General Conference
Soerokʼ fare Got ni Thʼabi Tolang
General conference ko April 2023
13:18

Soerokʼ fare Got ni Thʼabi Tolang

Keb rok Elder Ronald A. Rasband

Ko fare Ulung ko fare Ragag nge L’agruwi Apostle

Ni yean Yesus Kristus ngalan u Jerusalem nge pi n’en ni buch ulan ere wik nem ko rogon wo’en e yalen ni rayag ni ngaed feked ngalan e Yafos rodaed.

Daba’, ni woed rogon nikan mu’ i weliy, gadaed be un ngak boech Gidii’en Kristus u dakean e fayleng ni gadaed be liyoer ngak Yesus Kristus ko re rran ney ko Palm Sunday. Ke chugur ko 2000 e duw ngay ko fare Palm Suday kafram ni tabab fare wik ni tomur ni machib Yesus Kristus u fayleng. Irreram e ngiyal’ ni th’abi ga’fan nibay u fayleng.

N’en ni tabab nag e madnom rok’ Yesus ni’ir fare Messiah napan ni yib ngalan yu Jerusalem nike chugur ko ngiyal’ fare kuruth rok’ nge fare foskoyam’.1 Rogon nikan duugliy nib thothup, fare kuruth nin tay ngak e arram e n’en ni rrin’ ni tomur ko ngiyal’ e machib rok’ u fayleng, ni bing kanawo’en ngodaed ni ngad pired rok’ e Chitamangiy nu Tharmiy ni dariy bi’id memus.

Chep nib thothup e be yeog ngodaed ni fare wik nga m’on riy e tabab e gidii’ i yib ngaan fare gargo ni ngar guyed “fare profet i Jesus ni yib u Nazareth nib binaw ni bay u lan yu Galile.”2 Miyad “th’ab yuwan e fal’tir ngranod i yan nga wuru’ e binaw ni ngar mada’gad Jesus, ni yad be tolul ni be lungurad: “Ke soerok Got! I Got e nge ayuweg e en ni ir e ke yib ni owchen Somol.”3

Biney ni buch ulan e bible e ke pugoran ngog ba muruwel nigu un ngay u Takoradi, Ghana. Ni buch, ni gubay u rom ko rofen nem ko re madnom nem ko Palm Sunday.

Ulungi u Takoradi, Ghana

Kug wan ni nggu k’iyeg fare Stake ko Takoradi Ghana mug sunmiy ren e Stake ko Mpintsin Ghana. Daba’, ma bay nib pag 100,000 gidii’en e Galasia u Ghana.4 (Gadad be pinning e mogethin ngak Ga Mantse, Pilung Nii Tackie Teiko Tsuru II ko Accra, Ghana, nibe un ngodad daba’.) Mada’nag e pi gidii’ ney ni gidii’en Got, gu thamiy e t’ufeg roraed ni rib gel nge yul’yul’ roraed ngak Somoel. Bay e t’ufeg rog ngorad nib mu’un e t’ufeg ko President ko Galasia rodaed nifan ngoraed. Gube non nib sor fan ko fapi thin rok’ fare Tathapeg ni yoloey John mornga’agen: “Ra bigimed me t’uf bigimed rok, wod rogon ni um pired ni gimed ba t’uf rog.”5 Kar daged ko fare “t’ufeg roraed ko coference.”6

Elder Rasband be ruur e pa u Takoradi, Ghana

Napan ni gura sap ngalan fare chapel ni gube guy fapi gidii’ nge tabinaew roraed, ma gube guy u owchraed nibe galgeal’ rama’en ni bachan e michean’raed nge mich roraed ngak Yesus Kristus. Kug thamiy e n’en ni yaed ba’adag ni ngar manged bang ko fare Galasia rok’. Ma napan nira yoen’ fare choir e tang, ma yaed be tang ni woed fapi angel.

Choir u Takoradi, Ghana
Elder Rasband ni bay ko pi chongin u Ghana

Woed e Palm Sunday napan e kakrom, irerray pi gidii’en Yesus Kristus nikar bad nga ta’bang ningar ted fan ni wod e tin ni’i moy u langan e garog u Jerusalem, ni bay fapi yuwan’ e filtir ulan pa’raed, ni yaed be ga’ar, “Ke Soerok Got … : ayuweg e en ni ir e ke yib ni owchen Somol.”7

Koel e yuwan’ e filtir u Ghana

Kumus ko gidii’ ko galasia nib chugur ngoraed e ki yaed be tayfan fare Palm Sunday. Napan ni gube non ko fare pulpit, kug guy ko winda ni yaed bay ni yaed be yaen u kanawo’ ni yaed be chingeg fapi yuwan e filtir ulang, ni woed ya’an nibe dag ko re sassing ney. Ya’an ban’en ni dariy bi’id ma gura pagtilin—gamad gubin ko rofen nem ni gamaed be tayfan fare Pilung ko gubin mit e pilung.

President Russell M. Nelson e ke madil nag ngodaed ni ngaed ted fare Palm Sunday “nib thothup nibe par u wun’uy, ni gathi kemus ni ngan tafney nag fapi yuwan e filtir ni un chingeg ulan e lang nifan fare wub rok’ ngalan yu Jerusalem, machane ngan lemnag fare fathan e richib ulan paa’.” President Nelson e non nifan Isaiah, ni facha’ ni weliy mornga’agen fapi michmicheg rok’ Somoel, “Rdabiyag ni gu pag talim,” ufithik’ e pi thin ney: “Ya, ku gu yoloy fithingam ngalan pa’ag.”8

Somoel e manang ni par u fayleng e ba mo’maw rogon. Fathan e mad’ad rok’ e be pug oren ngodaed nike “yib nga but’ … nga fithik’ e gidii’ ni gubin”9 ni nge nang rogon ni nge ayuwegraed ko napan ni yaedra gafgow ma yaed mang wo’en ni “ngaer athamgil gaed,”10 ko wo’en, “ni ngeyag ni par Got [rodaed] ni gubin ngiyal’ ni manemus.”11

Fare madnom ko Palm Sumday e gathi kemus ni ba rran, nibay mornga’agen ulan e chap nib kakrom, ngiyal’ riy, nge rofen, nge gin ni buch riy. Ya ir e fare rran ni yean Yesus Kristus ngalan u Jerusalem nge pi n’en ni buch ulan ere wik nem ko rogon wo’en e yalen ni rayag ni ngaed feked ngalan e Yafos rodaed.

Ngad sap gaed ko beoch e yalen nib manechubog ni buch ko ngiyal’ ni i machib i yib ngalan u Jerusalem.

Bin somm’on, e fare prophecy. Woed e, fare profet Zekariah ulan fare bin Kakrom e M’ag ni micheg nira yib Yesus Kristus ngalan yu Jerusalem, ni weliy nira yib u dakean ba donkey.12 Yesus ni yog nga m’on fare Foskoyam’ nira tay ko napan ni be fal’ag rogon ir i yib ngalan fare ninaew, nibe ga’ar:

“Mu telmed ngog, gadad be yan nga Jerusalem, ni ir e bay ni pi’ e en ni Fak e Girdi’ riy ngak e pi tolang ko prist nge pi tamchib ko Motochiyel, ni yad e bay ra turguyed ni ngan li’ ngem’,

“Miyad pi’ ngak e pi’in gathi yad piyu Israel, ni yad e bay ra moninggad ngak, miyad toy ko dumow, miyad richibiy ko kuruth; ma chirofen nra gaman e dalip fen ngay e bay ni faseg ko yam’.”13

Bin l’agruw, e fare tawa’ath ko Kan ni Thothup. Joseph Smith e machib nag, “Dariy bee’ nira nang ni Yesus Kristus e ir fare Somoel, ma kemus ni fare Kan ni Thothup e manang.”14 Fare Tathapeg ni michag nag ngak fapi gachalpen15 ko fare bin Tomur e Abich nira ted16 ulan fare singgil nibay ngalang,17 “Dab gu pagmed ngam pired ni go’ gimed.”18 Dab i pag raed ni kemus ni go’ yaed e yaedra fek fare gospel nib riyul’ i yean nga m’on machane ra pii’ ngoraed fare Kan ni Thothup ni nge powi’iyraed. “Nggu tay e gapas nge par romed, nggu pi’ e gapas rog ngomed,” nike micheg; “dab gu pi’ ngomed ni bod rogon nma pi’ e girdi’ nu fayleng.”19 Bachan fare Kan ni Thothup ma bay e biney nikan micheg nag—ni “gubin ngiyal’ ma bay fare Thothup rok’ [rodaed]”20 ma “dakean gelingin fare Kan ni Thothup e rayog ni ngam nanged riy e tin nib riyulʼ ni morngaʼagen gubin banʼen.”21

Bin dalip, e fare gachalpen. Tin riyul’ gachalpen e yaedra fol ko tin nikar micheged ni yaedra rrin’, yaedra fol ko fapi motochiyel nib manechubog, mar t’ufeged Got, ni irreram e tin ni yaedra rrin’ ni somm’on. Dariy rogon mara thil. Fapi gidii’ ni pire’ ni yib ngabi madnom nag ko fapi yuwan e filtir era pininged ni’ir e fare Messiah. Ya irreram ni’ir e facha’. Ra bad i yib ngak, fapi ma’ang’ang rok’, nge fapi machib rok’. Machane fare falfalaen’ ko gidii’ ngak e dani par nib n’uw napan. Boech fapi gidii’ ni’i tolul nag fare, “Ke soerok Got,”22 e tolul nag ni ngan, “richibiy ko kuruth.”23

Bin aningeg, fare Bayul ku Yesus Kristus.24 Napan e pi tomur ko rran rok’, u mm’on ko fare Palm Sunday, me fal’ag fare Bayul, ni tabab ko fare gafgow ni tay u Gethsemane nge mada’ ko ngiyal’ ni un ni makrang, fare gafgow ni tay u dakean fare kuruth, nge fare ga’ameyag ni tay ko fare malang ko yam’. Machane dani tal u rom. Bachan fare muruwel nikan pii’ ngak ni’ir e fare Tabayul ko gubin pifak e Chitamangiy nu tharmiy, dalip e rran nga tomuren me yib nga wuru’ fare malang ko yam’, nike foskoyam’,25 ni woed rogon nike prophecy nag.

Gadaed be ul’ul’ nibe falfalaen’daed ko fare Bayul ku Yesus Kristus? Gadaed be thamiy fare gelngin nibe thothup nagdaed, e chiney? Irarray fan ni Yesus Kristus, ni’ir e facha’ ko tababnag nge mu’nag fare wo’en e Thap, ni yaen nga Jerusalem, ni nge thapeg e gidii’ ni gubin. Gamaed be thamiy ban’en ko pi thin ney rok’ Alma: “Faʼanra kam thamiyed gumʼirchaʼmed ni ke thil, ma faʼanra kam thamiyed ni gimed baʼadag ni nga munʼed tangin e falfalaenʼ u dakean e bayul, me ere gubaʼadag ni nggu fithmed, be yog ni ngam thamiyed e chiney?”26 Rayag ni nggog, fare choir u Takoradi e yoen’ ere tang ney ko re Palm Sunday nem, “fare tang ko fare t’ufeg ko tabayul.”

Ko re wik nem ni’ir e tomur ko fare machib rok’ u fayleng, pi’ Yesus Kristus ba fanethin ni mornga’gen fare ragag i bpin.27 Be machib nag nira sul ngak e pi’in nibe fal’ag rogon ni ngar thapaged, ni gati bay fapi yuwan e filtir ulan pa’raed machane fare tomilang ko gospel rok’. Fare ya’an fare magal nikan tay e nifiy ngay nibe yik’, nge boech e gaggep riy ni nge pii’ rama’en fare nifiy, e be yipfan ni yi ba’adag ni ngan leak, tin nib riyul’ rok’, nge tomilang rok’.

Gadaed manang mornga’agen e biney e yat. Fare ragag i bpin e be yipfan e gidii’ ko Galasia, ma fare mo’on ni nge mabgol e be yipfan Yesus Kristus.

Fare ragag i bpin nira feked fapi magal roraed “ngranod ni ngar mada’ niged be’ nib mo’on ni ir e nge mabgol.”28 Laal e ba gonop, ni kar fal’aged rogon fapi magal roraed nge boech ni fa’anra ke tu’uf, ma laal i yaed e bbalyang, ni fapi magal roraed e dariy e gapgep riy ni nge gel’ ra’en. Napan ni taw ko ngiyal riy, “Ke yib fare mo’on ni ir e nge mabgol; mired ngam mada’gad,”29 ma fare laal nib “gonop e [kar] thapaged fare riyul’, ma [kar] feked fare Kan ni Thothup ni nge powi’iyraed”30 ni kar fal’aged rograed ni ngar mada’ niged e pilung roraed31 ni fare riir rok’ [nira] yib nga dakeanraed.32 Ma fare laal e kiyaed be gay rogon ni ngar pire’egned e gapgep nifan e magal roraed. Machane ke pag nap’an. Me ul’ul’ e tin nge yean mar magay gaed ni danra uned. Ma napan nira tutuguyed e mab ni yaed be wenig ni ngar ranod ngalan, me ga’ar Someol, “Da gu nangmed.”33

Mang e gara thamiy ni fa’anra ke yoeg e biney ngodaed, “Da gu nangmed!”

Gadaed, woed fapi ragag i bpin, nibay e magal rodaed; machane bay e gapgep rodaed? Gube rus nag ni bay boech e gidii’ nikemus nibe un ko yean ni ri buchu’uw e gapgep nibay rok’, ni dar tofan ko tin nibe buch u falyang ma dar fal’ag rogon. Gapgep e ma yib nibe michuwun’uy ma yibe rrin’ ni woed rogon fapi prophesy nge fapi thin ko profet nibay nib fos e daba’, nirb ga’ ni President Nelson, fagli counselors rok’, nge fare Ragag nge L’agruw i Apostles. Gapgep e ma suguy lan gum’ircha’endaed ko napan ni gadaedra rung’ag magdaed thamiy fare Kan ni Thothup ma gadaed rrin’ ni woed rogon nikan powi’iydaed riy nib thothup. Gapgep nibe map’ ngalan gum’ircha’adaed e be dag ko ngiyal’ ni gadaed ne me’eleg ni Somoel e ba t’uf rodaed ma gadaed ba’adag e n’en nibe rrin’. Yima po’og e gapgep ngalan gum’ircha’endaed ko ngiyal’ ni yibe kalngaen’ ma yibe gay rogon fare Bayul ku Yesus Kristus ni nge gol nigey.

Fa’anra gabe sap ni ngam suguy e “baket rom,” ma irerray rogon: Mu suguy e baket rom ko gapgep nibe yipfan fare rran nima pii’ e yafos rok’ Yesus Kristus,34 nibe yipfan e yafos nge fapi machib rok’. Ku woed rogon, ni yibe rrin’ e tin ni dani ga’fan ban’en fa yean ngabang ni rib fel’el’ ya dariy reb nira suguyem ni ga’angin; makemus ni fare machib rok’ Yesus Kristus era rrin’ e biney. Ku mu’ i pi susun kafram: falfalaen’um ko fapi prophecy nge fapi machib nike yib rok’ e profet, mu rrin’ ni woed rogon nike thogthog nag ngom fare Kan ni Thothup, mang reb gachalpen nib riyul’, ma sapnag fare Bayul rok’ Somoel nira pii’ gelngim. Ma fare baket rom era fekem ko gin ni gaba’adag ni gara yean ngay—ko gin nibay e Chitamangim riy u Tharmiy.

Rofen nem ko re Madnom nem ko Palm Sunday u Takoradi e dariy bi’id ma gura pagtilin ni bachan e gu manang e biney ya ku guy rok’ e pi gidii’ ney ko re olung nem. Ni be ul’ul’ u dakean e nam nge fapi donguch u dakean ga’angin yang u fayleng. Gum’ircha’eg nge ya’el rog, ni woed gur, e ba’adag ni nge tolul nag e: Soerokʼ fare Got ni Thʼabi Tolang.”35

Dariy fan ni darda sak’iy gaed i mit ere garor nem u Jerusalem ni dariy yuwan e filtir u pa’daed, ya fare ngiyal’ e bayib, ni woed rogon nikan prophecy nag ko Revelation, “girdi’ nike mu’ulung ni pire’ ni pire’ ndariy be’ nrayag ni nge theegrad! Nra bad u gubin e nam, nge ganong, nge gubin mit e girdi’, ngu gubin e thin, ni kar [sak’iygad] u p’eowchen tagil’ Got nge fare Fak e Saf, ni karon’ed e mad nib wechwech ni bay yuwan e fal’tir u pa’rad.”36

Gube pii’ e tawa’ath rog ngomed ni i gag reb e Apostle ku Somoel ni gamedra gay rogon ngam pired ni gamed ba yul’yul’ ma gamed par u fithik’, e pi’in nibay fare yuwan e filtir ulan pa’raed, ni falfalaen’med ngak fare Fak Got, ni’ir e fare Tabayul ko gidii’ ni gubin. U dakean fithngan Yesus Kristus, amen.

Babyoren e Ayuw

  1. Aningeg yang ko fare Gospels—Matthew 21–28; Mark 11–16; Luke 19-24; nge John 12–21—e weliy mornga’agen e tin tomur e rran ni machib Yesus Kristus u fayleng, ni ban’en nikan ngongliy rogon nib tawa’ath nifan e wo’en e thap nge bin th’abi n’uf ngalang e falfalean’ nibay nifan ngak pifak Got. Bochingiyal’ ma en nibe yol e bay nib thil rogon nike yoloey mornga’agen machane rogon e machib rok’ fare Tathapeg nge fapi ngongol rok’ e dani thil.

  2. Muguy ko Matthew 21:10–11.

  3. John 12:13.

  4. Ra reb e Member nge fapi Statistical Records, bay ni 102,592 e members u Ghana.

  5. John 15:12.

  6. Gubin ngiyal’ ni gura non ngak reb gidii’en e galasia, me yaed ma ga’ar ngog, “Elder Rasbang, ni Apostle romaed, ri gab t’uf rog.” Tiney e gidii’ e ri yaed ba sug ko Thothup nge t’ufeg rok’ Got ma rib moem ngoraed ni yaed be dag.

  7. Matthew 21:9

  8. Muguy ko Russell M. Nelson, “The Peace and Hope of Easter” (video), Apr. 2021, ChurchofJesusChrist.org/media; Isaiah 49:16.

  9. Doctrine and Covenants 122:8. Ko December 1838, fare Profet Joseph e ni kalbus nag raed ulan fare Kalbus u Liberty. Rib gel e gafgow ko tin ni’i buch roraed. Bo’or e pul nga tomuren ni fani rib gel e gafgow riy, me yol ngak fapi gidii’em e Galasia ko March 1839, nib mu’un e meybil ngay ni nge runguy Somoel e tin nibe buchbuch rok’ nge fapi “gidii’en e Galasia nibe gafgow.” Ke weliy e n’en ni fulweg Somoel nifan e pi meybil nem nikan yoloey ngalan e Doctrine and Covenants 121– 23.

  10. Doctrine and Covenants 122:9 Athamgil ni pii’ Somoel’ ngak Joseph Smith ulan fare Kalbus u Liberty e pii’ e gapas me ayuweg nge nangfan ni fare to’ogor nge tin nib momaw’ ban’en e rayag ni nge ayuwegdaed nge gelnagdaed, me fill ngodaed e gamean’ nge rogon ni ngad filed fare n’en. Somoel e yoeg ngak ni nge “athamgil me dabi mulaen’,” ni irerram kanawo’en Somoel, athamgil ko tin ni yibe rrin’ ngak ni woed “fare Fak [Got, ni’ir] e yib nga but’ nga fithik’ raed. Me fith fa’anra ba mangil Ngak’?’ (Doctrine and Covenants 122:8).

  11. Doctrine and Covenants 122:9. Fare bugithin ni “Got era par rom” e ba michmicheg nifan ngak e pi’in ni yaedra chichi’iy pa’raed ko mich nge pagaen’ raed ngak Somoel.

  12. Muguy ko Zechariah 9:9

  13. Matthew 20:18–19. James E. Talmage writes u dakean Jesus the Christ: “Rib magagieyl … ni mu’ ni fapi Ragag nge L’agruw i dan ranangfaned e n’en ni fanathin nag. … Ya ngoraed e bay boech ban’en ni daniyag ni ngar nangfaned, fa boech ban’en nib togopuluw ko pi n’en ni’i yoeg fare Masta roraed. Yead manang ni’ir e fare Kristus, fare Fak Got nib Fos; machane uw rogon ni chaney e bee’ ni amargogon nikan noeg machane ni lii’ nge yim’?” ([1916], 502–3).

  14. Joseph Smith ni yoeg bugithin ngak fare Female Relief Society u Nauvoo, ko April 28, 1842, b’aray nikan yoloey ngalan fare “History of Joseph Smith,” Deseret News, Sept. 19, 1855, 218. Ran sap ko fare ragag nge l’agruw ko fapi guruy ko bin somm’on e Korinth, ke yoeg ni fare bin dalip e verse ngay, “Dariy bee’ ni rayag ni nge yog ni Yesus e ir fare Somoel, machane karimus ni u dakean fare Kan ni Thothup,” nike thilyeg ni be ga’ar, “Dariy bee’ ni rayag ni nge nang ni Yesus e ir fare Somoel machane karimus ni u dakean fare Kan ni Thothup. (Muguy ko The First Fifty Years of Relief Society: Key Documents in Latter-day Saint Women’s History [2016], 2.2, churchhistorianspress.org.)

  15. Yesus Kristus e fal’eg fare tha’ u thilin nga fapi gachalpen (muguy ko Mark 14:12–18). Fare ragag nge l’agruw ni tay bu’un Peter, Andrew, James, John, Matthew, Philip, Thomas, Bartholomew, James (fak ni Alphaeus), Judas Iscariot, Judas (walagen James), nge Simon (muguy ko Luke 6:13–16).

  16. Yesus Kristus ni fal’eg rogon fare sakrament nibay fapi gachalpen ko fare Bin Tomur e Abich (Muguy ko Matthew 26:26–29; Mark 14:22–25; Luke 22:19–20).

  17. Fare rran/nap nib duugil ni tay Yesus fare sacrament ulan fare “gin nibay ngalang e singil’” e dani duugil ko rofen ya dani ta’areb rogon ni yoloey Mathew, Mark, Luke, nge John. Matthew, Mark, nge Luke e kar rogned ni fare bin Tomur e Abich e ni tay ko fare “ga ba’adag ni nggu ngongliyed rogon e ggan riy ni ngam koy ko blayal’,” ni ggan ko Paluk’af (muguy ko Matthew 26:17; Mark 14:12; Luke 22:1, 7). John, e, be yoeg ni kalbus nag Yesus u mm’on ko fare abich ko Paluk’af (muguy ko John 18:28nibe yipfan ni fare bin Tomur e Abich e buch ko fare rran’ nib m’on ngay ko fare Paluk’af. Babyoren e Galasia nge gidii’en Got ko tin tomur e rran ni bugi scholarship e yead be yoeg ni Yesus e tay fare bin Tomur e Abich nibay fapi gachalpen riy ulan fare singil nibay ngalang ko fare balayal’ u mm’on nin kuruth nag. Boech gidii’en Kristus e yaed ma madnom nag fare Wik nib Thothup ko Thursday ni’ir e fare rran ko bin Tomur e Abich, Friday e fare rran ko fare kuruth, nge Sunday ni’ir e fare rran’ ko foskoyam’—nike yean u rogon fare Gregorian calendar.

  18. John 14:18.

  19. John 14:27.

  20. Doctrine and Covenants 20:77.

  21. Moroni 10:5.

  22. Fare Bible Dictionary e ke weliy ni, hosanna e be yipfan ni “ayuwegraed e chiney.” Kan fek e tiney e thin ko Psalm 118:25. “Yoen’ tangin e biney e tang e bay rogon ko fare Ulung nib ga’ ko fare Tabernacles ni yibe chingeg u lang fapi yuwun e gak’iy; ni irerram fan fare bugithin ni fanay fapi gidii’ ni pire’ napan ni yib Somoel ngalan yu Jerusalem” (Bible Dictionary, “Hosanna”). Muguy ko Matthew 21:9, 15; Mark 11:9–10; John 12:13.

  23. Mark 15:14; Luke 23:21.

  24. Fare luk’ngun e gonop rok’ e Chitamangiy nu Tharmiy nifan fare wo’en e thap e ba bayul nira micheg e yafos ni manechubog nifan ngak pifak ni gubin ni ngar thapaged e bin th’abi tolang e n’uf ngalang ko falfalaen’ ni fa’anra thawingraed e ba fal’ ni ngar thapaged fare tawa’ath. Nap’an Chitamangin ke yoeg,”Mini’ Ningu pii’?” Me yib Yesus nga mm’on, “Gube ara’, mu pii’eg” (Abraham 3:27). President Russell M. Nelson e ke machib nag: Muruwel rok’ “[Yesus Kristus] e fan fare Bayul. Kemus ni biney e muruwel e fan ngak. Ni gargeleg ni chitinngin e be’ nu fayleng ma chitmangin e dariy bi’id nira yib e yam’ ko doweg ngak, karimus ni’ir e rayag nira pii’ e yafos rok’ ma ki fos bayay (muguy ko John 10:14–18). Fare ma’ang’ang ni bachan e Bayul Rok’ e rib manechubog ma dariy bi’id memus. Ke yim’ nga daken e n’en nra yim’ ni bod e munmad nike kirebnag gelngin e yam’ (muguy ko 1 Corinthians 15:54–55). Muruwel rok’ nifan fare Bayul e yi manang u mm’on nin Sunmiy fare fayleng nge fare Mul nira tay. Gathi kemus ni nge pii’ wo’en fare foskoyam’ nge gidii’ ni dabki yim’ bi’id, machane wo’en ni nga kiyag ni n’agfan fapi denen rodaed—ni woed rogon nike ngongliy rogon. Ma Bayul Rok’ e ke bing wo’en nira rayag ni ngaed uned ngak nge gathon e tabinaew roraed ni dariy bi’id memus” (“The Mission and Ministry of Jesus Christ,” Liahona, Apr. 2013, 20).

  25. Foskoyam’ e be yipfan ni dogur rodaed nge ya’el rodaed era sul nga ta’abang ni dakriy bi’id ma rayag ni nge yim’, ni fare dogur nge fare ya’el riy e dariy bi’id ma rayag nira palog ni dabkiyag nira yim’ fa gafgow (muguy ko Alma 11:45; 40:23).

  26. Alma 5:26; ngkum guy ko Alma 5:14.

  27. Fare fananethin nifan fare ragag i bpin e ba’aray ko Matthew 25:1–12; Doctrine and Covenants 45:56–59. Tiney nike magay e guruy ko Matthew 25 e be dag e tin ni machib nag Yesus Kristus ni bugi fanathin ko fare bin tomur e wik nike magay, u tomuren ni yib ngalan yu Jerusalem Matthew 21 u mm’on ko fare bin Tomur e Abich ni tay nge kalbus nag Matthew 26. Nib mu’un fare fanathin ngay nifan fapi ragag i bpin ni pii’ ko fare wik nib m’on ngay, Yesus ni pii’ reb e fanathin nifan fare ke gak’iy ni fig (muguy ko Matthew 21:17–21; 24:32–33), fare fanathin ko fare l’agruw i pagal (muguy ko Matthew 21:28–32), fare fanathin ko fare mo’on ni bata denen (muguy ko Matthew 21:33–46).

  28. Matthew 25:1.

  29. Matthew 25:6.

  30. Doctrine and Covenants 45:57.

  31. Doctrine and Covenants 45:59.

  32. Doctrine and Covenants 45:59.

  33. Matthew 25:12. Fare Sermon u dakean fare Buruy, Somoel e non nibe fanathin ngak e pi’in ni yaed be susun nag ni kar “ngongliyed bo’or e maang’ang ngay” ni yaed be ga’ar, ni woed rogon nibay nikan yoloey ngalan fare baboyren marunga’agen laal i yaed e bbalyang i bpin “Ra da gu nangmed” (muguy ko Matthew 7:22–23).

  34. Woed rogon ni ran e rib tu’uf ko biney e yafos u fayleng, Yesus Kristus nge fapi machib rok’ (ni’ir e fare rran nima pii’ e yafos) e rib tu’uf ko fare yam’ ni manechubog (muguy ko Guide to the Scriptures, “Living Water,” scriptures.ChurchofJesusChrist.org; see also Isaiah 12:3; Jeremiah 2:13; John 4:6–15; 7:37; 1 Nephi 11:25; Doctrine and Covenants 10:66; 63:23).

  35. 3 Nephi 4:32.

  36. Revelation 7:9.