Tay u Wun’um e Tin Nth’abi Ga’fan

Keb rok President M. Russell Ballard

President e chiney ko fare Ulung ko fa Ragag Nge L’agruw i Apostles.

Kug fil e tin nth’abi ga’fan e fare tha’ rodaed ngak e Chitamangindaed nu Tharmiy nge fare Fak nib t’uf rok’, tabinaew rodaed, bugiliyiror rodaed, nge fare Thothup ni nge powi’iydaed.

Napan ni gadaed be tafney nag fare madnom rok’ fare Tathapeg ni yib ngalan yu Jerusalem u m’on nin kuruth nag, ma be yib ko tafney rog fapi thin rok’ ko athap nge gapas: “I gag owchen e fos ko yam’ nge yafos. Yigu ra ke yim’ be’ ni gub mich u wan’ mra fos; ma en nra i par nib fos ni gub mich u wan’ e dabki yim’ bi’id. Ke mich u wun’um e re bugithin ney fa dawor.”¹

Rib t’uf rog. Michuwun’ug ngak’. Gube micheg ni’ir e fare Foskoyam’ nge fare Yafos.

Biney e mich e ke pii’ e gapas ngog make ayuwegneg ko re aningeg i duw ni ba’aray nike thumur ko napan ni yim’ le’ngig, Barbara. Kug tawreng nag.

Bo’or ngiyal’, ni guma tafney nag e mabgol romow ni dariy bi’id memus nge yafos romow u ta’abang.

Ku mu’ i weliy mornga’agen rogon ko som’on riy ni gu mada’ nag Barbara nge rogon ni fil e biney ngog ni ngu “sul nggu nangfan salpen” ni ban’eni nigu fil mornga’agen ko mission rog. Gu sul nggu nangfan salpen u tomuren ni gu mada’ nag ko som’on ya riba’ ni rib pidorang, ma bo’or e gidii’ ni manang, ma be’ nib sug e calendar rok’ ko gidii’ ni nge guy ni tafagar. Fan ni rigu ba’adag ni bachan e be’ nib moem ni ngan non ngak. Ri guba’adag ni bachan e be’ ni rib fel’ gum’ircha’en. Ku thamiy ni gamowra mabgol. Rogon e tafney rog e ba moem e ran’ey.

I gag nge Barbara e ug date gow, ma aram ni tha’ romow ngomow e ga’ i yean, machane marwar e tafney rok’ ngog ko nge figirngiyeg fa dangay.

Gathi gag e ba t’uf ngog ni nggu nang; ya Barbara e ba t’uf ni nge nang rok’ nifan ngak. Gu manang ni fa’anra gamowra meybil ma gamow balaynag e abich romow ko mornga’agen e biney, ma rayag nira thapeg Barbara e mich riy nira yib u tharmiy.

Duugliyew reb e rran ngay ni dab guyew mow ni ngeyag ni nggu meybil gow ma gamow balay nag e abich romow ni ngeyag ni nggu ningew e biney. Kan tawa’ath nigeg, ni n’en nike thapeg e ta’areb rogon ko n’en ni kug thamiy. Ma oren mornga’agen, ni woed rogon ni yima yoeg, e bugi ban’en ni kakrom.

Napan ni yim’ Barbara, ma pifak mow era ted fare malang ni bay in e thin riy ni ba’adag ni nge par u waen’ pifakmow. Reb e pi machib nem “tay u wun’um e tin nth’abi ga’fan era par nib n’uw napan.”

Daba’ e nggu weliy e ban’en nibay u gum’ircha’eg nge tafney rogon ko tin ni th’abi ga’fan.

Bin som’on, tha’ rodaed ngak e Chitamangdaed nibay u Tharmiy nge Fak, Somoel Yesus Kristus, e rib ga’fan. Biney e tha’ e rib ga’fan e chiney nge ngiyal’ ni manemus.

Bin l’agruw, fare tha’ ulan e tabinaew e bay u fithik’ e pin’ey ni rib ga’fan.

Napan e ngiyal’ e pigpig rog, ku mada’ nag e gidii’ ni bo’or nike gafgow ko tin nibe buchbuch u fayleng. Oren ni yead, e ke mak’iy, make sug ko murus. Ba tu’uf e taflay roraed, ggan, nge nu’un ni ngar pired riy.

Ma kab tu’uf e tabinaew roraed.

Gu manang ni bay boech i yaed ni dariy e gidii’ ko tabinaew nib chugur ngoraed, ere ku uneg e gidii’ ko tabinaew ngay, ko tafagar, nge “tabinaew” ko ward. Tiney e tha’ e rib ga’fan ngodaed ko tin i gadaed be thamiy nge dogur rodaed.

Tiney e tha’ e krayag ni nge bing wo’en e t’ufeg, falfalaen’, nge bang ni gabe thamiy ni woed e tabinaew.

Chuwathiliy e tiney e tha’ ni rib ga’fan e ban’en ni gur rom e ngam me’eleg. Me’eleg ni ngan mang biyang ko fare tabinaew era tu’uf e tin ba’aray riy, t’ufeg, gamaen’, gopuruy’, nge min’aegfan.² Ba e ngiyal’ napan ni ga ba lem nag tin nib thil ko bee’, machane dam mu chingching. Mabgol nge gamew be’ nib fel’ e thin romew, e gathi gadaed ma adag fa mul e adag rodaed ni woed rogon ni yibe mithmitheg fapi chessboard. Kad me’eleged e adag ni ngad pi’ed e ayuw ngodaed. Ka gadad ma rrin’ ni ta’areb rogon ko tha’ ko tabinaew nge tafagar ni woed be’ ko tabinaew rodaed.

Fare bugithin nifan e tabinaew e ga’ar “fare gonop ko falfalaen’ nib thothup e ke fal’ag rogon e tha’ ko tabinaew ni nge ul’ul’ u tomuren e yam’. Fapi m’ag nge gam’ing nib thothup e bay ulan fapi temple nib thothup nrayag ni nge ayuweg facha’ ni nge sul ko gin bay Got riy nge tabinaew ni nge sul nga ta’abang ni manechubog.”³

Reb e ban’en ni th’abi ga’fan nima folgad e tin nibe thogthog nag fare Thothup ko fapi tha’ ni rin ga’fan ngodaed nge rogon ni yibe gay rogon ni ngar ayuweg e bugiliyiror rodaed, nib mu’un e pigpig rodaed ngay ko tin ni yibe guy nge tin nib mith mornga’agen. Gu nang e biney ko napan ni ug pigpig ni gag reb e bishop.

Reb e nap ngay ni rib gel e garbeb, nike blayal’ nibe aw e snow, ni ku chuw ko office rog me yib ba thamtham ngog ni rib gel ni nggu waen nggu nang salpen reb e pulibthir nima par ulan e ward rog. Kug sap ko klok rog—make 10 p.m. Ere tafney rog e ke n’uw e nap ni ngu waen nggu nangfan salpen. Ma kub chagil ngay, nibe aw e snow. Ere gu duugliy ni bay fani kadbul riy mugu wean nggu nangfan salpen ma dabku pug ya ke n’uw e nap. Gu waen nga tabinaew nggu mol ma dar mol orag ya fare Thothop e bay nibe pinningeg.

Ere kadbul riy, mu gu wean ko fare tabinaew rok’ fare labthir. Fak ni bpin e yibi bing e mab nib sug e luu’ u owchen me ga’ar, “Oh, Bishof, kamagar ni kamub. Ke yim’ nina l’agruw e awa’—kug kireeban’. Ri dabgu pagtiling e n’en ni thamiy gum’ircha’eg. Kug yoer. Mini’ e bay nib ga’fan ngak ere labthir ney ni dariy figirngin ni nge yib e bishof rok’ nge kol paa’, pii’ e gapas ngak, ma sana rayag ni ke pii’ reb e meybil nifan? Ke thumur e biney ni susun ni rayag ni nggu rrin’ ni bachan e danug motoyil ko fare Thothup.⁴

Pi walageg, gidii’ ni fal’yangren e pumo’on nge bpin, nge bitir ko Primary, gube micheg ni leak wo’en e tin nibe thogthog nag e Thothup e reb fapi n’en ni rib ga’fan ko fapi tha’ rodaed.

Bin tomur ngay, ko biney e wikind ko Palm Sunday, gube micheg ni un ngak Somoel, weliy e mich nib michuwun’uy ngak, nge pigpig ngak e boech fapi n’en nth’abi ga’fan.

Mich ngak Yesus Kristus e bin somm’on e kenggin e yalen ko mich rodaed. Mich e ba micheg fa ba pow ni kabi m’ug ko tin nib riyul’ nib manechubog nike yib ngalan gum’ircha’endaed nge ya’el rodaed u dakean fare Kan ni Thothup. Mich ngak Yesus Kristus, gargelag ngay ma be yib gelngin u dakean fare Thothup, era thilyeg e yafos—ra thilyeg rogon ni gadaed me leam nge rogon ni gadaed be par. Mich e ma fekdaed ngak e Chitamangdaed nu Tharmiy nge fare Fak nib thothup.

Ke fil Alma:

“Musap gaed, gube micheg ngomed ni gumnang ni pinnʼey niʼir e kug weliy ngomed e riyulʼ. Damur lemniged me gagrog ma gumnang e pinnʼey?

“Musap gaed, gube yoeg ngomed ni kan gagyeg nag ngog ni nggu nang u dakean fare Kan ni Thothup rokʼ Got. Musap gaed, kug baley nag e abich rog ma kug meybil nib yoʼor e rran ni gomanga yog nug nang e pinnʼey. Ere chiney e gagrog ma gumnang ni yaed ba riyulʼ; ya fare Somoel ni Got e kedag ngog u dakean fare Kan ni Thothup rok’.”⁵

Dani gaman ni kemus ni fa’anra yibe taga’ ko fare mich. Napan nira ul’ul’ ni gadaed be nang Yesus Kristus, ma ra mom ngodaed ni ngaed weliyed e mich ni mornga’agen—fal’ngin, t’ufeg, nge tin nib gol riy.

Bochingiyal’ ko fare Madnom ni yibe balay nag e abich, ma gadaed ma rung’ag bugithin ni “Rib falfalaen’ug ngay” nge “ri gu ba’adag” ni bo’or yay ni gadaed be rung’ag ko bin ba’aray ni be ga’ar “gu manang” nge “michuwun’ug gay.”

Gube piningmed ni ngam weliyed e mich romed ku Yesus Kristus ni gubin ngiyal’. Weliyed e mich ko tin ni gamed manang me michuwun’um e tin ni gabe thamiy, gathi kemus ni tin ni nib falfalaen’um ngay. Micheg ko tin nike buch rom ko rogon nikam nang ma rin t’uf fare Tu’ufeg rom, rogon ni gabe fol ko fapi machib rok’, nge rogoon fare gelngin e bayul rok’ ni gabe thamiy ulan e yafos rom. Napan ni gara micheg e tin ni ga manang, michuwun’umnge tin ni gabe thamiy, ma fare Kan ni Thothup ere micheg e pin’ey ngak e pi’in ni ba’adag ni nge motoyil ko mich rom. Yaedra guy ni bachan e kar guyed rogon nikam mang reb gachalpen Yesus Kristus. Yaedra guy rogon ni ngan mang reb e pi gachalpen. Yaedra thamiy ban’en ni sana dawra thamiyed bi’id. Mich nib polo’ e ke yib ko gum’richa’ nike thil ma rayag ni nge yean u dakean fare Kan ni Thothup ngalan gum’ircha’en e pi’in ni ba’dag ni nge thapeg.

Pi’in nira thamiy ban’en ni bachan e mich rom e bay nira fith ngak Somoel ko meybil roraed ni ngan micheg e pin’ey nib riyul’ nike yib ko mich rom. Ma aram ni rayag ni ngar nanged nifan ngoraed.

Pi walageg, gube micheg e pin’ey ngom ni gu manang ni Yesus Kristus e ir fare Tathapeg nge Tababyul ko fayleng. Bay nib fos. I ir e fare Fak Got nike foskoyam’, ni irerray e Galasia rok’ nibe powi’iy fapi profet nge apostles rok’. Gube meybil nag ko napan nira taw ngay ni nggu chuw u roy u fayleng, ma gura rrin’ u fithik’ e mich rog ni rib gel rama’en nibe mat.

Napan e pigpig rog, ma ku fil e tin nth’abi ga’fan e fare tha’ rodaed ngak e Chitamangindaed nu Tharmiy nge fare Fak nib t’uf rok’, tabinaew rodaed, bugiliyiror rodaed, nge fare Thothup rok’ Somoel ni nge powi’iydaed ko fapi tha’ ni rayag ni nge ayuwegdaed ko micheg rodaed ko tin th’abi ga’fan. U dakean fithngan Yesus Kristus, amen.