Gubin Ngiyal’ ni Fulweg Riy e Yesus Kristus

Keb rok President Russell M. Nelson

President ko Fare Galasia Ku Yesus Kristus ni Fan ko Gidiiʼen Got ko Tin Tomur e Rran

Demuturug ko mang e duwer fa tin nibe momaw’ ngom, ya fare fulweg riy e gubin ngiyal’ ma yira pire’eg ko yafos nge fapi machib rok’ Yesus Kristus.

Pi walageg, kan durwi’iydaed ko thin nib thothup ko gali rran ney. Ma fare musik ko choir e rib fel’. Gidii’ nike non e ke muruwel ni paa’ Somoel. Gube meybil ni gara gay fare Kan ni Thothup ni nge powi’iyem ko tin ni ngam fil ko tin nikan machib nag ngom nib riyul’ e daba’. Ya tiney e kan thapeg nike yib u tharmiy.

Reb e wik ko daba’ e fare rran ni Madnom ko Easter. I ir e fare rran ni th’abi ga’fan ko tiliw nifan fapi gachalpen Yesus Kristus. Fan ni gadaed ma madnom nag e Kristmas e bachan e Easter. Ulan fare Come, Follow Me machib nifan e biney e wik era ayuwegnem ngam fil mornga’gagen fare madnom rok’ fare Tathapeg ni yib ngalan yu Jerusalem, be’ech nag e temple Rok, fare gafgow ni tay ulan fare Milay’ nu Gathsemane, fare Kuruth ni tay, fare Foskoyam’, nge pi gidii’en ni yibe m’ug ngak.¹

Mu durwi’iyem kopi thin ney ni rib thothup magay rogon ni ngam pinning e magar ngak e Chitamangiy nu Tharmiy nike pi’ Fak ni kari Maagirag Rok’.² Bachan Yesus Kristus, ma rayag ni ngan kalngaen’ min n’agfan e pi denen nikad rrin’ed. Bachan ir, ma arram ni gadaed gubin ni rayag ni ngaed fos gaed ko yam’.

Ku gube pinningmed ni ngam filed biyay fare ngiyal’ ni yib fare Tathapeg ngabi m’ug ngak fapi Nephites u dakean yu Mariken, nibay mornga’agen ulan e 3 Nephi. De n’uw napan u m’on ni yibe m’ug, yib laman ngak fapi gidii’, nib mu’un e pi thin ni ba’aray ngay:

“Dab mu chelgaed ngam suloed ngog, magmed kalngaenʼ ko pi denen romed, me michaenʼmed, ni ra yog nug gol nagmed?

“… Musap gaed, kug kʼiyeg paʼag nib sug ko murnguy ngomed, ni enra yib ngog, e irechaʼ ni gura fek.”³

Pi walageg, Yesus Kristus e be pong ma be mulwol nag e biney ngom e daba’. Gube wenig nag ngom ni ngam mub ngak ni ngeyag ni nge gol nigem! Ra gol nigem ko denen napan ni gara kalngaen’. Ra gol nigem ko kirbaen’ nge tin ni gabe rus nag. Ra gol nigem ko m’ad’ad ko biney e fayleng.

Demuturug ko mang e duwer fa tin nibe momaw’ ngom, ya fare fulweg riy e gubin ngiyal’ ma yira pire’eg ko yafos nge fapi machib rok’ Yesus Kristus. Fil mornga’agen fare Bayul rok’, fare t’ufeg rok’, fare murnguy rok’, fare machib rok’, nge fare gospel rok’ nike sulweg yarmen nima gol nigey nge me mon’og nigey. Mu sul ngak! Maga laek!

Yesus Kristus e irerram fan ni gadaed be toey e temple ni bo’or. Ra reb ma nu’un rok’ nib thothup. Ngongliy min thapeg fapi gam’ing ni rib ga’fan ulan e temple, nib mu’un ni yibe gay rogon ni ngan chuchugur nigey ngak u rom, era tawa’ath nag e yafos rom ni dariy bang nrayag riy. Bachan e biney, gamaed be gay rogon u gelngin nrayag romaed ni nggu pii’ed e pi tawa’ath ney ko temple ni ngayag ni nge moem ni nge thapeg gidii’en e galasia u dakean e fayleng. Daba’, gub falfalaen’ ngay ni nggu weliy e gonop romaed ni ngan toey boech e temple ko yungin ni ba’aray:

Retalhuleu, Guatemala
Iquitos, Peru
Teresina, Brazil
Natal, Brazil
Tuguegarao City, Philippines
Iloilo, Philippines
Jakarta, Indonesia
Hamburg, Germany
Lethbridge, Alberta, Canada
San Jose, California
Bakersfield, California
Springfield, Missouri
Charlotte, North Carolina
Winchester, Virginia
Harrisburg, Pennsylvania

Pi walageg nib t’uf rog, gube micheg ni Yesus Kristus e ir e bay nibe gagiyeg nag e Galasia rok’. Gube micheg ni un ngan leak e karimus kanawo’en e falfalaen’ aray. Gu manang ni gelngin e bay nibe yib nga dakean pifak ni ngar ngongliyed e m’agar ngak, “ni kar longbiyed yaed ko fel’ u gelingin Got u fithik’ e rir.”⁴ Ri gube micheg, u fithik’ e t’ufeg nge tawa’ath rog ngomed, u dakean fithingan Yesus Kristus nib thothup, amen.