![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fa6%2Fa2%2Fa6a2e9545392a1693cad2642d1b2e28ee46e0e3d%2Fa6a2e9545392a1693cad2642d1b2e28ee46e0e3d.jpeg/full/!250,/0/default)
Kan Ererimbot Nyuŋ Nyene Nduɔk Odudu
Ebeŋe emi ami nnɔde mbufo usenubɔk emi edi ndinyene nduɔk odudu mbaŋa ufiop, unana idorenyin, ye ubiak ererimbot emi ke ndikan ererimbot nto ke mme ediomi ye Abasi.
Ndima nditɔ-eka iren ye iban, esit enem mi ndikɔm mbufo ke ediye usenubɔk Sabbath emi. Mbufo edu mi ke esit kpukpru ini. Akpa mi idem nte mbufo enamde ŋkpɔ ke ini ekutde nte mbon efen eyomde unwam. Enem mi ke mbuɔtidem emi mbufo ewutde kpukpru ini. Meseme mbaŋa mme ŋkɔŋ-ibuot, mfina, ye mme ekikere mbufo. Ami mema mbufo. Ami nnam mbufo efiɔk ete ke Ete nnyin ke Heaven ye Edima Eyen Esie, Jesus Christ, ema mbufo. Mmɔ etim efiɔk itie mbufo, mfɔn mbufo, se mbufo eyomde, ye mme akam mbufo kabaŋa unwam. Ami ŋka iso mbɔŋ akam nnɔ mbufo nte ekop ima Mmɔ enyenede enɔ mbufo.
Nidkop ima mmɔ edi akpan-ŋkpɔ, koro etiede nte ke nnyin ikop idiɔk etop kpukpru usen. Edu mme usen emi mbufo ekerede ke ekpe esine ɔfɔŋ idap mbufo, ewaŋa ena, ndien edɔhɔ yak owo edemere mbufo ke mfina emi ema ebe.
Edi, ndima nditɔ eka mi iren ye iban, ediwak nti ŋkpɔ edu ke iso. Ke mme usen emi edide, nnyin iyikut eriyarare odudu Andiyaŋa emi okponde akan emi ererimbot akananam ekutde. Ke ufɔt ini emi ye oro Enye ɔnyɔŋ edi “ye odudu ye akwa ubɔŋ,”1 Enye ɔyɔnɔ mbon emi ebuɔtde idem ediwak ufaŋ, mme edidiɔŋ, ye mme utibe ŋkpɔ.
Edi, idahaemi ke akpanikɔ nnyin idu ke ini emi ɔsɔŋde akan ke mbuk ererimbot. Mme nsɔŋɔ-ŋkpɔ ye mme mfina enam ediwak owo ekop ekaha ye mmem-idem. Edi, kere mbaŋa ŋkpɔ emi eketibede ke edem emi ekemede ndiwut nte mbufo ye ami ikpinyenede emem.
Ke ini emi ekeberede Washington D.C. Temple, owo kiet ke otu mbon eketimde edinam oro ama okut ŋkpɔ emi okotukde enye nte enye akadade mme ɔkɔ-mbuk ŋkpɔ-ntibe asaŋa ke temple. Ke usuŋ kiet mbon ufɔk emana kiet ema esin idem ke edinam oro. Ɔkɔ-mbuk ŋkpɔ-ntibe kiet ama aka iso obup abaŋa “isaŋ” anam utom temple kiet nte enye asaŋade ke temple. Enye ama oyom ndifiɔk mme isaŋ temple ada ɔnɔ mme mfina ke isaŋ oeo ke uwem.
Akparawa kiet ke ufɔk oro ama aka iso ke nneme oro. Ke ini mme esen-owo oro edukde ubet endowment, akparawa oro owut alter, emi mme owo etɔŋɔde erɔŋ ndinam mme ediomi ye Abasi, onyuŋ ɔdɔhɔ ete, “Oh, oro eye. Se ebiet mi mme owo ndi duɔk odudu ke isaŋ temple mmɔ.”
Mekere me akparawa oro ama ɔfiɔk nte se enye eketiŋde ekedide akpanikɔ. Etie nte enye ikifiɔkke ibaŋa ata nnen nne se idude ke ufɔt ndinam ediomi ye Abasi ye eŋwɔŋɔ Andinyaŋa.
“Etiene mi, kpukpru mbufo emi ekpade mba enyuŋ ebiomde edidobi mbiomo, ndien Ami nyenɔ mbufo nduɔk odudu.
“Emen ɔkpɔnɔ mi ekɔŋɔ ke itɔng mbufo, enyuŋ ekpebe mi; … ndien mbufo eyekut nduɔk odudu enɔ ukpɔŋ mbufo.
“Koro ɔkpɔnɔ mi ememem, mbiomo mi onyuŋ efefere.”2
Ndima nditɔ eke mi iren ye iban, mɔfɔhɔ mbaŋa mbon emi ekpɔŋde ufɔk Abasi ke ntak emi mmɔ ekerede ete ke se ufɔk Abasi oyomde oto mmɔ okpon akaha. Mmɔ ikwe kaŋa ite ke ndinam nyuŋ nnim mme ediomi enam uwem emem! Owo kiet kiet emi anamde eŋwɔŋɔ ke ebiet una baptism ye ke mme temple—ndien enim mmɔ—enyene nnen nnen ebuana ye odudu Jesus Christ. Mbɔk kere baŋa akpanikɔ oro!
Utip ke ndinam mme ediomi ye Abasi edi odudu eke heaven—odudu emi anamde nnyin ikan iyɔ mme idomo, mfina, ye mme ubiak. Odudu emi anam usuŋ nnyin emem. Mbon emi enimde ikpɔ ibet Jesus Christ enyene akamba odudu Esie. Ke ntre, mbon emi enimde ediomi mmɔ enyene saŋa-saŋa nduɔk odudu emi esimde mmɔ oto ke ediomi mmɔ ye Abasi.
Mbemiso Andinyaŋa ayak idem Esie ɔnɔ ete emia ufen ke Gethsemane ye Calvary, Enye ama ɔdɔhɔ mme Apostle Esie ete, “Ke ererimbot ke mbufo edikut ukut: edi enemesit; ami mekan ererimbot.”3 Ke etienede oro, Jesus ama ɔdɔhɔ nnyin kiet kiet ete inam ukem oro ke ini Enye ɔkɔdɔhɔ ete, “Ami nyom nte mbufo ana ekan ererimbot.”4
Ndima nditɔ eka iren ye iban, etop emi ami nnɔde mbufo mfin emi edi ete ke ntak emi Jesus Christ akakande usuhɔre ererimbot emi ye ke ntak emi Enye akakpade ɔnɔ nnyin kiet kiet, mbufo ŋko emekeme ndikan ererimbot emi ɔyɔhɔde ye idiɔk ŋkpɔ, uma-idem, ye mmem-idem.
Ke ntak emi Andinyaŋa, ke otode anana utit Mkpa Usio-isop Esie, akafakde nnyin kiet kiet osio ke mmem-idem, ndudue, ye idiɔk ŋkpɔ, ye ke ntak emi Enye okokopde ofuri ubiak, mfina, ye mbiomo emi mbufo akananam ekenyenede,5 ndien kpa nte mbufo ekabarede esit ke akpanikɔ enyuŋ eyomde unwam Esie, mbufo emekeme ndidaha ŋkoŋ nkan idiɔk ererimbot emi.
Mbufo emekeme ndikan mme mfina eke spirit emi eyɔhɔde ererimbot emi, ye ŋkut-idem, ntaŋ-idem, iyaresit, idiɔk ido, idiok itɔŋ, ufip ye ndik. Ke misehe mme mfiak-edem ye mme abiaŋa emi edude ekanare nnyin ekuk, mbufo emekeme ndikut ata nduɔk odudu—emi ɔwɔrɔde ndibɔhɔ ye emem—kpa ke ufɔt mfina mbufo emi okponde akan.
Akpanikɔ emi anam ekere ebaŋa mme akpan mbume ita
Akpa, ɔwɔrɔ nso ndikan ererimbot?
Iba, didie ke nnyin inam enye?
Ndien ita, didie ke ndikan ererimbot ɔdiɔŋ uwem nnyin?
Ɔwɔrɔ nso ndikan ererimbot? Ɔwɔrɔ ndikan idomo ndikere mbaŋa mme ŋkpɔ ererimbot nkan nte ekerede abaŋa mme ŋkpɔ Abasi. Ɔwɔrɔ ndidori-enyin ke ukpep-ŋkpɔ Christ nkan mme ukpep-ŋkpɔ owo. Ɔwɔrɔ ndidaresit ke akpanikɔ, ndikaŋ ŋkari, nyuŋ nkabare ndi “nti mme anditiene Christ.”6 Ɔwɔrɔ nditre ndinam ŋkpɔ ndomo kiet emi ebinde Spirit efep. Ɔwɔrɔ ndima “ndiyak” kpa mme idiɔk ŋkpɔ emi nnyin imade ikan.7
Idahaemi, ndikan ererimbot iwɔrɔke ndifɔn-mma ke uwem emi, inyuŋ iwɔrɔke ite ke mme mfina mbufo eyesop nte magic—koro mmɔ idisopke. Inyuŋ iwɔrɔke ite ke mbufo idinamke mme ndudue aba. Edi ndikan ererimbot ɔwɔrɔ ete ke odudu mbufo ndikan idiɔk ŋkpɔ ɔyɔkɔri. Esit mbufo eyemem nte mbuɔtidem mbufo ke Christ ɔkɔride.8 Ndikan ererimbot ɔwɔrɔ ndikɔri mma Abasi ye Edima Eyen Esie nkan nte amade owo efen mme ŋkpɔ efen.
Didie, ndien, ke nnyin ikan ererimbot? Edidem Benjamin ama ekpep nnyin nte idinamde. Enye ɔkɔdɔhɔ ete ke owo nte obot edide edi asua ɔnɔ Abasi” ndien onyuŋ edi oro ke nsi nsi “ibɔhɔke enye okop mme ntuk Edisana Spirit, onyuŋ ɔwɔrɔ ɔkpɔŋ owo nte obot edide onyuŋ akabare edi edisana oto ke usio-isop Christ Jehovah.”9 Ke ini emi mbufo eyomde enyuŋ etienede mme ntuk eke Spirit, ke ini emi mbufo enamde eti ŋkpɔ ndomo kiet—mme ŋkpɔ emi “ata owo” midinamke—mbufo emekan ererimbot.
Ndikan ererimbot idighe ŋkpɔ emi etibede ke usen kiet mme iba. Etibe ke ayan ini nte nnyin ikade iso ikop ukpep-ŋkpɔ Christ. Nnyin inyene mbuɔtidem ke Jesus Christ ke ndikabare esit kpukpru usen nyuŋ nnim mme ediomi emi enɔde nnyin odudu. Nnyin idu ke usuŋ ediomi enyuŋ edidiɔŋ nnyin ye odudu spirit, eriyarare nnɔ idem nnyin, nkɔri ke mbuɔtidem, ye utom mme angel. Ndidu uwem eke ukpep-ŋkpɔ Christ ekeme ndinɔ odudu emi okponde akan eti ido, anam inyene ukeme eke spirit ke uwem nnyin.10
Nte nnyin idomode ndinim ikpɔ ibet Jesus Christ, esit nnyin ye mme obot nnyin etɔŋɔ ndikpuhɔre. Andinyaŋa emenere nnyin ɔkpɔŋ ererimbot emi ɔduɔde ke ndidiɔŋ nnyin ye ima, nsuhɔre idem, ntat-ubɔk, eti ido, mfara ke idem, emem, ye nduɔk odudu.
Idahaemi, mbufo emekeme ndikere ke emi etie nte ɔkpɔsɔŋ utom spirit idighe nduɔk odudu. Edi se akpanikɔ mi: ke ini ererimbot edɔhɔde ete ke odudu, mme inyene, uwɔrɔ etop, ye inemesit obukidem ɔnɔ inemesit, mmɔ inɔhɔ! Mmɔ ikemeke ndinɔ! Se mmɔ edade edi edi ukpɔk ŋkpɔ emi adade ɔnɔ “eridiɔŋ ye idaha inemesit eke mmɔ emi enimde ibet Abasi.”11
Akpanikɔ edi ete ke etim ɔsɔŋ ndiyom inemesit ke ebiet emi mbufo mikemeke ndikut enye! Edi, ke ini mbufo ediande idem mbufo ye Jesus Christ enyuŋ enamde utom spirit emi eyomde man ekan ererimbot, Enye, ndien Enye ikpɔŋ, enyene odudu ndimenere mbufo mkpɔŋ odudu ererimbot.
Idahaemi, didie ke ndikan ererimbot ɔdiɔŋ uwem nnyin? Ibɔrɔ isɔŋke: ndiduk ebuana ediomi ye Abasi adian nnyin ye Enye ke usuŋ emi anamde kpukpru ŋkpɔ abaŋade uwem edi mmem-mmem. Mbɔk yak se ntiŋde anwaŋa: Ami nkɔdɔhɔke nte ke ndinam mme ediomi ayanam uwem edi mmem mmem. Ke akpanikɔ, ebeŋe-idem enɔ enwan, koro andidiɔk iyomke mbufo ekut odudu Jesus Christ. Edi ndidian idem mbufo ye Andinyaŋa ɔwɔrɔ ke mbufo emekut usuŋ ndinyene ukeme ye erifak odudu Esie .
Ami mɔsɔŋɔ eti ukpep-ŋkpɔ President Ezra Taft Benson: “Iren ye iban emi enɔde Abasi mme uwem mmɔ eyekut ete ke Enye ekeme ndinam ke uwem mmɔ nwak nkan se mmɔ ekemede. Enye eyenam inemesit mmɔ ɔtuŋɔ, atat enyin mmɔ, atat esit mmɔ, … emenere spirit mmɔ, anam edidiɔŋ mmɔ etɔt, anam mme ukeme mmɔ etɔt, ɔdɔŋ mmɔ esit, ɔnɔ mmɔ mme ufan, onyuŋ anwaŋa emem.”12
Mme anana mbiet ufaŋ emi etiene mbon emi eyomde unwam heaven ndinwam mmɔ ekan ererimbot emi. Ke ntak emi, ami nnɔ ofuri mbon ufɔk Abasi ukem item emi nkɔnɔde nditɔ nnyin ke May emi ekebede. Nkɔdɔhɔ mmɔ idaha oro nte—ndien ami mbeŋe mbufo idahaemi—nte ekara ikɔ ntiense mbufo ke Jesus Christ ye gospel Esie. Enam utom eyom enye. Ebɔk enye man enye ɔkɔri. Ebɔk akpanikɔ. Ekubiat enye ye nsu nsu ukpe-ŋkpɔ eke iren ye iban emi minyeneke mbuɔtidem. Nte mbufo ekade iso enam ndisɔŋɔ ikɔ ntiense mbufo ke Jesus Christ edi akpan, eyom mme utibe ŋkpɔ ke uwem mbufo.13
Ebeŋe emi ami nnɔde mbufo usenubɔk emi edi ndinyene nduɔk odudu mbaŋa ufiop, unana idorenyin, ye ubiak ererimbot emi ke ndikan ererimbot nto ke mme ediomi ye Abasi. Yak Enye ɔfiɔk oto mme akam mbufo ye mme edinam mbufo ete ke mbufo emeyom ndikan ererimbot. Ebeŋe Enye ete atat esit mbufo onyuŋ ɔnɔ unwam emi mbufo oyomde. Ke usen ke usen, ewet mme ekikere emi enyenede nte mbufo ebɔŋde akam; enyuŋ esin ifik etiene ebaŋa. Ebiat ini ke temple, enyuŋ eyom ndifiɔk nte temple ekpepde mbufo ndidaha nda mkpɔŋ ererimbot emi ama ɔkɔduɔ.14
Nte mma nketetiŋ, ndibok Israel edi utom emi okponde akan emi akade iso ke ererimbot mfin. Akpan ŋkpɔ kiet ke ndibok emi edi ndibeŋe mme owo idem emi enyenede ukeme, ebeŋede idem, enyuŋ edotde ndikut Abasi ke ini Enye afiakde edi, mme owo emi ema ekemek Jesus Christ ke itie ererimbot emi ama ɔkɔduɔ, mme owo emi enemde esit ke ufaŋ mmɔ ndimek ndidu akamba, nsasana mbet Jesus Christ.
Mokot mbufo, ndima nditɔ eka iren ye iban, nte edi ndisana owo emi. Ema enyuŋ ekpono mme ediomi mbufo ekan kpukpru mme ŋkpɔ efen. Nte mbufo eyakde Abasi akara ke uwem mbufo, ami mɔŋwɔŋɔ ke eyenyene akamba emem, nsɔŋɔ, idara, ye iŋ, nduɔk odudu.
Ye odudu edisana apostle emi enɔde mi, mɔdiɔŋ mbufo ke udɔŋ mbufo ndikan ererimbot emi. Mɔdiɔŋ mbufo nte ekɔri ke mbuɔtidem mbufo ke Jesus Christ ndien etim ekpep nte enyenede odudu Esie. Mɔdiɔŋ mbufo nte efiɔk akpanikɔ ye nsu. Mɔdiɔŋ mbufo nte ekere ebaŋa mme ŋkpɔ Abasi ekan nte ekerede ebaŋa mme ŋkpɔ ererimbot emi. Mɔdiɔŋ mbufo nte ekut mme mfina mbon emi edude ye mbufo enyuŋ esɔŋɔ mbon emi mbufo emade. Koro Jesus Christ ama akan ererimbot emi, mbufo ŋko emekeme ndikan. Ami ntiŋ ikɔ ntiense emi ke edisana enying Jesus Christ, amen.