. Shínaaí daniilínígíí, shideezhí łah yaadaadlohgo, yída’ats’ihgo yaa ńdiikai . Binichxǫ́’í t’áá ałtsoní ch’ídeezjaa’, doo siláhígo ádeiyiilaa. Naaltsoos díí yikáá’ ádeiyilaago ndeistsooz: “Emily, nihí ch’ídanii’ná. Díkwíída yiską́ągo nich’į’ áda’diilnííł háadi neildeehígíí bee nił dahodiilnih. Ayóó ádanííníí’ní, bił hainjéé’.”

Biiskání Emily t’áadoo da’adą́ąjį’ níyáa da, shik’iské yich’į’ níjéé’—ńt’ę́ę́’ sidá, daa’dílkał yine’dę́ę́’ doo bił hózhǫ́ǫ́góó. Emily díí yanitsékeesgo ání: “Baa yínííł niizį́į́’. Ákót’ée ndi dáá’dílkał t’óó ąą’ííshłaago da shą́’ hait’ée doo ńt’ę́ę́’? Ha’át’íísh da sidéts’ą́ą́’ doo ńt’ę́ę́? Ha’át’íísh da séłchin doo ńt’ę́ę́’? Doo t’áá sáhí nishłínígíí shił bééhodoozįįł ńt’ę́ę́’. Ayóó áshi’dóó’nínígíí baa ákoniizį́į́’ doo ńt’ę́ę́. Díí ts’ídá t’áadoo baa nitsédíkééz da. Bik’idíyą́ągo t’óó áda’dinishkaal dóó yishchah. Ákondi dáá’dílkał t’óó ąą ííshłaago shį́į́ łah át’ée doo ńt’ę́ę́’.”¹⁰

Shideezhí yoo’ínígíí bik’ehgo tsídéskééz, ákondi doo éí íiyisíí ahoot’éhígi’ át’ée da. Nihí łahda, Emily nahalingo, doo nihił dahózhǫ́ǫgo doodaii’ doo nihił dahats’íídgóó doodaii’ áháchį’ da yaa ádanihósingo nihik’eh nídadidleeh hait’áo biyi’ hadiidáłígíí doo baa nitsídeikeesgóó, dáá’dílkał da ąą ajóle’ígíí át’áo, Jesus Christ deiniidlánígíí baa da’ííníídlíigo shą’?

Diyin bizaad biyi’ hastóí dóó sáanii, Christ yikéé’ naazíigo, éí, ach’į’nahwii’ná bee dahaleehgo, doo t’óó naheizt’ą́ągo—be’oodlą́ yee náás deiyíkááh da.¹¹

Łóód ats’íís yiyáanii bee bąąh dah nahaz’ánígíí, Christ nánihíłdziih deidííniid áádóó ábíłní: “Nihílááh, nááda’iiłniihii danihinóoł’įįł. Áádóó baa hoolzhiizh, nít’éé’, t’áá ákǫ́ǫ́ yikahgo, hadaałt’é nídaasdlį́į́’.”¹²

Áádóó t’áá íídą́ą́ náádabi’diisdzíí’ nahalingo priests yich’į’ ííshjáá’ áda’diilyaa, ńt’ę́ę́’ t’áá yich’į’ yikahgo, yá’át’ééh nídaasdlį́į́’.

Áádóó ałdó’ nihich’į’nahwii’náago shíká’adoowoł ákondi doo bóhoneidzą́ą́ da nínízingo, t’ááshǫǫdí—nik’is, nik’éí, Sodizin binaat’áanii danilínígíí, doodaii’ yaa da’ííłta’ígíí shiká’anilyeed bididííniił. Díí bee ha’íínílníi doo.

Táá’góne’ éí, Nihijéí Bee Áyóó íínííníigo dóó Nihił Dahózhǫ́ǫgo Aká’anídeijah Doo¹³

Ach’į’ nahwii’ná biih néíkahgo, t’ahdoo nihookáá’ bikáá’ nishááh yę́ędą́ą́’ Christ bikéé’ yishááł doo dííniidyę́ę bénáshniih, háálá she’oodlą́, chánáh, dóó bee ha’ííníshnínígíí bee nashidí’nóotahgo biniyé kǫ́ǫ́ honishłǫ́. Áádóó dííjį́įdi nihich’į’ nahwii’náago éí biniinaa t’áadoo Diyin God daats’í ayóó áshóóní doodaii’ t’ahdii daats’í yinishdlą́ą doo t’áadoo danohsiní. Ach’į’nahwii’ná éí biniinaa nahat’á bee yisdá’iildééhii doo naalnish da t’áado danohsiní; éí Diyin binahat’á bił silá áko Diyin God hadadíníit’į́į́ doo. Yéigo hazhó’í é’éshį́įgo éí Bí át’éhígi’ ánísht’éii yishłeeh, dóó Bí nahalingo, ha’ííníshníi doo, shich’į’ nahwii’náago, yéigo sońdísdzįįh.¹⁴

Jesus Christ éí nihiTaa’ t’áá át’éii ńt’ę́ę́’ Bijéí yee haałt’éego ayóó áyó’níigo yee sezį́į́ ńt’ę́ę́’—bąąh adooleełígíí doo bił nilį́į da, Yá í’doolíłígíí t’éiya bił nilį́.¹⁵ Ásizį́įgo é’éł’ínígi’ át’áo shídó’ ákónísht’ée doo nisin.

Asdzáá bąąh é’ésdįįdígíí shidiisnáá’, bijéí dóó bii’sizíinii t’áá át’ée ńt’ę́ę́’ yee akéé’ sizį́ éí naaki łichí’í t’éiyá neijaahyę́ę diyin bighan góne’ yah ayííjaa’. T’áá ałtso bee hólónée einíjaa’.¹⁶

Jesus Christ baa ákoniizį́į́’ t’áá ałtso yee hiináanii ayíínilígíí ákondi ła’ éí t’áá íiyisíí bahojoobá’ígo dabinéł’į́. Nihídó’ t’áá ákódaniit’é. Bi’oh daniil’ánígíí doo yee nihinéł’į́į da ákondi oodlą’ choiniil’į́ dóó bee niilzéłígíí bee ła’ diilníiłgo yee nihinéł’į́.

Ałch’į’ ánálnééh

Jesus Christ bikéé’ nisiidzíinii, shijéí t’áá át’éé ńt’ę́ę́’ bee, shí éí Diyin Bóhólníihii bikéé’ sézį́į doo nisin. Shí éí Bá ndaal’a’í bíł nisézį́į doo nisin—President Russell M. Nelson dóó bihastóí Naakits’ą́ądah bił—háálá Yá yádaałti’ dóó o’ool’įįł dóó bee ahada’deit’áanii yik’ih dadéez’į́į́’ígíí éí bee Yisdá’iiníiłii bidéiti’go áshósin.

Ch’ąąhnídíshgohgo, t’áá áko nínádiishnah, háálá Jesus Christ bibe’ajooba’ dóó be’adziilii ba’ííníshłí. Bił aha’dinisht’ánígíí bikéé’ sézį́į doo dóó shína’ádíkid hólǫ́ǫgo Diyin God bizaad naashkaah doo, she’oodlą’ bee, dóó Ii’sizį́ Diyinii shíká’análwo’go, éí sháhoo’ááłgo ba’ííníshłí. Bi Ii’sizíinii ts’ídá t’áá ákwííjį́ azhą́ ádaałts’íísí dóó doo ndanitł’ah da ndi biká díníshį́į́’.

Díí Diyin God bikéé’ asdzį́ shi’atiin át’é.

Áádóó díí áts’íís atíl’į́ nádziihgo, Diyin Bóhólníihii biBa’ dooleeł dóó Ba’ííníshłį́į doo—Bi’oolkił, Bił ééhózin, Binahat’a’ bee.¹⁷

Da’ahíínííta’go, hool’áágóó Bił ndasiidzį́į dooleeł. Nihijéí bee áyóó áda’ahííníiníígo. Nihił bééhózin Jesus Christ nihijéí bee ayóó ííníiníígo, bidiníná t’áá át’é Bíhígíí yee nihik’ihozhdoodliił.¹⁸ Jesus Christ bízhi’ binahjį’, amen.