Pi Machib rok’ Yesus Kristus
Kan pii’ e pi babyor nib thothup ngodad ni nge powi’iy e yafos rodad. Milwol rog daba’ bay boch e pi yang ko fare thin rok’ Somoel—pi’nen ni ke yoeg.
Michaen’dad ngak’ Kristus Pi choggin ko Fare Galasia ku Yesus Kristus ni Fan ko Gidii’en Got ko Tin Tomur e Rran, gadad me liyor gad Ngak’ nge folgad e pi motochiyl ulan e pi babyor nib thothup.
Umon e mul, Chitamangdad nu Tharmiy ni ke non ngak Adam nge Eva. Tomuren, Chitamangdad nike yoeg marunga’agen e Fak ni Ma’agirag Rok’, Yesus Kristus, ni’ir e Tathapeg nge Tabiyul rodad nge ke pii’ ngodad e motochiyl ni ngad “motoyil gaed ngak’”.1 Dakaen e fonow ney rayog gadad ma nanged gubin e pi thin rok’ “Got” fa “Somoel” ulan e pi babyor nib thothup irma pi thin rok’ Jehovah, e Somoel nib fas ko yam’, Yesus Kristus.2
Kan pii’ e pi babyor nib thothup ngodad ni nge powi’iy e yafos rodad. Ni ke machib fare profet Nephi, “mu duruwʼiyed gimed ko thin rokʼ Kristus; ya musap gaed, pi thin rokʼ Kristus e ra yoeg ngomed rogon gubin e pinʼen ni ngam rinʼed.”3 Bo’or e pi scripture nima yoeg marunga’agen e machib rok’ Yesus napan ni bay u feylang ma weliy marunga’agen e ngongol ni Ke rrin’. Milwol rog daba’ bay boch e pi yang ko fare thin rok’ Somoel—pi’nen ni ke yoeg. Pi thin ney yira yoloey nga langgin fare Bin Be’ech e M’ag (ni tay e bu’un e pi thogthog ni yib rok’ Got ngak Joseph Smith) nge u lane Babyor ku Mormon. Bo’or e pi yang ney be yarmiy u rogon nike buch napan fare Tathapeg ni ke yoeg binem.
“Nggog e tin riyul’ ngom, Ndariy be’ nrayag ni nge yan ko gin nsuwon Go ni fa’anra dab ni gargeleg ko ran nge fare Kan ni Thothup.”4
“Ma rafelʼ waʼathan … gubin e piʼin [kar] mʼaed ni blig nge balel ni bachane tin nib matʼaw, ya yaedra sug ko fare Kan ni Thothup5
“Ma rafel’ wa’athan gubin e pi’in yaed ma awnag e gapas, ya yira piningraed ni bitir rok’ Got.”6
“Musap gaed, i yoloey e piʼin kakrom ni gaʼar, Dab mu pirew beeʼ ni gathi mabgol rom:
“Machane gube yoeg ngomed, Ni enra sap ngakʼ beeʼ nib ppin, me dirngal nag, e ke denen ni galong u lan gumʼirchaʼen.”7
“Ma musap gaed kun yoloey ni gaʼar, ngam tʼufeged e chaʼ ni buguliyoror romed ma ngam fananikayed e chaʼ nib toʼogor romed.
“Machane musap gaed gube ga’ar ngomed, mu t’ufeged e pi to’ogor romed, ma ngam fal’eged wa’athan e pi’in ni yaed be ger nagmed, ma ngam rin’ed e tin nib mangil ngak’ e pi’in nibe fananikaymed, ma ngam meybil ni fan ngak’ e pi’in nibe muruwel ngomed u fithik’ e sasaliyeb nge pi’in nibe gafgow nagmed;
“Ni ngam manged e pi bitir rokʼ e Chitamangmed ni bay u tharmiy; ya ire be gagyeg nag e yalʼ rokʼ nge mat nga dakean e piʼin nib kireb nge piʼin nib mangil, ma be pi’ e n’uw ngak e pi’in yad be rin’ e tin nib mat’aw nge pi’in yad be rin’ e tin nib kireb.”8
“Faʼan gimed ra nʼaegfan e kireb rokʼ e gidiiʼ ma Chitamangmed nu tharmiy e kura nʼaegfan romed:
“Machane faʼanra dab mu nʼaegfan e kireb rokʼ e gidiiʼ ma Chitamangmed e ku dabi nʼaegfan e pi kireb romed.”9
“Ya fa’an manga mmil famed ngak e girdi’ nu fayleng, me ere gimed ra t’uf rok e girdi’ nu fayleng, ya kam manged girdi’rad: Machane kug mel’egmed u fithik’ e girdi’ nu fayleng, ni gathi kigimed boch i yad; ireray fan nike fanenikaymed e girdi’ nu fayleng.”10
”Ere, dam pir’eg e pi’nen ko feylang machange ni ngam gayed ko sommʼon gilʼilungun Got nge gubin matʼawon, ma gubin e pinnʼey e bay ni piiʼ ngomed.”11
Ere, gubin banʼen ni gimed baʼadag ni nge rinʼ e gidiiʼ ngomed, e kuʼir e ngam rinʼed ngoraed, ya ireray fare motochiyel nge fapi profet.”12
Mu ayuweged gimed ko pi profet ni deriyulʼ, ni bay rabaed ngomed ni boed bunuʼen e saaf wuruʼ i doewraed, machane nga fithikʼ i doewraed e boed e pi wolf ni ma kʼaad.
“Gimed ranang u waamngiraed. Gulley ma kunuy e gidiiʼ e grape ko gakʼiy ni bay rachangalen, ara gakʼiy ni yigoʼ rachangal?
“Ere aram rogon ni gubin e gakʼiy nib mangil e ma piiʼ e waʼamngin nib mangil, machane bake gakʼiy nib kireb e ma piiʼ e waʼamngin nib kireb.”13
“Gathi gubin e gidiiʼ ni ma gaʼar ngog, Somoel, Somoel, e ra yaen nga lan fare gilʼilungun nu tharmiy; ya enra rinʼ fiti laniyaenʼ e Chitamag ni bay u tharmiy.”14
“Mired ngog, ni gimed gubin e pi’in ke aw parowmed i fek e n’en nib tomal ni gimed be fek, mu gu’ pi’ e toffan ngomed.
“Mfeked e mat’ rog ngam teg nga pomed, mi gimed folwok rog, ya gub munguy ma gub sobut’aen’: mi gimed pir’eg e toffan.
“Ya re mat’ ni gura pi’ ngomed e ba mom, ma tomalngin e ren’en ni gu ra tay nga pomed e ba ba’ud.”15
“Fa’anra ba’adag be’ ni nge un ngog, ma thangri pag talin ir, nge fek e kuruth rok nge lekeg.
“Nge fa’anra ba’adag be’ ni nge un ngog, ma thangri pag talin ir, nge fek e kuruth rok nge lekeg.”16
“Ya en nra finey ni nge ayuweg e pogofan rok e ra thay rok; ma en nra thay e pogofan rok ni bochag e ra pir’eg. 26Be mang e ra fel’ rogon be’ riy ni fa’anra yag ngak e re fayleng ney ni polo’, machane me thay e bin riyul’ e yafos u pa’? Dariy ban’en nrayag ni nge pi’ be’ ngki sul e yafos rok ngak?”17
“Fa’an ra bay be’ ni ra rin e muruwel ku Got, i ir ra nang fare machib, fa’an ra ke yib ku Got, fa Gu be non rog.”18
“Guge yoeg ngomed. Mu ninged, min piiʼ ngomed; mu gayed, ma gimed ra pirʼeg; mu tugtuguyed e mab, min bing ngomed.
“Ya gubin e piʼin ni yaedra ning, e yira piiʼ ngoraed; ma enra gay, e ra pirʼeg; ma enra tugtuguy e mab, e yira bing ngakʼ.”19
Ni boech e saaf rog ni dar moyed ko biney e ulung; e ngkug fekraed, ngar rungʼaged lamag; me yaeni aw ni taʼareb e ulung nge taʼareb e tachathowol.”20
“Me yog Yesus ngak ni ga’ar, I gag owchen e fos ko yam’ nga yafos: Yigu ra ke yim’ be’ ni gub mich u wan’ mra fos:
“Ma en nra i par nib fos ni gub mich u wan’ e dabki yim’ bi’id.”21
“[Thabi ga’ e motochiyl ko gubin pi motochiyl ni:] Thangri t’uf rom Somol ni ir e Got rom ni polo’ u gumircha’em, ngu polo’ i lanin’um, ngu polo’ i leam rom.
“Iraray e bin somm’on nge bin falel’ e motochiyel.
“Ma bin migid ngay e motochiyel ni ku ba ga’fan e bod e biney ni ga’ar, gin’en ni ga bay riy ma thangri t’uf rom e en ni bugul I yoror rom ni gow e guy.
“Urngin e motochiyel rok Moses nge tin i fil e pi profet ko girdi’ e be gif nga daken e gali motochiyel ney.”22
“En nra fel’ u wan’ e tin kug ta’chiylen ngomed me fol riy, e ireram e cha’ ni gub t’uf rok. Chitamag e ra t’ufeg e cha’ ni gub t’uf rok; ma ku er rogog ni ra t’uf rog mu gguy rogon nge nangeg.”23
“Nggu tay e gapas nge par romed, nggu pi’ e gapas rog ngomed: dab gu pi’ ngomed ni bod rogon nma pi’ e girdi’ nu fayleng. Dabi magafan’med ma dabi wagagey lanin’med, ma dab mu tamdaggad.”24
“Ba’aray e n’en ni nggu ning chiylen ngomed: nge bigimed me t’uf bigimed rok, ni bod rogon ni gimed ba t’uf rog.”25
“Mu sapgad nga pa’ag nruw raba’ nge rifrif u eg mi gimed nang ni gag: mmathgad nga dowag ngam guyed, ya kan e dariy e ufin nge yil u dow, ni bod rogon ni gimed be guyeg ni bay rog.”26
“Ere mmarod ngak girdi’en e pi nam u gubin yang ngam pingeged yad ngar manged pi gachalpeg, mi gimed tawfe nagrad nga fithingan e Chitamangiy nge Fak nge fare Kan Nthothup:
“Mi gimed fil ngorad rogon ni ngu’ur folgad u gubin e tin kugog ngomed ni ngu’um rin’ed. Ma dab mpaged talin ni gubin ngiyal’ ma gu bay romed, nge yan i mada’ nga tomuren e fayleng.”27
Tomuren e machib rok’ ulan e Nam nib Thothup, Yesus Kristus nike m’ug ngak e pi’in nib mat’aw. Binir boech e pi thin ni Ke pi’ ngorad:
“Musap gaed, I gag Yesus Kristus ni fachaʼ ni Fak Got. Gag e gu sunmiy e tharmiy nge fayleng, nge gubin banʼen ni bay riy. Gag e ʼug moy rokʼ e en Chitamangiy aram ko tabolngin. “Gubay u fithikʼ e en Chitamangiy ma en Chitamangiy e bay u fithikʼag; ma en Chitamangiy e be rir nag fithingan rok.”28
“I gag e tamilang nge yafos ko fayleng. I gag Alpha nge Omega, ni fare sommʼon nge fare tomur.
“Ma dab kum maligach gaed ngog ngalang ni puʼoeg rachaʼ; arragon, pi maligach romed nge pi moʼoruf ni maligach romed e ke tal, ya daki tʼuf rog e pi maligach romed nge pi moʼoruf ni maligach romed.
“Ma ngam pii’ed ngog ni maligach ni m’ingaen’ nge kalngaen’. Ma enra yib ngog ni ke mʼingaenʼ make kalngaenʼ, e ireram e chaʼ ni gura tawfe nag ko nifiy nge fare Kan ni Thothup. …
“Musap gaed, kugub nga fayleng ni nggu bayuliy e fayleng, ni nggu thapeg e fayleng nge chuw u fithikʼ e denen.”29
“Ma ku bayay gube yoeg ngomed, ni thingar mu kalgaed ngaenʼmed, min tawfe nagmed nga fithingag, magmed boed beeʼ nib bitir nib achichig, ara dangay ma dariy woʼen magmed tafnaʼ boech gilʼilungun Got.”30
“Ere gubaʼadag ni ngam machalbog gaed ni boed gag, ara boed e Chitamangmed ni bay u tharmiy nib machalbog.”31
“Rriyulʼ, nriyulʼ, gube yoeg ngomed, ni thingar mu uthumed oewchmed magmed meybil ni gubin e ngiyalʼ, ni nge siyi lumel nagmed fare moʼoniyanʼ, magmed mang sib rokʼ.”32
“Ere thingar um meybil gaed ni gubin e ngiyal’ ngak’ e en Chitamangiy u fithingag.”33
“Ere, demutrug e re n’en ni gimed rarin’, ma ngam rin’ed u fithingag; ere ngam pininged fare galasia u fithingag.”34
“Musap gaed kug piiʼ e gospel rog ngomed, ma baʼaray rogon e re gospel ney ni kug piiʼ ngomed—ni kugub nga fayleng ni nggu rinʼ fiti laniyaenʼ e Chitamag, ni bachan e ke lʼugeg e Chitamag.
“Ma ke lʼugeg e Chitamag ni ngan chibiyeg ngalang u dakean e kuruth; ma tomuren ni kan chibiyeg ngalang u dakean e kuruth, ni nge yog nug miliy gubin e gidiiʼ ngog … ni ngar sakʼiy gaed nga pʼoewcheg, ni ngan pufthin nagraed ko pi muruwel roraed, ko ba mangil fab kireb.”35
“Chiney e baʼaray fare motochiyel: Mu kalgaed ngaenʼmed, gimed gubin e gidiiʼ ni gimed bay ko tin tomur e rran u fayleng, magmed yib ngog ngan tawfe nagmed u fithingag, ni nge yog ni ngam machalbog gaed u dakean fare Kan ni Thothup, ni nge yog ni ngam sakʼiy gaed ni dariy thibngimed u pʼoewcheg ko bin tomur e rran.”36
Michaen’dad ngak’ Kristus Gube taleg ni bay e pi’nen nike yog marunga’agen thingari nanged nge folgad e pi machib Rok’:
“Ma en ni bay i ayuwegmed e aram fare Kan Nthothup ni en ni Chitamangiy e bayi l’oeg nge yib ni owcheg, ma bayi fil urngin ban’en ngomed, me ayuwegmed nge mit ngomed urngin e tin kug weliy ngomed.”37
Gube pii’ e m’ag rog marunga’agen e machib ney nib riyul’ udakaen e fithingan ku Yesus Kristus, amen.