E Kona n Kamaiuai!
Ana Kamaiu Te tia Kamaiu ao mwaakana ni kabooira e kaineti nakon kaairua aika karina, ara rinerine aika mamara, kakaewenako, ao kataaki n aekaia nako—n ikotaki naba ma ara bure.
E berita Moronaai bwa ngkana ti wareka ana Boki Moomon ao ni manga bubuti nakon te Atua te Tama ae Akea Tokina, ma nanora ni kabanea, ma te nano ni koaua, karekean am onimaki iroun Kristo ngkana e koaua, E na bon kaoti koauan bwai ni kabane te Atua man mwaakan te Tamnei ae Raoiroi.1 Mirion aomata ake a tia n karaoa nanon te berita aio ao man karekea te kakoaua ni Kaokan ana euangkerio Iesu Kristo ae bwanin.
E reireinira Moronaai, bwa ngkana ti wareka ana Boki Moomon, tina “uringa ana nanonaga te Uea nakoia natiia aomata man te tai are karikaki iai Atam nakon te tai [aei], … ao [n] iangoia i nano[ra]”2 Taian karaki ma reirei n ana Boki Moomon e kauring nakoira ao ni kakoauaa ana tangira te tia Kamaiu, ana mwamwannano, ao ana nanoanga.
E motirawa tamau n Eberi 2013. Ngke I katauraoai bwa nna marooro n tain matena, I kakabwaiaki ni kona n atai ao n tatangiri ana kibu ake e tatangirii man booki aika tabu. E tibwauai nakoira n tain bootaki n utu, ao e wareki nakoiu ngkana I kainanoi taeka n reirei, kairiiri, ao kakorakoran au onimaki. I a tia naba n ongo irouna n tibwauaia ngkana e mwiokoaki bwa e na taetae. I aki tii atai, ma I kona naba n uringa tangin bwanaana ao namakina te tamnei ngkana e tibwauai. Rinanon tibwauan kibu man boki aika tabu ao namakin, tamau e a tia n buokai ni katea aan au onimaki ae matoatoa iroun te Uea Iesu Kristo.
Tamau e rang tatangira rongorongon te tia Kamaiu ngke roko ni kawaria ana aomata Nibwaai.3 Te rongorongo ae tabu aio bon ibukin mangautin ao karietataan ara Uea Iesu Kristo. E a tia ni mooi n te mwangko ae mao ao n katoka iaona rawawata ni bane bwa ti aonga n aki rawawata ngkana ti raira nanora.4 E a tia n kawara te aba n tamnei ao ni baronga tataekinan te euangkerio ikekei.5 E a tia n uti man te mate, ao E a tia n maeka ma ao ni karekei tua mairoun te Tama bwa e na tibwauai booki aika tabu ma Nibwaite bwa aonga ni kakabwaiaki kanoaia n taai aika na roko.6 E karietaataki ao n tia n reke irouna Mwaakana ao konabwai. Ti kona n karekei tibwangara man Ana reirei ni kabane.
N 3 Nibwaai 11, ti wareka rongorongon te tia Kamaiu ngke karuoaki mai karawa bwa e na reireiniia Nibwaite ae bon ngaia Iesu Kristo, are a kakoaua burabeti bwa e na roko n te aonnaba. E taekinna bwa bon Ngaia Otan te Aonnaba ao E kamimitonga te Tama man anaakin buren aonnaba. E kaoia aomata bwa na nakoina ni karina baia i Rarikina ao n namakina mwiin te neera i Baina ao i Waena. E tangiria bwa a na ataia ae bon Ngaia Atuan Iteraera, are tiringaki ibukin buren te aonaaba. A kaeka aomata ma te kukurei, ni mwananga temanna imwiin temanna ni karokoa a bon bane n noora ao namakinna ae bon Ngaia ni kakoaua are e a kaman koreaki rongorongona irouia burabeti bwa e na roko.7
Iesu e reireinia Nibwaite bonganan te rairannano, n riki n aron te ataei ae uarereke, ao iaon kainnanoan te bwabetioaki iroun temanna are iai irouna Ana kariaia. Imwiina ao e reirei iaon tua aika mwaiti ake man te Nu Tetemanti are ti kamatebwai iaona n te ririki aei.
N 3 Nibwaai 17, ti warekia ae Iesu e tuangiia aomata bwa e a roko Ana tai n nakon te Tama ao ni Kaotia naba nakoina ana baronga Iteraera ake a bua.8 Ngke E tarataranako aoia aomata ake a uanao, E nooria bwa a tang, man teimatoa aia taratara iaona n te aro are kaanga a na tuangnga bwa e na tiku riki teutana irarikiia.9
Ana kaeka te tia Kamaiu nakoia Nibwaite e bon riinga te nano ao ni bongana. E taku nakoia, “Nooria, e a onrake nanou n te nanoanga ibukimi.”10
I kakoaua bwa Ana nanoanga bon ae korakora riki nakon kaekaan ranni mataia aomata. Titebo bwa E kona n nooria rinanon matana n Ana Anga karea. E noora marakiia, kainanoia, ao kaririakiia. E noora aorakiia. E noora kabwakaia, ao E ataia bwa man rawawatana ae korakora i Ketemwane ao i Korokota e bon buokia ni kaineti ma kabwakaia.11
Titebo, ngke ara Tia Kamaiu, Iesu Kristo, E taraira, E noori ao n ota n marakin ao rawawatan ara bure. E noori bwaai aika ti tatangiri ao kakaewenakoara. E noori korakaira ao kabwaka n aekaia nako—ao E onrake n te nanoanga ibukira.
Ana kakao n nanoanga nakoia Nibwaite: “Iai mai buakomi ae aoraki? Uotiia mai. Iai ibuakomi ae mwauku, ke e mataki, ke e ikoaki, ke e aki konabwai, ke e rebera, ke e rai, ke aika a bonotaninga, ke a karawawataki n aekaia nako? Kairiaa mai ao N na katoka aorakiia, bwa iai au nanoanga nakoimi; a onrake nanou n te nanoanga.”12
Ao a bane n nakoina aomata, ma kabwakaia n aekaia nako, e kamaiuia aomata ni kabane; ao e bon katoka aorakiia ni kabane ake a uotaki nakoina.”13
Inanon 1990 ti maeka n te kawa ae uarereke ae Sale, i Victoria, Aotiteria. Ti bon maeka ni kukurei ma ara utu, te Ekaretia, ao ara mwakuri. Inanon tain te kabuebue teuana n te kaonobong imwain te Kiritimati, ti baireia bwa tina kawarii tabeua taabo ni kamaengang ao te bike ae ti tatangiria. Imwiin kukureira n takakaro ma ara utu n te bong ae tamaroa anne, ti a bootiia raora ni kabane n toka iaon te kaa n okira mwengara. Ngke ti tabe ni buti, I a matunako naba ao n reke te kabuanibwai. Imwiin tabeua te tai ni kamarurungaki, I taratara n katobibia te kaa. Kainnabau, Maxine, e bon ikoaki kakaiaki rangana ao e korakai ni ikeike. E mwaoto riin bwabwaana. Natira aine ake teniman a mimii ni maaku ma I karabwarabwa bwa a taraa n raoiroi. Iai tabeua ikoakiu aika uarereke. Ma natira te mwaane ae nimaua ana namwakaina e aki kakarongoaa.
Ribuakon te rawawata ma te bua n iango, natira te aine ae ikawai, Kate 11-ana ririki-ni maiu, e kawaekoa n tuangai, “Tamau, ko riai n angan Jarom te kakabwaia.” Imwiin teutana te korakai, ngai ma natiu aine a reke otinakora man te kaa. E aaki kona ni mwaing Maxine. I karaurau n tabeka Jarom; imwiina inanon weneu iaon tano, I a karaua ni katoka iaon bwabwaau ao n anganna te kakabwaia. N te tai are e a roko iai te amburanti 40 te miniti imwiina, e a uti Jarom.
Te tairiki anne, I katukuia teniman kain au utu n te onaoraki ao ni katawe n toka n te taekitii nakon te auti ma natiu aine uoman. Inanon te tairaki ae abwaabwaki anne, I butia Tamau are I karawa bwa e na kamarurungia au utu ma kain te kaa are teuana. N ana nanoanga, ao e bane ni kaekai au tataro ake I anga nakoina. A kamaiuaki ni kabane inanon taina, te kakabwaia ae korakora ao te nanoanga ae bati.
Ma e teimatoa ni mena inanou namakinan te kairua ibukin moan karekean te kangaanga aio. E kona n aki reke matu n te bong ao n iaiangoa te bwai ae e a tia n riki. I korakai inanon ririki ni kabwara au bure ao i kakaea te rau. Rimwi, n aron ae kaain te nakoanibonga ngai, inanon au tai n reireinia tabemwaang te rairannano ao ni buokiia bwa ana namakina te tangira, te nanoanga, ao Ana tangira te tia Kamaiu, I kunea bwa ngaia I bon kona naba n kamaiuai.
Ana Kamaiu Te tia Kamaiu ao mwaakana ni kabooira e kona ni manena nakon kaairua aika karina, ara rinerine aika mamara, kakaewenako, ao kataaki n aekaia nako—n ikotaki naba ma ara bure. Ngkai I tan nakoina, namakinan te kairua a bon bitaki ao n oneaki mwiina n te rau ao te mweraoi.
E taku Beretitenti Russell M. Nelson: “Ngke e mate te Tia Kamaiu ibukin buren te aonaaba, E kauka te kawai nakoia taan Iriiria bwa a na karekea Ana kamaiu, korakorana, ao mwaakana ni kabooira. Bwaintangira n te tamnei aikai a kona n reke irouia naake a ongo Irouna ao n Iriria.”14
Tariu ao Mwaneu, e ngae ngke ko uouota te rawawata ibukin am bure aika tuai kabwaraaki, te korakai ibukin te bure ae e karaoaki nakoim ngkoa, ke ni korakai ibukin kabwarakin am bure bon iroum man karaoan te bure ae karina, iai iroum te kona ni kamaiuaki ao mwaakan te kabooaki iroun te Tia Kamaiu Iesu Kristo.
I kakoaua bwa E maiu. Bon ara Tia Kamaiu ao te Tia Kabooira. E tangiriira. Iai Ana nanoanga ibukira, E kaonaki n te nanoanga. N aran Iesu Kristo, amen.