13:26

“Ma bay Par ni ga Bay Rog, nge Gag Ngom; Ere Mu Paer Ngog”

Keb rok Elder David A. Bednar

Ko fare Ulung ko fare Ragag nge L’agruwi Apostle

Fare michmicheg rok’ fare Tathapeg nira par rodaed e ba riyul’ ma bay nifan e member nibe ayuweg fapi m’ag rok’ nifan e Galasia rok’ nikan sulweg yarmen.

Profet Enoch ni kaakroom, e weliy ulan fare Bin Kakrom e M’ag, fare Doctrine and Covenants, nge fare Pearl of Great price,¹ ni kubang ko fare toey tafan fare binaew ko Zion.

Fapi chep nib thothup ku Enoch nin pining ni nge pigpig e be yipfan ni “rung’ag ba lam ni yib u tharmiy, ni be ga’ar: Enoch, fakag, mu machib ngak e pi gidii’ ney, mag yag ngorad ni ngar—Kalngan’, … ya ke a’la’l gum’ircha’en rad, ma ke kireb tel rad, ma owchrad ni dabiyag ni ngar guyed ban’en nga orel.”²

“Ma napan ni ru’ngag Enoch e pi thin nem, me garbug nga but’ ko fayleng … me non ngak Somoel, nibe ga’ar: Mang ere n’en ni kam guy rog ni ri ga ba’adag, ya gag e kemus rogog aray, ma gubin e gidii’ ni dabun daken nag; ya gub sag’al ko numon; ere i gag e ta pigpig rok?”³

Wenig muguy ni ngiyal’ nem ni pining Enoch ni nge pigpig, me guy ni kachingiyal’ nem e bo’or ban’en ni dani nang rogon fa momaw’ ngak. Gube tafney nag ni gadaed gubin nikad thamiyed e biney ni woed Enoch ko ngiyal’ nikan pii’ reb e pigpig ngodaed nifan e Galasia. Machane rib michuwun’ug ngak ni fulweg rok’ Somoel ngak e duwer rok’ Enoch e kabay nifan ngodaed e daba’.

“Ma fare Somoel e gaʼar ngakʼ Enoch: Man ngam rrin’ ni woed rogon ni kug motohiyel nag ngom, ma dariy bee’ nira taleg nem. Bing lingam, ma bay ni suguy ko thin, ma bay gu pii’ ngom e thin ni ngam machib nag . …

“Bay i par e Thothup rog nga daken nem, gubin e thin rom e bay gu rrin’, ma bay mpar ni baga’ lungum ko fapi burey, ma fapi lul’ ni bay thil e gin nib sor ngay; ma bay par ni ga bay rog, nge gag ngom.”⁴

Enoch e mang reb e profet ni rib gel me mang e talin ko muruwel ni paa’ Got ni rrin’ boech e muruwel ni rib fel’, machane somm’on riy e dani tabab ko machin ni arogon! Ya, fin boech nga tomuren nin gel nag ko napan nike fil rogon ni nge leak wo’en fare Fak Got.

Ri gube meybil nag fare ayuw ko Kan ni Thothup ko napan ni gadaed be tafney nag fare mulwol ni pii’ Somoel ngak Enoch nifan ngom nge gag e daba’.

Thingar mu Par ni ga Bay Rog

Somoel Yesus Kristus e ke pining nira bagdaed me peth nag ir ngak.⁵ Machane uw rogon ni rayag ni ngad filed min nib ngan peth nigey ngak?

Fare bugithin ni paer e be yipfan ban’en nibe par u tigil’ fa ban’en ni dabi mithmith ma kuma athamgil nga mada’ ko tomur. Elder Jeffrey R. Holland e weliy ni fare bugithin ni “pageg” e kube yipfan ni “‘[ngan] par—machane [ngan] par ni dariy bi’id manimus.’ Iraram fare pigpig ko mulwol ko gospel nifan ngak … e gidii’ ni gubin… nge gubin yang u fayleng. Mub, machane mub ni ngam par. Mub nib michuwun’um ngay mag athamgil. Mub ngam par ni dabkum sul, nifan ngom nge fan e tin e mfen nibay yib u tomurem.”⁶ Ma arame, gadaed be par rok’ Kristus nib michuwun’daed ma gadaed ba gel ko pi n’en ni gadaed be rrin’ nifan fare Tabiyul nge fan nib thothup, ko nigyal’ ko tin nib fel’ nge tin nib kireb.⁷

Ma aram ni gadaed be pagdaed i un ngak Somoel ni gadaed be muruwel ko tin ni mat’wondaed ni ngan me’leg ni ngad feked fare muruwel rok’ nga dakeandaed⁸ u dakean fapi mʼag nge gamiʼing rokʼ ko fare gospel rokʼ nike sulyarmen. Fare tha’ ko m’ag ni bay rodaed ngak e Chitamangiy nu Tharmiy nge fare fak nike foskoyam’ e irreram fare gin nima yib e athap, gelngiy gapas, nge falfalaen’ riy; ma ki’ireram e gin nibay fare diyef riy nib gel⁹ ni susun ni irreram e gin ni ngad ted e yafos rodaed ngay.

Gadaed pagdaed ngak ni yibe ul’ul’ i gel nag e m’ag rodaed ngak fare Chitamangiy nge fare Fak. Woed e, meybil u fithik’ e yul’yul’ ngak e Chitamangiy nib manechubog u dakean fithingan fare Fak nib t’uf rok’ era gelnag e tha’ ko m’ag rodaed ngoraw.

Gadaedra pagdaed ngak ni gadaed be duruwʼiyed gadaed ko thin rokʼ Kristus. Fare machib rok’ fare Tathapeg e ma fekdaed, pifak, nge chuchugur nagdaed ngak¹⁰ mara yoeg ngodaed gubin ban’en ni ngad rrin’ed.¹¹

Gadaedra pagdaed ngak ni gadaed be un ko fare gam’ing ko sakrament, ni gadaed be tafney nag fapi m’ag nikad michmicheged, ma gadaed be kalngan’ u fithik’ e yul’yul’. Fek fare sakrament e ba mich ngak Got ni gadaed ba’adag ni ngad feked nga dakean daed fithngan Yesus Kristus ma gadaed be gay rogon ni “gubin e ngiyalʼ me yib uran ngoraed,”¹² ko tomuren e ngiyal’ nem ni gaded be un ko fapi gam’ing nib thothup.

Ma gadaed be pagdaed ngak ni gadaed be pigpig ngak Got ni gadaed be pigpig ngak pifak ma gadaed be machib ngak pi walagdead.¹³

Fare Tathapeg e ga’ar, “Fa’an gimed ra fol ko tin kug ning chiylen ngomed, ma gimed ra par ni gimed ba t’uf rog; ni bod rogon ni kug fol ko tin ni ning e Chitamag chiylen ngog gu be par ni ku gub t’uf rok.”¹⁴

Kemus ni kug weliy boch e rogon fapi kanawo’ rodad ni rayag ni ngad pared fare Tathapegdad. Ma chiney e nggu fith ngodaed pi gachalpen ni ngan fith, gay, min tu tuguy, ma gadaed fil u dakean fare gelngin fare Kan ni Thothup ko rogon boech kanawo’en ni rayag ni ngad ted Kristus ni’ir e bay u luk’ungun e pin’en ni gadaed be rrin’.

Nge Gag Ngom

L’agruw yang ko fare michmicheg rok’ fare Tathapeg: fa’anra gadaedra par ni gadaed bay rok’, mara par nibay rodaed. Machane riyul’ ni rayag ni nge par Kristus rom nge gag—gur rom nge fan ngom ni yigo gur? Fulweg ko biney e duwer e arrogon!

Ulan fare Babyor ku Mormon, kad filed mornga’agen e machib rok’ Alma ngak fapi gidii’ nib gafgow ni fapi gafgow roraed e ke liginraed ni ngar sobut’aen nigedraed. Rogon ni madil nag, ke ta’areb nag fare bugithin ko fare awoch ni thinga ni yung min gofoliy, me weliy ni “fare bugithin” ni’ir e fare yafos, muruwel, nge fare bayul rok’ Yesus Kristus.

Alma e ga’ar, “Mu changar gaed mi gimed tabolngin nag e mich romed ngakʼ fachaʼ ni Fak Got, ni bay yib ni nge bayuliy e gidiiʼ rokʼ, ma yira gafgow nag min liiʼ ngemʼ ni bayul ko pi denen roraed; ma ra fos bayay ko yamʼ, niʼir e ra yib nag e foskoyamʼ, ni nge gubin e gidiiʼ ma thingar sakʼiy gaed nga pʼoewchen, ni ngan pufthin nagraed ko bin tomur e rran ni fare rran ko pufthin, u rogon e pi muruwel roraed.”¹⁵

Biney e mornga’agen “fare bugithin” nike weliy Alma, wenig mu tafney nag e tha’ riy nike weliy rogon.

“Ere chiney, … gu baʼadag ni ngam yunged e re bugithin ney nga lan gumʼirchaʼmed, ma napʼan ni bayi thow ma arame ngam fogloliyed u dakean e mich romed. Ere musap gaed, ra ngaelʼ nib ke gakʼiy, ni ra ilal u fithik’med iyaen ko yafos ni dabimus biʼid. Ma gomanga bing Got woʼen ngomed ni nge yog ni ngam baʼud gaed, u dakean e falfalaenʼ rokʼ Fak. Ma gubin e pinnʼey ma ra yog ni ngam rinʼed”¹⁶

Fare awoch ni susun ni ngan yung ngalan gum’ircha’endaed e ir fare bugithin—nib mu’un fare yafos ngay, fare muruwel, nge machib rok’ Yesus Kristus. Ma napan ni yibe fogoliy fare buithin u dakaen e mich, ma arram nira ilal fare ke gak’iy ngodaed ko yafos ni dabimus biʼid.¹⁷

Mang e fare pow ko fare ke gak’iy ni guy Lehi ko lik’ay rok’? Fare ke gak’iy e rayag ni ngan tafney nag nibe yipfan Kristus.¹⁸

Pi walageg, bay fare Bugithin rodaed? Bay fare gospel rok’ fare Tathapeg rodaed nib riyul’ nikan yoloey ngalan gum’ircha’endaed?¹⁹ Gadaed be yib i yib ni ngad woded ir? Bay fare ke gak’iy ku Kristus rodaed? Gadaed be gay rogon ni ngaed manged ‘e tin nib be’ech [gidii’en]”²⁰ ngak?²¹

Sana biney e ke wawliy Alma ni fith: “Ke yog ni mu piiʼed gimed ngakʼ Got? Napʼan ni kam chugur gaed nga pʼoewchen Got gul be mʼug falʼngin u oewchmed? Ke yog ni mu thamiyed e biney e thil nga lan gumʼirchaʼmed?”²²

Susun ni gubin ngiyal’ ma ngad lamniged fare madil ni tay Somoel ngak Enoch: “Ma bay par ni ga bay Rog, nge Gag ngom²³ Ma gube micheg fare michmicheg rok’ fare Tathapeg nira par rodaed e ba riyul’ ma bay nifan e member nibe ayuweg fapi m’ag rok’ nifan e Galasia rok’ nikan sulweg yarmen.

Ere, Mu’un ngog

Apostle Paul e ta’ar midlin ngak e pi’in nikar mu’ gaed i thapeg Somoel: “Ere um pired rok.”²⁴

Un ngak fare Tathapeg e bay l’agruw bang ko fanow rok’ ni rib ga’fan: (1) fol ko motochiyel rok’ Got, nge (2) tayfan me par u wun’uy fapi m’ag nib thothup nima peth nagdaed ngak fare Chitamangiy nge fare Fak.

Ga’ar John:

“Fa’an gadad ra fol ko tin ke yog Got ngodad ni ngad rin’ed, ma aram e ke muduwgil u wun’dad ni kadnanged ir.

“Fa’anra yog be’ ni ga’ar, “Gu manang Got,” machane der fol ko thin rok, ma facha’ e be’ nma lifith l’ugun ma dariy e tin nib riyul’ u fithik’ i laniyan’.

Machane en nra fol ko thin rok, aram e cha’ ni rogon nib t’uf Got rok e ke yan i aw nrib fel’ rogon: Ireray rogon me muduwgil u wun’dad ni gadad be paer ngak’.

“Ma en nra ga’ar e be par u fithik’ Got e susun e ngi i par e wok rok, ni bod rogon ni i rin’ Jesus Kristus.”²⁵

Yesus ma pinningdad ni gubin, “Moy, mu leakeg”²⁶ nge “paered ngog.”²⁷

Gube micheg ni fa’anra gadaedra ul’ul’ i yean nga mm’on u fithik’ e mich ma gadaed be yean u fithik’ e sobut’ean’ ko Thothup rok’ Somoel,²⁸ gadad ma thapeged e tawa’ath ko gelngindaed, kanawo’ riy, damiiteg, nge gapas.

Mich nge Michmicheg

Alma ni weliy e t’ufeg rok’ Somoel ngak e gidii’ ni gubin nib fos:

“Musap gaed, ke piiʼ ba thiibach nge yaen ngakʼ gubin e gidii’, ya fagal rabaʼ i paʼayif ko murnguy e ke kʼiyeg ngoraed, me gaʼar: Mu kalgaed ngaenʼmed, mi gimed thap ngog.

“… Mired ngog ma rayog ni ngam kayed waʼamngin fare ke gakʼiy ko yafos; arragon, gimed ra kay mi gimed unum fare falowa nge raen ko yafos nib puf rogmed.”²⁹

Ri gube non nifan fare wenig nibe tay fare Tathapeg. Ba’adag ni nge tawa’ath nag e gidii’ ko fare murnguy rok’ gubin e gidii’ ni’i moy u fayleng, gidii’ nibay e chiney nib fos, nge gidii’ ni bayi yib nga fayleng.

Boech gidii’en e Galasia e kar fanayed fapi machib, fapi yalen, nge tin ni yibe micheg u roy ko Conference Center nge lane galasia u dakean e fayleng—momaw’ ngak ni nge michuwan’ e tiney ni’ir e tin nib riyul’ nib manechubog ni ngar feked ngalan e yafos roraed nge tin nibe buchbuch roraed. Michuwun’raed ma yead be pigpig u fithik’ e yul’yul, machane tha’ ko m’ag roraed ngak fare Chitamangiy nge fare Tabayul ni Fak e dawri mang bang ni nge thilyeg e yafos roraed.

Gube micheg ni u dakean fare gelngin e Kan ni Thothup, rayag ni ngam nang mag thamiy fare gospel nib riyul’ ni kug gay rogon ni nggu weliy rogon nifan ngom—nifan ngom nge yigogur rom.

Ri gube micheg ni Yesus Kristus e ir fare Thapeg nge Bayul rodaed ni bay nib fos. Fa’an gadad ba peth ngak Kristus, ma ra paer ni nge peth ngodad.²⁹ Ma napan ni gadaed be par u fithik’en mu gu par u fithik’an, ma gadaedra tawa’ath nag min fek boech fapi wa’amngin i yib. Gube micheg u dakean fithngan fare Somoel nib Thothup Yesus Kristus, amen.