Pigpig
Ngad rrin’ed ni woed rogon nira rrin’ fare Somoel, ni rib’ gaa’ ngak e pi’in ni be thamey pigpig ni ngad ayuweg ngak’.
Pi walageg, pi tafagar, kamagargad ni kam bad ko general conference!
Tomuren fare general conference ko October, Sister Gong nge gag kug warow ulan e Conference Center ni kug gog e mogethin nge rung’ag e tin ku gospel romed.
Members u Mexico kar yoeged, “Hoy es el tiempo de Mexico.”
Kug filew Gilly nge Mary yow e fagar ko England. Napan ni un Mary ko Galasia, ke malog e na’un rok’. Gilly nike pinning Mary ni nge yib nge par ngak. Be sug ko mich, Gilly keyog, “Dabgu maerwaeraen’ me paer ngog Somoel.” Ko conference, Gilly nike mada’ nag fare missionary ni ppin ni ke machib ngak 47 duw kafram.
Jeff nge le’engin, Melissa, kar un’ew general conference ko bin somm’on yay. Jeff nike gosgos ko baseball nifan e muruwel’ rok’ (ke mang a catcher) nge chiney ir e anesthesiologis ko togta. Nike yog ngog, “Gube balyangaen’, gube lemnag ninggu tawfe nag bachane gube nang ni e rogon ney ir e rogon nib fel’ ni nggu fas ufithik’ e yul’yul’.
Kafram, Melissa nike yog e sorok’ ngak e pumo’on ni kar thapeg e pigpig ngak Jeff, “Jeff dabun e maad nib wechwech’ ulan e na’un romow.” Biney e pumo’on keyog, “Baygu gay rogon kanawo’en.” Chiney yow be fagar nib mangil. U tawfe rok’ Jeff, kug mada’ e ulungi ko Gidii’en Got ko Tin Tomur e Rran ni Jeff, Melissa, nge fak’ nib ppin, Charlotte, niba t’ufeged.
Gadad pi gachalpen Yesus Kristus, ngad guyed rogon ni ngad pigpig ngak woed rogon Ir bachane e thilyeg e yafos.
Napan Peggy nike weliy ngog marunga’agen e figirngiy, John, tomur 31 e duw ko mabgol, ni ir ra tawfe nag, kug fith mang nike thilyeg.
Me ga’ar Peggy, “John nge gag kug filew ulan e Bin Be’ech e M’ag Moy, Mu Lekag, nge John nike fith ngog marunga’agen e machib rok e Galasia.”
Me ga’ar Peggy, “Rayag ni ngad pinning e pi missionary.”
Me ga’ar John, “Dariy’ e pi missionary—ma kemus ni fa’an e fagar rayog ni nge un.” U thilin 10 e duw, pumo’on nibe pigpig ngak John nike mang e fagar min tay e pagaen’ ngak. (Kug lemnag, Mang gara buch fa’an e pumo’on nibe pigpig ngak John ke taleg ni nge yib tomur ta’areb, l’agruw, fa mereb e pi duw?)
John nike motoyil. Nike bi’eg fare Babyor ku Mormon u fithik’ e yul’yul’. Napan e pi missionary kar pinning ngak John ni nge tawfe nag, nike yog arogon. Peggy e ga’ar, “ku mul nga but’ ko chiya rog nge tabab ko yoer.”
Me ga’ar John, “Kug thilyeg napan nikug chuchgur nag ngak fare Somoel.” Tomuren, John nge Peggy kar m’ag gow ulan e temple nib thothup. Fa binem e December kafram, John nike yim’ u duw rok’ ni 92. Me ga’ar Peggy, “John ir e bee’ nib fel’ ni gubin e ngiyal’, machane nike mang nib thil nib fel’ e rogon tomuren ni ke tawfe.”
Sister Gong nge gag kug mada’ gow Meb nge Jenny udakaen e video ufithik’ e m’ar ko COVID. (Kug mada’ bo’or e gidii’ udakaen e video napan bay e COVID, ni gubin iyib’ ngog udakaen e meybil rok’ e stake president.)
Meb nge Jenny kar yogew u fithik’ e gum’aen e magawon ulan e yafos rorow me fek e lemnag fa’anra rayog ni ngar thap e mabol ulan e temple rorow nge fa’anra rayog, urogon. Ya mich u Bayul rok’ Yesus Kristus rorow nge micheg rorow ko pi gam’ing ra ayuwegrow.
Mu lemnag e falfalaen’ rog napan Meb nge Jenny kar thapegew bi’ech e recommend ko temple nge sul bayay uta’abong nga e nu’un rok’ Somoel. Meb e chuchugur ni yim’. Ni rib fel’ e tawa’ath rok’ Meb nge Jenny bachane ni kar fulweg e tha’ u dakaen e micheg ngak e Somoel nge ngorow nge thamey e t’uf ko pigpig u langab gow.
Demtrug ni nggu waen, Kug fil ngak e pi’in nibe pigpig nge t’uf woed e Somoel.
U Peru, Sister Gong nge gag kug mada’ Salvador nge pi walagen.1 Salvador nge pi walagen ni ke yim’ e gallabthir roraed. Fare rran nikan gargel nag Salvador. Pi tiyugang’ ko Galasia nge pi chongin nima pigpig ngak nima pii’ athamgil ngog. “Tiluw nib machalbog … irrary, Pi gidii’ roraed ni ke yim’ e pi chitamangraed nge pi’in ni kanim’ roraed,”2 “ayuweged e pi’in nib mo’owaer, chiby ngalang e pi’in niba kirebaen’, … gelnag e ay ndariy’ e gelngin.”3
Ulan e Hong Kong, e elders quorum president nike weliy urogon e ulungi nima thapeg 100-pacent mo’olung ko ministering. “Gamad ma meybil napan ni ngad yarmiy en ni gamew ko pigpig arfan gubin e bee’ rayog ni nge ayuweg reb e bee’ nge thapeg e ayuw,” nikeyog. “Gamad ma fith gubin ni gamew ko pigpig nifan e gidii’ nira’ pigpig ngak. Dabgu yoloy ulan e check box; gamad ma pigpig ngak e cha’an ni ma pigpig ngak e gidii’.”
U Kinshasa, Democratic Republic ko Congo, President Bokolo me weliy urogon Ir nge tabinaw rok’ nike un’ed e Galasia u France. Ta’areb e rran, napan ni ke bi’eg e ta’awath ko patriarchal, fare Ya’el nike pii’ a thogthog ngak Brother Bokolo nge tabinaw rok ni ngar sulgad nga DR Congo. Brother Bokolo ke nang nira yib bo’or e pi magawon fa’anra ni ra sul. Nga galasia rorad, Fare Galasia ku Yesus Kristus ni Fan ko Gidii’en Got ko Tin Tomur e Rran, dawo’ ni nge yib nga Kinshasa.
Machane, ulan e mich, woed bo’or i yaed, fare Bokolos ni kar folgad ko Thothup rok Somoel. Ulan Kinshasa, ni kar pigpig nge yibliy ngak e pi’in chuchugur nigem, gelnag fapi magawon, thapeg e tawa’ath nib ya’el nge fayleng. Daba’, yadma falfalaen’gad ni bay e na’un rok’ Somoel ulan e nam rorad.4
Cha’an nike michaen’ ke thapeg e pigpig udakaen e rogon rok’ e bee’. Nap’an ke pagal, ke ga’ar ke paer ulan e yan’. Ta’areb e rran, nike yoeg, “Kug guy e ppin nib fel’ ya’an ulan e maad ko noeng nib fel’.” Ke balyangan, nike yaen ngak ni nge fith mangfan e ppin nib fel’ ya’an ra chuw e maad ko noeng nib fel’. Ir e chongin ko Fare Galasia ku Yesus Kristus ni Fan ko Gidiiʼen Got ko Tin Tomur e Rran nge fith ngak ufithik’ e sminmin, “Gaba’ adag ni ngam yib nga misa u Madnam?” Ke yog arrogon.
Bo’or e duw faram, napan ni gamow bay reb e muruwel u ta’abang, Elder L. Tom Perry nike weliy urogon ir nge fagar rok’ ni kar pigpig ngak e ppin nike paer kemus ir ulan e binaw nib kireb u Boston. Napan Elder Perry nge fagar rok nikar yib, fare ppin ma weliy ngorow, “Mu tay e recommend ko temple u taan e mab.” Kemus napan ni ke guy e recommend ko temple irma pag e lock nge bing e mab.5 Riyul, dabgu yog e cha’ nima pigpig thigari thapeg e recommend ko temple. Machane gube’adag e tafney napan nira thapeg e micheg ko pigpig, pi na’un ra pag e look nge bing e gum’ircha’ey.
Elder Perry nike pii’ reb e ayuw. Ke ga’ar, “Pii’ ngak pi cha’ney e pigpig nib fel’ rogon, mel’eg ufithik e meybil, mel’eg e gidii’ nibe paer chuchugur ngoraed.” Ra mulwol nag, “Tabab ko e pi’in ni bat’uf ayuw nib gel roraed. Tomuren mu lemnag marunga’agen e pi’in nima thapeg nge ba’adag e mo’olung.” Ke tal’ ni, “Ul’ul’ ko yul’ul’ ni gubin ngiyal’ ema fek e ma’ang’ang i yib.”
Pigpig nib tolang nib thothup6 nira yib napan ni gadad ra meybil nifan “fare t’ufeg rok’ Kristus nib machalbog”7 nge fol e Kan Thothup. Ni ra yib napan pi presidency ko elders quorum nge Relief Society, u tan pa’ e fanow rok bisof, ma guy gubin e ngongol ko pigpig, ni tay e bu’un mel’eg en ni gamew ko pigpig. Wenig ni ngam pii’ e pumo’on nge ppin nib fel’ yangren e rogon ni ngam fil’ed udakaen e muruwel rodad ko pigpig ngak fapi walagdad ni pumo’on nge ppin. Nge wenig ni ngam pii’ e rogon ko pumo’on nge ppin nib fel’ yangren ni ra pii’ athamgil ngorad.
Ulan boch e tafen ko Galasia, bay e magawon ko pigpig. Bo’or nibe yog ni kar pigpig ngak machane dar thapeg e pigpig. Da bin t’uf e magawon ko checklist. Machane thingarda rrin’ed bo’or nge ngathi kemus moeg e “Rayag ni nggu ayuwegnem?” ko gin ni yima tay e karo riy. U bo’or e tafen, rayog ni ngad non ngak, nanged marunga’raed, nge fal’eg e tha’ napan ni ngad mada’ e chongin ulan e na’un rorad. Pinning ko thogthog nira thilyeg e yafos. Napan e pinning nira ayuwegdad ni gadad ra ngongliy ma gadad cha’ariy e pi m’ag rok nib thothup, gadad ma yib chuchugur ngak somoel nge ngodad.
Ba ga’ar e pi’in ni ma nang e tin riyul’ nifan e pigpig ni ra rin’ bo’or, nge pi’in dabi nanged ma rin’ buch’uw. Gadad be rin’ed bo’or, woed e Tathapegdad. Woed ba ga’ar e tang nib thothup, ireray “e tawa’ath riy ko murwel nge tu’ufeg.”8
Councel ko ward, elders quorum, nge Relief Society, wenig ni ngam rungan’ e Tagafaliy e gamanman nib mangil nge ayuwegen “pir’eg e pi’nen ni kar malog, … sulyarmen e pi’nen nike yaen, … fal’eg e pi’nen ni ke kireb nag, … gelnag e pi’nen ni ka m’ar.”9 Gadad ma ayuweg e “pi angel ni ba miith”10 napan ni ngad fal’eg e tagil ulan e tafen e milekag nifan gubin e gidii’.11
Pigpig nib thogthog nima yibliy nag e tabinaw nge yigo’ bee’; ma gelnag e pi ward nge branch. Mu lemnag e ward fa branch rom ir woed e tafen ko tin nib thothup. Ulan fare Babyor ku Mormon bay marunga’agen e gak’iy ni olive, Somoel ko farengi mileay’ nge pi tapigpig ni kar thapeg e wa’amngin nge gelnag urngin e gak’iy napan ni kar puthuy e gelngin nge mo’owar rorad ko gubin e pi gak’iy.12 Somoel ko farengi mileay’ nge pi tapigpig rok’ nike fith bo’or ni, “Gur kabay ban’en ni gu pag nda gu rin’ ngay?”13 Uta’abong, kar yibliy nag e gum’ircha’ nge pi na’un, pi ward nge branch, udakaen e pigpig nib thothup nibe rin’ bo’or.14
Pigpig—tagafaliy e saaf nag—nira fal’eg e mileay’ rodad “ni ta’areb”15—e mileay’ nib thothup. Urngin e gak’iy ulan e mileay’ rodad ir e tabinaw. Pi chubchub nge paa’ nibe puthuy uta’abong. Pigpig nima yibliynag e mfen nga m’on. Napan bat’uf e pigpig, fapi bisof nib ganop rok’, pi presidencies ko eldes quorum nge Relief Society nibe fith, “Mini’ e en ni gamew ko pigpig ko pumo’on nge bpin?” Pi ward council nge interview ko pigpig dabi fith kemus marunga’agen e pi magawon machane be sapgad ni ngar pir’eged nge falfalaen’ gad nifan e pi murnguy rok’ Somoel nib yo’or ulan e yafos rodad napan ni ngad pigpig ni woed Ir.
Tathapeg rodaed e ir fare wo’en nib polo’.16 Bachane Ir nib fel’, rayog ni nge rin’ e pi’nen nib mangil.17 Irma yibliynag ni ta’areb nge fare 99. Ir e susun nib fel’ ko pigpig. Gadad ra manged boed Yesus Kristus napan ni ngad “rin’ed … e pin’ey ni fan ngak bagayad e pi cha’ney” woed ni ngad rin’ed Ngak,18 napan ni ngad t’ufeg e cha’ ni bugul yoror rok’ ni boed ir,19 napan ni “rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed,“20 nge napan “ba’adag bigimed ni nge mang ir e ba tolang, ma ir e thangri mang tapigpig romed ni gimed gubin.”21
Yesus Kristus e ba pigpig. Pi angel nibe pigpig.22 Pi’in ni ma fol Yesus Kristus ma “pigpig rorad ngorad,”23 “mu uned ko felfelan’ ngak e pi’in kar felfelan’gad, mi gimed un ko meyor ngak e pi’in yad be yor,”24 “mu sap ngak [nge] … ayuweg [e gidii’] nifan e pi’nen nib mangil,”25 “mu puguran … fare gidii’ ma gafgow nge t’uf e ayuw, pi’in nib m’ar nge pi’in nibe gafgow ko amith,”26 mu dag e Fithingan ufithik e pigpig rodad.27 Napan ni ngad pigpig woed Ir, rangad pir’eged e pi ma’ang’ang rok, nge pi tawa’ath rok’.28 Gadad be thapeged “ni rib’ fel’ rogon e machib.”29
Gadad ra magaf gad. Machane u lan e pigpig Rok’ gadad dabi “magaf nifan e pigpig nib mangil.”30 Gadad ma guyed rogon e rayog rodad, dabda mil nib papay fa’an dakiry e gelngin,31 machane pagaen’, woed Apostle Paul ni machib nag, ni “Got e ba t’uf rok e en nma pi’ ban’en u fithik’ e felfelan’.”32 Ere Got ni’ir “nma pi’ e awoch ngak e cha’ nma wereg e awoch u milay’ nge ggan ni nge kay e ku bayi pi’ ngomed urngin e awoch ni nge yag ngomed me muruwliy nge tugul.”33 Ara nga noeg, Got nima ga’ nag “urngin e tin ni bay romed.”34 Pi’in “nra yung e awoch ni pire’ e pire’ e n’en nrayag riy ngak.”35
Demtrug e gin ni gadaed bay riy ko Easter, rayog ni ngad ayuweg nge t’uf ni woed e Somoel, ni rib’ gaa’ e pi’in ni be thamey pigpig ni ngad ayuweg ngak’. Napan ni ngad rin’ed, gadad ma chuchugur Ngak nge ngodad, nira manged woed Ir nge pi Gidii’en Got ko Tin Tomur e Rran Ir ba’adag nira bagdaed manged. U dakean fithngan nib thothup, Yesus Kristus, amen.