Hool’áágóó Diyin Bikéé’ Asdzį́
Diyin k’ehjí iiná bee ha’ahóní nizhdiilééh dóó hoł hodeezyéél hozhǫ́jí é’él’į́ nabizhnít’aah dóó yá’át’ééhgo jiináago éí bee nihidziil dóó nihi’ oodlą’ bee diltłi’.
Shį́į́dą́ą́’, 200,000 dóó bi’aan bilááhgóó nooséłí ádahwiis’áágóó bi’oodlą’ dadiníísą́ dikwíídi neeznádiingo bił dahoo’a’ áłah danilį́įgó damóo da’azlį́į́’ Nooséłi Da Bidziil, doodaii’ FSY áłah daazlį́į́’. Naałniih biniinaa t’áá sahdii nihił nahazą́ądę́ę́’ chíhikai, niidlą’í Diyin God deiniidłą́ą’go binahjį́’ álah siidłį́į́’. Lą’ida nooséłí atah danilínígíí t’áá aheełt’éego yinahjį’ idahidiikai’ígíí t’áá hózhǫ́ yee bidziil daazlį́į́’. Damóo bee da’azlį́į́’go, na’ídishkid, “Hash yit’éé ńt’ę́ę́’?”
Łahda kódadííniid: “Jó, Damóo biiskaní shimá ayóó yiníshdin ńt’ę́ę́’ háálá yíshiniłchééhgo kwe’é níyá. Dóó ła’ bééhosin da ńt’éé’. Dóó díí doo shá át’ée da niizį́į́’. Dóó shik’is ádin. … K’ad éí nida’iiníísh, dóó t’áá kǫ́ǫ́ naasháa doo nisin. Diyin Ii’sizíinii shii’ hólǫ́ǫ doo nisin. Díígi’ át’éego hinishnáa dooleeł nisin.”
T’áá ła’í nízínígo baa hane’ dahólǫ́ éí bee bił éédahoozįįh dóó Diyin bits’ą́ą́déé’ ak’ihojidlí bitahgóó dahólǫ́ dóó anoosééł yááiitiingóó yee hada’ólní. Shį́į́dą́ą́’ ałdó’ Diyin bits’ą́ą́déé’ Diyin Ii’sizíinii doo ni’ kónééhgóó łahgo ánísht’éego áshiilaa FSYdi nooséłí yá’át’ééhii bijéí yee laanaa danízinígíí t’áá łá’í nízínígo Diyin yaa da’ó’líigo Damóo azlį́į́’.
Tónteel bikáádi bitsinaa’eełtsoh yi’oł nahalingo, nihinaagóó diyingo iiná łahgo ánáá’niił hwe’oodlą́ bee hoot’į́įgo baa ntsáhákeesgo t’áá hwee hólǫ́ǫ doo doodaii’ baa áhoojilyą́ągo, áko nihichxǫǫhgo, doo nahgóó kódaane’ da.
Idahidiikai Bits’ą́ądóó Bits’ádi’nílidígíí Hash Yit’áo T’áá Ákót’éego Ádeiníilzin Dooleeł?
FSY álah álį́įdi bídahwiil’ą́’ígíí, níbaal ndasii’nilgi, bááh dóó tó bik’isodahodoozin, dóó nda’nitin bee nihe’oodlą́ béésh łigai nahalingo nídeelgááh, bee daníílzééł dóó nihii’sizíinii hodeezyéél yaa ádahoniizįįh. Ákondi haash yit’áo t’áá ákóniit’ée doo dóó “t’áá náásgóó Christ bee daniildzilgo nii’nijį́ náánéíkah doo’” (2 Nephi 31:20) t’ą́ą́’ anídadiigohgo éí dooda? T’áá ha’át’íí shį́į́ bee náás niikai’ígíí t’áá beda’iilį́į doo, t’áá ahą́ą́h sohodizin da, Diyin bizaad nihii’ ndahwiile’, dóó t’áá aaníí íít’į́į́go áká’anéílwo’ doo.
Ła’ nihí éí, Diyin baa da’ííníidlį́įgo tó dóó bááh bik’ih sohodoozindi yah anéédááhgo nibídaniitaah doo. Áádi yiidááhgo, Diyin níhá tihooznii’ígíí nánihiłdziih, Diyin bina’nitin nihiyi’ nihwiileeh, dóó bił áłah nídeidleehígíí bee hada’ííníílnih.
Áłah nídeedleehgo bits’ą́ą́dóó bee danihidziilígíí éíísh háádę́ę́’?
FSYdi, 200,000 dóó bi’aan nooséłí Yisdá’iinííłii yéédahoosįįd Diyin bizaad ání naaki doodaii’ bilááhgóó Shízhi’ binahjį’ ahínéíkahgo (see Matthew 18:20) na’nitin dóó Diyin bizaad chodeil’į́įgo, dahwiitaał, dóó ahił sodadiilzingo, Christ bee hodeezyéél bik’ídiikah. Díí t’áá íiyisíí bidziilgo nihá hadiilyaa diyin ii’siz’íinii dahyidiiłwo’.
Nihila dóó nihik’is t’áá íiyisíí bił dahózhǫ́ǫgo k’ad dabighangóó dahnídadiikai éí ááhaní “Diyin ba’ódlí” (Proverbs 3:5; 2022 youth theme) t’áásh yada’óólí ni’ bikáá’góó ádahooníł ndabiníłtł’ahgo nidabííłso’. Jó łahgo át’é hodeezyéélgi “(Joseph Smith—History 1:17) idiits’į́į́h” Diyin bizaad hach’į’ ąą át’éego baa ntsáhákees łeh. Ákondi łahgo ánáánáát’é Diyin bikéé’ asdzį́ jótą’go díí ni’ bikáá’góó hahóó’á na’niłtł’ah ndi náásjį’ deinííkááhgo “Didiits’į́į́ł,” azhą́ ádaahodzóódlí dóó ádaaha’niih bee hahóó’áágo ndi. T’áadoo naaki nilíní: éí nihinooséłí ayóó ádaat’éii bijéí dóó bintsékees dabiyi’ áko bidínóołtł’ahígíí yich’į’ dabidziil dííshjį́įdi ni’naha’ná nahalǫ́ǫ łahgoo áhoonííł.
Dabighangóó Yił Kéédahat’íinii Díí Sodizingóó Baa Nda’aldeeh Yídaneidlínígíí Hait’áo Yighą́ą́jį’ Yíká’adoojah?
Ch’ikę́ę́h Dahyikahígíí yilą́ąjį’ sizínígíí shich’ooní át’é. Łah i’íí’ą́ągo bááh łikaní hasht’eishłééh shich’ooní sodizin báhooghan góne’ áłah aleehgo amá dóó ázhe’é bich’ikę́ę́h Young Women camp deeskaigóó yich’į’ hasht’e’ádadiilnééh, éí náádímóogo aleeh. Háadishį́į́ ahíídookah dóó ha’át’íí ndeidiyoojihígíí yee yił hoolne’, kóníigo, “K’ad, Naakijį́ na’anish abínígo niha’áłchíní ch’ikę́ę́h chidiłtsxooí bidááh bił nihoohkááhgo ayóí’ádeinóhníigo binídaahchid. Dóó hágoónee’ dabidoohníigo nídanohts’ǫs—jó háálá doo ńdookah da.”
Háíshį́į́’ yik’ee deesyiz, ńt’éé’ shí lá. “Da’ doo nákááh da?”
Áádóó ánáádi’ní, “Naaki jį́ na’anish-abínígo nihiát’ééké adadasoonilgo, honeinih ndabiníłtł’aahígíí t’áágééd nihidookah dóó t’ááłá’í damóo ahił ídahooł’aah doo dóó dadínóosééł dóó Diyin yada’óólį́į doo. Ahił sodadiilzin dooleeł dóó dahwiitaał dóó ch’iyáán ádeil’į́į dooleeł dóó ahił áká’anéijah dooleeł dóó nihe’oodlą’ bee ahił dahwiilne’ dooleeł dóó nihiZhé’é Diyin Bii’Sizíinii nihił hólǫ́ǫgo áda’iilį́į́ doo, ákot’áo damóo adooleeł, yee biyi’ dahodooleeł. Dóó Damóo Yázhígo, at’ééké chidíłtsxooí yiyi’dóó hadááhájeehgo éí naakijį́ na’anish yę́ędą́ą́’ bił ndahisiyoohkaiyę́ę doo t’áá éí ádaat’į́į da doo. Ániidí dadooleeł. Áádóó biká ánídaahjahgo t’áh hódááhídóó be’iina’ ádeeł’į́į doo, bik’ee dadidoołhxis. Bi’iiná łahgo ádadoonííł dóó dadínóosééł. Dóó bił danihighanígíí ałdó.”
Damóo Yázhí azlį́įgo, ádííniidyę́ę bohoolyaa. Níbaal hééł áshłééhgo, shich’ooní tsintahdéé’ bizhí’ disíts’ą́ą́’ at’ééké áłah nilį́įgi bighangóó nídadeeskaigo. Diséts’ą́ą́’, “Jó, ákǫ́ǫ́ honóhłǫ́ǫ lá. Hadanihiilzíídgo damóo azlį́į́’. Damóo Yázhí at’ééké.”
Dííjį́įdi ániid ndaakaiígíí dabidziilgo ach’į’nahwii’ná biyi’ t’áá náás yinééł. Ił hózhǫ́ yik’ídahakááh díí nahasdzáán bikáá’góó doo yá’át’éégóó áhodoonííł bee ha’oodzíí’yę́ę yiyi’ doo hoot’į́į da ndi doo yóóahikááh da, hodílzin yíká ádaat’į́, doo nídahinilyéésgóó yich’į’ deiyíkááh. Neeznádiin nááhaidą́ą́’, G. K Chesterton hooghangi’ át’éii dóó Sodizin yada’ólį́įgo bił ííshjání ályaa nahalingo yaa haadzíí’, “Yá haz’ą́ądi Ogre bighan yadiinééz t’áá nihighan nahalingo, bídadíníilnáá doo, bich’ą́ą́h nidadiibah, dóó i’íí’ą́ągo yah anídiikah” (G. K. Chesterton, Orthodoxy
Baa ahééhniidzin, doo t’áá sáhóó ndadoobah da. Ahił danilį́įgo ahíłkáá’anájah. Dóó nihídó’ bił niidlį́. Dóó dííshjį́įdi diyin yá halne’í, President Russell M. Nelson, diyindéé’ ádahodoonííłígíí yaa halne’go éí ayóó át’éego dóó ayóó ánoolningo biyi’ nihoo’ish—Israel dine’é ahínéet’ééshgo—(see “Israel bee Ha’óólní” [adawiis’áágóó nooséłí bich’į’ yá’óóti’, June 3, 2018], HopeofIsrael.ChurchofJesusChrist.org).
Shį́į́dą́ą́’, shich’ooní, Kalleen, dóó shí Amsterdamdi béésh naata’í bee neit’aashgo, bénááshnii’, íídą́ą́’ na’nitiní ániid naaghá’í nishłį́įgo. Díkwííshį́į́ nídeizid Dutch bizaad bóhooł’ą́ągo, nihi KLM béésh naat’a’í nihił nidaahgo, áko na’ałt’a’í nihich’į’ haadzíí’ ndi doo bik’ida’diit’ą́ą da. Doo íísts’ą́ą́góó, bił na’nishtinígíí, kódííniid, “Dutch bizaad yee haadzíí’gi’ át’é.” Dego haigal, kwííníníziníísh níídzį́į́’: “Nihił áhásdįįd.”
Ndi doo t’áá ałtsóní yíchxǫ’ da. Nihe’oodlą’ ba’ííníídlį́įgo yiit’ash béésh naat’a’í nídanidááhídi álílei bee nihik’ihozhdoodliił diyin bina’nitiní niidlį́įgo, t’áá hooschį’ dííjį́įdi nihił áhoot’éhígíí baa ánááhoniisdzį́į́’, na’nitiní łah hooghangóó náádááłgo iihilwod. Nihich’į’ ádééhoosdzįįd dóó nanihídéíłkid, “President Lund, k’adéésh heeshnééh?” Haash yit’áo she’oodlą’ bee t’áá shitsxe’ dooleeł?”
Díí ániid nidaakai’í na’ádíkid yaa ntsédaakees ahínídeikahgo, FSYdéé’ honeeni dóó ndabidi’nitingo, dóó diyin bighandéé’ ch’íhíkááhgo, dóó yá’ąąshdéé’ diyin bi’adziil dabidiiłnááhgo: “Hait’áo Diyin God bi’ayóó’ó’óni’ hool’áágóó bikéé ásdzį́ doodleeł?”
Díí na’nitin’í baa ááh niizį́į́’ binaanish k’adą́ą́ ałtso íílééhgo, áko Ii’sizį́ Diyinii t’áadoo iits’a’í shidiisnáá’, kódíshníigo diséts’ą́ą́’, “Nízhi’ naahdasit’ánígíí t’áágééd ndi Bízhi’ Bá ánít’į́į doo.”
Biwosgi dahdideeshní dóó, “Díígi’ ádíínííł bidi’deeshnííł niizį́į́’. Hooghangóó náádááł, dóó díígi’ ánít’ée doo. Yá’át’éehii nílį́ kasidą́ą́’ cha’ałheeł biyidéé’ nits’ádi’nílííd. Na’nítingo bee sinítł’isyę́ę dóó ni’iiná ninéíndláhígíí éí bee ayóó á’téego Diyin God biye’ sínélį́į́’. Ha’át’ííshį́į́ binahjį’ nidziilgo ániilaayę́ę t’áá ákónít’į́į doo nighandi. Sodílzingo bóhwiiníł’ą́ą́’ dóó háí bich’į’ sodílzin dóó saad bee sohodizinígíí bóhwiiníł’ą́ą́’. Diyin Bizaad bóhwiiníł’ą́ą́’ dóó Yisdá’iiníiłii ayóí ííní’ní sínílį́į́’ bikéé’ yínááłgo. Ni Yá’ąąshdę́ę́’ Nizhé’é ayóí’ííníní Bí Bizhé’é ayóí’áyóónínígi’ át’áo, áká’íínílwod Bi áká’análwo’ígi’ át’áo, dóó Diyin Bibeehaz’áanii bik’eh yínááł t’áá Bí nahalingo—dóó asínísįįhgo, ádaaná’iisíníkan. Diyin bikéé’ sénízį́į́go doo éí t’óó ni’éé’ naats’ǫǫdí bikáá’ da—t’áá ałtso bá ánít’į́įgo ni’iiná ííniilaa. Áko náádááł, dóó ákónít’į́į doo. Éí nílį́. Díí diyingo nideesnáá’ígíí t’áá yínítą’go hiinínáa doo.”
Shił bééhózin Jesus Christ joodlą́ągo dóó Bił aha’diit’ą́ atiingóó, diyingo bee danihidziil dóó ahiłhoodeezyéél bik’ídiikah éí hodiyin k’ehgo é’él’į́ dóó yá’át’ééhgo iiná nihe’oodlą’ bee bidziil doo. Bíni’ ádahoonííł, t’ááłá’í niidzínígo kǫ’ nihá dadiltłi’ígíí bich’į’ yiikah, t’áá náás yiikah dooleeł. Jesus Christ bízhi’ binahjį’, amen.