Pire’eg e Gapas Nifan Ngom
Gube meybil ni ngeyag ni ngam pire’eg e gapas, mag ayuweg boech e gidii’ ni ngar pire’egned, min ul’ul’ ni ngan rrin’ ni arram rogon.
Pi walageg nib tu’uf rog, kan tawa’ath nagdaed ko tin nikan machib nag nge fapi musik ni rib fel’ nikan tay ko biney e general conference ni’ir e somm’on. Kammagar nikam mub daba’ nge mich romed.
Daba’ e gura weliy mornga’agen e ma’ang’ang ko thapeg e gapas nifan ngom, ni demuturug rogon e n’en nibe buchbuch rodaed. Tathapeg e manang ni gubin pifak e Chitamangdaed nibay u Tharmiy e ba’adag e gapas, make yoeg ni rayag nira pii’ ngodaed. Kaga manang fapi thin rok’ Yesus Kristus ngalan e babyor ku John: “Nggu tay e gapas nge par romed, nggu pi’ e gapas rog ngomed dab gu pi’ ngomed ni bod rogon nma rin’ e girdi’ nu fayleng. Dabi magafan’med ma dabi wagagey lanin’med, ma dab mu tamdaggad.”1
N’en nibe yipfan ni mornga’agen e gapas nge rogon ni rayag ni nge dag e be yean u rogon e gidii’ nike rung’ag e pi thin nem nike yoeg. Motoyil ko mornga’agen nibay ulan e John ko rogon e machib rok’ Kristus. Gelngin mo’oniyean’ ni yib nga dakean nib alamrin niku de n’uw napan maki yib nga dakean fapi gachalepen.
Ba’aray e fapi thin rok’ fare Tathapeg:
“Fa’an gu ra t’uf romed, ma gimed ra fol ko tin kug ta’chiylen ngomed.
“Bay gu wenig ngak e en ni Chitamangiy, nge pi’ yug reb e Taayuw ngomed, ni bayi par romed ndariy n’umngin nap’an;
“Ir fare Kan ni Thothup; ma girdi’ nu fayleng e dabiyag ni nge yag ngorad, ya dabiyag ni ngar guyed ara ra nanged ir: machane gimed e gimed manang ir; ni bochan e bayi par romed ngi i par u fithik’med.
“Dab gu pagmed ngam pired ni go’ gimed: ya bay kug sul ngomed.
“Dabki n’uw nap’an ma dabki guyeg e girdi’ nu fayleng” machane gimed e bay mu guyed gag: bay gu par ni gub fos, ere ku er rogomed ni bay kum pired ni gimed ba fos.
“Bayi taw ko chirofen nem, ma bay mu nanged ni gu bay u fithik’ e Chitamag, ma gimed bay u fithik’ag, ni bod rogog ni gu bay u fithik’med.
“En nra fel’ u wan’ e tin kug ta’chiylen ngomed me fol riy, e ireram e cha’ ni gub t’uf rok: Chitamag e ra t’ufeg e cha’ ni gub t’uf rok; ma ku er rogog ni ra t’uf rog mu gguy rogon nge nangeg.
“Me ga’ar Judas, ni gathi Judas Iskariot, Somol, uw rogon ni ngam guy rogon nggu nanged gur ma dabi nangem e girdi’ nu fayleng?
“Me fulweg Jesus ngak ni ga’ar, en ni gub t’uf rok e ra fol ko thin rog: ra t’uf rok e Chitamag, ma Chitamag nge gag e gamow ra yib ngak nggu pirew rok.
“Ma en nda gu t’uf rok e der ma fol ko thin rog: fapi thin ni kug weliy ngomed kam rung’aged e gathi thin rog, ya yib rok e en ni Chitamangiy, ni ir e ke l’oegeg ku gub.
“Kugog ngomed e re bugithin ney ko ngiyal’ ni kug bay romed.
“Ma en ni bay i ayuwegmed e aram fare Kan Nthothup ni en ni Chitamangiy e bayi l’oeg nge yib ni owcheg, ma bayi fil urngin ban’en ngomed, me ayuwegmed nge mit ngomed urngin e tin kug weliy ngomed.
“Nggu tay e gapas nge par romed, nggu pi’ e gapas rog ngomed: dab gu pi’ ngomed ni bod rogon nma pi’ e girdi’ nu fayleng. Dabi magafan’med ma dabi wagagey lanin’med, ma dab mu tamdaggad.”2
Laal e tin nib riyul’ ni kug fil ko mornga’agen biney ko machib rok’ fare Tathapeg.
Bin somm’on, fare tawa’ath ko gapas e yima pii’ u tomuren e mich rodaed ni ngad fol gaed ko fapi motochiyel rok’. Pi’in ni yaed gidii’en e Galasia rok’ Somoel nike mu’ i ngongliy e m’ag rok’, fare fol e irerram fare n’en nikad micheged ni gadaedra rrin’.
Bin l’agruw, fare Kan ni Thothup era yib nge par rodaed. Somoel e yoeg ni fa’an gadaedra ul’ul’ ko yul’yul’, ma fare Kan ni Thothup era par rodaed. Irerram fare micheg nibay ko fare meybil ko sakrament ni fare Thothup era mang e tafagar rodaed ni gadaedra thamiy, ulan gum’ircha’endaed nge tafney rodaed, mara pii’ e gapas.
Bin dalip, fare Tathapeg e micheg ni fa’an gadaedra koled fapi m’ag, ma rayag ni gadedra thamiyed e t’ufeg rok’ e Chitamangiy nge fare Fak nge fan ngodaed. Rayag ni gadaedra thamiy ni yow ba chuchugur ngodaed ulan e biney e yafos, ni woed rogon ni yira tawa’ath nagdaed ni ngad pired rorow ni manemus.
Bin aningeg, kol folen fapi motochiyel rok’ Somoel e gathi kemus ni ngam fol. Ya thingari t’uf Got ulan gumircha’en daed, gelngin daed, laniyaen’ daed, nge gelngidaed.3
Pi’in ni dani t’uf Got u wun’raed e darma kol folen e motochiyel rok’. Ni arame dabiyag ngoraed fare tawa’ath ko gapas ulan e biney e yafos nge bin migid e yafos.
Bin ni laal, rib magagiyel ni ri gadaed ba t’uf rok’ Got ya ke pii’ pilwon fapi denen rodaed ni ngeyag—u dakean e mich rodaed ngak nge kalngaen’ rodaed, ufithik’ e rogon ko Bayul Rok’—ni ngaed thapaged fare tawa’ath “fan e ra yororiy gum’ircha’med nge tafinay romed,”4ulan e biney e yafos nge yafos ni manemus.
Boech i gimed, fa bay ni bo’or i gimed, e bay ni dar thamiy fare gapas nike micheg Somoel. Sana bay nikam mu’ i meybil nag e gapas nifan ngom nge gapas ko thothup. Ma bay nikam tafney nag ni dar rung’ag e tharmiy e tin ni gabe wenig nag nifan ko gapas.
Bay e to’ogor rom ni dabun, nge pi’in ni rib t’uf rom ni ngam pire’egned e gapas. Ya dabiyag ni nge thapeg e biney. Be muruwel ni nge talagnem ni dabiyag ni ngam pire’eg e biney e gapas nike ngongliy fare Tathapeg nge Chitamangiy nu Tharmiy ni ngam thapeg.
Muruwel rok’ Mo’oniyan’ ni nge ul’ul’ nag e fananikan nge me’elegthin e be liyegdaed nike yo’or. Gadaed be guy e pow riy nibe buchbuch ko naam nge flock, ulan e binaew, ko media, nge ga’angin yang u dakean e fayleng.
Machane bay fan ni rayag ni nge falfalaen’daed: fare Tomilang ku Kristus nira reb e bitir nikan gargeleg ma bay rok’ ere tomilang ney. Ko biney e tawa’ath nikan pii’ nira bee’ ma bay rok’ e arram rogon ni yaedra nang e tin nib mat’aw, fare adag ni ngan t’ufeg maki t’ufegnem e gidii’. Ra bee’ nikan gargeleg ma bay e thamtham rok’ ko tin nib justice nge tin nib riyul’ nira reb pifak’ Got ma bay e biney rok’ ko napan ni yib nga fayleng.
Rogon nrayag e gapas nifan ngom nge fan e pi bitir ney e be yaen u rogon e pi’in nibe chathowoliy. Fa’anra pi’in ni yaed be chuwathily e pi bitir ney nge pigpig ngoraed e kar gayed rogon i thapeg ere tawa’ath ney ko gapas nibe yib rok’ fare Tathapeg, ma yaedra, gay rogon, ni ngar pii’ed e athamgil ko mich rok’ fare tir ni nge thapeg e biney e tawa’ath ko gapas.
Irerram e pi n’en nike micheg fapi chep nib thothup, “Chathowoliy ea bitir u lan wo’en ni thingari yaen u dakean: ma ra ilal, ma dabi chuw riy.”5 Kemus ni biney e rib tu’uf ngay ni nge ayuweg me chathowiliy fare tir ni nge thapeg fare tawa’ath ko gapas.
Kirbaen’uy, e tin ba’aray e bitir nike chugliy e galibithr nib mangil—fa kemus ni ta’areb e galibthir ni chugliy—nike me’eleg, tomuren bay e yafos ko mich nge gapas, me duugliy ni nge yean ko kanawo’en e kirbaen’.
Demuturug ni fa’anra buch e biney nibe kirbaen’uy ngay, ma tafney rog e kabay nga reb e tawa’ath rok’ Somoel. Ireray: Ir ma chathowiliy bo’or e pi’in yaed ma awnag e gapas ufithik’ e gachelpen niba pagan’ug ngak’. Kar thamiyed fare gapas nge fare t’ufeg rok’ Got. Bay fare Kan ni Thothup ulan gum’ircha’enraed, ma Somoel e rayag ni nge powi’iyraed ko gidii’ ni dawi thap e biney ngoraed.
Ku guy e biney ulan e yafos rog nge dakean e fayleng. Kam guy e biney. Bochingiyal’, ni yira powi’iyem ni ngan ayuwegnem, ma woed ni woed ya’an banan ni dani tafney nag nira buch.
Kafram, nigu fith ngak be’ ni fani gu mada’ nag ko milekag rog, “Moeg ngog mornga’agen buchu’uw e tabinaew rom?” Sabathin romow e powi’iyeg nigu fith ni ngguy e sassing ni ya’an e bin ilaal i fak ni bpin, baya e magawon rok’. Kug lemnag bay e tin nib mangil ko oewchen e ppin ulan e sassing nem. Kug thamiy ni ba tu’uf ni nggu fith e email address rok’. Ngiyal’ ney ma re bpin nem e be malbach nge nibe tafney nag ko bay e mulwol ku Got nifan ngak. Bay. Ba’aray e biney e mulwol: “Gab t’uf rok’ Somoel. Gubin ngiyal’ ma gab t’uf rok’. Somoel e ba’dag ni ngam sul ngak. Fapi tawa’ath nikan micheg nag ngom e kabay u tigil’.”
Gidii’ ko Galasia e kar thamiyed e biney e tawa’ath nibe yib rok’ Somoel nifan e gapas nifan ngom. Be pii’ e athamgil ngodaed ni ngaed ayuweged boech e gidii’ ni ngar bad ngak ni ngar thapagned e biney e gapas nifan ngoraed. Ma arram, ni, yaed e ngar me’eleged ni ngar thapaged fapi yi’iy ko rogon ni ngar pii’ed e biney e tawa’ath ngak boch e gidii’.
Biney e mfen nibe ilaal i yean era chadowoliy e tin ni migid e mfen ni bay yib u tomuren. Ma urngin nira buch riy era fal’ag wo’en e ma’ang’ang. Mara ilaal nge garar, ma fare tofen Somoel u fayleng era fal’ag rogonraed ni ngar mada’ niged ni yaedra tolul ni yaed be og nag e sorok’ ngak. Mara yib e gapas nga fayleng.
Ri gube micheg nibay fare Tathapeg nib fos ni’ir e bay nibe gagiyeg nag e Galasia Rok’. Kug thamiy e t’ufeg rok’ ulan e yafos rog nge t’ufeg rok’ ngak urngin pifak e Chitamangiy nu Tharmiy. Pong rok’ Somoel ni ngan yib ngak e ire fare mulwol ko gapas.
President Russell M. Nelson e ire fare profet rok’ Got nibay nib fos u dakean e feylang. Ke yoeg, “Gube micheg nag ngom ni demuturug e n’en nibe buchbuch u fayleng fa tin nibe bucbuch rom, ya rayag ni ngam sap nga mm’on ko falfalaen’ nib pasig u wun’um.”6
Ri gamed ba t’uf rog. Mich rom ni rib gel nge t’ufeg rom e be thap ko gidii’ nibe yag ni Somoel e be pilyeg gum’richa’ey ni ngan adag ni ngkun pii’ boech e pi tawa’ath ney ko gapas ngak e gidii’ ni gubin.
Gube meybil ni ngeyag ni ngam pire’eg e gapas, mag ayuweg boech e gidii’ ni ngar pire’egned, min ul’ul’ ni ngan rrin’ ni arram rogon. Ma arram nirayag biyu’ e duw ko gapas napan ni bayib Somoel biyay. Gube micheg ulan e falfalaen’ nge u dakean fithngan Yesus Kristus, amen.